وزیراعظم کا شکریہ، ان کا لگایا ہوا پودا ہوں،گولڈ میڈلسٹ ارشد ندیم

ارشد ندیم والد ہ سے ملکر آبدیدہ ہو گئے

ویب ڈیسک: پیرس اولمپکس میں گولڈمیڈل حاصل کرنے والے ارشد ندیم  اپنے آبائی گھر پہنچنے  پر والدہ کے گلے لپیٹ کر آبدیدہ ہو گئے۔

 تفصیلات کے مطابق فخر پاکستان ارشد ندیم ایک بڑے قافلے کے ہمراہ اپنے آبائی گھر پہنچ گئے، اس موقع پر ان کی والدہ نے  بیٹے کے گلے میں ہار پہنا کر استقبال کیا۔

ارشد ندیم والدہ کے گلے لگ کر روتے رہے،ارشد ندیم کی گھر آمد پر بہنوں، بچوں اور دیگر رشتہ داروں نے بھی استقبال کیا اور پاکستانی ایتھیلیٹ کے گلے میں ہار پہنائے۔

قبل ازیں پیرس اولمپکس کے جیولین تھرو مقابلے میں پاکستان کو 40 سال بعد گولڈ میڈل جتوانے والے قومی ہیرو ارشد ندیم کی وطن واپسی پر اپنے والد سے ملاقات کے جذباتی مناظر کیمرے کی آنکھ نے محفوظ کرلیے۔

ائیرپورٹ اسٹیٹ لاؤنج میں ارشدندیم کے والد بھی موجود تھے، انہوں نے بیٹے کو دیکھتے ہی فوراً چوما اور زور سے گلے لگایا، ساتھ ہی پھولوں کے ہار بھی پہنائے۔

اس موقع پر کچھ جذباتی مناظر میں دیکھنے میں آئے اور بظاہر ارشد کی آنکھیں نم تھیں۔

ارشد ندیم کے والد کا کہنا تھا کہ میرے بیٹے نے قوم کا مان رکھ لیا، میں تو ایک مزدور ہوں، اللہ کا کرم ہوگیا۔

واضح رہے کہ اولمپکس گیمز میں پاکستان نے اپنا آخری مرتبہ 8 اگست 1992 میں کانسی کے تمغے کے ساتھ ہاکی ایونٹ میں حاصل کیا تھا جبکہ آخری گولڈ میڈل بھی ہاکی کی ہی بدولت 1984 میں حاصل ہوا تھا۔

گولڈ میڈلسٹ ارشد ندیم کا قافلہ 12 گھنٹے بعد میاں چنوں پہنچ گیا، والہانہ استقبال

ویب ڈیسک: پیرس اولمپکس میں 40 سال بعد پاکستان کو سونے کا تمغہ جتوانے والے قومی ہیرو ارشد ندیم کا قافلہ 12 گھنٹے بعد میاں چنوں پہنچ گیا، جہاں ان کا والہانہ استقبال کیا گیا اور پھول نچھاور کیے گئے۔

تفصیلات کے مطابق قومی ہیرو ارشد ندیم قافلے کی صورت میں آبائی علاقے پہنچے تو گھنٹوں سے ان کی آمد کے منتظر ہزاروں شہریوں کے چہرے خوشی سے دمک اٹھے۔

میاں چنوں بائی پاس پر ارشد ندیم کے دوستوں اور اہلخانہ نے ان کا استقبال کیا اور پھولوں کی پتیاں نچھاور کیں، عوام کی کثیر تعداد بھی اس موقع پر موجود تھی۔

آبائی علاقے پہنچنے پر قومی ہیرو کو پھولوں کے ہار پہنائے گئے جبکہ ڈھول کی تھاپ پر رقص اور آتشبازی کا مظاہرہ کیا گیا اور مٹھائیاں بھی تقسیم کی گئیں، شہر کے داخلی راستوں پر ویلکم ارشد ندیم کے پوسٹر بھی آویزاں کیے گئے تھے۔

میاں چنوں پہنچنے پر مداحوں کی جانب سے ارشد ندیم زندہ باد کے نعرے بھی لگائے گئے۔

اس سے پہلے ارشد ندیم کا قافلہ ساہیوال پہنچا تھا، جہاں ساہیوال بائی پاس پہنچنے پر شہریوں نے ان پر پھول نچھاور کیے تھے۔

آج علی الصبح ارشد ندیم لاہور ایئر پورٹ سے تبلیغی مرکز رائیونڈ آئے تھے جہاں ان کے قافلے نے ایک گھنٹہ قیام کیا تھا، جس کے بعد وہ تبلیغی مرکز رائیونڈ میں نمازِ فجر ادا کرنے کے بعد میاں چنوں روانہ ہوئے تھے۔

میاں چنوں میں ارشد ندیم کو ان کے استاد کے ڈیرے پر استقبالیہ دیا جائے گا جس کے بعد وہ اپنے آبائی گاؤں چک 101 جائیں گے۔

یوم آزادی پر ارشد ندیم کی تصویر والا خصوصی ڈاک ٹکٹ جاری

ویب ڈیسک: وزیراعظم شہباز شریف کی خصوصی ہدایت پر ملک کے 77ویں یوم آزادی کے موقع پر ”عزم استحکام“ کے عنوان سے خصوصی ڈاک ٹکٹ جاری کر دیا گیا۔

ڈاک ٹکٹ پر پاکستان کے جیولین تھرور ارشد ندیم کی تصویر لگا کر انہیں خراج تحسین پیش کیا گیا ہے، ارشد ندیم نے پیرس اولمپکس میں 92.97 میٹر فاصلے پر نیزہ پھینک کر نیا اولمپک ریکارڈ قائم کر کے گولڈ میڈل حاصل کیا اور نوجوان نسل کے لئے ایک مثال بن گئے ہیں۔

ڈاک ٹکٹ کو عزم استحکام کا عنوان دیا گیا ہے، جو ملک کی ترقی اور استحکام کے عزم کا منہ بولتا ثبوت ہے ، ڈاک ٹکٹ میں مینار پاکستان کی تصویر کو شامل کر کے پاکستان کی آزادی کی جدوجہد اور اس کی علامتی اہمیت کو بھی اجاگر کیا گیا ہے۔ 

فخر پاکستان، قومی ہیرو ارشد ندیم کی وطن واپسی، شایان شان استقبال، پھول نچھاور

ویب ڈیسک: پیرس اولمپکس میں عالمی ریکارڈ قائم کرنے والے قومی ہیرو ارشد ندیم وطن واپس پہنچ گئے، عوام کا جم غفیر اپنے قومی ہیرو کا استقبال کرنے کیلئے لاہور ایئرپورٹ پر پہنچا، ارشد ندیم کے جہاز کو واٹر کینن سلیوٹ پیش کیا گیا۔

تفصیلات کے مطابق وفاقی وزیر منصوبہ بندی احسن اقبال، وزیر مملکت برائے انفارمیشن ٹیکنالوجی شزہ فاطمہ، چیئرمین پی ایم یوتھ پروگرام رانا مشہود احمد، صوبائی وزیر اطلاعات عظمیٰ بخاری، خواجہ سعد رفیق نے علامہ اقبال انٹرنیشنل ایئر پورٹ پر پاکستان کے قومی ہیرو ارشد ندیم کا شایان شان استقبال کیا۔

ارشد ندیم کے لاہور ایئرپورٹ پر استقبال کیلئے اے ایس ایف کو 50 سے زائد مہمانوں کی فہرست موصول ہوئی تھی جس کے باعث سکیورٹی کے سخت انتظامات کئے گئے تھے، پولیس کے ساتھ رینجرز نے بھی سکیورٹی کے فرائض سرانجام دیئے۔

گولڈ میڈلسٹ ارشد ندیم پیرس سے براستہ استنبول لاہور پہنچے، قومی ہیرو کے جہاز نے رات ڈیڑھ بجے لاہور ایئرپورٹ پر لینڈ کیا، عوام قومی ہیرو کی ایک جھلک دیکھنے کیلئے بے تاب تھی، ارشد ندیم کا فقید المثال استقبال کیا گیا۔

فخر پاکستان ارشد ندیم کے چاہنے والوں نے اپنے ہیرو پر پھولوں کی پتیاں نچھاور کیں اور ڈھول کی تھاپ پر بھنگڑے ڈالتے رہے، ایئرپورٹ ’’ارشد ندیم زندہ باد، پاکستان زندہ باد‘‘ کے نعروں سے گونجتا رہا۔

وزیر کھیل پنجاب فیصل ایوب کھوکھر ، سپورٹس بورڈ کے اعلیٰ حکام بھی ایئرپورٹ پر استقبال کیلئے پہنچے، ارشد ندیم کے استقبال کیلئے ان کے اہل خانہ بھی گاؤں سے لاہور پہنچے، اہلخانہ میں والد، والدہ، بہنیں، بھائی اور بچے شامل تھے، گاؤں سے کافی تعداد میں لوگ بھی ان کے ہمراہ آئے۔

لاہور ایئرپورٹ پر مداحو ں کی بڑی تعداد کے پیش نظر ارشد ندیم کو ڈبل ڈیکر بس پر سوار کیا گیا، قومی ہیرو نے بس پر سوار ہو کر مداحوں کا شکریہ ادا کیا اور ہاتھ اُٹھا کر عوام کے نعروں اور محبتوں کا جواب دیا۔

ارشد ندیم نے وطن واپسی پر میڈیا سے گفتگو کرتے ہوئے کہا کہ کئی سال بعد پاکستان کو خوشی ملی، میری جیت پر نیرج بھی خوش ہے، 90 میٹر سے اوپر تھرو پھینکی تو یقین ہو گیا پاکستان گولڈ میڈل جیت گیا، آئندہ بھی ملک کا نام روشن کرنے میں کوئی کسر نہیں اٹھا رکھوں گا۔

واضح رہے کہ ارشد ندیم نے اولمپک ریکارڈ کے ساتھ جیولن تھرو مقابلے میں گولڈ میڈل جیتا ہے، انہوں نے 92.97 میٹر تھرو کرکے نیا اولمپک ریکارڈ قائم کیا۔

مینز جیولن تھرو ایونٹ کے فائنل میں ارشد ندیم نے پاکستان کو 40 سال بعد گولڈ میڈل جتوایا، ارشد ندیم پاکستان کی جانب سے اولمپکس کے انفرادی مقابلوں میں گولڈ میڈل جیتنے والے پہلے ایتھلیٹ ہیں۔

ایتھلیٹکس فیڈریشن کا گولڈ میڈل جیتنے پرارشد ندیم کیلئے بڑا اعلان

ویب ڈیسک: ایتھلیٹکس فیڈریشن آف پاکستان کی جانب سے پیرس اولمپکس میں ریکارڈ ساز کارکردگی کارکردگی کا مظاہرہ کرنے والے اولمپئین گولڈ میڈلسٹ ارشد ندیم کے لیے بڑا اعلان کر دیا۔

تفصیلا ت کے مطابق چیئرمین ایتھلیٹکس فیڈریشن آف پاکستان میجرجنرل (ر) محمد اکرم ساہی نے ارشد ندیم کو فیملی سمیت عمرہ کروانے کا اعلان کردیا۔

چیئرمین کے مطابق قومی ہیرو ارشد ندیم ان کے بیوی بچوں اور والدین کو عمرے پر بھجوایا جائے گا جبکہ تقریبات سے فارغ ہونے کے بعد ارشد ندیم اور ان کے والدین کو عمرے پر بھجوایا جائے گا۔

یاد رہے کہ ارشد ندیم گزشتہ رات پیرس سے ترکش ایئر لائن کی پرواز کے ذریعے پاکستان پہنچے تھے۔

لاہور کے علامہ اقبال انٹرنیشنل ایئرپورٹ پر ان کا شاندار استقبال کی گیا تھا، ترکش ایئرلائن کے طیارے کو واٹرکینن سیلوٹ پیش کیا گیا تھا۔

قومی ہیرو کے استقبال کے لیے ایئرپورٹ پر ن لیگی رہنماؤں، اہلخانہ اور گاؤں کے لوگوں کے علاوہ شہریوں کی بہت بڑی تعداد موجود تھی۔

سیاست میں انٹری پر ارشد ندیم کاواضح جواب

ویب ڈیسک: پیرس اولمپکس میں پاکستان کو 40 سال بعد گولڈ میڈل جتوانے والے قومی ہیرو ارشد ندیم کا وطن واپسی پر والہانہ استقبال کیا گیا، اس موقع پر ایک صحافی نے ارشد ندیم سے سوال کیا کہ آپ بھی سیاست میں آئیں گے؟ صحافی کے سوال پر جیولن تھرور ارشد ندیم نے کہا کہ میرا جو کام ہے میں وہ ہی کروں گا، میرا سیاست میں آنا بنتا ہی نہیں۔

تفصیلا ت کے مطابق پیرس اولمپکس میں سونے کا تمغہ حاصل کرنے والے قومی ہیرو ارشد ندیم کا لاہور پہنچنے پر والہانہ استقبال کیا گیا۔ارشد ندیم کی پرواز رات 1 بج کر 25 منٹ پر لاہور پہنچی ، اس موقع پر ان کے طیارے کو واٹر کینن سلیوٹ پیش کر کے خوش آمدید کہا گیا ۔

ہزاروں فینز اپنے ہیرو کی ایک جھلک دیکھنے لاہور ائیر پورٹ پہنچے ، بینڈ نے دھنیں بکھیر کر ماحول میں اور جوش پیدا کر دیا۔عوام نے ڈھول کی تھاپ پر بھنگڑے ڈالے اور پھولوں کی پتیاں بھی نچھاور کیں، خوشی میں جھومتے فینز نے سیلفیاں بھی لیں۔

وطن واپسی پر میڈیا سے گفتگو کرتے ہوئے ارشد ندیم نے کہا کہ قوم اور والدین کی دعاؤں سے اللہ تعالیٰ نے عزت دی، اس کامیابی کے پیچھے بہت لمبا سفر ہے۔

اس موقع پر صحافی نے ارشد ندیم سے سوال کیا کہ کیا آپ بھی سیاست میں آئیں گے؟ صحافی کے سوال کا جواب دیتے ہوئے ارشدندیم نے کہا کہ میرا جو کام ہے میں وہ ہی کروں گا ، میرا سیاست میں آنا بنتا ہی نہیں ہے۔

انہوں نے مزید کہا کہ گولڈ میڈل حاصل کرنے کے لیے دن رات محنت کی تھی، اب آنے والے ایونٹس کی بھرپور تیاری کروں گا۔

واضح رہے کہ ارشد ندیم نے اولمپک ریکارڈ کے ساتھ جیولین تھرو مقابلے میں گولڈ میڈل جیتا ہے۔ انہوں نے 92.97 میٹر تھرو کرکے نیا اولمپک ریکارڈ قائم کیا۔

مینز جیولین تھرو ایونٹ کے فائنل میں ارشد ندیم نے پاکستان کو 40 سال بعد گولڈ میڈل جتوایا۔

ارشد ندیم پاکستان کی جانب سے اولمپکس کے انفرادی مقابلوں میں گولڈ میڈل جیتنے والے پہلے ایتھلیٹ ہیں۔

پبلک نیوز کی جانب سے ارشد ندیم کیلئے 10 لاکھ روپے انعام کا اعلان

(ویب ڈیسک ) پبلک نیوز کی جانب سے پیرس اولمپکس میں سونے کا تمغہ جیتنے والے  ارشد ندیم کیلئے 10 لاکھ روپے انعام کا اعلان کیا گیا ہے۔

چئیرمین پبلک نیوز میاں مشتاق کا کہنا ہے کہ ارشد ندیم ملک کا حقیقی اثاثہ ہیں، ارشد ندیم نے 24 کروڑ عوام کا سر فخر سے بلند کیا۔

میاں مشتاق نے کہا کہ  ارشد ندیم نے جشنِ آزادی پر گولڈ میڈل جیت کر قوم کو تحفہ دیا، ارشد ندیم نے ثابت کیا ہے کہ بلند حوصلہ، توجہ اور محنت سے کوئی بھی سنگِ میل عبور کیا جا سکتا ہے۔ ارشد ندیم نے پاکستان میں امید اور اعتماد کے جذبے کو دوبارہ زندہ کیا ہے۔

پبلک نیوز نیٹ ورک کے CEO احمد ساہی کی جانب سے پیرس اولمپکس جیولین تھرو کے فائنل میں شاندارکارکردگی دکھانےاور گولڈمیڈل جیتنے پر قومی ہیرو ارشد ندیم کے لئے 1 ملین روپے کی انعامی رقم کا اعلان کیا گیا،CEO احمد ساہی نے اپنے آفیشل ’ایکس ‘ پر پوسٹ شیئر کی اور مبارکباد بھی دی۔

اولمپکس جویلین تھرو میں گولڈ میڈل جیتنے والے ارشد ندیم کو میڈل کب ملے گا؟

(ویب ڈیسک ) پیرس اولمپکس کے 13ویں روز( جمعرات کو) فائنل جیتنے  والے کھلاڑیوں کو میڈل دینے کی تقریب آج ہوگی۔

پیرس اولمپکس میں گزشتہ شب مینز جیولین تھرو ایونٹ کے فائنل میں ارشد ندیم نے پاکستان کو 40 سال بعد گولڈ میڈل جتوا دیا۔

فائنل میں ارشد ندیم نے92.97 میٹر کی تھرو کرکے نیا اولمپک ریکارڈ بنا کر بنایا تھا۔ارشد ندیم پاکستان کو انفرادی مقابلوں میں گولڈ میڈل دلوانے والے پہلے ایتھلیٹ بن گئے۔

پیرس اولمپکس کے 13ویں روز یعنی  جمعرات کو فائنل جیتنے  والے کھلاڑیوں کو میڈل دینے کی تقریب آج ہوگی۔پاکستانی وقت کے مطابق میڈل تقسیم کی تقریب آئفل ٹاور کے قریب چیمپئنز  پارک میں رات 10 بجے شروع ہوگی۔

واضح رہے کہ پاکستان نے آخری مرتبہ 8 اگست 1992 کو اولمپکس میں  کانسی کا میڈل جیتا تھا۔ قومی ہاکی ٹیم نے بارسلونا اولمپکس میں نیدرلینڈز کو تین کے مقابلے میں چار گول سے شکست دی تھی۔

یاد رہے کہ پاکستان نے  اولمپکس میں گولڈ میڈل 1984 میں جیتا تھا وہ بھی ہاکی ٹیم نے ہی دلوایا تھا۔

پاکستان میں  تعینات غیر ملکی سفیروں کی ارشد ندیم کو گولڈ میڈل جیتنے پر مبارکباد

(ویب ڈیسک ) پاکستان میں  تعینات   غیر ملکی سفیروں نے بھی  پیرس اولمپکس میں  ارشد ندیم کو گولڈ میڈل جیتنے پر مبارکباد دی ہے۔

پیرس اولمپکس میں جویلین تھرو  مینز کے فائنل میں ارشد ندیم کے گولڈ میڈل جیتے پر انہیں پاکستان سمیت دنیا بھر سے مبارکباد دی جا رہی ہے۔

پاکستان میں  تعینات   غیر ملکی سفیروں نے بھی  پیرس اولمپکس میں  ارشد ندیم کو گولڈ میڈل جیتنے پر مبارکباد دی ہے۔

 یو اے ای کے قونصل جنرل بخیت عتیق الرومیتی  نے  ارشد ندیم کو مبارکباد دی۔ بخیت عتیق الرومیتی نے کہا کہ   ارشد ندیم نے گولڈ میڈل جیت کرپاکستان کا نام دنیا بھر میں روشن کیا ہے ۔

پاکستان میں جرمنی کے سفیر  نے مبارکباد دیتے ہوئے  کہا کہ  ارشد ندیم نے  92۔97 میٹر کی حیران کن تھرو پھینک کر  تاریخ رقم کی اور  گولڈ میڈل جیتا۔آج دنیا آپ کا نام جانتی ہے۔

اقوام متحدہ پاکستان نے بھی ارشد ندیم کو مبارکباد دی۔ایکس پر بیان میں کہا کہ  مبارک ہو ارشد ندیم ، مبارک ہو پاکستان۔  پاکستان  کیلئے اولمپک میں ایک نیا ریکارڈ اور گولڈ میڈل   جیت لیا۔

پاکستان میں امریکی سفارتخانے نے ایکس پر بیان میں کہا کہ  ارشد ندیم کو  اولمپکس کے مینز جویلین میں گولڈ میڈل گھر لانے پر مبارک ہو۔ ارشد دندیم ایک زندہ مثال ہے کہ ایسا کچھ نہیں جو آپ حاصل نہیں کرسکتے اگر آپ  بڑا خواب دیکھیں ، سخت محنت کریں  اور کبھی ہار نہ مانیں۔

یاد رہے کہ فرانس میں جاری پیرس اولمپکس 2024 میں پاکستان کے اتھلیٹ اور قومی ہیرو ارشد ندیم نے پاکستان کو جیولین تھرو کے مقابلے میں گولڈ میڈل دلواتے ہوئے اولمپکس کی 118 سالہ تاریخ بدل دی ہے۔

واضح رہے کہ ارشد ندیم انفرادی مقابلوں میں پاکستان کو گولڈ میڈل دلوانے والے پہلے ایتھلیٹ ہیں جبکہ اولمپکس میں گولڈ میڈل جیتنے والے دوسرے جنوبی ایشین ایتھلیٹ ہیں۔

1984 اولمپکس کے بعد اور ہاکی کے علاوہ پاکستان کا یہ پہلا گولڈ میڈل ہے جبکہ اولمپکس کی تاریخ میں پاکستان کا 11 واں میڈل ہے۔

ارشد ندیم پر انعامات کی بارش،اہم خبرآگئی

ویب ڈیسک: خوشی سے نہال قومی شخصیات، حکومتوں، اداروں اور شوبز ستاروں نے پاکستان کیلئے تاریخی کارنامہ انجام دینے پر ارشد ندیم کو مالامال کرنے کا اعلان کردیا۔

تفصیلات کے مطابق ارشد ندیم کی جانب سے پیرس اولمپکس میں ورلڈ ریکارڈ قائم کرکے پاکستان کو چالیس سال بعد اولمپک گولڈ میڈل دلوانے پر پوری قوم خوشی سے نہال ہے۔

ارشد ندیم کے اس کارنامے پر جہاں دنیا بھر میں ان کی تعریف و تحسین کی جا رہی ہے، وہاں پاکستان میں مختلف اداروں، حکومتوں اور اہم شخصیات کی جانب سے ان کیلئے انعامات کے اعلان کا سلسلہ جاری ہے۔

مریم نواز نے پاکستان کے جیولین تھرو کے لیجنڈ ارشد ندیم کے لئے 10 کروڑ روپے انعام کا اعلان کرتے ہوئے کہا ہے کہ جشن آزادی پر ارشد ندیم نے گولڈ میڈیل جیت کر قوم کو تحفہ دیا،قوم کی طرف سے ارشد ندیم کو انعام دے کر اُن کا شکریہ ادا کررہے ہیں،وزیراعلی پنجاب مریم نوازشریف نے ارشد ندیم کے نام سے منسوب سپورٹس سٹی بنانے کا بھی اعلان کردیا۔

مریم نواز نے کہا کہ میاں چنوں میں ارشد ندیم سپورٹس سٹی بنے گا،ارشد ندیم نے تمام مشکلات کا سامنا کرتے ہوئے 40 سال بعد پاکستان کے لئے گولڈ میڈل جیتا،اولمپکس میں نیا ریکارڈ بنانا ارشد ندیم کی محنت، لگن اور قومی جذبے کا ثبوت ہے،پاکستان کا پرچم دنیا میں بلند کرنے والے ہر بیٹے اور بیٹی کو اللہ تعالیٰ ہمیشہ سربلند رکھے۔

ارشد ندیم کی جانب سے کارنامہ سر انجام دیے جانے کے بعد سندھ حکومت نے ارشد ندیم کو 5 کروڑ روپے انعام دینے کا اعلان کر دیا۔

سندھ حکومت کے بعد گورنر سندھ کامران خان ٹیسوری بھی آگے بڑھے اور انہوں  نے بھی اپنی طرف سے جیولن تھرور کیلئے 10 لاکھ روپے انعام کا اعلان کر دیا۔

سکھر کے میئر اور پی پی رہنما ارسلام اسلام شیخ نے ارشد ندیم کو سونے کا تاج پہنانے کے ساتھ سکھر کے زیر تعمیر اسٹیڈیم کو ارشد ندیم کے نام کرنے کا اعلان کیا ہے۔

ادھر شوبز شخصیات میں سے نامور گلو کار علی ظفر نے بھی خوش ہوکر ارشد ندیم کو 10 لاکھ روپے انعام کے طور پر دینے کا اعلان کیا ہے۔

ارشد ندیم کو خوشی سے نہال قوم کے مختلف افراد، اداروں اور تنظیموں و شخصیات کی جانب سے مالامال کرنے کا سلسلہ جاری ہے۔

دوسری جانب گورنرپنجاب سردار سلیم حیدر خان نے قومی ہیرو  ارشد ندیم کے لیے 20 لاکھ روپے انعام کا اعلان کرتے ہوئے کہا کہ ارشد ندیم کی وطن واپسی پر ان کو گورنر ہاؤس لاہور مدعو کیا جائے گا۔ ارشد ندیم نے پیرس اولمپکس میں    118 سالہ جیولن تھرو کا ریکارڈ توڑ کر تاریخ رقم کی۔سبز ہلالی پرچم کو دنیا میں بلند کرنے والے قومی ہیرو کو جتنا خراج تحسین پیش کیا جائے کم ہے۔ارشد ندیم  نے محنت، لگن اور ہمت سے  اولمپکس میں گولڈ میڈل  جیت کر نوجوانوں کے لیے مثال قائم کی۔

قومی ٹیم کےسابق اورموجودہ کھلاڑیوں کی ارشد ندیم کو مبارکباد

ویب ڈیسک: کھیلوں سے جڑی شخصیات ہوں یا شوبز کے ستارے یا پھر سیاستدان ہر کوئی ہی ارشد ندیم کی پیرس اولمپکس میں شاندار کارکردگی کی تعریف کرنے میں مصروف ہے۔

تفصیلات کے مطابق پاکستان ویمن کرکٹ ٹیم کی سابق کپتان ثنا میر نے کہا ہے کہ ارشد ندیم نے سر دھڑ کی بازی لگائی ہے۔

سابق فاسٹ بولر شعیب اختر 

سابق فاسٹ بولر شعیب اختر نے ریکارڈ تھرو پر ارشد ندیم کو ’شہزادہ‘ قرار دے دیا۔

فاسٹ بولر نسیم شاہ 

فاسٹ بولر نسیم شاہ نے کہا ہے کہ ارشد ندیم لاکھوں لوگوں کے لیے متاثر کن شخصیت ہیں، پورا پاکستان فخر سے ارشد ندیم کے ساتھ کھڑا ہے۔

فاسٹ بولر شاہین آفریدی 

فاسٹ بولر شاہین آفریدی نے بھی اولمپک گولڈ میڈلسٹ ارشد ندیم کو مبارکباد دیتے ہوئے کہا ہے کہ ہم فخر کے ساتھ اس تاریخی لمحے کا جشن منا رہے ہیں۔

سابق کپتان مصباح الحق 

سابق کپتان مصباح الحق نے کہا کہ ارشد ندیم آپ کو سلیوٹ ہے، آپ  کے عظیم کارنامے کو بیان کرنے کے لیے الفاظ نہیں۔ ارشد ندیم، ان کی فیملی اور پوری قوم کو مبارکباد۔

 یاد رہے کہ گزشتہ روز پاکستان کے جیولین تھرو کے لیجنڈ ارشد ندیم نے پیرس اولمپکس تاریخ رقم کرتے ہوئے پاکستان کے لیے 40 سال بعد گولڈ میڈل جیت لیا تھا۔

انہوں نے اولمپکس کی تاریخ کی سب سے بڑی 92.97 میٹر کی تھرو کر کے یہ اعزاز بھی حاصل کیا تھا۔

ارشدندیم بھی ہمارابچہ ہے،نیرج چوپڑاکی والدہ نےپاکستانیوں کےدل جیت لیے

ویب ڈیسک: پیرس اولمپکس میں ارشد ندیم کے گولڈ میڈل جیتنے پر ہر پاکستانی نازاں ہے لیکن آپ اگر اسی جیولن تھرو ایونٹ میں سلور میڈل جیتنے والے بھارتی ایتھلیٹ نیرج چوپڑا کی والدہ کے جذبات سے واقف ہوں تو آپ کی خوشی دوبالا ہوجائے گی۔

گزشتہ رات جیولن تھرو کے فائنل کے بعد میڈیا سے گفتگو کرتے ہوئے نیرج چوپڑا کی والدہ سروج دیوی نے جہاں اپنے بیٹے کی کامیابی پر خوشی کا اظہار کیا وہیں انہوں نے گولڈ میڈل جیتنے والے پاکستانی ایتھلیٹ ارشد ندیم کو بھی نہیں بھولیں۔

سروج دیوی نے ارشد ندیم کو اپنا لڑکا یعنی بیٹا کہتے ہوئے ان کی محنت کی تعریف کی۔ ’ہم بہت خوش ہیں، ہمیں تو سلور بھی گولڈ برابر لگ رہا ہے، جس کو گولڈ (میڈل) ملا ہے وہ بھی ہمارا لڑکا ہے، ہر کوئی بہت محنت کرنے کے بعد وہاں جاتا ہے۔‘

نیرج چوپڑا کی والدہ نے بتایا کہ وہ سلور میڈلسٹ کے لیے چورما بنائیں گی جو اسے پسند ہے۔ ’اس نے (نیرج چوپڑا) نے بہت اچھا کام کیا ہے اور ہم اس کی واپسی پر شاندار استقبال کریں گے، چونکہ اسے چورما پسند ہے، اس لیے ہم اس کے لیے وہی بنائیں گے۔‘

نیرج کے والد ستیش کمار نے اپنے بیٹے کی اولمپکس میں کارکردگی کو سراہتے ہوئے کہا کہ یہ مردوں کے جیولن تھرو کے فائنل مقابلے میں پاکستان کا دن ہے، انہوں نے نیرج چوپڑا کی کارکردگی میں ان کی انجری کا بھی ذکر کیا۔

’ہر کسی کا اپنا دن ہوتا ہے، آج پاکستان کا دن تھا۔ لیکن ہم نے سلور میڈل جیتا ہے، اور یہ ہمارے لیے فخر کی بات ہے، مجھے لگتا ہے کہ اس (نیرج) کی کمر کی چوٹ نے اس کی کارکردگی کو متاثر کیا، لیکن پیرس اولمپکس میں نیرج کی کامیابی پر ہمیں خوشی اور فخر ہے، تمام نوجوان اس سے متاثر ہوں گے۔‘

ارشد ندیم کے گولڈ میڈل جیتنےپر نیرج چوپڑا کا ردعمل

ویب ڈیسک: پیرس اولمپکس میں مردوں کے جیولین تھرو مقابلے میں چاندی کا تمغہ جیتنے والے ٹاپ جیولین تھرو کھلاڑی نیرج چوپڑا نے کہا ہے کہ اگرچہ انہوں نے اچھی کارکردگی کا مظاہرہ کیا لیکن یہ ارشد ندیم کا دن تھا۔

تفصیلات کے مطابق  نیرج چوپڑہ کا کہناتھا کہ ملک کے لیے تمغہ جیتنے سے ہمیشہ خوشی ملتی ہے۔ انہوں نے اپنی کارکردگی کو بہتر بنانے کی ضرورت پر بھی زور دیا ۔

نیرج چوپڑا نے کہا کہ جب بھی ہم ملک کے لیے کوئی تمغہ جیتتے ہیں، تو ہم سب خوش ہوتے ہیں اب کھیل کو بہتر کرنے کا وقت آگیا ہے۔بھارت کا قومی ترانہ بھلے ہی آج نہیں بجایا گیا ہو، لیکن مستقبل میں یہ  کہیں اور ضرور بجایا جائے گا۔ ارشد نے واقعی بہت اچھی تھرو کی۔ انہیں اور ان کے ملک کو مبارک ہو۔

 یادرہے چاندی کا تمغہ جیت کر، نیرج چوپڑا نے بھی تاریخ رقم کردی کیونکہ وہ انفرادی مقابلے میں دو اولمپک تمغے جیتنے والے دوسرے مرد کھلاڑی بن گئے۔

جیتنےکے بعد ارشد ندیم اللہ کے حضور سجدہ ریز ہوگئے

ویب ڈیسک: شاندار فتح پر ارشد ندیم اللہ کے حضور سجدہ ریز ہوگئے، میاں چنوں میں شاندار جشن، ڈھول کے تھاپ پر بھنگڑے۔ آتش بازی کا بھی شاندار مظاہرہ کیا گیا۔

تفصیلات کے مطابق کامیابی کے بعد پریس کانفرنس کے دوران انہوں نے کہا کہ آج میرا دن تھا، اس سے بھی زیادہ دور تھرو کر سکتا تھا، ردھم میں تھا اور پُرامید تھا کہ گولڈ میڈل جیتوں گا۔

یاد رہے کہ پیرس میں جیولین تھرو کے مقابلوں میں بطور پاکستانی ایتھلیٹ پہلا انفرادی گولڈ میڈل حاصل کرنے والے ارشد ندیم نے کہا تھاکہ میں ردھم میں تھا اور پرامید تھا کہ گولڈ میڈل جیتوں گا، گولڈ میڈل کے ساتھ 14 اگست منائیں گے۔

انہوں نے کہا کہ امید تھی کہ آج کچھ کر جاؤں گا، پُرامید تھا کہ جتنے دور تھرو کی اس سے گولڈ میڈل جیت سکوں۔

ارشد ندیم نے کہا کہ پاکستان اولمپک ایسوسی ایشن اور اپنے کوچ کا شکر گزار ہوں۔

سندھ حکومت کا ارشد ندیم کیلئے 5 کروڑ روپے انعامی رقم کا اعلان

ویب ڈیسک: پیرس اولمپکس میں پاکستان کیلئے 40 سال بعد پہلا گولڈ میڈل جیتنے پر سندھ حکومت نے پاکستانی جیولین تھرور ارشد ندیم کیلئے 5 کروڑ روپے انعام کا اعلان کردیا۔

تفصیلات کے مطابق سندھ حکومت کے ترجمان اور میئر کراچی مرتضٰی وہاب نے میڈیا سے بات چیت کرتے ہوئے ارشد ندیم کی گیم کو سراہتے ہوئے پاکستان کیلئے گولڈ میڈل جیتنے پر ارشد ندیم سمیت پوری قوم کو مبارکباد پیش کیا۔

مرتضیٰ وہاب نے کہا کہ تھرو پھینکنے کے معاملے میں پہلے پوزیشن بھی ارشد ندیم کی ہے جبکہ دوسرا بڑا تھرو بھی انہوں نے ہی پھینکا ہے، شاندار کارکردگی کا مظاہرہ کرنے پر ارشد ندیم کو مبارکباد پیش کرتے ہیں۔

مرتضیٰ وہاب نے کہا کہ 32 سال بعد اولمپکس میں پاکستان کیلئے پہلا گولڈ میڈل جیتنے پر سندھ حکومت کی جانب سے انہیں 5 کروڑ روپے انعام کا اعلان کرتے ہیں۔

پیرس اولمپکس میں مینز جیولین تھرو ایونٹ کے فائنل میں پوری قوم کی نظریں ارشد ندیم پر تھیں جو پاکستان کو 32 سال بعد اولمپک میں کوئی میڈل دلانے کی واحد امید تھے۔

خیال رہےکہ پاکستان نے آخری مرتبہ 8 اگست 1992 کو اولمپکس میڈل پوڈیم پر قدم رکھا تھا جب قومی ہاکی ٹیم نے بارسلونا اولمپکس میں نیدرلینڈز کو تین کے مقابلے میں چار گول سے شکست دے کر کانسی کا تمغہ جیتا تھا جب کہ پاکستان نے آخری مرتبہ 1984 میں اولمپکس میں گولڈ میڈل جیتا تھا جوکہ ہاکی ٹیم نے دلوایا تھا۔

پاکستان کے اب تک اولمپکس مقابلوں میں جیتےگئے میڈلز کی تعداد کتنی ہوگئی؟

ویب ڈیسک: پیرس اولمپکس میں مینز جیولین تھرو ایونٹ کے فائنل میں ارشد ندیم نے پاکستان کو گولڈ میڈل جتوادیا ہے جس کے بعد پاکستان کے اب تک کے اولمپکس مقابلوں میں مجموعی میڈلز کی تعداد 11 ہوگئی ہے۔

تفصیلات کے مطابق پاکستان نے اولمپکس میں اب تک 11 میڈلز جیتے ہیں جن میں 4 گولڈ، تین سلور اور چار کانسی کے تمغے شامل ہیں۔

پاکستان نے اولمپکس میں آخری مرتبہ کوئی بھی میڈل 1992 میں جیتا تھا جب بارسلونا میں ہونے والے ہاکی کے مقابلے پاکستان کانسی کا تمغہ جیتنے میں کامیاب ہوا تھا۔

پاکستان نے آخری مرتبہ 1984 میں لاس اینجلس اولمپکس میں گولڈ میڈل جیتا تھا جوکہ ہاکی ٹیم نے دلوایا تھا۔

دلچسپ بات یہ ہے کہ اب تک پاکستان کے تمام گولڈ میڈلز فیلڈ ہاکی کے ذریعے آئے تھے اور یہ پہلی بار ہے کہ ارشد ندیم نے ملک کے لیے پہلا انفرادی گولڈ میڈل حاصل کیا ہے۔

ان سے قبل مجموعی طور پر پاکستان کے پاس صرف دو انفرادی تمغے تھے، ریسلنگ میں محمد بشیر نے 1960 میں کانسی کا تمغہ جیتا تھا جب کہ حسین شاہ نے 1988 کے سیئول اولمپکس میں کانسی کا تمغہ جیتا تھا۔

ارشد ندیم کی تاریخی کامیابی پر صدر مملکت، وزیراعظم اور دیگر رہنماؤں کی مبارکباد

ویب ڈیسک:پیرس اولمپکس میں پاکستانی جیولین تھرور ارشد ندیم کی تاریخی کامیابی پر  صدر مملکت آصف علی زرداری اور  وزیراعظم  شہباز شریف سمیت دیگر رہنماؤں نے مبارکباد پیش کردی ہے۔

تفصیلات کے مطابق اپنے مبارکباد کے پیغام میں صدر مملکت آصف علی زرداری نے کہا کہ ارشد ندیم آپ پوری قوم کا فخر ہیں۔

صدرآصف زرداری کی  گولڈ میڈل جیتنے پر ارشد ندیم کو مبارکباد

صدر مملکت آصف علی زرداری کی اولمپکس میں گولڈ میڈل جیتنے پر ارشد ندیم کو مبارکباد پیش کرتے ہوئے  صدر آصف علی زرداری نے کہا کہ ارشد ندیم کی جیت پوری قوم کی جیت ہے۔

صدر  مملکت نے کہا کہ شاندار  اولمپکس ریکارڈ قائم کرنا، طویل ترین جیولین تھرو بڑا کارنامہ ہے، پیرس اولمپکس میں پاکستان کیلئے تمغہ جیت کر آپ نے ہمارا سر فخر سے بلند کر دیا۔

صدرمملکت کا کہنا تھا کہ ارشد ندیم نے اولمپکس جیسے بڑے مقابلے میں پاکستان کا نام روشن کیا۔

وزیراعظم شہباز شریف کی  ارشد ندیم کو مبارکباد
اپنے پیغام میں وزیراعظم شہبازشریف نے کہا کہ اولمپک کی 118سالہ تاریخ میں منفرد ریکارڈ قائم کرنے پر ارشد ندیم آپ ڈھیروں مبارکباد کے مستحق ہیں۔

وزیراعظم شہبازشریف کی ارشد ندیم کوجیولین تھرومیں اولمپک میڈل جیتنے پر مبارکباد دیتے ہوئے کہا کہ شاباش ارشد ندیم ،آپ نے قوم کا سرفخر سے بلند کردیا۔

وزیراعظم شہباز شریف کا کہنا تھاکہ اولمپک میں تاریخ رقم کرکےآپ نےثابت کیا ہے کہ ارادے مضبوط ہوں تو ناممکن ممکن بن جاتاہے۔

وزیراعظم کا کہنا تھاکہ قوم کےبیٹےاولمپئین ارشدندیم پر والدین ہی نہیں ہم سب کو ناز ہے۔

سابق وزیراعظم نوازشریف

سابق وزیراعظم نوازشریف نےاولمپکس میں گولڈ میڈل جیتنے پر ارشد ندیم کو مبارکباد پیش کرتے ہوئے کہا ہے کہ ارشد ندیم نےپیرس اولمپکس 2024 میں گولڈمیڈل جیت کر قوم کاسر فخر سے بلند کردیا،شاباش ارشدندیم۔

اسپیکر قومی اسمبلی اور چیئرمین سینیٹ کی مبارکباد

اسپیکر قومی اسمبلی ایاز صادق نے ارشد ندیم کو اولمپکس میں گولڈ میڈل جیتنے پر مبارکبادکے بیان میں کہا کہ ارشد ندیم نے بھرپور محنت اور صلاحیتوں کا مظاہرہ کرتے ہوئے گولڈ میڈل جیتا ہے۔

چیئرمین سینیٹ یوسف رضا گیلانی نے ارشد ندیم کواولمپکس میں گولڈ میڈل جیتنے پر مبارکبادکے پیغام میں کہا کہ ارشد ندیم نے اپنی کامیابیوں کا سلسلہ جاری رکھتے ہوئے پاکستان کا نام روشن کیا۔

چیئرمین پیپلزپارٹی بلاول بھٹو 

چیئرمین پاکستان پیپلز پارٹی بلاول بھٹو زرداری نے  ارشد ندیم کو پیرس اولمپکس میں گولڈ میڈل جیتنے پر مبارکباد کے پیغام میں کہا کہ ارشد ندیم نے اولمپکس کے انفرادی مقابلوں میں پاکستان کیلئے تاریخ میں پہلا طلائی تمغہ حاصل کرکے قوم کا سر فخر سے بلند کردیا۔

وزیر اعلیٰ پنجاب مریم نواز 

وزیر اعلیٰ پنجاب مریم نواز نے بھی ارشد ندیم کو اولمپکس میں گولڈ میڈل جیتنے پر مبارکبادپیش کی ہے۔

اپنے مبارکباد کے پیغام میں وزیراعلیٰ پنجاب مریم نواز نے کہا کہ ارشد ندیم نے گولڈ میڈل ہی نہیں قوم کے دل بھی جیت لیے ہیں،ارشدندیم نےاولمپکس میں 92.97 میٹرکاریکارڈ قائم کرکےاپنی برتری ثابت کردی۔

وزیر اعلی گلگت بلتستان حاجی گلبر خان

وزیر اعلی گلگت بلتستان نےارشد ندیم کی جیولن تھرو اولمپکس کا فائنل جیتنے پر مبارکباد  دی اور کہا کہ پاکستان میں باصلاحیت لوگوں کی کمی نہیں ہے،ارشد ندیم نے 92.97 کی تھرو ریکارڈ قائم کر کے قوم کا سر فخر سے بلند کیا ۔

وفاقی وزیر داخلہ اور چیئرمین پی سی بی محسن نقوی 

وفاقی وزیر داخلہ اور چیئرمین پی سی بی محسن نقوی نے بھی پیرس اولمپکس میں گولڈ میڈل جیتنے پر پاکستانی جیولین تھرور ارشد ندیم کو مبارکباد پیش کی۔

وزیر داخلہ محسن نقوی نے ارشد ندیم کیلئے اپنے مبارکباد کے پیغام میں کہا کہ ارشد ندیم کی تاریخی کامیابی پر پورے ملک کو ان پر فخر ہے۔

انہوں نے کہا کہ ریکارڈ کے ساتھ اولمپک گولڈ میڈل جیتنا آپ کی سخت محنت لگن اور کمٹمنٹ کا نتیجہ ہے۔

حمزہ شہباز

سابق وزیراعلی پنجاب و نائب صدر مسلم لیگ ن حمزہ شہباز شریف نے پیرس اولمپکس میں گولڈ میڈل جیتنے پر ارشد ندیم کو مبارک باد دیتے ہوئے کہا ہے کہ ارشد ندیم نے گولڈ میڈل جیت کر پوری قوم کا سر فخر سے بلند کیا ہے،محدود سہولیات کے ساتھ قومی ہیرو نے اولمپکس میں پاکستان کا جھنڈا بلند کیا۔محنت لگن اور پاکستان کے لئے کچھ کر گزرنے کے جذبے نے تاریخ رقم کی ہے۔

حمزہ شہباز  نے کہا کہ ارشد ندیم نے نہ صرف گولڈ میڈل جیتا بلکہ اولمپکس ریکارڈ بھی قائم کیا۔ارشد ندیم پاکستان کی نئی نسل کے لئے ایک زندہ مثال ہیں۔شاباش اور شکریہ ارشد آپ نے قوم کو سچی خوشی سے سرشار کیا ہے۔

وفاقی وزیر احسن اقبال 

وفاقی وزیر احسن اقبال نے ارشد ندیم کےپیرس اولمپکس میں گولڈ میڈل جیتنے پر  اپنے مبارکباد کے پیغام میں کہا کہ ارشد ندیم کی محنت اور عزم نے دنیا بھر میں پاکستان کا سر فخر سے بلند کر دیا ہے۔

 پیرس اولمپکس میں مینز جیولین تھرو ایونٹ کے فائنل میں پوری قوم کی نظریں ارشد ندیم پر تھیں جو پاکستان کو 32 سال بعد اولمپک میں کوئی میڈل دلانے کی واحد امید تھے۔

خیال رہےکہ پاکستان نے آخری مرتبہ 8 اگست 1992 کو اولمپکس میڈل پوڈیم پر قدم رکھا تھا جب قومی ہاکی ٹیم نے بارسلونا اولمپکس میں نیدرلینڈز کو تین کے مقابلے میں چار گول سے شکست دے کر کانسی کا تمغہ جیتا تھا جب کہ پاکستان نے آخری مرتبہ 1984 میں اولمپکس میں گولڈ میڈل جیتا تھا جوکہ ہاکی ٹیم نے دلوایا تھا۔

عطاء اللہ تارڑ 

وفاقی وزیر اطلاعات و نشریات عطاء اللہ تارڑ نے جیولین تھرور ارشد ندیم کو پیرس اولمپکس میں گولڈ میڈل جیتنے پر مبارکباد دیتے ہوئے کہا ہے کہ ارشد ندیم نے اپنی محنت، لگن اور صلاحیت سے ثابت کر دیا ہے کہ پاکستانی کھلاڑی کسی سے کم نہیں۔پیرس اولمپکس میں گولڈ میڈل جیت کر آپ نے تاریخ رقم کردی ہے۔ ارشد ندیم کی کامیابی ہر پاکستانی نوجوان کے لیے  مشعل راہ ہے،ان کی کامیابی نوجوانوں کو کھیل کی دنیا میں آگے بڑھنے کی ترغیب دے گی۔

عطاء اللہ تارڑ نے مزید کہا کہ ارشد ندیم کی جیت پوری قوم کی جیت ہے، آپ کو میری طرف سے لاکھوں مبارکباد۔

سابق اسپیکر قومی اسمبلی راجہ پرویز اشرف 

سابق اسپیکر قومی اسمبلی اور پی پی پی وسطی پنجاب کے صدر راجہ پرویز اشرف نے اولمپکس میں طلائی تمغہ جیتنے والے قومی ہیرو ارشد ندیم کو مبارک باد دیتے ہوئے کہا ہے کہ ارشد ندیم نے اولمپکس انفرادی مقابلوں میں پہلا طلائی تمغہ حاصل کرکے تاریخ رقم کی ہے،ارشد ندیم نے پوری پاکستانی قوم کا دنیا میں سر فخر سے بلند کر دیا،اولمپکس جیولن تھرو مقابلوں میں ارشد ندیم نے 114سالہ ریکارڈ بریک کر دیا۔کھیلوں کی اولمپکس اور پاکستانی تاریخ میں ارشد ندیم کا نام سنہرے حروف سے لکھا جائیگا۔

راجہ پرویز اشرف نے مزید کہا کہ محنت، لگن اور مستقل مزاجی کے باعث اولمپئن ارشد ندیم پاکستانی یوتھ کیلیے مشعل راہ بن چکے ہیں،92.97 کی تھرو کا ریکارڈ قابل تعریف ہے، 24کروڑ عوام  اپنے ہیرو کا والہانہ استقبال کریگی۔

آئی جی پنجاب ڈاکٹر عثمان انور 

آئی جی پنجاب ڈاکٹر عثمان انور نےارشد ندیم کو پیرس اولمپکس میں گولڈ میڈل جیتنے پر مبارکباد دیتے ہوئے کہا ہے کہ ارشد ندیم نے ان تھک محنت اور لگن سے تاریخ رقم کی، قوم کا سر فخر سے بلند کر دیا،32 برس بعد پاکستان کے لئے  اولمپکس گولڈ میڈل کا تحفہ نوجوان اتھلیٹس کیلئے مشعل راہ ثابت ہوگا،ارشد ندیم کو اولمپک مقابلوں میں ورلڈ ریکارڈ قائم کرنے پر پولیس فورس کی جانب سے مبارک باد پیش کرتا ہوں،ارشد ندیم نے آبائی شہر میاں چنوں میں سپیشل انیشئیٹو پولیس سٹیشن کا افتتاح بھی کیا تھا۔

امیر جماعت اسلامی حافظ نعیم الرحمن 

امیر جماعت اسلامی حافظ نعیم الرحمن نے پریس کانفرنس سے خطاب  کرتے ہوئے ساری قوم کو ارشد ندیم کی کامیابی پر مبارکباد  دی ہے اور کہا کہ ارشد ندیم مایوسی کے دور میں امید کا پیغام بن کر سامنے آئے ہیں،ہم نے آخری حافظ نعیم الرحمن مرتبہ لاس اینجلس میں ہاکی میں گولڈ میڈل لیا تھا۔

بیرسٹر ارسلان اسلام شیخ

ترجمان سندھ حکومت و میئر سکھر نے ارشد ندیم کے لیے سکھر کی عوام کی پرزور خواہش پر سونے کے تاج کا اعلان کردیا، بیرسٹر ارسلان اسلام شیخ نے کہاہے کہ سکھر میں زیر تعمیر نیو اسپورٹس اسٹیڈیم کو ارشد ندیم اسٹیڈیم کے نام سے منسلک کرنے کا  فیصلہ کیا ہے،بیرسٹر ارسلان اسلام شیخ نے ارشد ندیم کو سکھر آنے کی دعوت بھی دے دی،سکھر آمد پر سکھر کی عوام ارشد ندیم کو سونے کا تاج پہنائے گی۔

ترجمان سندھ حکومت و میئر سکھر نے کہا ہے کہ اس وقت ہر پاکستانی خوش ہے،ارشد ندیم نے ایک صدی پراناریکارڈ توڑ کر ہر پاکستانی کا سر فخر سے بلند کردیا ہے،ارشد ندیم نے ہماری ماؤں بہنوں کی دعاؤں سے بہت خوبصورت تحفہ پاکستان کو دیا ہے۔

وزیر توانائی سندھ ناصر شاہ

وزیر توانائی و منصوبہ بندی و ترقیات سید ناصر حسین شاہ نے گولڈ میڈل جیتنے پر ارشد ندیم کو مبارکباد دیتے ہوئے کہا ہے کہ ارشد ندیم نے گولڈ میڈل جیت کر ملک و قوم کا سر فخر سے بلند کردیا،ارشد ندیم کی کامیابی، محنت اور جذبہ دیگر کھلاڑیوں کیلئے باعث تقلید ہے،ملک و قوم کا نام روشن کرنے والے ارشد ندیم کے ٹرینر، کوچ اور یورپی قوم مبارکباد کے مستحق ہیں،ارشد ندیم کی جیت نے کھلاڑیوں میں جوش و جذبہ اور جیت کی لگن پیدا کردی ہے۔

ناصر شاہ نے کہا ہے کہ ارشد ندیم کی وطن واپسی پر پرجوش اور تاریخی استقبال کیا جائے،32 سال بعد اولمپکس میں گولڈ میڈل کا حصول ارشد ندیم کا نام پاکستانی تاریخ میں ہمیشہ یاد رکھا جائے گا،امید ہے کہ اولمپکس میں ارشد ندیم کا رکارڈ عرصے تک کوئی نہیں توڑ پائے گا۔

سینیٹر شیری رحمٰن 

پیپلز پارٹی کی نائب صدر ,سینیٹر شیری رحمٰن نے ارشد ندیم کو گولڈ میڈل جیتنے پر مبارکباد پیش کی اور کہا کہ آج کا دن پاکستان کے لیے تاریخی ہے، ارشد ندیم نے اپنی محنت اور لگن سے قوم کا سر فخر سے بلند کیا ہے،ارشد نے 32 سال بعد ایک بار پھر اولمپکس گیمز میں پاکستان کا پرچم بلند کیا۔

شیری رحمٰن نے پاکستان زندہ باد کا نعرہ بلند کرتے ہوئے کہا کہ ارشد ندیم کی کامیابی نے پوری قوم کے دل جیت لیے ہیں، ان کی اس کامیابی پر پوری قوم ان کو دلی مبارکباد پیش کرتی ہے۔

شازیہ مری 

 شازیہ مری نے کہا ہے کہ ارشدم ندیم نے یوم آزادی کی خوشیوں کو دوگنا کردیا،ایتھلیٹ ارشد ندیم نے اولمپکس میں بہترین کھیل کا مظاہرہ کیا،اولمپکس میں جیولن تھرو کے مقابلوں میں ارشد ندیم کا92.97 عالمی ریکارڈ پوری قوم کیلے باعث فخر ہے،ارشد ندیم پوری قوم کا فخر بن گئے ہیں، دعا ہے کہ ایسے ہی کامیابیاں سمیٹتے رہیں۔

مرکزی چئیرمین قومی وطن پارٹی آفتاب خان شیرپاؤ 

مرکزی چئیرمین قومی وطن پارٹی آفتاب خان شیرپاؤ نے ارشد ندیم کی شاندار کامیابی پر زبردست خراج تحسین پیش کرتے ہوئے کہا ہے کہ پیرس اولمپکس 2024 میں ارشد ندیم کی کامیابی ،مشکل ترین معاشی اور سیاسی تناؤ کے حالات میں باد صبا کا ایک ٹھنڈا جھونکا ہے۔ارشد ندیم کو ان کی شاندار کامیابی پر میں انہیں اور پوری قوم کو دلی مبارکباد پیش کرتا ہوں،میرا وطن عزیز یقیناً ٹیلنٹ سے بھرپور ہے، ضرورت صرف میرٹ کے اطلاق اور کرپشن کے خاتمہ کی ہے۔

 انٹرنیشنل ریسلر ورلڈ چیمپئن انعام بٹ 

 انٹرنیشنل ریسلر ورلڈ چیمپئن انعام بٹ نے ارشد ندیم کو جیت کی مبارکباد دیتے ہوئے کہا ہے کہ ارشد ندیم اپکو اولمپک جیتنے پر مبارک باد پیش کرتا ہوں،  ارشد آپ نے اپنی جیت سے پورے پاکستان کا سر فخر سے بلند کردیا،ارشدندیم جیسے کھلاڑی صدیوں میں پیدا ہوتے ہیں،اگر ارشد ندیم کو موجودہ وقت کا محمد علی کلے کہاجائے تو غلط نہ ہوگا۔

پیرس اولمپکس میں گولڈ میڈل جیتنے پر افواج پاکستان کی ارشد ندیم کو مبارکباد

ویب ڈیسک :پیرس اولمپکس میں 32سال بعد پاکستان کیلئے پہلا گولڈ میڈل جیتنے پر پاک فوج نے ارشد ندیم سمیت قوم کو مبارکباد پیش کی ہے۔

آئی ایس پی آر کے مطابق اولمپکس میں پاکستان کیلئے 32 سال بعد پہلا گولڈ میڈل جیتنے پر چیئرمین جوائنٹ چیفس آف اسٹاف کمیٹی اور افواج پاکستان کے سربراہان آرمی چیف جنرل عاصم منیر، چیف آف ائیر اسٹاف ائیر چیف مارشل ظہیر احمد سدھو اور نیول چیف ایڈمرل نوید اشرف نے اپنے پیغام میں ارشد ندیم کی جیت پر قوم کو مبارکباد پیش کی ہے۔

آئی ایس پی آر کے مطابق ارشد ندیم نے انفرادی طور پر گولڈ میڈل حاصل کرنے والے پہلے پاکستانی کھلاڑی بن کر تاریخ میں اپنا نام روشن کیا، اولمپکس میں پاکستان کیلئے شاندار کامیابی ارشد ندیم کی غیرمتزلزل لگن کا نتیجہ ہے۔

اپنے بیان میں آئی ایس پی آر کا کہنا تھا کہ اولمپکس میں کامیابی ارشد ندیم کی انتھک محنت، ثابت قدمی اور مثالی محنت کا منہ بولتا ثبوت ہے۔

پیرس اولمپکس میں مینز جیولین تھرو ایونٹ کے فائنل میں پوری قوم کی نظریں ارشد ندیم پر تھیں جو پاکستان کو 32 سال بعد اولمپکس میں کوئی میڈل دلانے کی واحد امید تھے۔

گولڈ میڈل کے ساتھ 14 اگست منائیں گے: ارشد ندیم

ویب ڈیسک:پیرس اولمپکس میں 32 سال بعد پاکستان کیلئے پہلا گولڈ میڈل جیتنے والے پاکستانی ایتھلیٹ جیولین تھرور ارشد ندیم نے کہا ہے کہ آج میرا دن تھا، میں اس سے زیادہ دور بھی تھرو کر سکتا تھا۔

تفصیلات کے مطابق پیرس میں جیولین تھرو کے مقابلوں میں بطور پاکستانی ایتھلیٹ پہلا انفرادی گولڈ میڈل حاصل کرنے والے ارشد ندیم نے کہا کہ میں ردھم میں تھا اور پرامید تھا کہ گولڈ میڈل جیتوں گا، گولڈ میڈل کے ساتھ 14 اگست منائیں گے۔

انہوں نے کہا کہ امید تھی کہ آج کچھ کر جاؤں گا، پُرامید تھا کہ جتنے دور تھرو کی اس سے گولڈ میڈل جیت سکوں۔

ارشد ندیم نے کہا کہ پاکستان اولمپک ایسوسی ایشن اور اپنے کوچ کا شکر گزار ہوں۔

ارشد ندیم نےتاریخی کامیابی کے بعد سوشل میڈیا پر اپنے بیان میں کہا ہے کہ اس عظیم کامیابی پر سب سے پہلے اللہ پاک کا شکرگزار ہوں،میرے والدین، پوری قوم کی دعاؤں کا شکریہ، خاص طور پر میرے کوچ سلمان اقبال بٹ، کی انتھک محنت اور ڈاکٹر علی شیر باجوہ کی سپورٹ کی بدولت میں نے یہ عظیم سنگِ میل حاصل کیا ہے۔

سب کا شکریہ! ارشد ندیم نے کہا کہ یہ گولڈ میڈل میری طرف سے پوری قوم کے لیے یومِ آزادی کے موقع پر ایک تحفہ ہے۔

دوسری جانب ارشد ندیم کے بھائی نے کہا ہے کہ کم وسائل کے باوجود ارشد ندیم نے ریکارڈ تھرو کی۔

انہوں نے کہا کہ حکومت سے بھی اپیل ہے کہ ارشد ندیم سے کیا وعدہ پورا کرے، گاؤں میں گراؤنڈ بنانے کا حکومت اپنا وعدہ پورا کرے۔

ارشد ندیم کے بھائی کا کہنا تھا کہ نیرج چوپڑا اور اس کی فیملی کو بھی مبارکباد دیتا ہوں۔

پیرس اولمپکس میں مینز جیولین تھرو ایونٹ کے فائنل میں پوری قوم کی نظریں ارشد ندیم پر تھیں جو پاکستان کو 32 سال بعد اولمپکس میں کوئی میڈل دلانے کی واحد امید تھے۔

خیال رہےکہ پاکستان نے آخری مرتبہ 8 اگست 1992 کو اولمپکس میڈل پوڈیم پر قدم رکھا تھا جب قومی ہاکی ٹیم نے بارسلونا اولمپکس میں نیدرلینڈز کو تین کے مقابلے میں چار گول سے شکست دے کر کانسی کا تمغہ جیتا تھا جب کہ پاکستان نے آخری مرتبہ 1984 میں اولمپکس میں گولڈ میڈل جیتا تھا جوکہ ہاکی ٹیم نے ہی دلوایا تھا۔

ارشد ندیم پاکستان کو انفرادی مقابلوں میں گولڈ میڈل دلوانے والے پہلے ایتھلیٹ ہیں۔