ویب ڈیسک: حکومت نے بجلی کے بلوں پر سبسڈی کی شفاف فراہمی اور غلط استعمال روکنے کیلئے نیا ‘کیو آر کوڈ سسٹم’ متعارف کرا دیا، جس کے تحت ماہانہ 200 یونٹ تک بجلی استعمال کرنے والے گھریلو صارفین کو ڈیجیٹل رجسٹریشن کے بعد ریلیف دیا جائے گا۔
پاور ڈویژن پاکستان کے مطابق وفاقی ‘کراس سبسڈی پروگرام 2026’ کے تحت بجلی کے بلوں پر خصوصی QR کوڈ پرنٹ کیے جائیں گے، تاکہ سبسڈی صرف مستحق افراد تک پہنچ سکے۔
حکام کا کہنا ہے کہ اس اقدام کا مقصد ایک ہی گھر میں متعدد میٹرز کے ذریعے بار بار سبسڈی حاصل کرنے کے رجحان کی روک تھام اور کم آمدنی والے طبقے کو براہِ راست ریلیف فراہم کرنا ہے۔
ماہانہ 200 یونٹ سے کم بجلی استعمال کرنے والے گھریلو صارفین
بے نظیر انکم سپورٹ پروگرام کے مستحقین
دیہاڑی دار اور کم آمدنی والے مزدور
رجسٹریشن کا طریقہ
صارفین کو اپنے بجلی کے بل پر موجود QR کوڈ اسکین کرنا ہوگا، جس کے بعد سرکاری پورٹل پر:
14 ہندسوں کا ریفرنس نمبر درج کرنا ہوگا
شناختی کارڈ کی تفصیلات فراہم کرنا ہوں گی
موبائل پر موصول ہونے والا OTP درج کرنے کے بعد رجسٹریشن مکمل ہو جائے گی
حکام نے ہدایت کی ہے کہ بجلی کے بل پر درج نام اور شناختی کارڈ کا نام ایک جیسا ہونا ضروری ہے۔
اسمارٹ فون نہ رکھنے والے افراد کیلئے ڈپٹی کمشنر دفاتر اور یونین کونسلز میں خصوصی سہولت مراکز بھی قائم کیے گئے ہیں، جبکہ QR کوڈ اسکین نہ ہونے کی صورت میں صارفین دستی طور پر بھی پورٹل پر رجسٹریشن کر سکیں گے۔