ویب ڈیسک: ملک بھر میں موسم ایک بار پھر خشک ہوگیا جبکہ محکمہ موسمیات نے بارش کے ہونے یا نہ ہونے سے متعلق بھی پیش گوئی جاری کی ہے۔
تفصیلات کے مطابق محکمہ موسمیات کا کہناہے کہ لاہور سمیت پنجاب کے بیشتر اضلاع سے بارش برسانے والا سسٹم نکل گیا ہے، جس کے بعد سے موسم دوبارہ خشک ہونا شروع ہوگیا ہے۔
ملک کے میدانی علاقوں میں ہونے والی بارش اور پہاڑی علاقوں میں برف باری کے اثرات تاحال موجود ہیں۔ آج لاہور میں کم سے کم درجہ حرارت 9 ڈگری سینٹی گریڈ ریکارڈ کیا گیا اورزیادہ سےزیادہ ،23 ڈگری سینٹی گریڈ تک جانے کے امکانات ہیں۔
محکمہ موسمیات کے مطابق آج ہفتے کے روز ملک کے بیشتر علاقوں میں موسم سرد اور خشک رہنے کی توقع ہے۔ وفاقی دارالحکومت اسلام آباد اور گرد و نواح کے علاقوں میں موسم سرد اور خشک رہنے کا امکان ہے۔پنجاب میں آج ہفتے کے روز بیشتراضلاع میں موسم سرد اور خشک رہنے کا امکان ہے۔ مری، گلیات اور گردونوا ح میں موسم شدید سرد اور مطلع جزوی ابر آلود رہنے کی توقع ہے۔
موسم کا حال بتانے والوں کا کہناہے کہ سندھ میں آج بیشتر اضلاع میں موسم خشک رہنے کے علاوہ چند مقامات پر مطلع جزوی طور پر ابر آلود رہنے کی توقع ظاہر کی گئی ہے۔
محکمہ موسمیات کا کہناہے کہ خیبر پختونخوا میں آج ہفتے کے روز بیشتراضلاع میں موسم سرد اور خشک رہنے کے علاوہ بالائی اضلاع میں شدیدسرد رہنے کا امکان ہے جب کہ کشمیر اور گلگت بلتستان میں ہفتے کے روز موسم شدید سرد اور مطلع جزوی ابر آلود رہنے کا امکان ہے۔
اسی طرح بلوچستان میں بھی آج بیشتراضلاع میں موسم سرد اور خشک رہنے کا امکان ہے تاہم شمالی اضلاع میں شدید سردی رہنے کی توقع ہے جبکہ بالائی علاقوں میں برفباری کے بعد سردی کی لہر برقرار رہی، کئی علاقوں میں درجہ حرارت نقطہ انجماد سے بھی نیچے گر گیا، لہہ میں پارہ منفی 5، کالام منفی 4،مالم جبہ اور پارا چنار میں منفی 3 رہا۔قلات، راولا کوٹ اور مری میں منفی 2 ڈگری سینٹی گریڈ ریکارڈ کیا گیا۔