ویب ڈیسک : ٹاٹا گروپ نے رتن ٹاٹا کے نئے جانشین کا انتخاب کیا ہے۔ جمعہ کو ٹاٹا ٹرسٹ کی میٹنگ میں ان کے سوتیلے بھائی نوئل ٹاٹا کو متفقہ طور پر ٹاٹا ٹرسٹ کا نیا چیئرمین منتخب کیا گیا۔ رتن ٹاٹا کے والد نیول ٹاٹا نے دو شادیاں کی تھیں۔ نیول ٹاٹا کی دوسری شادی سائمن ٹاٹا سے ہوئی۔ نوئل ٹاٹا ،نیول ٹاٹا اور سائمن ٹاٹا کے بیٹے ہیں۔
نوئل ٹاٹاکو ٹاٹا ٹرسٹ کا نیا چیئرمین بنایا گیا ہے۔مرحوم رتن ٹاٹا کے انتقال کے بعد یہ ذمہ داری نوئل ٹاٹا کو سونپی گئی ہے۔ رتن ٹاٹا کو 1991 میں جب ٹاٹا گروپ کی ذمہ داری سونپی گئی تو وہ ٹاٹا ٹرسٹ کے چیئرمین کے عہدے پر فائز تھے۔ لیکن اب ٹاٹا ٹرسٹ نے متفقہ طور پر یہ کمان نوئل ٹاٹا کو سونپ دی ہے۔ نوئل ٹاٹا ، رتن ٹاٹا کے سوتیلے بھائی ہیں جو گزشتہ 40 سالوں سے ٹاٹا گروپ سے منسلک ہیں۔
نوئل ٹاٹاپہلے ہی ٹاٹا ٹرسٹ سے وابستہ ہیں۔ نوئل ٹاٹا نے ٹاٹا ٹرسٹ کے کام کاج میں بہت فعال کردار ادا کیا ہے۔ اس وقت وہ سر رتن ٹاٹا ٹرسٹ اور سر دورابجی ٹاٹا ٹرسٹ کے ٹرسٹی ہیں جو ٹاٹا ٹرسٹ کے تحت آتا ہے۔ یہ ٹرسٹ نہ صرف ٹاٹا گروپ کی فلاحی سرگرمیوں کا انتظام کرتا ہے بلکہ ٹاٹا ٹرسٹ کی ٹاٹا سنز میں 66 فیصد حصہ داری بھی ہے جو کہ ٹاٹا گروپ کی پیرنٹ کمپنی ہے۔
نوئل ٹاٹا، ٹاٹا گروپ کی کئی کمپنیوں کے بورڈ میں شامل ہیں۔ وہ ٹاٹا گروپ کی خوردہ کمپنی ٹرینٹ، ٹاٹا انٹرنیشنل لمیٹڈ، ٹاٹا انویسٹمنٹ کارپوریشن کے چیئرمین اور ٹاٹا اسٹیل اور ٹائٹن کے وائس چیئرمین بھی ہیں۔ ٹرینٹ کی ان کے دور میں کامیابی کا ہر طرف چرچا ہے۔ ٹرینٹ کی مارکیٹ کیپ 2.93 لاکھ کروڑ روپے تک پہنچ گئی ہے۔ نوئل ٹاٹا اگست 2010 سے نومبر 2021 تک ٹاٹا انٹرنیشنل لمیٹڈ کے منیجنگ ڈائریکٹر تھے اور ان کے دور میں کمپنی کا کاروبار $500 ملین سے بڑھ کر $3 بلین ہو گیا۔
ٹاٹا گروپ نے نوئل ٹاٹا کے تین بچوں کو اپنی پانچ خیراتی تنظیموں کا سربراہ بنایا تھا۔ نوئل ٹاٹا کے بچوں کے نام لیہ، مایا اور نیویل ہیں۔ ان تینوں کو سر دورابجی ٹاٹا ٹرسٹ اور سر رتن ٹاٹا ٹرسٹ کے پانچ ٹرسٹوں کا ٹرسٹی بنایا گیا ہے۔ رتن ٹاٹا نے ان تمام عہدوں پر تقرری کے لیے ہری جھنڈی دے دی تھی۔یادرہے کہ یہ تینوں پہلے بھی ٹاٹا گروپ میں اہم عہدوں پر فائز رہ چکے ہیں۔
رتن ٹاٹا نے اپنا جانشین مقرر نہیں کیا تھا، ایسی صورت میں ان کے ٹرسٹیوں میں سے ایک چیئرمین کا انتخاب کیا جانا تھا۔ ٹاٹا گروپ کے دو اہم ٹرسٹ ہیں۔ سر دورابجی ٹاٹا ٹرسٹ اور سر رتن ٹاٹا ٹرسٹ۔ یہ دونوں ٹرسٹ مشترکہ طور پر ٹاٹا سنز میں تقریباً 52 فیصد حصص رکھتے ہیں، جو ٹاٹا گروپ کی بنیادی کمپنی ٹاٹا سنز کو چلاتی ہے۔ یہ گروپ ہوا بازی سے لے کر FMCC تک کے پورٹ فولیوز کو سنبھالتا ہے۔ دونوں ٹرسٹوں میں کل 13 ٹرسٹیز ہیں۔ یہ لوگ دونوں ٹرسٹوں کے امانت دار ہیں۔ ان میں سابق دفاعی سکریٹری وجے سنگھ، آٹوموبائل سیکٹر کے تجربہ کار وینو سری نواسن، رتن ٹاٹا کے سوتیلے بھائی اور ٹرسٹ کے چیئرمین نوئل ٹاٹا، تاجر مہلی مستری اور وکیل ڈیریوس کھمباٹا کے نام شامل ہیں۔