ویب ڈیسک: عید الاضحیٰ سے قبل پیٹرولیم مصنوعات کی قیمتوں میں بڑی کمی کا امکان ہے۔ ماہرین نے پیٹرول کی قیمت میں 9 روپے 28 پیسے جبکہ ڈیزل کی قیمت میں 4 روپے 2 پیسے کمی کی پیش گوئی کردی ہے۔
تفصیلات کے مطابق مہنگائی کے ستائے عوام کو عید الاضحیٰ سے قبل بڑا ریلیف مل سکتا ہے۔ 16 جون سے ملک میں پیٹرولیم مصنوعات کی قیمتوں میں کمی متوقع ہے۔
ذرائع کا کہنا ہے کہ آئندہ 15 روز کے لیے پیٹرولیم مصنوعات 9 روپے 30 پیسے تک سستی ہوسکتی ہیں۔
16جون سے پیٹرول کی قیمت 9 روپے 28 پیسے تک کم ہونے کی امید ہے جبکہ آئندہ 15 روز کے لیے ڈیزل کی قیمت میں 4 روپے 2 پیسے کمی متوقع ہے، اس کے علاوہ مٹی کے تیل کی قیمت 2 روپے تک کم ہونے کا امکان ہے۔
گزشتہ ایک ہفتے میں عالمی مارکیٹ میں خام تیل کی قیمتوں میں کمی ریکارڈ کی گئی، عالمی مارکیٹ سے قیمتوں میں کمی کا فائدہ عوام تک پہنچائے جانے کا امکان ہے۔
ذرائع کے مطابق اوگرا عالمی مارکیٹ کے تناسب سے ورکنگ 15جون کو حکومت کو بھجوائے گا، پیٹرولیم مصنوعات کی قیمتوں سے متعلق حتمی منظوری وزیراعظم شہباز شریف دیں گے۔
وزارت خزانہ کی جانب سے پیٹرولیم مصنوعات کی قیمتوں کا نوٹیفکیشن 15 جون کو جاری کیا جائے گا۔