میٹا کی زیرملکیت ایپ انسٹاگرام کی جانب سے صارفین کیلئے ایک نئے فیچر 'ری پوسٹ ' کی آزمائش کی جارہی ہے۔ انسٹاگرام کی جانب سے ایک نئے فیچر ری پوسٹ کی آزمائش کی تصدیق کی ہے، اس فیچر کی مدد سے صارفین دیگر افراد کے مواد کو اپنی فیڈ پر شیئر کرسکیں گے۔ یہ فیس بک کے ری شیئر یا ٹوئٹر کے ری ٹوئٹ فیچر سے ملتا جلتا فیچر ہے۔ انسٹاگرام میں اسٹوریز میں تو دیگر افراد کی پوسٹس شیئر کی جا سکتی ہیں مگر کسی پوسٹ کو آپ ابھی فیڈ پر ری شیئر نہیں کرسکتے۔ میٹا کے ایک ترجمان کا کہنا ہے کہ محدود صارفین کو یہ نیا فیچر دستیاب ہے۔ ہم فیڈ پر پوسٹس ری شیئر کرنے کے فیچر کی آزمائش کررہے ہیں تاکہ صارفین اپنی پسند کا مواد شیئر کرسکیں اور کریڈٹ بھی اصل اکاؤنٹ کے پاس رہے۔ خیال رہے کہ اس فیچر پر کئی ماہ سے کام کیا جا رہا تھا اور رواں سال مئی کے مہینے میں بھی اس سے متعلق رپورٹس سامنے آئی تھیں مگر اس وقت کمپنی نے اس کی تصدیق نہیں کی تھی۔