(ویب ڈیسک) پاکستان اور سری لنکا کے درمیان کھیلا جانے والا دو میچوں کی سیریز کا پہلا ٹیسٹ میچ سنسنی خیز مقابلے کے بعد ڈرا ہو گیا، تاہم میچ کے آخری روز مڈل آرڈر بلے باز سعود شکیل ایک بار پھر انتہائی بدقسمتی سے نروس نائنٹیز کا شکار ہو کر محض تین رنز کی کمی سے اپنی سنچری مکمل نہ کر سکے۔
پاکستان نے میچ کے آخری روز اپنی دوسری اننگز کا آغاز ایک وکٹ کے نقصان پر 57 رنز سے کیا، تاہم دن کے آغاز میں ہی قومی ٹیم کو ڈرامائی جھٹکوں کا سامنا کرنا پڑا۔
گزشتہ روز کے ناٹ آؤٹ بلے باز اذان اویس (22 رنز) پہلے ہی اوور میں بغیر کسی رن کا اضافہ کیے پویلین لوٹ گئے، جبکہ اگلے ہی اوور میں محمد طحٰہ (24 رنز) بھی اپنا اسکور آگے بڑھائے بغیر آؤٹ ہو گئے۔
کپتان بابر اعظم 34 اور سلمان علی آغا 13 رنز بنا کر آؤٹ ہوئے، جس کے بعد پہلی اننگز میں 93 رنز بنانے والے سعود شکیل نے ذمہ دارانہ بیٹنگ کرتے ہوئے ٹیم کو سنبھالا دیا، مگر وہ دوسری اننگز میں بھی نروس نائنٹیز کا شکار ہو کر 97 رنز پر ہمت ہار بیٹھے۔
پاکستان نے دن کے اختتام تک 8 وکٹوں کے نقصان پر 284 رنز بنائے اور یوں میچ ڈرا ہو گیا۔ سری لنکا کی جانب سے ملان رتنائیکے نے عمدہ بولنگ کرتے ہوئے 3 وکٹیں حاصل کیں۔
اس سے قبل پاکستان نے ٹیسٹ کے دوسرے روز اپنی پہلی اننگز 434 رنز 9 کھلاڑی آؤٹ پر ڈیکلیئر کر دی تھی، جس میں سعود شکیل 93، ڈیبیو کرنے والے طیب عارف 57، عرفات منہاس 52، محمد طحٰہ 51، بابر اعظم 50 اور غازی غوری 48 رنز کے ساتھ نمایاں رہے تھے۔
جواب میں سری لنکن ٹیم نے اپنی پہلی اننگز میں 446 رنز بنا کر 12 رنز کی معمولی برتری حاصل کی تھی۔
خیال رہے کہ سیریز کا دوسرا اور فیصلہ کن ٹیسٹ میچ 17 نومبر سے راولپنڈی کرکٹ اسٹیڈیم میں ہی کھیلا جائے گا۔