فلسطینیوں کا قتل عام ،چاڈ نے اسرائیل سے اپنا سفیر واپس بلالیا

فلسطینیوں پر وحشیانہ بمباری اور قتل عام پر وسطی افریقی ملک چاڈ نے بھی اسرائیل سے اپنے سفیر کو واپس بلالیا ہے۔ اس سے قبل ترکیہ، ہنڈوراس، چلی، کولمبیا، اردن اور بحرین بھی اسرائیل سے اپنا سفیر واپس بلا چکے ہیں ۔ چاڈ نے اسرائیل کی جانب سے غزہ کے فلسطینیوں کے قتل عام پر یہ غیرمعمولی قدم اٹھایا ہے۔ خیال رہے کہ بولیویا نے گزشتہ ہفتے اسرائیل کی جانب سے محصور فلسطینی علاقے پر جاری بدترین حملوں پر سفارتی تعلقات توڑ لیے تھے۔ غیر ملکی میڈیا کی رپورٹ نے کہا کہ چاڈ کے دارالحکومت انجیمینا سے موصول اطلاعات کے مطابق چاڈ نے غزہ میں اسرائیل کی وحشیانہ بمباری اور ہزاروں معصوم شہریوں کی ہلاکت پر اپنے سفیر کو واپس بلا لیا ہے۔ اس سے متعلق چاڈ کی حکومت نے ایک بیان میں کہا ہے کہ غزہ میں جاری سانحے اور بہت زیادہ معصوم شہریوں کی جانوں کے نقصان کی شدید مذمت کرتے ہیں اور فوری جنگ بندی کے ساتھ مسئلہ فلسطین کے پائیدار بنیادوں پر حل کا مطالبہ کرتے ہیں۔