(ویب ڈیسک ) یوٹیوب میں رواں سال کے دوران آرٹی فیشل انٹیلی جنس (اے آئی) ٹیکنالوجی پر مبنی متعدد فیچرز متعارف کرائے جائیں گے۔
یوٹیوب کے چیف ایگزیکٹو(سی او) نیل موہن نے اپنے سالانہ خط میں بتایا کہ 2025 میں اے آئی ٹیکنالوجی کمپنی کی 4 بڑی ترجیحات میں سے ایک ہے۔
انہوں نے کہا کہ کمپنی کی جانب سے کریٹیرز کیلئے اے آئی ٹولز پر بھاری سرمایہ کاری کی جارہی ہے، جیسے صارفین کو ویڈیوز کے مواد کا آئیڈیا دینے، اچھے تھمب نیلز کے انتخاب میں مدد فراہم کرنے اور زبانوں کا ترجمہ کرنے والے جیسے اے آئی ٹولز متعارف کرائے جائیں گے۔
زبانوں کا ترجمہ کرنے والا فیچر صرف ان صارفین کو دستیاب ہوگا جو یوٹیوب پارٹنر پروگرام کا حصہ ہیں اور اسے فروری میں ہی کسی وقت متعارف کرادیا جائے گا۔
یوٹیوب کے مطابق ایک اور اے آئی فیچر پر بھی کام کیا جا رہا ہے جو صارفین کی عمروں کی شناخت کرکے اس کے مطابق مناسب مواد کی سفارشات کرے گا۔
کمپنی کا کہنا ہے کہ مختلف اے آئی ٹولز کریٹیرز کو نئے ناظرین تک رسائی میں مدد فراہم کریں گے جن میں آٹو ڈبنگ قابل ذکر ہے، جس کے ذریعے صارفین اپنی ویڈیوز کا مختلف زبانوں میں ترجمہ کرسکتے ہیں۔
اس کے علاوہ کمپنی کی جانب سے ایسے ٹولز پر کام کیا جا رہا ہے جو یہ دیکھنے اور کنٹرول کرنے کا کام کریں گے کہ یوٹیوب پر اے آئی کو کیسے استعمال کیا جا رہا ہے۔