ویب ڈیسک: وزیراعظم سے پیپلز پارٹی کے وفد کی ملاقات کی اندرونی کہانی سامنے آگئی۔
تفصیلات کے مطابق ذرائع کا کہناہے کہ پیپلز پارٹی نے بجٹ میں عوام کو ریلیف دینے کےلیے اپنی تجاویز پیش کیں، وفد نے سرکاری ملازمین کی تنخواہوں اور پنشن میں 20 سے 25 فیصد اضافہ کا مطالبہ کیا۔
ذرائع وزیراعظم کا کہنا ہے کہ اپنے وسائل میں رہتے ہوئے تنخواہوں میں اضافہ کرینگے۔
ذرائع کے مطابق سندھ حکومت نے وفاق کے ترقیاتی منصوبوں کےلیے فنڈز کی فراہمی تیز کرنے کا بھی مطالبہ کیا،سندھ کے نئے ترقیاتی منصوبوں کی فہرست بھی وفاقی وزیر احسن اقبال کو پیش کی، وزیراعظم نے پیپلز پارٹی کی وفاقی کابینہ میں شمولیت کے حوالے سے اپنی خواہش کا اعادہ کیا۔
پیپلز پارٹی نے جواب دیا کہ اس بارے حتمی فیصلہ صدر آصف زرداری اور بلاول بھٹو زرداری کرینگے۔
ذرائع کا کہنا ہے کہ پیپلز پارٹی نے بجٹ کی منظوری میں حکومت کو مکمل تعاون کی یقین دہانی کروائی۔
قبل ازیں وزیراعظم شہباز شریف سے پاکستان پیپلز پارٹی کے وفد نے ملاقات کی۔پیپلز پارٹی کے وفد میں سابق وزیراعظم راجہ پرویز اشرف، سید نوید قمر، وزیر اعلیٰ سندھ مراد علی شاہ اور شیری رحمان شامل تھیں۔
ملاقات میں وزیر خارجہ اسحاق ڈار، احسن اقبال، رانا ثناء اللہ اور اعظم نذیر تارڑ بھی شریک ہوئے۔
ملاقات کے دوران ملک کی مجموعی و سیاسی صورت حال پر تبادلہ خیال کیا گیا، اس کے علاوہ مالی سال 25-2024 کے بجٹ کے حوالے سے بھی مشاورت کی گئی۔