ویب ڈیسک:پاکستان میں سماجی رابطے کے معروف پلیٹ فارم ایکس (سابقہ ٹوئٹر) کی سروس 7 مئی 2025 کو ایک سال سے زائد عرصے بعد بالآخر بحال کر دی گئی ہے۔ اب صارفین بغیر کسی وی پی این کے پلیٹ فارم تک رسائی حاصل کر سکتے ہیں۔
یہ سروس فروری 2024 میں اس وقت بند کی گئی تھی جب بھارت کی جانب سے پاکستان پر پانچ مختلف مقامات پر میزائل حملوں کے بعد دونوں ممالک کے درمیان شدید کشیدگی پیدا ہو گئی تھی۔ سیاسی ماحول میں بڑھتے ہوئے تناؤ اور سوشل میڈیا پر گردش کرتی غلط معلومات اور حساس مواد کو مدنظر رکھتے ہوئے حکومت نے اس وقت سیکیورٹی بنیادوں پر یہ قدم اٹھایا تھا۔
سرکاری موقف کے مطابق، ایکس پر بعض ایسے مواد کی اشاعت ہو رہی تھی جو قومی سلامتی کے لیے خطرہ بن سکتا تھا اور عوام میں انتشار کا باعث بن رہا تھا۔ حکومت کا مؤقف تھا کہ یہ اقدام جھوٹی اطلاعات کے پھیلاؤ اور سماجی بےچینی سے بچاؤ کے لیے ضروری تھا۔
تاہم، اس پابندی کو انسانی حقوق کی تنظیموں، صحافیوں، طلبہ اور متعدد سیاسی کارکنان کی جانب سے شدید تنقید کا نشانہ بنایا گیا۔ اسے آزادیٔ اظہار پر قدغن قرار دیا گیا اور عدالتوں میں متعدد پٹیشنز بھی دائر کی گئیں۔ بین الاقوامی اداروں اور انٹرنیٹ آزادی سے متعلق تنظیموں نے بھی تشویش ظاہر کی تھی۔
اب، ایک سال بعد اس سروس کی بحالی کو پاکستان میں اظہارِ رائے کی آزادی کی جانب ایک مثبت قدم قرار دیا جا رہا ہے۔ خاص طور پر ایسے وقت میں جب خطے میں کشیدگی بڑھتی جا رہی ہے اور درست معلومات کی ترسیل عالمی سطح پر اہمیت اختیار کر چکی ہے۔
یہ بحالی نہ صرف سوشل میڈیا صارفین کے لیے خوش آئند ہے بلکہ اس سے پاکستان میں ڈیجیٹل آزادی کے مستقبل کے حوالے سے بھی مثبت اشارہ ملتا ہے۔تاہم یہ واضح نہیں ہے کہ آیا یہ سروس صرف پاک بھارت کشیدگی کی وجہ سے بحال ہے یا اس کو مستقبل میں بھی اب بحال رکھا جائے گا۔