گلا کٹ جائے آواز پھر بھی عمران خان کی ہی آئے گی،عمرایوب

ویب ڈیسک: قومی اسمبلی میں اپوزیشن لیڈر اور پی ٹی آئی رہنما عمر ایوب نے کہا ہے کہ گلا کٹ جائے آواز پھر بھی بانی پی ٹی آئی عمران خان کی ہی آئے گی۔

تفصیلا ت کے مطابق اسلام آباد کی انسداد دہشت گردی عدالت میں پی ٹی آئی رہنماؤں کے خلاف جوڈیشل کمپلیکس توڑ پھوڑ کے کیس میں ضمانت قبل از گرفتاری کی درخواستوں پر سماعت جج طاہر عباس سِپرا نے کی۔

پی ٹی آئی رہنما عمر ایوب، عمر سلطان، عامر مغل، فیصل جاوید، شبلی فراز اور علی نواز اعوان عدالت میں پیش ہوئے۔

دوران سماعت جج طاہر عباس سپرا نے استفسار کیا کہ علی امین گنڈاپور کہاں ہیں؟۔

وکیل انتظار پنجوتھہ نے کہا کہ علی امین کے آج کافی کیس ہیں،کسی دوسری عدالت میں موجود ہیں،اس مقدمے میں کافی لوگوں کی ضمانت ہو چکی ہے، آج ہم اس پر دلائل دینا چاہتے ہیں۔

جج طاہر عباس سِپرا نے ریمارکس دیئے کہ علی امین گنڈاپور خود آئے نہ ان کا وکیل آیا ہے، ضمانت خارج کرنے کا اصول سب کے لیے ایک ہے۔

پی ٹی آئی وکیل نے کہا کہ ہم سب علی امین کی نمائندگی کر رہے ہیں،سب ان کے معاون وکلاء ہیں۔

عمر ایوب نے کہا کہ بابر اعوان بیمار ہیں میری طرف سے وہی دلائل دیں گے۔

جج طاہر عباس سِپرا نے ریمارکس دیئے کہ بابر اعوان سے زیادہ مجھے عمر ایوب آپ کی طبیعت خراب لگ رہی ہے۔

عمر ایوب نے کہا کہ گلا کٹ جائے آواز پھر بھی بانی پی ٹی آئی عمران خان کی آئے گی۔

انسداد دہشت گردی عدالت نے پی ٹی آئی رہنماؤں کی درخواست ضمانتوں پر سماعت 6 مئی تک ملتوی کر دی۔

عمرایوب کی جوڈیشل کمپلیکس میں میڈیا سے گفتگو

جوڈیشل کمپلیکس میں میڈیا سے گفتگو  کرتے ہوئے عمر ایوب نے کہا کہ آج ہمارے کیسز میں اگلی تاریخ ہوئی ہے، پورے پاکستان میں ہم سب پر بے بنیاد مقدمات بنائے گئے ہیں یہ وہی جوڈیشل کمپلیکس ہے جہاں بانی پی ٹی آئی عمران خان آنا چاہتے تھے لیکن یہاں پورا واویلا کیا گیا۔

انہوں نے کہا کہ یہاں آنے سے بانی پی ٹی آئی عمران خان کو روکاگیا یہ سوچی سمجھی سازش کی گئی تھی،سی سی ٹی وی فوٹیج غائب کر دی گئی وہ سامنے آجائے تو دودھ کا دودھ اور پانی کا پانی ہو جائے گا۔