مارک زکر برگ کا انسٹا گرام نوٹس اسٹیٹس ٹول میں نئے فیچر کا اعلان

انسٹاگرام کی جانب سے نوٹس اسٹیٹس ٹول میں ایک نئے میوزک شیئرنگ فیچر کا اضافہ کر دیا گیا ہے۔ اس نئے فیچر کا اعلان میٹا کے چیف ایگزیکٹو آفیسر (سی ای او) مارک زکربرگ نے اپنے انسٹاگرام اکاؤنٹ کے براڈ کاسٹ چینل کیا۔ جہاں انہوں نے بتایا کہ بہت جلد صارفین کسی گانے کا 30 سیکنڈ کا کلپ براہ راست نوٹس میں پوسٹ کر سکیں گے۔ اس فیچر کو استعمال کرنے کیلئے صارفین کو نوٹ تحریر کرنے سے پہلے میوزک نوٹ آئیکون پر کلک کرنا ہوگا جس کے بعد اپنی پسند کے آڈیو کلپ کا انتخاب کرنا ہوگا،اس نئے فیچر میں گانے کے ساتھ صارفین مختصر کیپشن بھی تحریر کر سکتے ہیں ۔ اس کے علاوہ انسٹاگرام میں جلد ہی ٹرانسلیشن ٹول کا بھی اضافہ کیا جا رہا ہے۔اس ٹول کے ذریعے نوٹس کی تحریر کے نیچے ٹرانسلیشن کا آپشن نظر آئے گا جس پر کلک کرنے پر تحریر کا ترجمہ آپ کی پسند کی زبان میں ہو جائے گا۔ فی الحال یہ واضح نہیں ہے کہ یہ فیچر صارفین کو کب تک دستیاب ہوگا۔ یاد رہے کہ نوٹس کا فیچر گزشتہ سال دسمبر میں متعارف کرایا گیا تھا ۔