ویب ڈیسک: امریکی حکومت نے ایران کے جوہری پروگرام سے متعلق خفیہ معلومات فراہم کرنے والوں کے لیے 2 کروڑ ڈالر تک انعام اور محفوظ مقام پر منتقلی کی پیشکش کردی۔
امریکی سینٹرل کمانڈ (سینٹ کام) کے مطابق یہ پیشکش محکمہ خارجہ کے پروگرام ’ریوارڈز فار جسٹس‘ کے تحت کی گئی ہے، جس کا مقصد امریکی قومی سلامتی سے متعلق اہم معلومات حاصل کرنا ہے۔
امریکی محکمہ خارجہ کا کہنا ہے کہ ایران کی جانب سے بین الاقوامی جوہری توانائی ایجنسی (آئی اے ای اے) کے حفاظتی معاہدوں پر عمل درآمد نہ کرنے کے باعث ایجنسی کو ایران میں سینٹری فیوجز کی تیاری اور ذخیرے سے متعلق معلومات تک رسائی میں مشکلات کا سامنا ہے۔
تاہم امریکی حکام نے واضح نہیں کیا کہ مکمل 2 کروڑ ڈالر انعام کے لیے کس نوعیت کی معلومات درکار ہوں گی۔
Rewards for Justice is offering a reward of up to $20 million and possible relocation for information about Iran’s nuclear program, including its facilities, equipment, and associated personnel, such as those in the scientific community, or the movement of any of the above. Submit a tip: https://t.co/A8uRQJSosj
— U.S. Central Command (@CENTCOM) November 7, 2026
دوسری جانب امریکی صدر ڈونلڈ ٹرمپ متعدد بار دعویٰ کر چکے ہیں کہ امریکی حملوں نے ایران کے جوہری پروگرام کو مؤثر طور پر تباہ کردیا ہے۔
ٹرمپ نے فلوریڈا میں گفتگو کرتے ہوئے کہا کہ اگر امریکا نے ایران کو نشانہ نہ بنایا ہوتا تو آج اسرائیل موجود نہ ہوتا۔ ان کا دعویٰ تھا کہ ایران کے پاس جوہری ہتھیار ہوتے تو وہ انہیں استعمال کرکے پورے مشرق وسطیٰ کو تباہ کرسکتا تھا۔