(ویب ڈیسک) حکومت کی مجوزہ 27ویں ترمیم پر نئی بحث چھڑ گئی،پاکستان آئینی توسیع سے ادارہ جاتی اصلاحات کی طرف بڑھ رہا ہے۔مجوزہ ترمیم میں آئینی عدالت کے قیام کی تجویز زیر غور ہے۔ججوں کے تبادلے اور مدت ملازمت کا نیا نظام زیر تجویز ہے۔
27ویں آئینی ترمیم سے متعلق ابھرنے والی بحث ظاہر کرتی ہے کہ پاکستان کا آئینی نظام اب ساختی توسیع (structural expansion) کی بجائے ادارہ جاتی اصلاح (institutional refinement) کے مرحلے میں داخل ہو رہا ہے۔
اختیارات کی نچلی سطح تک منتقلی (decentralization) اور عدالتی اصلاحات کے بعد، اب توجہ کارکردگی، جوابدہی اور آئینی ہم آہنگی کو بہتر بنانے پر مرکوز ہوتی دکھائی دیتی ہے۔
آئینی عدالت (Constitutional Court) کا قیام ایک منطقی اگلا قدم محسوس ہوتا ہے — تاکہ آئین سے متعلق تنازعات کا تیز، واضح اور مخصوص طور پر فیصلہ ہو سکے، اور سپریم کورٹ اپنی اصل اپیلیٹ (appellate) ذمہ داریوں پر توجہ دے سکے۔ دنیا کے کئی ماڈلز سے ثابت ہوتا ہے کہ اس طرح کی عدالتیں نہ صرف مقدمات کا بوجھ کم کرتی ہیں بلکہ آئینی تشریح کو زیادہ واضح اور مستحکم بناتی ہیں۔
اسی طرح، اگر ججوں کے تبادلے اور مدتِ ملازمت کو سول سروس کی طرز پر منظم کر دیا جائے تو پسند و ناپسند، گروہی اثر و رسوخ اور غیرمعمولی اختیارات کے تاثر کو کم کیا جا سکتا ہے۔ مقررہ مدت اور باقاعدہ تبادلے، عدلیہ کی خودمختاری کو کمزور نہیں بلکہ زیادہ شفاف اور ادارہ جاتی بناتے ہیں۔
الیکشن کمیشن کے چیئرمین کی تقرری بھی مسلسل سیاسی تعطل کا شکار رہی ہے، جس سے انتخابی نظام کی ساکھ متاثر ہوئی۔اس عمل میں واضح ٹائم لائنز اور غیرجانبدار نامزدگی کا طریقہ شامل کرنا اس بار بار کے بحران کو مؤثر انداز میں حل کر سکتا ہے۔
ایگزیکٹو مجسٹریسی کے محدود اختیارات کی بحالی بھی قابلِ غور ہے۔ماضی میں ان اختیارات کے خاتمے سے چھوٹے نوعیت کے معاملات براہ راست عدالتوں پر آ گئے، جس سے عدالتی نظام مزید دباؤ کا شکار ہوا۔اگر اس نظام کو کچھ تحفظات اور نگرانی کے ساتھ بحال کیا جائے تو فوری انصاف اور تیز فیصلہ سازی ممکن ہو سکتی ہے۔
تعلیم کے شعبے میں سنگل نیشنل کریکولم (SNC) ایک ایسا اصلاحی قدم ہے جس کا مقصد نصاب کو ایکسان کرنا، طبقاتی تفریق کم کرنا، اور قومی ہم آہنگی بڑھانا ہے۔متحدہ نصاب سے شہری شعور، قومی شناخت اور مساوی تعلیمی مواقع کو فروغ ملتا ہے۔
این ایف سی ایوارڈ کا جائزہ لینا بھی ایک حقیقت پسندانہ ضرورت ہے۔کمزور صوبائی ٹیکس وصولی، آبادی پر مبنی فارمولے کی خامیاں، اور وفاقی مالیاتی دباؤ اس بات کے متقاضی ہیں کہ این ایف سی کی ازسرِ نو وضاحت کی جائے- یہ عمل صوبائی خودمختاری واپس لینے کیلئے نہیں بلکہ مالیاتی استحکام کیلئے متوازن اصلاح کیلئے ہے۔
آرٹیکل 243 کا ازسرِ نو جائزہ لینا حکومت کا آئینی اختیار بھی ہے اور وقت کی ضرورت بھی۔
جدید جنگ (multi-domain warfare) میں Synergy، Jointness اور Unity of Command & Execution بنیادی ستون بن چکے ہیں۔معرکہ حق کے تجربات نے بھی واضح کیا کہ حملہ اور دفاع اب صرف زمینی نہیں بلکہ سائبر، خلا، انفارمیشن اور ملٹی ڈومین حقیقتوں پر مبنی ہیں — جس کیلئے آئینی وضاحت لازمی ہے۔
مجموعی طور پر، یہ مجوزہ اصلاحات کسی طاقت کی از سرِ نو تقسیم نہیں بلکہ نظام کی بہتری کا اشارہ ہیں
27ویں ترمیم کا بنیادی مقصد انقلاب نہیں بلکہ استحکام، ہم آہنگی اور مؤثر ادارہ جاتی فعالیت ہے — تاکہ پاکستان کے آئینی ادارے زیادہ ذمہ داری، توازن اور درستگی کے ساتھ کام کر سکیں۔