ویب ڈیسک: ترکیہ کی معروف فیشن انفلوئنسر عائشہ گل ایراسلان کی اچانک اور پراسرار موت نے سوشل میڈیا اور مداحوں کو شدید صدمے میں مبتلا کر دیا ہے۔
27 سالہ عائشہ گل کو استنبول کے علاقے کاغیتھانے میں واقع ان کی رہائش گاہ پر بے ہوشی کی حالت میں پایا گیا۔ اہلخانہ کے مطابق جب ان سے رابطہ ممکن نہ ہو سکا تو انہوں نے حکام کو اطلاع دی، جس پر ریسکیو ٹیمیں موقع پر پہنچیں اور ابتدائی معائنے کے بعد ان کی موت کی تصدیق کر دی گئی۔
بعد ازاں پولیس اور پراسیکیوٹر نے جائے وقوعہ کا تفصیلی معائنہ کیا جبکہ لاش کو مزید فرانزک جانچ کے لیے منتقل کر دیا گیا تاکہ موت کی اصل وجہ کا تعین کیا جا سکے۔
ابتدائی اطلاعات کے مطابق عائشہ گل حال ہی میں بیرونِ ملک سفر سے واپس آئی تھیں۔ تحقیقات کے دوران عمارت کی سکیورٹی فوٹیج کا بھی جائزہ لیا گیا جس میں ایک شخص، سونائے کُرتولوش کو ان کے گھر میں داخل ہوتے اور کچھ دیر بعد باہر نکلتے دیکھا گیا۔
پولیس نے مذکورہ شخص سے پوچھ گچھ کی تاہم بیان ریکارڈ کرنے کے بعد اسے رہا کر دیا گیا، جبکہ اس کے وکلا کا مؤقف ہے کہ وہ واقعے کے وقت موقع پر موجود نہیں تھا۔
حکام نے تاحال کسی بدفعلی کی تصدیق نہیں کی، تاہم واقعے کو مشکوک قرار دیتے ہوئے تحقیقات جاری رکھی گئی ہیں۔ فرانزک رپورٹ کے بعد ہی موت کی اصل وجوہات سامنے آ سکیں گی۔
عائشہ گل ایراسلان سوشل میڈیا پر ایک مقبول فیشن انفلوئنسر کے طور پر جانی جاتی تھیں اور ان کے لاکھوں مداح تھے، جبکہ وہ ترک فیشن شوز میں بھی شرکت کر چکی تھیں جس سے ان کی شہرت میں مزید اضافہ ہوا تھا۔