ویب ڈیسک: عالمی شہرت یافتہ گلوکار ایکون کے بنگلورو میں ہونے والا کنسرٹ ایک ناخوشگوار واقعے کا شکار ہو گیا، جہاں کچھ مداحوں نے پرفارمنس کے دوران ان کی پینٹ کھینچنے کی کوشش کی۔ یہ واقعہ اس وقت پیش آیا جب ایکون وی آئی پی سیکشن کے قریب آ کر مداحوں سے قریب تر رابطہ قائم کر رہے تھے۔
سوشل میڈیا پر وائرل ہونے والی ویڈیوز میں دیکھا جا سکتا ہے کہ ایکون مسلسل اپنا لباس درست کرنے کی کوشش کرتے رہے اور اس دوران وہ واضح طور پر بےآرام محسوس کر رہے تھے۔ ناخوشگوار صورتحال کے باوجود انہوں نے پرفارمنس جاری رکھی اور ماحول کو معمول پر لانے کی کوشش کی۔
ویڈیوز وائرل ہونے کے بعد سوشل میڈیا صارفین نے اس نامناسب رویے پر سخت تنقید کی۔ کئی صارفین کا کہنا تھا کہ چند افراد کی بدتمیزی نے پورے کنسرٹ کی فضا خراب کر دی اور ایکون کی پرفارمنس متاثر ہوئی۔
بھارتی مداحوں نے بھی اس واقعے پر افسوس کا اظہار کیا اور کہا کہ ایسی حرکات نہ صرف فنکار کی توہین ہیں بلکہ ملک کی نمائندگی پر بھی منفی اثر ڈالتی ہیں۔ ابھی تک ایکون یا ان کی ٹیم کی جانب سے اس واقعے پر کوئی باضابطہ بیان جاری نہیں کیا گیا، تاہم ایکون نے اپنا بھارت ٹور بغیر کسی تبدیلی کے جاری رکھا ہے۔ وہ 16 نومبر کو ممبئی میں بھی پرفارم کر چکے ہیں اور ان کے آنے والے کنسرٹس شیڈول کے مطابق ہونے کی توقع ہے۔
ایکون کی بھارت میں مقبولیت کا دائرہ ان کی موسیقی سے کہیں آگے تک پھیلا ہوا ہے، خصوصاً بالی وڈ کے مقبول گانے "چھمک چھلو" نے انہیں بھارتی مداحوں کے دلوں میں خاص مقام دیا۔ اب دیکھنا یہ ہے کہ اس واقعے کے بعد آئندہ کنسرٹس میں سیکیورٹی انتظامات کو مزید مضبوط کیا جاتا ہے یا نہیں۔