ایشیا کپ کے لیے بھارت نے ایک بار پھر اپنی ٹیم پاکستان بھیجنے سے انکار کر دیا. تفصیلات کے مطابق بھارتی کرکٹ بورڈ کے عہدیدار ارون دھومال نے کہا ہے کہ جےشاہ اور ذکاء اشرف کے درمیان ملاقات میں ایشیا کپ کے شیڈول کو فائنل کرلیا گیا ہے، بھارتی ٹیم ایشیا کپ کے لیے پاکستان نہیں جائے گی. پہلے4میچز پاکستان میں کھیلے جائیں گے، پاک بھارت میچ سمیت باقی9میچز سری لنکا میں ہوں گے، ملاقات میں صرف ایشیا کپ کے شیڈول پر ہی بات ہوئی ہے، بھارتی ٹیم یا جےشاہ کے پاکستان جانے کے معاملے پر بات نہیں ہوئی ہے. واضح رہے کہ ایشیا کپ 31 اگست سے 17 ستمبر تک کھیلا جائے گا، اے سی سی پاکستان کی جانب سے پیش کردہ ہائبرڈ ماڈل کے تحت ایشیا کپ کھیلے جانے کا پہلے ہی اعلان کر چکی ہے۔