(ویب ڈیسک ) نیوزی لینڈ کے خلاف کھیلے جانے والے میچ میں فخر زمان کی اوپننگ نہ کرنے کی اہم وجہ سامنے آگئی۔
چیمپئنز ٹرافی میں فخر زمان اوپننگ نہیں کر رہے۔وہ فیلڈنگ کے دوران انجری کا شکار ہوئے تھے۔پاکستان ٹیم کی جانب سعود شکیل اور بابر اعظم اوپننگ کر رہے ہیں ۔
فخرزمان فیلڈنگ کے دوران بیشتر اوورز میں میدان سے باہر رہے۔
آئی سی سی قوانین کے تحت فخر زمان اننگز کے 20 منٹ تک بیٹنگ کیلئے نہیں آسکتے۔
ویب ڈیسک: قومی کرکٹ ٹیم کے سابق کپتان بابراعظم کی ایک مداح نے کل اتوار کو ہونے والے پاک بھارت ٹاکرے سے قبل خاص پیغام دیا۔
سوشل میڈیا پر وائرل ویڈیو میں بابر اعظم کی برطانیہ میں مقیم خاتون مداح نبیہہ اپنے من پسند کھلاڑی سے دل نہ توڑنے کا مطالبہ کرتی دکھائی دے رہی ہیں اوربابر اعظم کو مخاطب کرتے ہوئے کہتی ہیں کہ بابراعظم! اگر سنڈے کو اس بار آپ نے میرا دل توڑا تو آپ کو طلاق طلاق طلاق۔
یاد رہے کہ گزشتہ برس بابر اعظم کی مداح نبیہہ نے اس وقت سوشل میڈیا صارفین کی توجہ حاصل کی تھی جب انہوں نے پاکستان اور انگلینڈ کے درمیان ہونے والے ٹی 20 میچ میں بابر اعظم سے سنچری کا مطالبہ کرتے ہوئے کہا تھا کہ اگر بابر سنچری بنائیں گے تو میں اپنے پپّا کی مرسیڈیز انہیں تحفے میں دے دوں گی۔
February 22, 2025
February 22, 2025
ویب ڈیسک: لاہور کے قذافی اسٹیڈیم میں کھیلے جانے والے آئی سی سی چیمپئنز ٹرافی کے چوتھے میچ میں انگلینڈ نے آسڑیلیا کو جیت کے لئے 352 رنز کا ہدف دیا، انگلینڈ کے بیٹر بین ڈکٹ نے آئی سی سی چیمپئنز ٹرافی میں انفرادی اننگز کا 21 سالہ ریکارڈ توڑ دیا۔
تفصیلات کےمطابق آئی سی سی کے چوتھے میچ میں آسٹریلیا کے خلاف 143 گیندوں پر 165 رنز بنانے والے انگلینڈ کے بین ڈکٹ چیمپئنز ٹرافی کی تاریخ میں سب سے بڑی انفرادی اننگز کھیلنے والے کھلاڑی بن گئے۔
اس سے قبل نیوزی لینڈ کے نیتھن ایسٹل نے 2004 میں امریکہ کے خلاف 145 رنز کی ناقابلِ شکست اننگز کھیلی تھی۔
ویب ڈیسک: چیمپئنز ٹرافی کے چوتھے میچ میں انگلینڈ نے آسٹریلیا کو جیت کے لئے 352 رنز کا بڑا ہدف دیا تھا،آسٹریلین بیٹرز نے ذمہ دارانہ بیٹنگ کرتے ہوئے ہدف 47.3 اوورز میں پورا کرلیا،انگلینڈ کی جانب سے بین ڈکٹ نے شاندار اننگز کھیلی، وہ 143 گیندوں پر 165 رنز بنا کر آؤٹ ہوئے۔
352 رنز کا ٹارگٹ حاصل کرنے کے لئے آسٹریلیا کی جانب سے اوپننگ میتھیو شارٹ اور ٹریوس ہیڈ نے کی،ٹریوس ہیڈ کو 6 رنز پر آرچر نے کیچ آؤٹ کیا، سٹیون سمتھ بھی 5 رنز بنا کر ووڈ کی گیند پر کیچ آؤٹ ہوئے,میتھیو شارٹ 63 رنز پر، مارنس لبوشین 47 رنز پر آؤٹ ہوئے۔
الیکس کیری 69 رنز بنا کرپویلین لوٹ گئے، بعد ازاں جوش انگلیس اور گلین میکسویل نے جارحانہ بیٹنگ کرتے ہوئے ٹیم کو فتح دلائی، جوش انگلیس نے 86 گیندوں پر 120 رنز اور گلین میکسویل نے 15 گیندوں پر 32 رنز کی ناقابل شکست اننگز کھیلی۔
انگلینڈکی بیٹنگ کی بات کریں تو انگلینڈ کی پہلی وکٹ13 کے اسکور پر گری، فل سالٹ 6گیندوں پر 10 رنز بنا کر آؤٹ ہوئے، دوسری وکٹ جیمی اسمتھ کی گری جو 13 گیندوں پر 15 رنز بنا کرپویلین لوٹ گئے۔
بین ڈکٹ نے سنچری اور جوروٹ نے پراعتماد بلے بازی کرتے ہوئے ففٹی مکمل کی، بعد میں 77 گیندوں پر 68 رنز بنا کر جوروٹ آؤٹ ہوگئے، وہ ایڈم زیمپا کا شکار بنے۔
ہیری بروک 3رنز بنا کر ایڈم زیمپا کا شکار بنے، جوس بٹلر نے بین ڈکٹ کا ساتھ دیا، بین ڈکٹ 143 گیندوں پر 165 رنز بنا کر آؤٹ ہوئے۔
جوس بٹلر 23 رنز بنا پائے،لیام لیونگسٹون 14 رنز بنا کرپویلین لوٹ گئے، برائیڈن کارس 8 رنز بنا کر آؤٹ ہوئے، جوفرا آرچر نے 10 گیندوں پر 21 اور عادل رشید 1 رنز بنا کر ناٹ آؤٹ رہے۔
لاہور کے قذافی اسٹیڈیم میں کھیلے جا رہے میچ میں آسٹریلیا کے کپتان اسٹیو اسمتھ نے ٹاس جیت کر انگلینڈ کو بیٹنگ کی دعوت دی۔
آئی سی سی چیمپئنز ٹرافی کے پہلے میچ میں نیوزی لینڈ نے میزبان پاکستان کو 60 رنز سے شکست دی تھی جبکہ دوسرے میچ میں بھارت نے بنگلا دیش کو 6 وکٹوں سے ہرایا تھا،گزشتہ روز کراچی میں کھیلے گئے میچ میں جنوبی افریقا نے افغانستان کو 107 رنز سے شکست دی تھی۔
February 22, 2025
February 21, 2025
ویب ڈیسک: چیمپئنز ٹرافی کے تیسرے میچ میں جنوبی افریقا نے افغانستان کو 107 رنز سے شکست دے دی، میچ کے دوران ایک عجیب واقعہ دیکھنے میں آیا، اسٹیڈیم میں ایک کالے رنگ کی ’بلی‘ نے انٹری دی۔
گروپ بی کے پہلے میچ میں جنوبی افریقا کے 316 رنز کے ہدف کے تعاقب میں افغان ٹیم 208 رنز پر ڈھیر ہوگئی، اسٹیڈیم میں ’بلی‘ کی انٹری اُس وقت ہوئی جب افغانستان کی ٹیم ساؤتھ افریقہ کے 316 کےرنز کا تعاقب کررہی تھی۔
بلی کے گراؤنڈ میں داخل ہونے کی ویڈیو آئی سی سی نے اپنے آفیشل انسٹاگرام اکاؤںٹ پر شیئر کی، ویڈیو میں دیکھا جاسکتا ہے کہ ایک کالے رنگ کی بلی میچ کے دوران گراؤنڈ میں ٹہلنے نکل آئی، بلی کو باہر بھگانے کے لئے ساؤتھ افریقہ کے فاسٹ باؤلر’کاگیسو ربادا‘ نے اُس کی طرف دوڑ لگائی۔
جنوبی افریقہ کے کھلاڑی کو اپنی طرف آتا دیکھا کر بلی نے فوراً گراؤنڈ سے باہر چلی گئی، بلی کے اس طرح اچانک گراؤنڈ میں داخل ہونے پر کمنٹیٹرز بھی اپنی ہنسی پر قابو نہ رکھ پائے۔
ویڈیو کے سامنے آنے پر سوشل میڈیا صارفین کی جانب سے بھی دلچسپ تبصرے کئے جارہے ہیں۔
ویب ڈیسک: قومی کرکٹ ٹیم کے تیز رفتار بولر حارث رؤف نے کہا ہے کہ بھارت کے خلاف میچ میں کوئی دباؤ نہیں ہے اور تمام کھلاڑی پر سکون ہیں۔
دبئی میں میڈیا سے گفتگو کرتے ہوئے انہوں نے کہا کہا کہ یہ ایک عام کھیل ہے اور پاکستان بھارت کے میچ کو دوسرے کرکٹ میچ کی طرح ہی دیکھے گا۔
حارث رؤف نے تصدیق کی کہ وہ مکمل طور پر فٹ ہیں۔ انہوں نے کہا کہ انہوں نے نیوزی لینڈ کے خلاف میچ میں 10 اوورز کرائے جس سے ان کی میچ فٹنس ثابت ہوئی۔
انہوں نے کہا کہ پاکستان اس سے قبل دبئی کرکٹ اسٹیڈیم میں بھارت کو 2 بار شکست دے چکا ہے اور اس بار ایک اور فتح حاصل کرنے کی کوشش کرنے کے لیے پر عزم ہے۔
آنے والے میچ کے بارے میں بات کرتے ہوئے فاسٹ بولر نے (نیوزی لینڈ کے ہاتھوں ٹیم کی شکست کے تناظر میں) کہا کہ اس میچ سے آگے نکل گئی ہے اور اب دبئی کی کنڈیشنز کو اپناتے ہوئے بھارت کے خلاف کھیلنے پر توجہ مرکوز کر رہی ہے۔
حارث رؤف نے ٹورنامنٹ میں آگے بڑھنے اور سیمی فائنل کے لیے کوالیفائی کرنے کے لیے ماضی کی غلطیوں سے سیکھنے کی اہمیت پر زور دیا۔ انہوں نے مزید کہا کہ تمام کھلاڑی اپنی بہترین پرفارمنس دینے کے لیے پرعزم ہیں۔
انجریز کے بارے میں بات کرتے ہوئے حارث رؤف نے کہا کہ وہ کسی بھی وقت ہو سکتی ہیں حتیٰ کہ کھلاڑی چلتے ہوئے بھی زخمی ہوسکتا ہے،کچھ چیزیں ہمارے قابو سے باہر ہوتی ہیں اس لیے ان کے بارے میں فکر کرنے کا کوئی فائدہ نہیں ہے۔
ٹیم سلیکشن پر تبصرہ کرتے ہوئے حارث نے تسلیم کیا کہ فخر زمان اور صائم ایوب کی عدم موجودگی نے ٹیم کے کمبی نیشن میں خلل ڈالا ہے۔ تاہم انہوں نے مضبوط پرفارمنس کے ساتھ دستیاب کھلاڑیوں پر اعتماد کا اظہار کیا۔
واضح رہے کہ آئی سی سی چیمپئنز ٹرافی میں پاکستان اور بھارت اتوار کو دبئی میں آمنے سامنے ہوں گے۔
February 21, 2025
February 21, 2025
ویب ڈیسک:چیمپئنز ٹرافی 2025، قومی کرکٹر امام الحق دبئی پہنچ گئے ،امام الحق کو چیمپئنز ٹرافی کے لئے فخر زمان کے متبادل کے طور پر قومی اسکواڈ کا حصہ بنایا گیا ہے۔
امام الحق نے پاکستان ٹیم کو دبئی میں جوائن کر لیا، پاکستان ٹیم آج دبئی میں شام کو ٹریننگ سیشن میں حصہ لے گی ،امام الحق کل پاکستان ٹیم کے دبئی میں ہونےوالے ٹریننگ سیشن میں حصہ لیں گے۔
پاکستان دوسرا میچ بھارت کے خلاف 23 فروری کو دبئی اسٹیڈیم میں کھیلے گی۔
ذرائع ابلاغ کے مطابق قومی کرکٹر امام الحق آج دوپہر 1 بجے ائیربلیو کی پرواز PA410 کے ذریعے دبئی روانہ ہوئے۔
ذرائع کے مطابق امام الحق گزشتہ رات کراچی سے لاہور پہنچے تھے۔امام الحق کو چیمپئنز ٹرافی کے لیے فخر زمان کے متبادل کے طور پر قومی اسکواڈ کا حصہ بنایا گیا ہے۔
ویب ڈیسک:لاہورمیں28 سال بعدعالمی کرکٹ کی رونقیں بحال ،کل پہلاچیمپئنز ٹرافی میچ،لاہور پولیس مکمل تیار، ڈی آئی جی آپریشنز فیصل کامران خود فیلڈ میں موجود، سکیورٹی پلان نافذ،12ہزار201 پولیس افسران وجوان ڈیوٹی دیں گے۔
ڈی آئی جی آپریشنز فیصل کامران کے مطابق 4درجاتی حصارپرمشتمل فول پروف سکیورٹی پلان ترتیب دیاگیا ،افسران میں12ایس پیز،37ڈی ایس پیز، 86انسپکٹرزتعینات ہونگے، خواتین کی سکیورٹی وچیکنگ کیلئے245لیڈی اہلکارڈیوٹی فرائض انجام دینگی، ٹیموں کےایئرپورٹ سےہوٹل اورسٹیڈیم تک روٹ ہائی الرٹ رہیں گے۔
تمام روٹ کی سیف سٹی کیمروں اورسول وردی اہلکارمسلسل نگرانی کرینگے، ایلیٹ فورس کی33، ڈولفن اور پیرو کی 71 ٹیمیں پٹرولنگ کریں گی،روٹ میں آنیوالی تمام بلندعمارتوں پرسنائپرز بھی تعینات کئےجائیں گے،
شہر بھر میں حفاظتی سرچ اینڈ سویپ آپریشن بھی کئے جا رہے ہیں، سرچ اینڈ سویپ آپریشنز میں تمام سکیورٹی ادارے بھی شامل ہیں۔
رواں سال 2818سرچ آپریشن، 1793مشکوک افراد کی مکمل چھان بین کی گئی،1لاکھ سے زائد گھروں میں مقیم 3لاکھ 50ہزار کرایہ داروں کی چیکنگ کی گئی،ایس ایس پی آپریشنز تصور اقبال، ایس پی سکیورٹی عبدالوہاب تمام امور کے انچارج ہوں گے۔
ڈی آئی جی آپریشنزفیصل کامران کا مزید کہنا تھا کہ سکیورٹی ایس او پیز پر من و عن عملدرآمد کروایا جائے گا، سیکورٹی پلان پر عمل درآمد کیساتھ عوام کی سہولت بھی اولین ترجیح ہو گی۔
February 21, 2025
February 21, 2025
(ویب ڈیسک ) انگلینڈ کرکٹ ٹیم کے کپتان جوز بٹلر کا کہنا ہے کہ پاکستان میں آکر بڑے پرجوش ہیں، پاکستان میں پہلے بھی کھیل چکے ہیں اور کنڈیشنز کے مطابق کھیلنے کی کوشش کریں گے۔
انگلینڈ کرکٹ ٹیم کے کپتان جوز بٹلر نے پریس کانفرنس کرتے ہوئے کہا کہ یہاں کچھ اچھے دن گزارے اور ہماری تیاری اچھی ہے، جیمی اسمتھ اچھا ٹیلنٹ ہے وہ کسی بھی نمبر پر بیٹنگ کر سکتے ہیں، میری اپنی فارم اچھی ہے اور میچ کے لیے پوری تیاری ہے۔
انہوں نے کہا کہ بھارت کی نسبت یہاں کی کنڈیشنز مختلف ہونگی، پاکستان میں پہلے بھی کھیل چکے ہیں اور کنڈیشنز کے مطابق کھیلنے کی کوشش کریں گے۔
جوزبٹلر نے کہا کہ آسٹریلیا کے تین اہم کھلاڑیوں کی انجری کی وجہ سے ہمیں فائدہ ہوگا، آسٹریلیا کے ساتھ اچھی رائیولری ہے۔
ان کا کہنا تھا کہ ٹاس ہارے یا جیتیں مگر ہم اچھا کھیلنے کی کوشش کریں گے، جوفرا آرچر 18 مہینوں بعد واپس آئے ہیں وہ مکمل فٹ ہیں۔
ویب ڈیسک: چیمپئنز ٹرافی کے تیسرے میچ میں جنوبی افریقہ نے افغانستان کے خلاف ٹاس جیت کر بیٹنگ کا فیصلہ کیا ہے۔ جنوبی افریقہ نے بیٹنگ کرتے ہوئے مقرررہ اوورز میں315 رنز بنائے اور افغانستان کو جیت کیلئے 316 رنز کا ہدف دیا۔ہدف کے تعاقب میں افغانستان کی پوری ٹیم 208 رنز پر آؤٹ ہوگئی۔
جنوبی افریقہ کی پہلی وکٹ 28 کے مجموعی اسکور پر گرگئی۔ ٹونی ڈی زورزی محمد نبی کی گیند پر حشمت اللہ کو کیچ دے بیٹھے۔ انہو ں نے11 گیندوں پر 11 رنز بنائے، 157 رنز کے مجموعی رنز پر کپتان ٹیمبا باوماآؤٹ ہوئے۔انہوں نے 58 رنز بنائے۔جنوبی افریقہ کی تیسری وکٹ 201 رنز پر گری، تیسرے آؤٹ ہونے والے ریان رکیلٹن تھے۔انہوں نے 7 چوکوں اور 1 چھکے کی مدد سے 106 گیندوں پر 103 رنز بنائے۔ریسی ون ڈر ڈسن نے46 گیندوں پر 52 رنز بناکرآؤٹ ہوئے۔ڈیوڈ ملر 14 رنز بنا کر پویلین لوٹے جبکہ مارکرم 52 رنز بنا کر ناٹ آؤٹ رہے۔
افغانستان کی جانب سے محمد نبی نے 2 کھلاڑیوں کو آؤٹ کیا۔ فضل الحق فاروقی ، عظمت اللہ اور نور احمد نے 1،1 وکٹ حاصل کی۔
ہدف کے تعاقب میں افغانستان کی بیٹنگ مشکل کا شکار رہی، رحمان اللہ 10 رنز بنا کر آؤٹ ہوئے۔ابراہم زردان 17 اور صدیق اللہ نے 16 رنز بنائے۔کپتان حشمت اللہ صفر رنز بنا کر پولین لوٹے۔عظمت اللہ عمرزئی نے 18 جبکہ محمد نبی نے 8 رنز بنا کر آؤٹ ہوئے۔گلبدین نائب نے 13 اور راشد خان 18 رنز بنا سکے۔
افغانستان کی جانب سے رحمت شاہ خوب مزاحمت دکھائی۔انہوں نے 92 گیندوں پر 9 چوکوں 1 چھکے کی مدد سے 90 رنز بنائے اور ٹاپ اسکورر رہے۔
جنوبی افریقہ کی جانب سے ربادا،نگیڈی نے 2،2 کھلاڑیوں کو آؤٹ کیا۔ جبکہ مارکو، ویان ملڈر اور مہاراج نے 1،1 وکٹ حاصل کی۔
افریقی کپتان ٹیمبا باوما نے ٹاس کے موقع پر گفتگو کرتے ہوئے کہا کہ ہمیں خود پراعتماد ہے،اچھا اسکور کرنے کی کوشش کریں گے۔
کپتان افغانستان کرکٹ ٹیم حشمت اللہ نے کہا کہ ہم ٹاس جیتتےتوبیٹنگ ہی کرتے، اچھی شروعات کریں گے تو خوشی ہوگی۔
حشمت اللہ نے کہا کہ جنوبی افریقا کےخلاف پہلےبھی اچھی کرکٹ کھیلی ہے۔
February 21, 2025
February 20, 2025
ویب ڈیسک: بھارتی باؤلر محمد شامی نے بنگلہ دیش کیخلاف چیمپئنز ٹرافی کے اپنے پہلے میچ میں وکٹیں لیتے ہوئے ون ڈے کرکٹ میں تیز ترین 200 وکٹیں حاصل کرنے کا ریکارڈ توڑ ڈالا ہے ۔
تفصیلات کے مطابق محمد شامی نے یہ کارنامہ 5126 گیندوں پر انجام دیاہے جو کسی بھی باولر کیلئے سب سے کم ہیں جبکہ مچل سٹارک نے 200 وکٹیں 5240 گیندوں میں حاصل کرتے ہوئے ریکارڈ بنایا تھا ۔
اگر میچز کے لحاظ سے دیکھا جائے تو محمد شامی اور ثقلین مشتاق 104 ون ڈے میچز میں 200 وکٹیں حاصل کرکے مشترکہ طور پر دوسرے نمبر پر ہیں، جبکہ مچل اسٹارک نے یہ کارنامہ 102 میچز میں انجام دیا تھا۔
ویب ڈیسک: قومی ٹیم کے سابق کپتان شاہد آفریدی نے کہا ہے کہ میں نے بطور کپتان محمد رضوان کو بہت سپورٹ کیا، محمد رضوان سب سےبہتر چوائس ہے، ہمارے بڑے کھلاڑیوں کو بھارت کے خلاف پر فارم کرنا ہو گا، خود اعتمادی ہمیں بھارت کے خلاف جتوائے گی، کسی بھی کھلاڑی کو ہیرو بننا ہے تو بھارت کے خلاف پر فارم کرنا ہو گا۔
قومی کرکٹ ٹیم کے سابق کپتان شاہد خان آفریدی نے نجی ٹی وی چینل کے پروگرام میں گفتگو کرتے ہوئے کہا کہ تمام فاسٹ بولرز کواظہرمحمود کےساتھ پلان بناناہوگا، یارکر ہماری صلاحیت رہی ہے جو کہ نظر نہیں آرہی، خود اعتمادی ہمیں بھارت کے خلاف جتوائے گی، ہمارے بڑے کھلاڑیوں کو بھارت کے خلاف پر فارم کرنا ہو گا۔
انہوں نے کہا کہ ہماری ٹیم میں میچ ونر نہیں ہیں، پرفارم کرنا ہر کھلاڑی کی ذمہ داری ہوتی ہے، بابراعظم اور فخرزمان پر چھوڑ دینا کہ یہ جتوائیں گے،یہ غلط ہے، نیوزی لینڈ کے خلاف ہمارے بولرز نے اچھا اسٹارٹ دیا تھا، ہم نے نیوزی لینڈ کے خلاف 27 اوورز ڈاٹ کھیلے، ہماری ہٹنگ نہیں،سنگل ڈبل کا بھی مسئلہ ہے، نیوزی لینڈ کے خلاف خوشدل شاہ نے اچھی بیٹنگ کی۔
شاہد آفریدی نے کہا کہ بھارت کے خلاف بابراعظم اور امام الحق کو اوپننگ کرانی چاہیے، بابراعظم لمبی اننگز کھیل سکتا ہے،ماضی میں بھی کھیلی ہے، کسی بھی کھلاڑی کو ہیرو بننا ہے تو بھارت کے خلاف پر فارم کرنا ہو گا، بھارت کی فرسٹ کلاس کو 100سال ہوگئے،وہی نظام چل رہا ہے، ہمارے کرکٹ بورڈ کا نیا چیئرمین آتا ہے تو نظام بدل جاتا ہے، چہرے بدلنے سے ہمارا کرکٹ کانظام نہیں بدلناچاہیے، ڈیپارٹمنٹ کرکٹ کے نظام کو بھی چھیڑنے کی ضرورت نہیں تھی۔
سابق کپتان نے کہا کہ 2017کے بعد ہم کوئی ایشیاکپ،چیمپئنز ٹرافی اور ٹی ٹوئنٹی ورلڈکپ نہیں جیتے، ہمیں کرکٹ میں نچلی سطح پر سرمایہ کاری کرنا ہو گی،ٹیلنٹ لانا ہو گا، کسی کو ذمہ داری دی ہے تو اس کو وقت دینا چاہیے، ہم جس کو بھی لاتے ہیں کنٹریکٹ ختم ہونے سے پہلے ہٹا دیتے ہیں، صحیح بندہ صحیح کرسی پر ہونا چاہیے، کرکٹ اکیڈمیز اسکول کی طرح ہوتی ہیں، ہماری اکیڈمیز میں کئی کئی مہینے تک کیمپس نہیں لگائے جاتے، ہماری اُمیدیں ہوتی ہیں کہ شاہین آفریدی اور بابراعظم آئے تو پرفارم کرے۔
شاہد آفرید ی کا کہناتھا کہ شاہین آفریدی اور بابراعظم کا جیت میں اہم کردار ہونا چاہیے، میں نے بطور کپتان محمد رضوان کو بہت سپورٹ کیا، محمد رضوان سب سےبہتر چوائس ہے، ہم صرف ایک اسپنر کے ساتھ کھیل رہے ہیں،یہ غلطی ہے، ہمیں 15کے اسکواڈ میں ساجد کو رکھنا چاہیے، ہم 4 بولرز کے ساتھ نہیں جا سکتے،5کے ساتھ کھیلنا ہو گا،محمد رضوان کو نیوزی لینڈ کےخلاف اوپن کرنا چاہیے تھا، فخر زمان انجرڈ تھا،اس کوچوتھے نمبرپربھیجاگیا،یہ غلطی تھی۔
ان کا کہناتھا کہ ہمیں خاموش کرنے کیلئے بھارت کے خلاف قومی ٹیم کو جیتنا ہو گا،فخر زمان فٹ نہیں تھا،امام الحق کی ٹیم میں جگہ بنتی تھی۔
February 20, 2025
February 20, 2025
(ویب ڈیسک ) آئی سی سی چیمپئنز ٹرافی میں بھارت اور بنگلادیش کے میچ کے براڈکاسٹ میں ایونٹ لوگو پر پاکستان کا نام نہ ہونے کے معاملے پر آئی سی سی نے اپنی غلطی مان لی ہے۔
واضح رہے کہ آج بھارت اور بنگلادیش کے میچ کے براڈکاسٹ میں ایونٹ لوگو پر پاکستان کا نام نہیں لکھا گیا جس پر ناظرین کی جانب سے سوالات اٹھائے گئے تھے۔
اس کے برعکس گزشتہ روز ہونے والے پاکستان اور نیوزی لینڈ کے میچ کے براڈکاسٹ میں لوگو پر پاکستان درج تھا۔
انٹرنیشنل کرکٹ کونسل کی جانب سے اس معاملے میں تکنیکی خرابی کا اعتراف کرلیا گیا ہے۔
اس حوالے سے ترجمان آئی سی سی نے کہا ہے کہ گرافکس کی غلطی تکنیکی وجہ سے ہوئی جو کل سے درست ہوجائےگی، میچ کے دوران اس لوگو کو تبدیل کرنا ممکن نہیں تھا۔
ترجمان نے بتایا کہ آئی سی سی کے سوشل میڈیا اکاؤنٹس پر میچ کے کلپس پر لوگو میں پاکستان کا نام موجود ہے، پاکستان کا نام صرف براڈ کاسٹ کے لوگو سے غائب رہا۔
ویب ڈیسک: بھارت کے سابق کپتان ویرات کوہلی ایک روزہ فارمیٹ میں 14 ہزار رنز سکور کرنے والے تیسرے کھلاڑی بنتے بنتے رہ گئے۔
ویرات کوہلی نے یہ سنگِ میل دبئی میں بنگلادیش کے خلاف کھیلے جانے والے چیمپئنز ٹرافی کے دوسرے میچ میں عبور کرنےکیلئے15 رنز درکار تھے جب رشاد حسین کی گیند پر سومیا سرکار کو 22 رنز پر کیچ دے بیٹھے۔
سٹار بیٹراگر 14 ہزار رنز مکمل کر جاتے تو یہ کارنامہ انجام دینے والے تیز ترین بلے باز بھی بن جاتے۔
واضح رہے اب صرف دو کھلاڑی یہ کارنامہ انجام دے سکے ہیں جن میں سچن ٹنڈولکر (350 میچز) اور سری لنکا کے کمار سنگاکارا (378 میچز) شامل ہیں۔
February 20, 2025
February 20, 2025
(ویب ڈیسک ) بھارتی کپتان روہت شرما نے بڑا اعزاز اپنے نام کرلیا، وہ ون ڈے میں تیز ترین 11 ہزار رنز بنانے والے دوسرے بیٹر بن گئے ہیں۔
دبئی میں آئی سی سی چیمپئنز ٹرافی کے دوسرے میچ میں بنگلادیش کے خلاف بیٹنگ کرتے ہوئے روہت شرما نے تاریخ رقم کردی، انہوں نے اپنی 261ویں اننگز میں 11 ہزار رنز مکمل کرلیے۔
خیال رہے کہ ا س سے قبل ویرات کوہلی نے ون ڈے کی 222 اننگز میں اپنے 11 ہزار رنز مکمل کیے تھے۔
روہت شرما کی جانب سے اس فہرست میں بھارت کے لیجنڈ سچن ٹنڈولکر کو پیچھے چھوڑ دیا گیا ہے۔سچن نے 276 اننگز میں یہ کارنامہ انجام دیا تھا، وہ 11 ہزار رنز مکمل کرنے والے دنیا کے دسویں اور بھارت کے چوتھے کھلاڑی بن گئے ہیں۔
قبل ازیں بھارت کی طرف سے سارو گنگولی بھی 11 ہزار سے زائد رنز بنا چکے ہیں۔
ویب ڈیسک:چیمپئنز ٹرافی 2025 کے دوسرے میچ میں بنگلادیش نے بھارت کو جیت کےلیے 229 رنز کا ہدف دے دیا، بھارت کیخلاف بنگلہ دیش کی ٹیم نے چھٹی وکٹ کی شراکت میں ریکارڈ قائم کردیا۔
تفصیلات کےمطابق دبئی میں بنگلادیش کی ٹیم کا پہلے بیٹنگ کرنے کا فیصلہ بھارتی بولرز نے ابتدا میں ہی غلط ثابت کردیا،بھارتی بولرز نے 9ویں اوور میں ہی بنگلادیش کی آدھی ٹیم کو صرف 35 رنز پر پویلین بھیج دیا۔
تاہم چھٹی وکٹ پر بنگلادیشی بیٹرز توحید ہردوئے اور جاکر علی 154 رنز کی پارٹنرشپ بنائی اور اپنی ٹیم کو ایک قابل دفاع ٹوٹل تک پہنچانے میں کلیدی کردار ادا کیا، آئی سی سی چیمپئنز ٹرافی میں بنگلہ دیش نے بھارت کے خلاف چھٹی وکٹ کی شراکت میں 154 رنز بڑی ’پارٹنرشپ‘ کا ریکارڈ قائم کیا۔
جاکر 68 رنز کی اننگز کھیل کر آؤٹ ہوئے تو توحید نے ٹیل اینڈرز کے ساتھ رنز بنانے کا سلسلہ جاری رکھا، اس دوران توحید ہردوئے پٹھوں میں کھنچاؤ کا شکار ہوئے، اس کے باوجود انہوں نے 49ویں اوور میں اپنی سنچری مکمل کی۔
تاہم آخری اوور میں وہ بنگلایش کے آؤٹ ہونے والے آخری کھلاڑی تھے جس کے ساتھ ہی بنگلادیشی ٹیم 228 رنز پر آل آؤٹ ہوگئی۔
February 20, 2025
February 20, 2025
(ویب ڈیسک ) آئی سی سی چیمپئنز ٹرافی 2025 میں نیوزی لینڈ کے خلاف افتتاحی میچ میں پاکستان ٹیم پر جرمانہ عائد کردیا گیا۔
پاکستان کرکٹ ٹیم پر سلو اوور ریٹ کی وجہ سے میچ فیس کا پانچ فیصد جرمانہ عائد کیا گیا ہے۔ پاکستان ٹیم نے مقررہ وقت میں ایک اوور کم پھینکا تھا جس کی وجہ سے پاکستان ٹیم پر جرمانہ عائد کیا گیا ہے۔
آئی سی سی قوانین کے تحت فی اوور کھلاڑیوں پر میچ فیس کا پانچ فیصد جرمانہ عائد کیا گیا ہے۔قومی ٹیم کے کپتان محمد رضوان نے غلطی مان کر جرمانہ تسلیم کرلیا ہے۔
واضح رہے کہ گزشتہ روز پاکستان میں 29 سال بعد ہونے والے آئی سی سی ایونٹ کے افتتاحی پہلے میچ میں نیوزی لینڈ نے پاکستان کو 60 رنز سے شکست دی تھی۔
(ویب ڈیسک ) سندھ حکومت نے آئی سی سی چیمپئنز ٹرافی میں پاک بھارت میچ بڑی اسکرینز پر دکھانے کا فیصلہ کر لیا۔
سندھ حکومت نے آئی سی سی چیمپئنز ٹرافی میں پاک بھارت میچ دکھانے کے لیے عوامی مقامات پر بڑی اسکرین لگانے کا فیصلہ کیا ہے۔ 23 فروری کو عوامی مقامات پر بڑی اسکرین پر پاک بھارت میچ لائیو دکھائے جائیں گے۔
اس حوالے سے صوبائی وزیر کھیل محمد بخش مہر کا کہنا ہے کہ کراچی، حیدرآباد، لاڑکانہ، گھوٹکی سمیت 30 اضلاع میں پاک بھارت میچ براہ راست دکھانے کا اہتمام کیا گیا ہے۔
انہوں نے کہا کہ کراچی میں سی ویو، سندھ یوتھ کلب اور گلستان جوہر میں بڑی اسکرینز لگائی جائیں گی۔
خیال رہے کہ 23 فروری بروز اتوار کو پاکستان آئی سی سی چیمپئنز ٹرافی میں اپنا دوسرا میچ بھارت کے خلاف دبئی میں کھیلے گا۔
گزشتہ روز پاکستان اپنا پہلا میچ نیوزی لینڈ کے خلاف کھیلا تھا جس میں نیوزی لینڈ نے پاکستان کو شکست دیدی تھی۔
February 20, 2025
February 20, 2025
ویب ڈیسک:چیمپئنز ٹرافی کے پہلے میچ میں فیلڈنگ کے دوران انجری کا شکار ہوکر ایونٹ سے آؤٹ ہونے والے قومی ٹیم کے اوپنر فخر زمان نے بیان جاری کردیا۔
ایکس پر جاری بیان میں فخر زمان نے لکھا کہ ’سب سے بڑے اسٹیج پر پاکستان کی نمائندگی کرنا ہر قومی کرکٹر کیلئے ایک اعزاز اور خواب ہے، مجھے فخرہے کہ مجھے بھی پاکستان کی نمائندگی کا اعزاز حاصل ہوا ‘۔
فخر زمان نے اپنی ٹوئٹ میں کہا کہ’بدقسمتی سے میں اب آئی سی سی چیمپئنز ٹرافی 2025 سے باہر ہوں لیکن یقیناً اللہ بہترین منصوبہ ساز ہے، میں گھر سے اپنے کھلاڑیوں کو سپورٹ کروں گا‘۔
قومی کرکٹر نے مزید لکھا کہ ’ یہ تو صرف آغاز ہے، واپسی اس شکست سے زیادہ مضبوط ہوگی ‘۔
یاد رہے کہ فخر زمان چیمپئنز ٹرافی کے ابتدائی میچ میں فیلڈنگ کے دوران انجری کا شکار ہوکر ٹورنامنٹ سے باہر ہوگئے تھے جس کے بعد فخر کی جگہ ٹیم میں امام الحق کو شامل کرلیا گیا ہے۔
دوسری جانب قومی ٹیم بھارت کے خلاف 23 فروری کو ہونے والے میچ کے لیے کراچی سے دبئی کے لیے آج روانہ ہوگئی ہے۔
ویب ڈیسک: انجری کے باعث فخر زمان کے چیمپئنز ٹرافی سے باہر ہونے کے بعد آئی سی سی ایونٹ ٹیکنیکل کمیٹی نے قومی اسکواڈ میں امام الحق کی شمولیت کی اجازت دے دی۔
ایونٹ ٹیکنیکل کمیٹی میں وسیم خان،عثمان واہلہ،سارا ایڈگر اور شان پولگ شامل ہیں۔
فخر زمان کے ایونٹ سے باہر ہونے کے بعد قومی پاکستان کرکٹ بورڈ کی جانب سے متبادل کھلاڑی کے نام پر غور کیا جا رہا تھا تاہم اب امام الحق کو فخر زمان کی جگہ اسکواڈ میں شامل کرلیا گیا ہے۔
یاد رہے کہ فخر زمان نیوزی لینڈ کے خلاف میچ میں فیلڈنگ کے دوران انجری کا شکار ہو گئے تھے جس کے باعث ان کی جگہ اوپن کرنے بھی سعود شکیل آئے تھے اور فخر زمان کو بیٹنگ کے لیے چوتھے نمبر پر بھیجا گیا تھا۔
پاکستان کرکٹ بورڈ کی جانب سے فخر زمان کے انجری کے باعث چیمپئنز ٹرافی سے آؤٹ ہونے کی تصدیق کر دی گئی تھی بعد ازاں پی سی بی نے فخر زمان کے متبادل کھلاڑی کے لیے آئی سی سی سے رابطہ کیا تھا۔
واضح رہے کہ امام الحق چیمپئنز ٹرافی کے آغاز سے قبل وارم اپ میچز میں پاکستان شاہینز میں شامل تھے اور انہوں نے جنوبی افریقا کے خلاف میچ میں 98 رنز کی شاندار اننگز بھی کھیلی تھی۔
February 20, 2025
February 20, 2025
ویب ڈیسک: آئی سی سی چیمپئنز ٹرافی کا میلہ لاہور میں سجنے کو دو دن باقی ہیں۔ جس کیلئے سیکورٹی تیاریاں عروج پر ہیں۔لاہورپولیس نے سیکورٹی اداروں کے ساتھ قذافی اسٹیڈیم میں فرضی مشقیں کیں۔
تفصیلات کے مطابق آپریشن محفوظ انخلاء کے نام سے ہنگامی صورتحال سے نبٹنے کی مشقیں کی گئیں۔ایس پی سیکورٹی عبدالوہاب کی نگرانی میں ایس پی ماڈل ٹاؤن اخلاق تارڑ نے آپریشن محفوظ انخلاء مشقوں کو لیڈ کیا۔
ڈی آئی جی آپریشنز فیصل کامران کے مطابق فرضی مشق میں پولیس، آرمی، رینجر، ایلیٹ فورس کے دستوں نے شرکت کی۔بم ڈسپوزل سکواڈ، سی ٹی ڈی، سپیشل برانچ، ریسکیو 1122 نے بھی مشقوں میں حصہ لیا۔فرضی مشق میں حملے کی صورت میں فوری رسپانس کا عملی نمونہ پیش کیا گیا۔موک ایکسرسائز کی مدد سے سیکورٹی پلان کو عملی حالت میں چیک کیا گیا۔مشق کا مقصد کسی بھی ہنگامی صورت حال میں سیکورٹی فورسز کا باہمی رابطہ مضبوط کرنا ہے۔
ڈی آئی جی آپریشنز کا مزید کہنا تھا کہ کوئیک رسپانس فورسز کو ہنگامی صورتحال سے نمٹنے کیلئے جدید سامان فراہم کیا گیاہے۔دس ہزار افسران و جوان چیمپین ٹرافی سیکورٹی ڈیوٹی سرانجام دیں گے۔چار درجاتی سیکورٹی حصار کے باوجود ہنگامی صورتحال کے لیے بھی مکمل تیار ہیں۔آئی سی سی سیکورٹی ٹیموں نے سیکورٹی پلان پر مکمل اعتماد کا اظہار کیا ہے۔
ویب ڈیسک: آئی سی سی چیمپئنز ٹرافی کے دوسرے میچ میں بنگلادیش نے بھارت کے خلاف ٹاس جیت کر پہلے بیٹنگ کا فیصلہ کیا ہے۔تاہم بنگلہ دیش کی بیٹنگ لائن اپ ریت کی دیوار ثابت ہوئی اور صرف 35 رنز پر آدھی ٹیم پویلین لوٹ گئی۔بنگلہ دیش نے مقرررہ اووز میں228 رنز بنا کر بھارت کو جیت کیلئے229 رنز کا ہدف دےدیا جو بھارت نے باآسانی 4 وکٹوں کے نقصان پر حاصل کرلیا۔
پاکستان کی میزبانی میں کھیلے جارہے اس ایونٹ کا یہ میچ دبئی انٹرنیشنل کرکٹ اسٹیڈیم میں ہورہا ہے جہاں بنگال ٹائیگرز کی آدھی ٹیم یعنی 5 کھلاڑی صرف 35 رنز بناکر آؤٹ ہوگئے۔
اوپنر سومیا سرکار اور مہدی حسنکو محمد شامی جب کہ کپتان نجم الحسن شنتو کو ہرشت رانا نے پویلین لوٹایا۔ بنگلادیش کے تنزید حسن اور مشفق الرحیم کو اکشر پٹیل نے آؤٹ کیا۔
5 وکٹیں گرنے کے بعد ذاکر علی اور توحید ہردوئی نے 154 رنز کی قیمتی شراکت قائم کی ، 189 کے مجموعی اسکور پر ذاکر علی 68 رنز بنا کر آؤٹ ہوئے۔ریشاد حسین نے 18 رنز کی اننگ کھیلی۔یوحید ہردوئی نے شاندار سنچری اسکور کرتے ہوئے 100 رنز پر آؤٹ ہوئے۔ شبھمن گل نے بنگلہ دیش کے خلاف شاندار سنچری بنا ڈالی ،129 گیندوں پر 101 رنز بنا کر سب سے نمایاں رہے۔ جبکہ کے ایل راہول نے 47 گیندوں پر 41 رنز بنائے۔
بھارت کی جانب سے محمد شامی نے 5 کھلاڑیوں کو آؤٹ کیا۔ہرشت رانا نے 3 جبکہ اکشر پٹیل نے 2 وکٹیں حاصل کیں۔
ٹاس کے موقع پر گفتگو کرتے ہوئے بھارتی کپتان روہت شرما نے کہا ہر ٹیم گیم ٹورنامنٹ جیتنے کی کوشش کرتی ہے، ہم بھی یہی چاہتے ہیں، ٹاس ہوگیا اب ہمیں فوکس کرنا ہے کہ گیند کے ساتھ کس طرح کھیلنا ہے۔
بنگلادیشی کپتان نجم الحسن شنتو نے کہا کہ ٹیم کی تیاری سے خوش ہوں، ٹیم میں دو اسپنرز اور 3 فاسٹ بولرز کو شامل کیا ہے۔
February 20, 2025
February 20, 2025
ویب ڈیسک: آئی سی سی چیمپئنز ٹرافی میں ہائی وولٹیج پاک بھارت ٹاکرے کیلئے قومی سکواڈ کراچی سے دبئی روانہ ہوگیا ہے۔
تفصیلات کے مطابق پاکستان کرکٹ ٹیم 23 فروری کو بھارت کے خلاف سیریز کا بڑا میچ کھیلے گی۔
پاکستان ٹیم کل دبئی میں پریکٹس سیشن میں حصہ لے گی۔
یاد رہے کہ آئی سی سی چیمپئنز ٹرافی 2025 کے افتتاحی میچ میں دفاعی چیمپئن پاکستان کو نیوزی لینڈ نے 60 رنز کے بڑے مارجن سے شکست دی تھی۔
کراچی کے نیشنل بینک اسٹیڈیم میں کھیلے گئے میچ میں پاکستان کی دعوت پر پہلے بیٹنگ کرتے ہوئے کیوی ٹیم نے 5 وکٹوں پر 320 رنز کا پہاڑ کھڑا کیا جبکہ آخری 10 اوورز میں پاکستانی بولرز کو 113 رنز پڑے۔
کیویز نے ول ینگ اور ٹام لیتھم کی سینچریوں کی بدولت 320 رنز بنائے اور گرین شرٹس کو جیت کیلئے 321 رنز کا ہدف دیا۔
دوسری اننگز میں پاکستان نے مایوس کن آغاز کیا، بابراعظم نے 90 گیندوں پر 64 اور خوشدل شاہ کے 69 رنز کے علاوہ کوئی پلئیر ففٹی اسکور نہ کرسکا اور یوں پاکستانی اننگز محض 47.2 اوورز میں 260 رنز بنا کر آؤٹ ہوگئی۔
ویب ڈیسک: آئی سی سی چیمپئنز ٹرافی شروع ہوتے ہی پاکستان کا سفر مشکل اور اگر مگر کا کھیل شروع ہوگیا۔
نیوزی لینڈ سے پہلا میچ ہارنے کے باوجود اب بھی پاکستان ٹیم سیمی فائنل میں کوالیفائی کرسکتی ہے۔
اگر پاکستان اگلے دونوں میچوں میں بھارت اور بنگلا دیش کو ہرادے اور نیوزی لینڈ بھارت کو شکست دے دے لیکن پاکستان کو ٹورنامنٹ میں باؤنس بیک کرنے کیلئےغیر معمولی کارکردگی دکھانا ہوگی۔
اس کے علاوہ پاکستان کو نیٹ رن ریٹ کو بھی نظر میں رکھنا ہوگا کیونکہ ایسا امکان ہوسکتا ہے کہ 3 ٹیمیں 2، 2 جیت کے ساتھ گروپ کا اختتام کریں تو نیٹ ریٹ کی بنیاد پر فیصلہ ہو۔
دوسری جانب چیمپئنز ٹرافی میں ہوم ٹیم کے خلاف کیویز نے اپنا 100فیصد ریکارڈ برقرار رکھا اور مسلسل چوتھی کامیابی حاصل کی۔
یاد رہے کہ آئی سی سی چیمپئنز ٹرافی 2025 کے افتتاحی میچ میں دفاعی چیمپئن پاکستان کو نیوزی لینڈ نے 60 رنز کے بڑے مارجن سے شکست دی تھی۔
کراچی کے نیشنل بینک اسٹیڈیم میں کھیلے گئے میچ میں پاکستان کی دعوت پر پہلے بیٹنگ کرتے ہوئے کیوی ٹیم نے 5 وکٹوں پر 320 رنز کا پہاڑ کھڑا کیا جبکہ آخری 10 اوورز میں پاکستانی بولرز کو 113 رنز پڑے۔
کیویز نے ول ینگ اور ٹام لیتھم کی سینچریوں کی بدولت 320 رنز بنائے اور گرین شرٹس کو جیت کیلئے 321 رنز کا ہدف دیا۔
دوسری اننگز میں پاکستان نے مایوس کن آغاز کیا، بابراعظم نے 90 گیندوں پر 64 اور خوشدل شاہ کے 69 رنز کے علاوہ کوئی پلئیر ففٹی اسکور نہ کرسکا اور یوں پاکستانی اننگز محض 47.2 اوورز میں 260 رنز بنا کر آؤٹ ہوگئی۔
February 20, 2025
February 20, 2025
ویب ڈیسک: چیمپئنز ٹرافی کے ابتدائی میچ میں فیلڈنگ کے دوران انجری کا شکار ہونے والے قومی ٹیم کے اوپنر فخر زمان ٹورنامنٹ سے باہر ہوگئے۔
ذرائع کے مطابق قومی ٹیم بھارت کے خلاف 23 فروری کو ہونے والے میچ کے لیے کراچی سے دبئی کے لیے آج روانہ ہو گئی ہے تاہم فخر زمان دبئی روانہ ہونے والی ٹیم کے ہمراہ نہیں جا رہے۔
ذرائع کا بتانا ہے کہ فخر زمان کی انجری سنجیدہ نوعیت کی ہے، فخر زمان ٹورنامنٹ میں مزید نہیں کھیل پائیں گے۔
ذرائع کے مطابق پاکستان کرکٹ بورڈ کی جانب سے متبادل کھلاڑی کیلئے آئی سی سی ٹیکنیکل کمیٹی سے رابطہ بھی کیا گیا ہے، فخر زمان کی جگہ متبادل اوپنر کے لیےمخلتف ناموں پر غور کیا جا رہا ہے۔
ذرائع پی سی بی کا بتانا ہے جب فخر زمان نیوزی لینڈ کے خلاف میچ میں فیلڈنگ کرتے ہوئے گرے تھے تو انہوں نے اسی وقت بتا دیا تھا کہ وہ کھڑے ہونے کے قابل نہیں ہیں تاہم فزیو نے انہیں ٹریٹمنٹ کے بعد اٹھایا تھا اور پھر ٹیم مینجمنٹ نے انہیں بیٹنگ میں آزمانے کا فیصلہ کیا تھا تاہم بیٹنگ کے دوران بھی وہ مشکل میں نظر آئے تھے۔
چیمپئنز ٹرافی کے پہلے میچ میں فخر زمان کی انجری کی وجہ سے پاکستان کی جانب سے اوپننگ کے لیے بابر اعظم کے ساتھ سعود شکیل آئے تھے جبکہ فخر زمان مڈل میں بیٹنگ کے لیے آئے تھے۔ گزشتہ روز کھیلے گئے میچ میں نیوزی لینڈ نے پاکستان کو 60 رنز سے شکست دی تھی۔
ویب ڈیسک: آج ہونے والےچیمپئنز ٹرافی کے افتتاحی میچ میں پاکستان کو نیوزی لینڈ نے 60 رنز سے شکست دے دی، میچ کے بعد پاکستانی ٹیم کے بیٹر سلمان علی آغا نے کہا آج بھی اور پچھلے میچز میں بھی ہم نے بڑی اننگز نہیں کھیلی۔
پاکستانی ٹیم کے بیٹر سلمان علی آغا نے پریس کانفرنس کرتے ہوئے کہا کہ ہمیں بڑی اننگ کھیلنی ہوگی، ہمیں ایک میچ بُرا یا ایک میچ اچھا ایسے نہیں کھیلنا ہوگا۔
ہمیں اگر اچھی ٹیموں میں شمار ہونا ہے تو لگاتار میچ جیتنے ہونگے،اوپنگ میں ہمارا اچھا مومنٹم نہیں بنا جس کے باعث زیادہ اسکور نہیں ہوا۔
پاور پلے جس طرح کھیلنا چاہئے تھا اس طرح ہم کھیل نہیں پائے، ساؤتھ افریکہ کیخلاف ہمارے پاور پلے کا اسکور اچھا تھا تو ہماری پارٹنر شپ بھی اچھی رہی، آج بھی اگر فخر زمان اوپنگ کرتے ہو پاور پلے کا اسکور مختلف ہوتا۔
February 19, 2025
February 19, 2025
(ویب ڈیسک )آئی سی سی چیمپئنز ٹرافی کے سلسلے میں شائقین کی دلچسپی کےلیے ٹکٹس کی نئی کیٹیگری متعارف کروادی گئی ہے۔
شائقین کےلیے 50 ہزار درہم والا پیکیج متعارف کراویا گیا ہے۔ 4 میچز کیلئے 2 لاکھ درہم خرچ کرنا ہوں گے۔اس پیکیج کی 4انمول ٹکٹس کی قیمت ایک کروڑ 52 لاکھ پاکستانی روپے بنتی ہے۔ چاروں ٹکٹس وی آئی پی سوئٹ کی ہیں۔
اس پیکج کے تحت بھارت کے 3 میچز اور ایک سیمی فائنل دیکھنے کا موقع ملے گا۔ اس انمول پیکیج کو آن لائن خریدا جاسکتا ہے۔لیکن ایک کسٹمر زیادہ سے زیادہ صرف 4 انمول ٹکٹس خرید سکتا ہے جس کے کیلئے اسے 2 لاکھ درہم خرچ کرنا ہونگے۔
ویب ڈیسک: بھارتی ٹیم کے کپتان روہت شرما نے نیوز کانفرنس کرتے ہوئے کہا کہ ابھی پہلے میچ پر فوکس ہے، ایک ایک میچ پر فوکس کرکے جیتنے کی کوشش کریں گے۔
بھارتی ٹیم کے کپتان روہت شرما کا کہنا تھا کہ بھارتی ٹیم بہت متوازن ہے، اسپنر اور آل راؤنڈز کاکمبی نیشن ہے، آئی سی سی کے تمام ایونٹس میں ہرٹیم ایونٹ جیتنے کا سوچ کر آتی ہے، کامیابی کے لئے 2 سے 3 کھلاڑیوں کا بڑا اسکور کرنا ضروری ہے۔
ہر گراونڈ کی اپنی کنڈیشن اور چیلنجز ہوتے ہیں، دبئی کے ماحول سے ہم آہنگ ہونے کی کوشش کررہے ہیں، کھلاڑیوں پر بھروسہ ہے اچھا پرفارم کریں گے۔
February 19, 2025
February 19, 2025
ویب ڈیسک: چیمپئنزٹرافی کا ہائی وولٹیج ٹاکرا پاکستان اور بھارت کے درمیان 23 فروری کو دبئی کے کرکٹ اسٹیڈیم میں ہونے جارہا ہے۔ جس کیلئے ٹکٹوں کی ریکارڈ فروخت ہوچکی ہے۔
تاہم اب اماراتی حکومت پاکستانی شائقین کرکٹ کے دل توڑ رہی ہے۔ ذرائع نے خبر دی ہے کہ جن شہریوں کے پاس پاک بھارت میچ کے ٹکٹس موجود ہیں۔ ان کی بھی ویزا درخواستیں مسترد کی جارہی ہے۔
اماراتی حکومت نہ صرف پاکستانی شہریوں کے بلکہ خلیجی ممالک میں موجود پاکستانیوں کی ویزا درخواستیں مسترد کررہی ہے۔ بتایا گیا ہے کہ اس حوالے سے کوئی متحدہ عرب امارات کی حکومت نے کوئی بیان بھی جاری نہیں کیا ہے۔
ذرائع نے ایک پی سی بی عہدیدار کے حوالے سے خبر دی ہے کہ اماراتی حکومت سے ٹکٹ ہولڈر پاکستانیوں کی ویزا درخواستیں منظور کروانے پر کرکٹ بورڈ بات کررہا ہے۔
اس صورتحال نے متحدہ عرب امارات کا سفر کرنے کے خواہشمند پاکستانیوں کے لیے ویزا تک رسائی کے وسیع تر مسئلے کو اجاگر کیا ہے۔ بہت سے پاکستانیوں نے اپنے وزیٹر ویزا مسترد ہونے پر وضاحت کا مطالبہ کیا ہے۔
مسترد ہونے کی صحیح وجوہات ابھی تک واضح نہیں ہیں، لیکن متحدہ عرب امارات کی حکومت نے پاکستانیوں کے لیے ویزا پر مکمل پابندی کی تردید کی ہے۔
ابوظہبی میں پاکستانی سفارت خانے نے گزشتہ سال جولائی میں ایک بیان جاری کیا تھا جس میں شہریوں پر زور دیا گیا تھا کہ وہ متحدہ عرب امارات کے وزٹ ویزا کی شرائط پر عمل کریں۔
سفارتخانے نے کہا کہ مسافروں کو یہ یقینی بنانا چاہیے کہ ان کے پاس اپنے قیام کو پورا کرنے کے لیے ضروری دستاویزات اور کافی فنڈز موجود ہیں، ورنہ انہیں پہنچنے پر واپس بھیجے جانے کا خطرہ ہے۔
ویب ڈیسک : (علی رضا )پاکستان اور بھارت کے درمیان میچ 23 فروری کو دبئی میں کھیلا جائے گا۔ اس میچ کے ٹکٹ تو فروخت ہو چکے ہیں لیکن اس میچ کے ٹکٹوں کی بلیک مارکیٹنگ جاری ہے۔ میچ کے ٹکٹوں کی قیمت اتنی زیادہ ہے کہ کسی کا بھی دماغ اڑا دے گا۔
یمپئنز ٹرافی کا اہم ترین میچ انڈیا اور پاکستان کے درمیان 23فروری کو دبئی میں کھیلا جائے گا، اس میچ کے پانچ ارب پاکستانی روپے کے ٹکٹس بکے ہیں، یہ ایک بڑی رقم ہے لیکن اماراتی بورڈ بھی اس میں سے اپنا حصہ لے گا جبکہ پی سی بی کے حصے میں کم رقم آئے گی
اس میچ کے ٹکٹوں کی بلیک مارکیٹنگ جاری ہے۔ اس میچ کو دیکھنے کی اتنی ڈیمانڈ ہے کہ بلیک مارکیٹ میں ٹکٹ بیچنے والے زیادہ تر لوگوں نے اس کی قیمت آسمان تک پہنچا دی ہے۔ میڈیا رپورٹ کے مطابق پاک بھارت میچ کے ٹکٹ 4 سے 5 لاکھ روپے میں فروخت ہو رہے ہیں۔
ایک ویب سائٹ پر دبئی کے گرینڈ لاؤنج کے ٹکٹ کی قیمت 4 لاکھ 29 ہزار روپے ہے۔ اسی وقت، اسی گراؤنڈ کے گرینڈ لاؤنج میں ایک اچھی سیٹ کی قیمت تقریباً 5 لاکھ روپے تک پہنچ رہی ہے۔ میچ کا بہترین نظارہ دبئی اسٹیڈیم کے گرینڈ لاؤنج سے دستیاب ہے۔
یادرہے ٹی 20 ورلڈ کپ 2024 کے دوران اس میچ کے ٹکٹ کی قیمت بلیک مارکیٹ میں 16 لاکھ تک پہنچ گئی تھی۔
February 19, 2025
February 19, 2025
ویب ڈیسک: آئی سی سی چیمپئنز ٹرافی 2025 کی افتتاحی تقریب کے موقع پر پاک فضائیہ کے شاندار فضائی مظاہرے نے پاکستانی قوم کو خراج تحسین پیش کیا۔
پاک فضائیہ کی شیردل ٹیم نے فضا میں سبز ہلالی پرچم کے رنگ بکھیر کر قوم کو سلام پیش کیا، جبکہ شاہین بریک کے دلکش مظاہرے نے شائقین کو مسحور کر دیا۔
جے ایف-17 تھنڈر، ایف-16 اور شیردل شاہینوں کی مہارت نے فضاؤں میں جوش و ولولہ پیدا کر دیا۔ فخرِ پاکستان جے ایف-17 تھنڈر، جو کئی بین الاقوامی مشقوں میں اپنی حربی صلاحیتوں کا لوہا منوا چکا ہے، بھی فلائی پاسٹ میں شامل تھا۔
پاکستان میں تیار کیے جانے والے جے ایف-17 تھنڈر کی مختلف دوست ممالک کی فضائی افواج میں شمولیت اس کی بے مثال حربی صلاحیتوں کا ثبوت ہے۔
پاک فضائیہ کے اس شاندار فلائی پاسٹ نے اس عزم کا اظہار کیا کہ پاک فضائیہ ہمیشہ قوم کے شانہ بشانہ کھڑی ہے۔
ویب ڈیسک: آئی سی سی چیمپئنز ٹرافی 2025 کے افتتاحی میچ میں پاکستان نے نیوزی لینڈ کیخلاف ٹاس جیت کر پہلے باؤلنگ کرنے کا فیصلہ کیا تھا۔ کیویز نے 5 وکٹوں کے نقصان پر 320 رنز بنائے جواب میں پاکستان کی پوری ٹیم 47.2 اوورز میں 260 رنز پر ڈھیر ہوگئی۔
کیویز کی ٹیم شروع میں مشکل کا شکار رہی۔ نیوزی لینڈ کی پہلی وکٹ 39 رنز پر گرگئی۔ڈیوون کانوے 10 رنز بنا کر ابرار کی گیند پر وکٹ دے بیٹھے۔
نیوزی لینڈ کو دوسرا نقصان کین ولیمسن کی شکل میں برداشت کرنا پڑا۔صرف ایک کے انفرادی اسکور پر نسیم شاہ کی گیند پر ولیمسن محمد رضوان کو کیچ تھما بیٹھے۔
نیوزی لینڈ کو تیسرا نقصان ڈیرل مچل کی شکل میں برداشت کرنا پڑا۔ جو حارث رؤف کی گیند پر شاہین آفریدی کو کیچ تھما بیٹھے۔ انہوں نے 25 گیندوں پر 10 رنز اسکور کیے۔
کیوی بلے باز ول ینگ نے ذمہ دارانہ بیٹنگ کرتے ہوئے 113 گیندوں پر 107 رنز بنا کر آؤٹ ہوئے جبکہ لیتھم 118 رنز بنا کر نمایاں رہے۔فلپس کی جانب سے 39 گیندوں پر 61 رنز کی تیز اننگز کھیلی گئی۔انہوں نے 4 چھکے اور 3 چوکے لگائے۔
پاکستان کی جانب سے نسیم شاہ اور حارث رؤف نے 2،2 کھلاڑیوں کو آؤٹ کیا جبکہ ابرار نے 1 وکٹ حاصل کی۔
ہدف کے تعاقب میں پاکستان کی پہلی وکٹ 8 رنز پر گری،سعود شکیل 6 رنز بنا کر آؤٹ ہوئے،قومی ٹیم کے کپتان محمد رضوان 3 رنز بنا کر فلپس کے ہاتھوں کیچ آؤٹ ہو ئے،فخرزمان 24 رنز بنا کر بولڈ ہوئے، بابراعظم نے 64 ، سلمان علی آغا 42 اور خوشدل شاہ 69 رنز بنا کر نمایاں رہے۔
فخرزمان پہلے میچ میں زخمی ہوکر گراؤنڈ سے باہر:
چیمپئنز ٹرافی کے افتتاح میچ میں نیوزی لینڈ کیخلاف میچ میں فیلڈنگ کے دوران فخرزمان انجری کا شکار ہو گئے۔میچ کے دوران چوکا روکنے کی کوشش میں قومی بلے باز فخرزمان انجری کا شکار ہو گئے اور گراؤنڈسے باہر چلے گئے۔
تاہم کچھ ہی دیر بعد فخر زمان دوبارہ فیلڈ میں واپس آگئے۔
نیشنل بینک سٹیڈیم کراچی میں قومی ٹیم کے کپتان محمد رضوان نے ٹاس کے موقع پر گفتگو کرتے ہوئے کہا ہے کہ کوشش ہو گی مہمان ٹیم کیخلاف بہتر کھیل پیش کریں اور جیت کیساتھ ٹورنامنٹ کا آغاز کریں۔
پاکستان کرکٹ ٹیم کے کپتان محمد رضوان نے کہا ہے کہ 15 کے 15 کھلاڑی کپتان ہیں، جیت کے لیے نیوزی لینڈ سے اچھا کھیلنا ہوگا، بابر اعظم ہمارے بہترین کھلاڑی ہیں، اننگز وہی اوپن کریں گے، دوسری اننگزمیں یہاں اوس پڑتی ہے، ہم دفاعی چیمپئن ہیں،تھوڑا دباؤ ہوگا۔
اس موقع پر نیوزی لیںڈ کے کپتان مچل سینٹنر نے کہا ہے کہ میچ میں فتح کیلئے پر امید ہیں، کوشش ہوگی میزبان پاکستان کیخلاف بڑا ٹارگٹ رکھیں اور پریشر میں لائیں، کراچی سٹیڈیم کی وکٹ اچھی لگ رہی ہے، رات میں اوس ہوگی، ٹیم میں فاسٹ باؤلر میٹ ہنری کی واپسی ہوئی ہے۔
قومی سکواڈ
پاکستانی ٹیم میں کپتان محمد رضوان، فخر زمان، بابر اعظم، سعود شکیل، سلمان علی آغا، طیب طاہر، خوشدل شاہ، شاہین شاہ آفریدی، نسیم شاہ، حارث رؤف اور ابرار احمد شامل ہیں۔
کیوی ٹیم
نیوزی لینڈ کی ٹیم میں کپتان مچل سینٹنر، ول ینگ، ڈیون کانووے، کین ولیمسن، ڈیرل مچل، ٹام لیتھم، گلین فلپس، مائیکل بریسیول، میٹ ہنری، نیتھن سمتھ اور ول اوررکی شامل ہیں۔
یاد رہے کہ ایونٹ کا سب سے بڑا پاک بھارت ٹاکرا 23 فروری کو دبئی میں ہو گا، کراچی، لاہور، راولپنڈی اور دبئی میں 8 بہترین ٹیمیں چیمپئن بننے کی جنگ لڑیں گی۔
February 19, 2025
February 19, 2025
ویب ڈیسک : (علی زیدی)متحدہ عرب امارات میں کرکٹ کا جنون سر چڑھ کر بولنے لگا۔ بھارتی نژاد تاجر اور ڈینیوب گروپ کے وائس چیئرمین، انیس ساجن نے کمپنی ملازمین میں آئی سی سی چیمپئنز ٹرافی 2025 کے میچوں کے ٹکٹ مفت تقسیم کر دئیے۔ یہی نہیں مفت کھانے پینے کے ٹوکن اور گھر لے جانے کیلئے کھانےکے پیکٹ بھی ملیں گے۔
ڈینیوب گروپ کے ملازمین دبئی انٹرنیشنل کرکٹ اسٹیڈیم میں پاک بھارت میچ سمیت دبئی میں بھارتی ٹیم کے ہونے والے تمام میچز دیکھ سکیں گے۔
یادرہے متحدہ عرب امارات میں 3.7 ملین سے زیادہ بھارتی اور تقریباً 1.7 ملین پاکستانی شہری رہتے ہیں۔ جبکہ 0.92 ملین بنگلہ دیشی شہری بھی متحدہ عرب امارات میں رہائش پذیر ہیں ۔ جنوبی ایشیائی شہری ہی کرکٹ کے بارے میں زیادہ پرجوش ہیں۔
کچھ دلچسپ میچوں کے لیے مفت ٹکٹ تقسیم کرنے کا منصوبہ بنایا گیا ہے۔ ان میں 20 فروری کو بنگلہ دیش بمقابلہ بھارت، 23 فروری کو بھارت بمقابلہ پاکستان، 2 مارچ کو بھارت بمقابلہ نیوزی لینڈ اور 4 مارچ کو سیمی فائنل شامل ہیں۔مفت ٹکٹوں کے لیے ملازمین کا انتخاب لکی قرعہ اندازی کے ذریعے کیا گیا۔
کمپنی نے اسٹیڈیم میں اسنیکس اور پانی خریدنے کے لیے مفت ٹکٹ کے ساتھ ساتھ کوپن فراہم کرنے کا انتظام کیا ہے۔ اس کے علاوہ میچ کے بعد کھانے کے پیکٹ دوبارہ گھر لے جانے کے لیے فراہم کیے جائیں گے۔
ویب ڈیسک: آئی سی سی چیمپئنز ٹرافی کے آغاز سے قبل شاہینوں کے لیےکراچی کے مقامی ہوٹل میں ٹیم ڈنرکا اہتمام کیا گیا۔ جس میں ٹیم مینجمنٹ اور کھلاڑیوں نے شرکت کی۔
تفصیلات کے مطابق نیوزی لینڈ کے خلاف میچ سے قبل کراچی کے مقامی ہوٹل میں پاکستان کرکٹ اسکواڈ کا ٹیم ڈنرہوا۔ جس میں ٹیم مینجمنٹ اور کھلاڑیوں نے شرکت کی۔
ڈنر کے دوران کھلاڑی خوش گپیوں میں مصروف رہے۔کپتان محمد رضوان کی نسیم شاہ کے ساتھ چھیڑ خانی کی دلچسپ ویڈیو بھی سوشل میڈیا پر وائرل ہے۔ ڈنر کے بعد کھلاڑیوں نے فینز سے ملاقات کی۔ننھے فینز کے ساتھ کھلاڑیوں نے تصاویر بنوائیں اور آٹوگراف دیئے۔
February 19, 2025
February 19, 2025
ویب ڈیسک: میڈیا اور یوٹیوبرز کے احتجاج کے باعث بھارتیوں کے جھنڈا نہ لگانے کے اعتراض کو بھی پاکستان نے ختم کردیا۔
گزشتہ روز بھارتی صحافی و سوشل میڈیا ایکسپرٹس پاکستان کی میزبانی میں ہونیوالی چیمپئینز ٹرافی میں اسٹیڈیم میں بھارت کا جھنڈا نہ ہونے پر آگ بگولہ ہوگئے تھے۔
اس موقع پر نیشنل اسٹیڈیم کراچی میں بھارت کے علاوہ تمام ٹیموں کے جھنڈے چھت پر لگائے گئے ہیں تاہم انڈین میڈیا اور سوشل میڈیا ایکسپرٹس نے بھارت کا پرچم نہ لگانے پر پاکستان کرکٹ بورڈ (پی سی بی) کو تنقید کا نشانہ بنایا تھا۔
ادھر چیمپئینز ٹرافی کے انعقاد کو لیکر پاکستان مخالف پروپیگنڈا کرنیوالا بھارتی میڈیا اب افتتاحی تقریب میں اپنے ملک کا جھنڈا نہ ہونے پر تنقید کررہا تھا۔
سوشل میڈیا پلیٹ فارم پر ایک پاکستانی صحافی نے نیشنل اسٹیڈیم کے اندر بھارتی ٹیم کے جھنڈے کی تصویر شیئر کرتے ہوئے کیپشن میں لکھا کہ کراچی کے نیشنل اسٹیڈیم میں بھارت کا جھنڈا لہرا دیا گیا ہے، ہمارے دل بڑے ہیں، آپ کی طرح گھٹیا نہیں۔
انہوں نے کیپشن میں بھارتی یوٹیوبرز اور صحافیوں کو بتایا کہ پڑوسی ملک کی جانب سے چیمپئینز ٹرافی کی کوریج کیلئے درخواست کرنیوالے تمام 7 ہندوستانی صحافیوں کو ویزے جاری کردیے گئے ہیں۔
واضح رہے کہ ایونٹ کا افتتاحی میچ آج میزبان پاکستان اور نیوزی لینڈ کے درمیان کھیلا جائے گا۔
دوسری جانب بھارت کے علاوہ تمام ٹیمیں پاکستان میں اپنے میچز کھیلیں گی جبکہ انڈین ٹیم اپنے تینوں گروپ میچز دبئی میں ہی کھیلے گی جبکہ پاک بھارت ہائی وولٹیج مقابلہ 23 فروری کو شیڈول ہے۔
ویب ڈیسک: (شکیل خٹک)29 سال بعد پاکستان میں آج کرکٹ کا بین الاقوامی میلہ سجے گا۔8 ٹاپ ٹیموں میں کانٹے دار مقابلے دیکھنے کیلئے شائقین کرکٹ بے تاب جبکہ کھلاڑی پر جوش ہیں۔کراچی کے عالمی معیار کے اسٹیڈیم میں آئی سی سی چیمپئنز ٹرافی کا پاکستان اور نیوزی لینڈ کے درمیان پہلا بڑا مقابلہ آج ہوگا۔
تفصیلات کے مطابق صدر مملکت آصف علی زرداری کراچی نیشنل بینک اسٹیڈیم میں افتتاحی میچ کے مہمان خصوصی ہونگے۔پاکستان ائیر فورس کے جانباز آج شیردل شو پیش کریں گے۔چئیرمین پی سی بی محسن نقوی کراچی نیشنل سٹیڈیم میں پاکستان اور نیوزی لینڈ کا میچ دیکھیں گے۔
چیئرمین پی سی بی محسن نقوی کا کہنا ہے کہ چیمپئنز ٹرافی صرف ایک ٹورنامنٹ نہیں بلکہ ثقافت و تہذیب کو فروغ دینے کاخوبصورت سلسلہ بھی ہے۔ تمام ٹیموں کے کھلاڑیوں کو دل کی اتھاہ گہرائیوں سے خوش آمدید کہتے ہیں۔ چیمپئنز ٹرافی کا انعقاد پرامن اور محفوظ پاکستان کی جیت ہے۔ میرے سمیت آج ہر پاکستانی کا سر فخر سے بلند ہے۔ اللہ تعالٰی کا جتنا بھی شکر ادا کروں کم ہے۔ پاکستانی قوم نے ثابت کیا ہے کہ وہ کرکٹ کے دلدادہ ہیں اور کرکٹ سے محبت کرتے ہیں۔
چیمپئنزٹرافی کے حوالے سے فول پروف سیکیورٹی انتظامات:
کراچی میں چیمپئنز ٹرافی میچز کے حوالے سے فول پروف سیکیورٹی انتظامات کیے گئے ہیں۔ سیکیورٹی انتظامات کو حتمی شکل ایس ایس یو ہیڈ کوارٹرز میں ہونے والے اجلاس میں دی گئی ۔اجلاس کی صدارت ڈی آئی جی سیکیورٹی ڈاکٹر مقصود احمد نے کی۔
میچ دیکھنے آنے والے شائقین کے لیے خصوصی ہدایات بھی جاری کی گئی ہیں۔
ایس ایس یو اور دیگر قانون نافذ کرنے والے اداروں کے 6700 سے زائد اہلکار تعینات کیے گئے ہیں۔
یاد رہے کہ 19، 21 فروری اور 1 مارچ 2025 کو میچز نیشنل بینک کرکٹ اسٹیڈیم میں کھیلے جائینگے۔
اس حوالے سےایس ایس یو کے 1045 کمانڈوزبشمول لیڈی کمانڈوز اپنے فرائض انجام دے رہے ہیں۔سیکیورٹی ڈویژن کے1745، ٹریفک پولیس کے 1390، اسپیشل برانچ کے328 اپنے فرائض انجام دے رہے ہیں۔اہلکارنیشنل بینک کرکٹ اسٹیڈیم، کراچی ایئرپورٹ، روٹس، پارکنگ پوائنٹس، ہوٹلز اور دیگر مختلف مقامات پر مامورہیں ۔ماہر نشانہ باز بھی حساس مقامات پر تعینات ہیں۔
جدید تربیت یافتہ کمانڈوز پر مشتمل ٹیم کسی بھی ہنگامی صورتحال سے نمٹنے کے لیے الرٹ رہے گی۔ٹیم اسٹیڈیم کے اطراف گشت پر بھی مامور ہوگی۔
ڈی آئی جی سیکیورٹی ڈاکٹر مقصوداحمد نے کہا ہے کہ سندھ پولیس اس بات کو یقینی بنانے کے لیے پرعزم ہے کہ تمام شرکاء کے لیے ایک پر امن اور خوشگوار ماحول فراہم کیا جائے۔سیکیورٹی انتظامات دیگر متعلقہ اداروں کے اشتراک کے ساتھ بنایا گیا ہے۔ایس ایس یو کے خصوصی کمانڈ اینڈ کنٹرول بس، اسٹیڈیم کے اطراف امن و امان کی نگرانی کے لیے تعینات کی جائے گی۔اسٹیڈیم کے اطراف تمام سڑکیں ٹریفک کی آمدورفت کے لیے کھلی رہیں گی۔
February 19, 2025
February 19, 2025
ویب ڈیسک: آئی سی سی چیمپئینز ٹرافی کے آغاز سے محض چند گھنٹوں قبل آئی سی سی نے میگا ایونٹ میں شریک ٹیموں کے کپتانوں کا نیا اینیمیٹڈ پرومو جاری کردیا۔
آئی سی سی نے اپنے تمام سوشل میڈیا پلیٹ فارمز پر ایک ویڈیو شیئر کی، جس میں ٹورنامنٹ میں شریک ٹیموں کے کپتانوں کا اینیمیٹڈ پرومو جاری کیا گیا جس نے دیکھنے والوں کو ششدر کردیا۔
اس پرومو کی دلچسپ بات یہ ہے کہ اس میں قومی ٹیم کے کپتان محمد رضوان سمیت تمام کپتانوں کے اینیمیٹڈ کریکٹر پیش کیے گئے ہیں اور منفرد انداز میں ان کا فیورٹ شاٹ بھی دکھایا گیا ہے۔
پرومو میں تمام کپتانوں کو ٹرافی کے حصول کیلئے دوڑ لگاتے اور چمچاتی ٹرافی کی جانب لپکتے بھی دکھایا گیا۔
واضح رہے کہ ایونٹ کا افتتاحی میچ آج میزبان پاکستان اور نیوزی لینڈ کے درمیان کھیلا جائے گا۔
دوسری جانب ٹورنامنٹ کے پہلے میچ سے قبل رنگارنگ افتتاحی تقریب کا بھی مظاہرہ کیا جائے گا، جس میں پاک فضائیہ کے طیارے کرتب دیکھائے گے اور شائقین کرکٹ کو متوجہ کریں گے۔
اینیمیٹڈ پرومو کو دیکھ کر شائقین کرکٹ نے آئی سی سی کو خراج تحسین پیش کیا اور کاوش کو خوب سراہا۔
ویب ڈیسک: شائقین کرکٹ کا انتظار ختم ہوگیا، 29 برس بعد پاکستان کی سرزمین پر آئی سی سی ایونٹ کا انعقاد ہونے جارہا ہے۔
آئی سی سی چیمپئنز ٹرافی کا آغاز آج سے ہو رہا ہے، 8 بہترین ٹیموں میں چیمپئن بننے کی جنگ ہوگی۔
چیمپئنز ٹرافی کے پہلے میچ میں میزبان پاکستان اور نیوزی لینڈ کی ٹیمیں آج نیشنل اسٹیڈیم کراچی میں مدمقابل ہوں گی، تمام تیاریاں مکمل کرلی گئی ہیں، اب صرف شائقین کو انتظار ہے ٹیموں کو میدان میں ایکشن میں دیکھنے کا۔
کرکٹ شائقین کی بڑی تعداد چیمپئنز ٹرافی کا افتتاحی میچ دیکھنے کراچی کے نیشنل اسٹیڈیم جائے گی۔اس موقع پر سکیورٹی کے سخت انتظامات کیے گئے ہیں۔
اس لیے ضروری ہے شائقین کرکٹ کو پتا ہو کہ کن معمولی چیزوں کو بھی ساتھ لے جانے پر ان کی اسٹیڈیم میں انٹری نہیں ہوگی۔
شائقین کیلئے کراچی اسٹیڈیم میں کن چیزوں کو لانا منع ہے؟
1: پاور بینک
نیشنل اسٹیڈیم کراچی میں شائقین اپنے ساتھ موبائل چارج کرنے کے لیے پاور بینک نہ لے جائیں، سکیورٹی اہلکار پاور بینک سمیت فینز کو اسٹیڈیم میں داخل ہونے نہیں دیں گے۔
2: ائیر پوڈز،ہیڈ فونز، ہینڈ فری
نیشنل اسٹیڈیم کراچی میں شائقین کو اپنے ساتھ کسی بھی قسم کے ائیرپوڈز، ہیڈ فونز یا ہینڈ فریز ساتھ لے کر جانے کی اجازت نہیں ہے۔ اس لیے پریشانی سے بچنا چاہتے ہیں تو اپنے ساتھ اسٹیڈیم میں اس قسم کی کوئی بھی ڈیوائس ساتھ نہ لے کر جائیں۔
3: چھالیہ ، پان، گٹکا
کراچی کے نیشنل اسٹیڈیم میں شائقین کو چھالیہ ، پان، گٹکا ساتھ لے جانا منع ہے۔
4: کھانے پینے کی اشیاء
پانی کی بوتل، چپس، کولڈرنک وغیرہ بھی شائقین کو اسٹیڈیم کے اندر لے جانے کی اجازت نہیں ہوگی۔
واضح رہے کہ آئی سی سی چیمپئنز ٹرافی میں پاکستان اور نیوزی لینڈ کے درمیان افتتاحی میچ پاکستانی وقت کے مطابق دوپہر 2 بجے شروع ہوگا۔
ایونٹ کے تمام میچز جیوسوپر سے براہ راست نشر ہوں گے۔
February 19, 2025
February 22, 2025
February 22, 2025
February 22, 2025
February 21, 2025
February 21, 2025
February 21, 2025
February 21, 2025
February 21, 2025
February 21, 2025
February 20, 2025
February 20, 2025
February 20, 2025
February 20, 2025
February 20, 2025
February 20, 2025
February 20, 2025
February 20, 2025
February 20, 2025
February 20, 2025
February 20, 2025
February 20, 2025
February 20, 2025
February 20, 2025
February 20, 2025
February 19, 2025
February 19, 2025
February 19, 2025
February 19, 2025
February 19, 2025
February 19, 2025
February 19, 2025
February 19, 2025
February 19, 2025
February 19, 2025
February 19, 2025
February 19, 2025
February 19, 2025