ایک بھارتی شہری کو گرفتار کیا ہے جو روسی فوج کیلئے لڑ رہا تھا، یوکرین

 ویب ڈیسک: یوکرین کی فوج کا کہنا ہے کہ اس نے ایک بھارتی شہری کو گرفتار کیا ہے جو روسی فوج کیلئے لڑ رہا تھا۔ بھارت نے سرکاری طور پر اس رپورٹ کی تصدیق کرنے سے انکار کرتے ہوئے کہا ہے کہ وہ اس معاملے کی تحقیقات کر رہا ہے۔

یوکرینی میڈیا رپورٹس کے مطابق گرفتار شخص کی شناخت مجوتی ساحل محمد حسین کے نام سے ہوئی ہے جو گجرات کے ضلع موربی کا رہائشی ہے اور اس کی عمر 22 سال ہے۔

بھارتی وزارت خارجہ کے ذرائع نے بتایا کہ وہ اس رپورٹ کی سچائی کا پتہ لگانے کی کوشش کر رہے ہیں۔ یوکرین کی طرف سے کوئی اطلاع موصول نہیں ہوئی ہے۔

یوکرین کی 63ویں بریگیڈ نے ایک ویڈیو جاری کی ہے جس میں حسین کو قید میں دکھایا گیا ہے۔ ویڈیو میں حسین کا کہنا تھا کہ وہ روس میں تعلیم حاصل کرنے گیا تھا لیکن منشیات کے ایک کیس میں اسے سات سال قید کی سزا سنائی گئی۔

اس نے کہا کہ قید کے دوران، روسی حکام نے اسے معافی کے بدلے فوج میں شامل ہونے کی پیشکش کی۔ اس نے پیشکش قبول کر لی۔ میں جیل میں نہیں رہنا چاہتا تھا، اس لیے میں نے روسی فوج کے ساتھ خصوصی فوجی آپریشن کے لیے معاہدہ کیا۔

حسین کے مطابق انہیں روسی فوج نے صرف 16 دن کی تربیت دی اور یکم اکتوبر کو انہیں پہلی جنگی کارروائی کے لیے بھیجا گیا۔ 3 دن کی لڑائی کے بعد، حسین نے ایک کمانڈر کے ساتھ جھگڑے کے نتیجے میں یوکرینی فوج کے سامنے ہتھیار ڈال دیے۔

میں یوکرین کے ایک محاذ کے قریب پہنچا، اپنی بندوق زمین پر رکھ دی اور کہا، 'میں لڑنا نہیں چاہتا، مجھے صرف مدد چاہیے۔'

میڈیا رپورٹس میں دعویٰ کیا گیا ہے کہ روس نے مالیاتی لالچ کے ذریعے بھارت، شمالی کوریا اور دیگر ممالک کے شہریوں کو بھرتی کیا ہے۔ حسین کا کہنا ہے کہ ان سے رقم کا بھی وعدہ کیا گیا تھا لیکن کوئی ادائیگی نہیں کی گئی۔

بھارت نے اس سے قبل روس سے اس معاملے پر سخت احتجاج درج کرا چکا ہے۔ جنوری 2025 میں وزارت خارجہ نے کہا تھا کہ روسی فوج میں بھیجے گئے 12 بھارتی شہری یوکرین میں ہلاک ہو گئے تھے، جب کہ 16 لاپتہ تھے۔ بھارت نے ماسکو سے کہا تھا کہ وہ ہمارے شہریوں کی فوری رہائی اور محفوظ واپسی کو یقینی بنائے۔