ویب ڈیسک: بھارتی کرکٹ بورڈ کو ٹی ٹوئنٹی ورلڈکپ کے دوران امریکا میں سہولیات کی فکر ستانے لگی۔
بھارتی میڈیا کا کہنا ہے کہ بھارتی بورڈ نے ہوٹل اور دیگر سہولیات کا جائزہ لینے کے لیے ریکی ٹیم نیو یارک بھجوا دی ہے۔
بھارتی میڈیا کے مطابق آئی سی سی ایونٹ کے امریکا میں پہلی مرتبہ میچز ہو رہے ہیں اور امریکا میں سہولیات کا اس وقت کسی کو اندازہ نہیں اس لیے ریکی ٹیم بھیجی گئی۔
میڈیا رپورٹس میں بتایا گیا ہے کہ بھارتی بورڈ کا ایک آفیشل ہوٹل اور دیگر انتظامات کا جائزہ لے گا، آئی پی ایل کے لیگ میچز کے اختتام کے ساتھ ہی بھارتی کھلاڑی امریکا روانہ ہوں گے جب کہ ناک آؤٹ مرحلے میں پہنچنے والی ٹیموں کے کھلاڑی بعد میں امریکا جائیں گے۔
میڈیا رپورٹس کے مطابق بھارتی ٹیم 5 جون کو آئرلینڈ کے خلاف پہلا میچ نیویارک میں کھیلے گی، پاکستان اور بھارت کے درمیان میچ 9 جون کو نیویارک میں شیڈولڈ ہے۔
خیال رہے کہ بھارتی بورڈ ماضی میں ٹیم کے لیے دیگر ٹیموں سے الگ ہوٹلوں میں رہائش کا انتظام کرتا رہا ہے۔