ویب ڈیسک: بھارتی کسان مودی سرکار کی ناقص پالیسیوں اور جھوٹے وعدوں کے باعث خوار ہو گئے ہیں۔ 133 دن گزرنے کے بعد بھی بھارتی کسانوں کا احتجاج تاحال جاری ہے۔
تفصیلات کے مطابق مودی کے بھارت میں اپنے حق کے لئے آواز اٹھانے والے کسانوں پر زمین تنگ ہو گئی ہے۔ کسانوں کے جائز مطالبات پورے کرنے کی بجائے مودی سرکار الٹا کسانوں کو ہی مجرم ثابت کرنے پر تل گئی۔ مودی سرکار کسانوں کو ان کے جائز حقوق دینے میں بری طرح ناکام ہو گئی ہے اور کسانوں کو مجبورا احتجاج کرنا پڑا۔
خیال رہے کہ کسانوں کے احتجاج کو چار ماہ سے زائد کا عرصہ گزر چکا تاحال وہ اپنے جائز مطالبات منوانے میں ناکام ہیں۔
ملکی معیشت میں ریڑھ کی ہڈی کی حیثیت رکھنے والے کسانوں کو مودی سرکار نے یکسر نظر انداز کر دیا ہے، رواں سال فروری میں دہلی چلو پرامن کسان مارچ پر بھارتی پولیس نے نہتے کسانوں پر آنسو گیس کی شیلنگ اور ربڑ کی گولیاں چلائیں جس کے نتیجے میں سینکڑوں زخمی اور کئی ہلاک بھی ہوئے تھے۔
سخت موسم میں بھی کسان اپنے جائز مطالبات کیلئے تاحال سراپا احتجاج ہیں۔ عوام کو متنفر کرنے کیلئے مودی سرکار کا گودی میڈیا بھی کسانوں کو دہشتگردوں سے تشبیہ دینے لگا ہے۔ دی وائر سے گفتگو کرتے ہوئے کسان یونین کے سربراہ نے کہا کہ انہیں مودی سرکارکو کم سے کم سپورٹ قیمت کے اعلان پر کوئی اعتماد نہیں ہے۔ کسان یونین کے سربراہ نے بھارتی کسانوں کی مشکلات کے بارے میں بھی مکمل آگاہی دی ہے۔
سربراہ کسان یونین کا کہنا ہے کہ کسان اپنی یہ جنگ تنہا لڑ رہے ہیں، عوام کی جانب سے جب یہ کہا جاتا ہے کہ احتجاج سے انہیں پریشانی ہوتی ہے تو ہمیں دکھ ہوتا ہے، ہمارا مقصد عام عوام کی مدد کرنا ہے، ہم اگر یہ جنگ جیتے تو اس کا فائدہ نہ صرف ہمیں بلکہ عوام کو بھی پہنچے گا، مودی کا سب سے بڑا مسئلہ یہ ہے کہ وہ خودپسند شخص ہے اور خود کو سپر ہیرو سمجھتا ہے جبکہ حقیقت اس کے برعکس ہے۔
سربراہ کسان یونین کا مزید کہنا تھا کہ بھارت میں سچ بولنے والے صحافیوں کیخلاف کریک ڈاؤن کرنے والی سرکار زیادہ دیر اقتدار پر قابض نہیں رہ سکتی ہے۔ ایم ایس پی کے قانون کا نفاذ صرف کسانوں کی نہیں بلکہ عوام کی فتح ہو گی جس سے ذخیرہ اندوزوں کو دھچکا لگے گا، کسان اپنے حقوق کے تحفظ اور انصاف کے حصول کیلئے جدوجہد جاری رکھیں گے اور وہ دن دور نہیں جب مودی کے ظالمانہ اقتدار کا خاتمہ ہوگا۔