ویب ڈیسک: قومی اسمبلی کی قائمہ کمیٹی برائے دفاع کا اجلاس ہوا۔ جس میں پہلگام واقعے میں جانوں کے ضیاع کی متفقہ طور پر مذمت کی گئی۔ بھارتی حکومت کی جانب سے پاکستان پر لگائے گئے بے بنیاد الزامات کو واضح طور پر مسترد کر دیاگیا۔ اس کے علاوہ کمیٹی نے کسی بھی غیر ضروری اقدام پر مناسب ردعمل دینے کے عزم کا اعادہ کیا۔
تفصیلات کے مطابق قومی اسمبلی کی قائمہ کمیٹی برائے دفاع نے بھارتی حکومت کے اقدامات پر گہری تشویش کا اظہار کیا، جن میں سندھ طاس معاہدے کی یکطرفہ معطلی، اٹاری بارڈر کی بندش، اور سفارتی عملے کی واپسی شامل ہے۔ کمیٹی نے واضح کیا کہ ایسے اقدامات دو ایٹمی طاقتوں کے درمیان کشیدگی بڑھانے کا سبب بن سکتے ہیں۔
کمیٹی نے اس بات پر زور دیا کہ پاکستان خود دہشت گردی کا شکار رہا ہے اور اس کی حکومت اور مسلح افواج نے ہمیشہ امن قائم رکھنے کے لیے ایک ذمہ دار رویہ اختیار کیا ہے۔ تاہم، کمیٹی نے اعادہ کیا کہ اگر بھارتی جانب سے کسی غیر ضروری اقدام کا ارتکاب کیا گیا تو پاکستان کی جانب سے مناسب جواب دیا جائے گا۔
اجلاس آج پارلیمنٹ ہاؤس اسلام آباد میں چیئرمین فتح اللہ خان کی زیر صدارت منعقد ہوا۔ کمیٹی نے چیف آف آرمی اسٹاف جنرل سید عاصم منیر کی والدہ اور سالی کے انتقال پر فاتحہ خوانی اور دعا بھی کی۔
اس کے بعد کمیٹی نے " پاکستان نیوی (ترمیمی) بل 2024" پر غور کیا۔ دوران اجلاس، وزارت دفاع نے کمیٹی کو بل کی اہم خصوصیات سے آگاہ کیا، جن کا تعلق فلاحی سرگرمیوں، الیکٹرانک جرائم، اور طریقہ کار سے تھا۔ وزارت نے وضاحت کی کہ ترامیم کا مقصد نیوی ایکٹ کو حال ہی میں ترمیم شدہ پاکستان آرمی اور ایئر فورس کے ایکٹس کے مطابق بنانا ہے تاکہ مسلح افواج کی تمام شاخوں میں یکسانیت قائم کی جا سکے۔ تفصیلی مشاورت کے بعد، کمیٹی نے متفقہ طور پر قومی اسمبلی کو بل منظور کرنے کی سفارش کی۔
اس کے بعد، کمیٹی نے سرویئر جنرل آف پاکستان اور چاروں صوبوں و گلگت بلتستان کے مائنز اینڈ منرلز ڈیپارٹمنٹ کے سیکریٹریز سے معدنی وسائل کے سروے اور نقشہ سازی میں نجی شعبے کی شمولیت سے متعلق بریفنگ حاصل کی۔ کمیٹی نے تمام صوبوں پر زور دیا کہ وہ حساس معلومات کے تحفظ کے لیے نجی شعبے کے بجائے SOP کے محکمے کی خدمات حاصل کریں۔
وزارت دفاع کے تحت وفاقی تعلیمی اداروں (FGEIs) اور وزارت تعلیم کے تحت وفاقی نظام تعلیم (FDE) کے درمیان فنڈز کی تقسیم میں پائے جانے والے فرق پر، کمیٹی نے آئندہ اجلاس میں وزارت خزانہ اور وزارت منصوبہ بندی کے سیکریٹریز کو طلب کرنے کا فیصلہ کیا تاکہ اس مسئلے پر وضاحت حاصل کی جا سکے۔
اجلاس میں شریک اراکین میں ایم این ایز عقیل ملک، ابرار احمد، صبا صادق، اسفندیار محمد بندارہ، صلاح الدین جنیجو، سنجے پروانی، گل اصغر خان، پلین بلوچ، محمد اسلم گھمن، غلام محمد، اور ذیب جعفر (پارلیمانی سیکرٹری برائے دفاع) شامل تھے۔ اس کے علاوہ اجلاس میں لیفٹیننٹ جنرل (ر) محمد علی، ہلالِ امتیاز (ملٹری)، میجر جنرل عامر اشفاق کیانی، اور وزارت دفاع، قانون و انصاف، اور صوبائی حکومتوں کے دیگر اعلیٰ افسران نے بھی شرکت کی۔