(ویب ڈیسک) خیبرپختونخوا کے محکمہ تعلیم نے صوبے بھر کے سرکاری اسکولوں میں زیرِ تعلیم کمسن بچوں کی تعلیمی استعداد اور پڑھنے کی مہارت کو بہتر بنانے کے لیے اہم فیصلہ کرتے ہوئے روزانہ ایک گھنٹہ 'ریڈنگ آور' (Reading Hour) لازمی قرار دے دیا ہے، اور اس حوالے سے باضابطہ نوٹیفکیشن بھی جاری کر دیا گیا ہے۔
روزانہ ایک گھنٹہ مطالعہ لازمی:
نوٹیفکیشن کے مطابق خیبرپختونخوا کے تمام سرکاری پرائمری اسکولوں میں روزانہ ایک گھنٹہ مطالعہ (ریڈنگ آور) کے لیے لازمی طور پر مختص ہوگا۔
اس فیصلے کا اطلاق نہ صرف علیحدہ پرائمری اسکولوں پر ہوگا بلکہ صوبے کے تمام مڈل، ہائی اور ہائیر سیکنڈری اسکولوں کے پرائمری سیکشنز میں بھی روزانہ ایک گھنٹہ مطالعہ کے لیے مختص کیا جائے گا۔
محکمہ تعلیم کے اعلامیے کے مطابق یہ اہم اقدام بنیادی طور پر پرائمری سطح کے بچوں کی پڑھنے کی مہارت (Reading Skills) کو بہتر بنانے اور ان میں مطالعے کا شوق پروان چڑھانے کے لیے اٹھایا گیا ہے۔
ریاضی کی ریمیڈیشن کلاسز کا بھی آغاز:
ریڈنگ آور کے ساتھ ساتھ محکمہ تعلیم نے پرائمری سطح کے طلباء کے لیے ہفتے میں کم از کم ایک پیریڈ میں ریاضی کی ریمیڈیشن (Math Remediation) بھی لازمی قرار دے دی ہے، تاکہ ریاضی کے مضمون میں کمزور طلباء کی خصوصی توجہ کے ساتھ رہنمائی کی جا سکے۔