ویب ڈیسک: پنجاب کے مختلف شہروں میں قومی انسداد پولیو مہم کا آغاز 3 فروری سے ہو گا۔ لاہور، راولپنڈی، فیصل آباد میں مہم 9 فروری جبکہ دیگر اضلاع میں 7 فروری تک جاری رہے گی۔
تفصیلات کے مطابق مہم کے دوران پنجاب میں 2 کروڑ 33 لاکھ بچوں کو پولیو سے بچاؤ کے قطرے پلانے کا ہدف مقرر کیا گیا ہے۔
انسداد پولیو مہم کے سلسلے میں انتظامات کا جائزہ لینے کیلئے چیف سیکرٹری پنجاب زاہد اختر زمان کی زیر صدارت اجلاس سول سیکرٹریٹ میں منعقد ہوا جس میں متعلقہ محکموں کے حکام اور پولیو کے خاتمے کیلئے کام کرنے والے بین الاقوامی اداروں کے نمائندوں نے شرکت کی۔تمام ڈویژنل کمشنرز اور ڈپٹی کمشنرز ویڈیو لنک کے ذریعے شریک ہوئے۔
اجلاس میں فیصلہ کیا گیا کہ سکولوں میں امتحانات کے پیش نظر انسداد پولیو مہم میں محکمہ تعلیم سے کم سے کم عملہ کی خدمات لی جائیں گی۔
چیف سیکرٹری نے ہدایت کی کہ انسدادپولیو مہم کو موثر اور کامیاب بنا یا جائے۔ انہوں نے کہا کہ ماحولیاتی نمونوں میں پولیو وائرس کی موجودگی تک خطرہ برقرار ہے، ڈپٹی کمشنرز انسداد پولیو مہم کی خودنگرانی کریں۔
انہوں نے کہا کہ پولیو کے خاتمے کی کوششوں میں مطلوبہ نتائج حاصل کرنے کیلئے جدید ٹیکنالوجی کو بروئے کار لایا جائے، ڈیجیٹائزیشن کے ذریعے مائیکرو پلانز کو بہتر بنایا جا سکتا ہے۔
چیف سیکرٹری نے ڈپٹی کمشنرز کو ہدایت کی کہ ٹرانزٹ پوائنٹس پر ویکسیئن کے قطرے پلانے کیلئے خصوصی اقدامات کئے جائیں۔ سیکرٹری پرائمری ہیلتھ نادیہ ثاقب نے اجلاس کو تفصیلی بریفنگ دی۔
انہوں نے بتایا کہ تین فروری سے شروع ہونے والی انسداد پولیو مہم کیلئے تمام انتظامات مکمل کر لئے گئے ہیں، مہم کیلئے 2654 ٹرانزٹ، 4888 فکسڈ، 85 ہزار موبائل ٹیمیں تشکیل دی گئی ہیں۔