ویب ڈیسک: اسلام آباد ہائیکورٹ نے ایف آئی اے، پیمرا اور پی ٹی اے کی متفرق درخواستیں 5,5 لاکھ روپےجرمانے کے ساتھ خارج کرتے ہوئےتوہین عدالت کی کارروائی کا عندیہ دے دیا۔
تفصیلات کے مطابق آڈیو لیکس سے متعلق اسلام آباد ہائیکورٹ میں 2 درخواستیں یکجا کر کے سماعت ہوئی۔بشریٰ بی بی اور سابق چیف جسٹس کے بیٹے نجم الثاقب کی درخواستوں پر اسلام آباد ہائیکورٹ کے جسٹس بابر ستار نے سماعت کی۔
عدالت نے پیمرا، پی ٹی اے، آئی بی اور ایف آئی اے کی متفرق درخواستوں پر بھی سماعت کی۔
عدالت نے درخواست دائر کرنے پر ایف آئی اے پر 5 لاکھ روپے جرمانہ عائد کر دیا۔
جسٹس بابر ستار نے ریمارکس دیئے کہ ڈی جی ایف آئی اے کے خلاف توہین عدالت کی کارروائی بھی شروع ہو سکتی ہے۔
اسلام آباد ہائی کورٹ نے انٹیلیجنس بیورو کے جوائنٹ ڈائریکٹر جنرل کو ذاتی حیثیت میں طلب کر لیا۔
جسٹس بابر ستار نے ریمارکس دیئے کہ انٹیلیجنس بیورو کی متفرق درخواست کس کی منظوری سے دائر ہوئی ہے؟
ایڈیشنل اٹارنی جنرل نے کہا کہ جوائنٹ ڈائریکٹر جنرل انٹیلیجنس بیورو نے منظوری دی ہے۔
جسٹس بابر ستار نے سوال کیا کہ اُن کا کوئی نام ہو گا،والدین نے کوئی نام رکھا ہو گا۔
ایڈیشنل اٹارنی جنرل نے جواب دیا کہ طارق محمود نام ہے۔
جسٹس بابر ستار نے ریمارکس دیئے کہ آئندہ سماعت پر وہ خود پیش ہوں۔متفرق درخواستیں دائر ہوئی ہیں پہلے یہ سن لیتے ہیں،پہلے تو متفرق درخواستیں طے ہوں گی، کس نے درخواستیں فائل کی ہیں؟ ان کا فیصلہ کرنا ہے۔
اٹارنی جنرل عثمان منصور اعوان نے کہا کہ آئی بی، ایف آئی اے اور پی ٹی اے نے یہ درخواستیں دائر کی ہیں۔
جسٹس بابر ستار نے ریمارکس دیئے کہ جو درخواستیں آئی ہیں ان کو سن کر فیصلہ کروں گا،آئی بی، ایف آئی اے، پی ٹی اے سیریس ادارےہیں ان کی درخواستیں سن کر فیصلہ کیا جائے گا، انہوں نے درخواستیں دائر کیں اب میں انہیں سنوں گا، کس نے ان کو درخواستیں دائر کرنے کی اتھارٹی دی ہے؟
ایڈیشنل اٹارنی جنرل منور اقبال دوگل نے کہا کہ ڈی جی ایف آئی اے نے اسسٹنٹ ڈائریکٹر کو اتھارٹی دی۔
جسٹس بابر ستار نے ریمار کس دیئے کہ درخواست کا متعلقہ حصہ پڑھیں جہاں مجھ پر اعتراض کیا گیا ہے۔
ایڈیشنل اٹارنی جنرل نے کہا کہ ایف آئی اے نے کیس دوسری عدالت منتقل کرنے کی استدعا کی ہے،اعتراض ہے ہائیکورٹ کے 6 ججز نے سپریم جوڈیشل کونسل کو خط لکھا ہے، جسٹس بابر ستار سمیت 6 ججز نے انٹیلیجنس ایجنسیز کی عدلیہ میں مداخلت کا خط لکھا۔
جسٹس بابر ستار نے سوال کیا کہ ایف آئی اے کا آئی ایس آئی سے کیا تعلق ہے؟ کیا وہ آئی ایس آئی کی پراکسی ہے؟ آئی ایس آئی کے معاملے سے ایف آئی اے کا کیا تعلق ہے؟ یہ خط ایف آئی اے سے کس طرح متعلقہ ہے؟
عدالت نے ایڈیشنل اٹارنی جنرل منور اقبال دوگل کو خط کا متعلقہ حصہ پڑھنے کی ہدایت کی۔
جسٹس بابر ستار نے ریمارکس دیئے کہ جسٹس شوکت صدیقی کے جو الزامات ہیں اس عدالت کے ججز ان کو سپورٹ کررہے ہیں،اس عدالت کے ججز نے کہا وہ جسٹس شوکت صدیقی کے الزامات کی تحقیقات کرنے کو سپورٹ کرتے ہیں، آپ نے خط کا جو حصہ پڑھا یہ آئی ایس آئی سےمتعلق ہے ایف آئی اے سے متعلق نہیں؟
ایڈیشنل اٹارنی جنرل منور اقبال دوگل نے کہا کہ جی بالکل ایسا ہی ہے۔
جسٹس بابر ستار نے اٹارنی جنرل سے استفسار کیا کہ کیا ایف آئی اے انٹیلیجنس ایجنسی ہے؟
ایڈیشنل اٹارنی جنرل منور اقبال دوگل نے بتایا کہ ایف آئی اے انٹیلیجنس ایجنسی نہیں ہے۔
جسٹس بابر ستار نے استفسار کیا کہ کیا ہائیکورٹ کے ججز کو بلیک میل کرنے سے ایف آئی اے کا کوئی تعلق ہے؟
ایڈیشنل اٹارنی جنرل نے کہا کہ ایسا تو نہیں ہے لیکن خط میں لفظ انٹیلیجنس ایجنسیز استعمال کیا گیا ہے۔
جسٹس بابر ستار نے استفسار کیا کہ کیا ایف آئی اے کا ججز کے گھروں میں خفیہ کیمرے لگانے سے کوئی تعلق ہے؟
ایڈیشنل اٹارنی جنرل نے کہا کہ نہیں ان کا تعلق تو نہیں ہے، ایک پٹیشن میں ایجنسیز کے کردار سے متعلق بات کی گئی ہے اس لئے میں کہہ رہا ہوں۔
جسٹس بابر ستار نے استفسار کیا کہ اگر ایگزیکٹو ججز کو بلیک میل کرے؟ تو کیا ججز کا مفادات کا ٹکراؤ ہو جائے گا؟ مفادات کے ٹکراؤ کی کیا آپ اس طرح تعریف کریں گے؟
جسٹس بابرستار نے ایڈیشنل اٹارنی جنرل منور اقبال دوگل سے مکالمہ کرتے ہوئے کہا کہ کیس دوسری عدالت منتقل کرنے کی متفرق درخواستیں دائر کرنے کا مقصد عدالتی کارروائی کو شرمندہ کرنا ہے، ہم اور آپ ایک ہی دنیا میں رہتے ہیں بالکل سمجھ رہے ہیں، اگر ایگزیکٹو ججز کو دھمکائے اور ججز توہین عدالت کی کارروائی شروع کریں تو وہ مفاد کا ٹکراؤ کیسے ہے؟ کیا جج ذاتی مفاد کے لیے توہینِ عدالت کی کارروائی کرے گا؟ کیا عدالت آئی بی اور ایف آئی اے کے سارے کیس سننا چھوڑ دے؟ آپکی دلیل مان لی جائے تو پھر تو حکومت کے خلاف کوئی کیس ہی نہیں سننا چاہیے۔
سابق ایڈووکیٹ جنرل اسلام آباد جہانگیر خان جدون نے روسٹرم پر آ کر کہا کہ میں اس کیس میں وکیل نہیں لیکن کچھ کہنا چاہتا ہوں، فضول اور غیرسنجیدہ درخواستیں دائر کرنے پر ان سب کی جیبوں سے جرمانہ لیا جائے،قومی خزانے سے یہ رقم ادا نہیں کی جانی چاہیے، یہ سلسلہ اب بند ہونا چاہیے۔
آڈیو لیکس کیس میں عدالتی معاون بیرسٹر اعتزاز احسن نے کہا کہ مجھےخوشی ہے اب ججز کہہ رہے ہیں enough is enough۔
عدالتی معاون بیرسٹر اعتزاز احسن نے دوران دلائل ایگری کلچر ڈیپارٹمنٹ کا نام لیا۔
جسٹس بابر ستار نے استفسار کیا کہ آپ کس کی بات کر رہے ہیں، یہاں بہت سارے ایگری کلچرڈ یپارٹمنٹس ہیں؟
بیرسٹر اعتزاز احسن نے کہا کہ میں پنجاب ایگری کلچر ڈیپارٹمنٹ کی بات کر رہا ہوں۔
عدالتی معاون اعتزاز احسن نے کہا کہ ایسا لگتا ہے عدلیہ نے اسٹینڈ لینے کا فیصلہ کرلیا ہے، عدلیہ کو الیکشن 90 دن کے اندر نہ ہونے پر اسٹینڈ لینا چاہیےتھا، اب بھی وقت ہے کہ ہم کھڑے ہو جائیں اور اپنا ہاؤس اِن آرڈر کریں، میں پارلیمان کی سُپر میسی جبکہ آئین کی سُپرمیسی پر یقین رکھتا ہوں، عدالت کا کام جائز یا ناجائز قرار دینا ہے اور اس آرڈر پر عمل ہو گا۔
اعتزاز احسن نے سپریم کورٹ میں جاری فوجی عدالتوں میں سویلینز کے ٹرائل کے خلاف کیس کا حوالہ دیا۔
جسٹس بابر ستار نے ریمارکس دیئے کہ آپ اُس کیس کا ریفرنس یہاں نہ دیں، کوئی اور ریفرنس آپ کے پاس ہے تو وہ دے دیں۔
بعد ازاں عدالت نے ایف آئی اے، پی ٹی اے اور پیمرا پر پانچ پانچ لاکھ روپے جرمانہ عائد کردیا جبکہ تمام اداروں کی اتھارٹیز کیخلاف توہین کی کارروائی کا بھی عندیہ دیدیا۔