ویب ڈیسک: آرمی چیف اور چیف آف ڈیفنس فورسز، فیلڈ مارشل سید عاصم منیر نے بلوچستان کے دورے کے دوران مشکل آپریشنل حالات کے باوجود مادرِ وطن کے دفاع کے لیے پاک فوج کے جوانوں اور افسران کے غیر متزلزل عزم کو سراہا۔
پاک فوج کے شعبہ تعلقاتِ عامہ (آئی ایس پی آر) کے مطابق، فیلڈ مارشل عاصم منیر نے تربت میں یادگارِ شہداء پر پھولوں کی چادر چڑھائی اور فاتحہ خوانی کی۔ اس موقع پر اُن کو سیکیورٹی کی موجودہ صورتحال اور آپریشنل تیاریوں پر بریفنگ دی گئی۔ انہیں دہشت گردی کے خلاف جاری کامیاب آپریشنز کے بارے میں بھی تفصیلی بریفنگ دی گئی۔
شعبہ تعلقاتِ عامہ کے مطابق، فیلڈ مارشل عاصم منیر کو بلوچستان میں جاری مختلف سماجی و اقتصادی ترقیاتی منصوبوں کی پیش رفت کے بارے میں بھی بریفنگ دی گئی۔
جوانوں اور افسران سے خطاب کرتے ہوئے، چیف آف آرمی اسٹاف اور چیف آف ڈیفنس فورسز نے مشکل آپریشنل حالات کے باوجود ان کی اعلیٰ سطحی آپریشنل تیاری، پیشہ ورانہ مہارت اور مادرِ وطن کے دفاع کے لیے غیر متزلزل عزم کو سراہا۔
فیلڈ مارشل سید عاصم منیر نے امن، خوشحالی اور پائیدار ترقی کے حصول کے لیے فوج کے پختہ عزم کا اعادہ کیا، اور بلوچستان کے عوام کے ساتھ شانہ بشانہ کھڑے رہنے کے لیے پاک فوج کے پختہ ارادے کی دوبارہ تصدیق کی۔