(ویب ڈیسک ) سرمایہ دارانہ نظام کے خاتمہ پر مبنی مارکسی نظریے کے حامی انورا کمارا سری لنکا کے نئے صدر بن گئے ہیں۔
انورا کمارا نے انتخابات میں اپنے مدمقابل اپوزیشن رہنما ساجیت پریما داسا کو شکست دی۔جیتنے کے بعد انوراکمارا کا کہنا ہے کہ ترقی و استحکام کے ہمارے خواب نئی شروعات سے پورے ہوں گے اور سنہالیوں، تاملوں، مسلمانوں اور تمام سری لنکن شہریوں کا اتحاد ہی نئی شروعات کی بنیاد ہے۔
واضح رہے کہ سری لنکا میں 2022 کے بدترین معاشی بحران کے بعد پہلے صدارتی انتخابات گزشتہ روز ہوئے تھے۔
خیال رہے کہ انتخابات میں کسی امیدوار کی جانب سے 50 فیصد ووٹ حاصل نہ کرنے پر صدر کا انتخاب ترجیحی ووٹوں کی گنتی سے کیا گیا تھا، سری لنکا کے موجودہ صدر رانیل وکرما سنگھے ووٹوں کی پہلی گنتی میں مقابلے سے باہر ہوگئے تھے۔
وزیر اعظم شہباز شریف کی مبارکباد:
وزیراعظم شہباز شریف نے انورا کمارا ڈیشا نائیکے کو سری لنکا کا صدر منتخب ہونے پر مبارکباد دی ہے۔وزیر اعظم نے کہا ہے کہ سری لنکا کے صدارتی انتخابات میں کامیابی پر انورا کمارا ڈیشا نائیکے کو مبارکباد پیش کرتا ہوں، نو منتخب صدر کی کامیابی کے لئے دعا گو ہوں۔
وزیراعظم نے پاک سری لنکا تعلقات کو مستحکم کرنے کے لئے نو منتخب صدر کے ساتھ مل کر کام کرنے کی خواہش کا اظہار کیا۔