پاک فوج کا سرگودھا کے علاقے گورنہ پٹھاناں میں ریسکیو اینڈ ریلیف آپریشن جاری

گھروں،فصلوں کا نقصان پورا کریں گے،متاثرین زندگی کو ترجیح دیں،مریم نواز کی اپیل

ویب ڈیسک: وزیراعلیٰ پنجاب مریم نواز شریف نے سیلاب کے خطرے کی زد میں آنے والے عوام سے اپیل کی ہے کہ وہ فوری طور پر انتظامیہ سے تعاون کریں اور اپنی جانوں کو محفوظ بنانے کے لیے محفوظ مقامات پر منتقل ہو جائیں۔

وزیراعلیٰ نے کہا کہ موجودہ صورتحال میں سب سے اہم ترجیح عوام کی زندگیوں کا تحفظ ہے، لہٰذا شہری انتظامیہ اور ریسکیو اداروں کے ساتھ بھرپور تعاون کریں۔

انہوں نے یقین دہانی کرائی کہ گھروں، فصلوں اور مویشیوں کے نقصانات کا شفاف تخمینہ لگایا جا رہا ہے اور کسی متاثرہ شخص کو اس کے حق سے محروم نہیں کیا جائے گا۔

مریم نواز شریف نے وعدہ کیا کہ پنجاب کے تمام متاثرین کے نقصانات کا ازالہ کیا جائے گا۔ انہوں نے عوام پر زور دیا کہ وہ اپنی اور اپنے بچوں کی زندگیوں کی حفاظت کو اولین ترجیح دیں۔

آج سے ملک بھر میں شدید موسلادھار بارشیں،محکمہ موسمیات کا الرٹ

ویب ڈیسک: محکمہ موسمیات نے آج سے ملک کے مختلف حصوں میں گرج چمک کے ساتھ موسلادھار بارشوں کی پیشگوئی کی ہے اور خبردار کیا ہے کہ بالائی علاقوں میں لینڈ سلائیڈنگ کے خطرات بھی موجود ہیں۔

محکمہ موسمیات کے مطابق آج سے 2 ستمبر تک اسلام آباد اور راولپنڈی میں شدید بارشوں کا امکان ہے، جبکہ وسطی اور جنوبی پنجاب میں بھی 31 اگست تک بارشوں کا سلسلہ جاری رہنے کی توقع ہے۔ ملتان، ڈی جی خان، راجن پور، لیہ، بھکر، ساہیوال، بہاولپور، بہاولنگر اور رحیم یار خان ان اضلاع میں شامل ہیں جہاں بارشوں کے باعث نشیبی علاقے زیر آب آ سکتے ہیں۔

پنجاب کے شمالی اور شمال مشرقی اضلاع میں 30 اور 31 اگست کو شدید بارشیں متوقع ہیں۔ ان اضلاع میں لاہور، گوجرانوالہ، سیالکوٹ، اٹک، جہلم، چکوال، گجرات، نارووال، حافظ آباد اور منڈی بہاؤالدین شامل ہیں۔ لاہور میں دریائے راوی پر شاہدرہ کے مقام پر اونچے درجے کا سیلاب ریکارڈ کیا گیا ہے جبکہ چوہنگ کے قریب ایک نجی ہاؤسنگ سوسائٹی پہلے ہی زیر آب آ چکی ہے۔

خیبرپختونخوا میں بھی آج سے 31 اگست تک بارشوں کا نیا سلسلہ جاری رہے گا۔ ملاکنڈ اور ہزارہ ڈویژن میں لینڈ سلائیڈنگ کا خدشہ ظاہر کیا گیا ہے۔ چترال، دیر، سوات، بونیر، مانسہرہ، ایبٹ آباد، پشاور، نوشہرہ، مردان، ڈی آئی خان، ٹانک، کوہاٹ اور بنوں میں بارشیں متوقع ہیں۔

آزاد کشمیر کے شہروں مظفرآباد، باغ، حویلی، کوٹلی، میرپور اور بھمبر میں بھی 2 ستمبر تک بارشیں ہوں گی جبکہ گلگت بلتستان میں لینڈ سلائیڈنگ کا خطرہ بڑھ گیا ہے۔

ادھر نیشنل ڈیزاسٹر مینجمنٹ اتھارٹی (این ڈی ایم اے) نے کراچی میں کل سے بارشوں کی پیشگوئی کرتے ہوئے شہریوں کو احتیاطی تدابیر اختیار کرنے کی ہدایت کی ہے۔ ادارے کے مطابق ممکنہ شدید بارشوں سے شہری سیلاب کا خطرہ پیدا ہو سکتا ہے۔ سندھ کے دیگر اضلاع، خصوصاً ٹھٹہ، سجاول، بدین اور تھرپارکر میں 30 اگست تا 2 ستمبر بارشوں کا امکان ہے، جبکہ حیدرآباد، دادو، سکھر، گھوٹکی، لاڑکانہ، جیکب آباد اور کشمور میں بھی موسلادھار بارشیں متوقع ہیں۔

پنجاب حکومت کاسیلاب متاثرہ علاقوں میں تعلیمی ادارے بند رکھنے پر غور

ویب ڈیسک: پنجاب حکومت نے سیلاب متاثرہ اضلاع میں تعلیمی ادارے ایک ہفتے کے لیے بند رکھنے پر غور شروع کر دیا ہے۔

نجی ٹی وی کے مطابق چیف سیکرٹری پنجاب زاہد اختر زمان کی زیر صدارت پی ڈی ایم اے کا اہم اجلاس ہوا جس میں ریلیف کمشنر پنجاب اور ڈی جی پی ڈی ایم اے عرفان علی کاٹھیا شریک تھے، جبکہ صوبائی وزرا خواجہ سلمان رفیق اور خواجہ عمران نذیر نے ویڈیو لنک کے ذریعے شرکت کی۔

اجلاس میں فیصلہ کیا گیا کہ کلینک آن وہیلز کو فوری طور پر متاثرہ اضلاع روانہ کیا جائے گا۔ اس کے ساتھ ساتھ، تعلیمی اداروں کو ایک ہفتے کے لیے بند رکھنے کی تجویز پر بھی غور کیا گیا۔

پی ڈی ایم اے اجلاس میں ننکانہ، شیخوپورہ اور ٹوبہ ٹیک سنگھ کے دریائی بیلٹ کو فوری خالی کرانے کی ہدایت کی گئی، جبکہ جھنگ اور چنیوٹ کو بچانے کے لیے رواز پل پر کنٹرولڈ شگاف ڈالنے کا فیصلہ کیا گیا۔

چیف سیکرٹری پنجاب نے متاثرہ علاقوں میں ٹینٹ ولیجز قائم کرنے، میڈیکل کیمپس میں ادویات کی فراہمی یقینی بنانے اور ریلیف سرگرمیوں کو مزید مؤثر بنانے کی ہدایت کی۔

کمالیہ میں دریائے راوی کا سیلابی ریلا، 26 دیہات کیلئے خطرے کی گھنٹی

ویب ڈیسک: کمالیہ میں دریائے راوی کی صورتحال تشویشناک حد تک بگڑ گئی ہے۔ پانی کی سطح میں مسلسل اضافہ ہو رہا ہے اور اگلے 24 گھنٹوں کے دوران دو لاکھ کیوسک تک کا شدید سیلابی ریلا مل فتیانہ کے مقام پر داخل ہونے کا خدشہ ظاہر کیا جا رہا ہے۔ حکام کے مطابق یہ ریلا علاقے میں بڑے پیمانے پر تباہی کا باعث بن سکتا ہے۔

اسسٹنٹ کمشنر کمالیہ اقرا ناصر نے بتایا ہے کہ اس وقت مل فتیانہ کے مقام سے 45 ہزار سے 50 ہزار کیوسک پانی گزر رہا ہے، تاہم بہاؤ میں تیزی کے باعث صورت حال مزید خراب ہوسکتی ہے۔ ان کا کہنا ہے کہ سیلابی پانی پہلے ہی قریبی رہائشی علاقوں میں داخل ہونا شروع ہو گیا ہے، جس کے بعد ضلعی انتظامیہ نے ہائی الرٹ جاری کر دیا ہے۔

انتظامیہ نے ہنگامی صورتحال کے پیشِ نظر کمالیہ کی 26 دیہات میں انخلاء کے احکامات جاری کر دیے ہیں۔ مقامی مساجد سے مسلسل اعلانات کرائے جا رہے ہیں جن میں شہریوں سے کہا جا رہا ہے کہ وہ فوری طور پر اپنے مال مویشیوں سمیت محفوظ مقامات پر منتقل ہو جائیں۔

ضلعی حکومت کے مطابق ریسکیو 1122، پولیس اور مقامی رضاکاروں سمیت تمام ادارے ہائی الرٹ پر ہیں اور متاثرہ دیہات کو خالی کرانے کے لیے اقدامات تیز کر دیے گئے ہیں۔ سیلاب متاثرین کے لیے قریبی تعلیمی اداروں اور سرکاری عمارتوں میں ہنگامی ریلیف کیمپ قائم کیے جا رہے ہیں، جہاں انہیں عارضی رہائش، کھانے اور دیگر بنیادی سہولیات فراہم کی جائیں گی۔

انتظامیہ نے شہریوں کو خبردار کیا ہے کہ دریائے راوی میں پانی کی سطح مسلسل بلند ہو رہی ہے اور آئندہ چند گھنٹے انتہائی نازک ثابت ہو سکتے ہیں۔ عوام سے اپیل کی گئی ہے کہ وہ کسی بھی صورت خطرناک مقامات پر نہ جائیں اور حکومتی احکامات پر عمل کرتے ہوئے فوری طور پر انخلا کریں۔

دریائے چناب کے بپھرنے سے ملتان خطرے میں،انتظامیہ کا بڑا فیصلہ

ویب ڈیسک: دریائے چناب کی بپھری موجوں نے جنوبی پنجاب میں خطرے کی گھنٹیاں بجا دی ہیں۔ سیلابی ریلے کے ممکنہ تباہ کن اثرات کو دیکھتے ہوئے ضلعی انتظامیہ نے ہیڈ محمد والا کے مقام پر کنٹرولڈ شگاف ڈالنے کا فیصلہ کیا ہے تاکہ ملتان شہر کو بڑے نقصان سے بچایا جا سکے۔

ڈپٹی کمشنر ملتان وسیم حامد کے مطابق اگر بروقت شگاف نہ ڈالا گیا تو شہر کو تباہی کا سامنا کرنا پڑ سکتا ہے۔ ان کا کہنا ہے کہ آئندہ دو روز نہایت نازک ہیں کیونکہ جھنگ سے گزرنے کے بعد انتہائی طاقتور سیلابی ریلا اب ملتان کی سمت بڑھ رہا ہے۔ ضلعی حکومت نے ہنگامی بنیادوں پر انخلاء کا عمل شروع کر دیا ہے اور 60 فیصد سے زائد آبادی کو محفوظ مقامات پر منتقل کر دیا گیا ہے۔

تحصیل جلال پور پیروالا کے 18 دیہات پہلے ہی پانی میں ڈوب چکے ہیں جبکہ مجموعی طور پر 138 سے زائد موضع جات سیلاب سے متاثر ہوئے ہیں۔ دوسری جانب مظفرگڑھ میں صورتحال نہایت سنگین ہو چکی ہے، جہاں ممکنہ بڑے نقصان کو روکنے کے لیے پانچ مقامات پر حفاظتی بند توڑنے کی تیاریاں مکمل کر لی گئی ہیں۔

سیلاب نے پنجاب کے دیگر اضلاع کو بھی لپیٹ میں لے لیا ہے۔ سرگودھا کے علاقے کوٹ مومن میں کھیت پانی میں ڈوب گئے اور فصلیں مکمل طور پر تباہ ہوگئیں جبکہ کئی دیہات کا زمینی رابطہ کٹ چکا ہے۔ منڈی بہاؤالدین کی تحصیل پھالیہ کے 69 دیہات مکمل طور پر زیرِ آب آ گئے ہیں، جہاں راستے ختم ہونے کے باعث لوگ محصور ہو گئے ہیں۔

ادھر حافظ آباد میں دھان اور چارے کی فصلیں تباہ ہو گئیں۔ گوجرانوالہ میں نالہ پلکھو کے اوور فلو ہونے سے دیہات کا رابطہ ٹوٹ گیا جبکہ وزیرآباد میں دریا کنارے واقع کئی بستیاں سیلابی پانی میں ڈوب گئیں۔

ضلعی انتظامیہ اور ریسکیو اداروں کی ٹیمیں امدادی کارروائیوں میں مصروف ہیں تاہم ماہرین نے خبردار کیا ہے کہ اگر دریائے چناب میں پانی کی سطح مزید بلند ہوئی تو جنوبی پنجاب کو بڑے پیمانے پر نقصانات کا سامنا کرنا پڑ سکتا ہے۔

بھارتی آبی جارحیت، مقبوضہ کشمیر میں دریائے چناب پر سلال ڈیم کے دروازے کھول دیے

ویب ڈیسک: بھارت کی آبی جارحیت کے نتیجے میں پاکستان کے دریاؤں میں پانی کی سطح خطرناک حد تک بلند ہو گئی ہے۔ مقبوضہ جموں و کشمیر میں دریائے چناب پر واقع سلال ڈیم کے دروازے کھول دیے گئے جس کے بعد دریائے چناب میں غیر معمولی صورتحال پیدا ہوگئی ہے۔

فلڈ فارکاسٹنگ ڈویژن کے مطابق ہیڈ قادر آباد کے مقام پر انتہائی اونچے درجے کا سیلاب ریکارڈ کیا گیا ہے جہاں پانی کی آمد 3 لاکھ 5 ہزار کیوسک تک جا پہنچی ہے۔ اسی طرح ہیڈ خانکی پر بھی اونچے درجے کا سیلاب جاری ہے اور پانی کا بہاؤ 2 لاکھ 42 ہزار کیوسک ریکارڈ کیا گیا ہے۔

ہیڈ مرالہ کے مقام پر نچلے درجے کا سیلاب ہے لیکن یہاں بھی پانی کی آمد 1 لاکھ 10 ہزار کیوسک تک پہنچ گئی ہے۔ چنیوٹ کے مقام پر دریائے چناب کی صورتحال تیزی سے بگڑ رہی ہے، جہاں اب تک 4 لاکھ 57 ہزار کیوسک کا ریلا گزر چکا ہے۔ ماہرین نے خبردار کیا ہے کہ آنے والے دنوں میں 10 لاکھ کیوسک کا ریلا گزرنے کا خدشہ ہے جو مزید تباہی کا باعث بن سکتا ہے۔

چناب نگر میں بھی اونچے درجے کا سیلاب جاری ہے جہاں 4 لاکھ 63 ہزار کیوسک کا ریلا گزر رہا ہے۔ مقامی انتظامیہ نے ہائی الرٹ جاری کرتے ہوئے قریبی آبادیوں کو نقل مکانی کی ہدایت کر دی ہے۔ دوسری جانب احمدپور شرقیہ میں بیلی والا پتن کے مقام پر زمیندارہ بند ٹوٹنے سے متعدد بستیاں زیرِ آب آگئیں جبکہ سیکڑوں ایکڑ پر کھڑی فصلیں تباہ ہو گئیں۔

ادھر دریائے ستلج نے بھی پاکپتن اور اس کے مضافات میں تباہی مچا دی ہے۔ بند ٹوٹنے کے باعث درجنوں دیہات کا منچن آباد شہر سے زمینی رابطہ منقطع ہوگیا ہے اور ہزاروں افراد شدید مشکلات کا شکار ہیں۔

محکمہ موسمیات اور پی ڈی ایم اے نے مزید بارشوں کی پیش گوئی کرتے ہوئے خبردار کیا ہے کہ آنے والے دنوں میں دریاؤں میں پانی کی سطح مزید بلند ہوسکتی ہے، اس لیے متاثرہ علاقوں میں لوگوں کو بروقت محفوظ مقامات پر منتقل ہونا ضروری ہے۔

دریائے راوی میں پانی کی سطح بلند، شاہدرہ اور بلوکی شدید متاثر

ویب ڈیسک: لاہور اور گردونواح میں دریائے راوی کی صورتحال خطرناک ہوتی جا رہی ہے۔ شاہدرہ اور بلوکی کے مقام پر پانی کے بہاؤ میں تیزی آگئی ہے جس کے باعث قریبی علاقوں میں سیلابی پانی داخل ہونا شروع ہوگیا۔

فلڈ فارکاسٹنگ ڈویژن کے مطابق شاہدرہ کے مقام پر دریائے راوی انتہائی اونچے درجے کے سیلاب کی سطح پر پہنچ گیا ہے، جہاں پانی کا بہاؤ دو لاکھ 15 ہزار 550 کیوسک ریکارڈ کیا گیا ہے جبکہ سائفن کے مقام پر پانی میں مزید اضافہ دیکھا جا رہا ہے۔

سیلابی ریلے کے نتیجے میں شاہدرہ کی کئی آبادیوں کو متاثر ہونا پڑا ہے۔ فرخ آباد، عزیز کالونی اور دیگر ملحقہ علاقوں میں پانی گھروں میں داخل ہوگیا، جس پر انتظامیہ نے فوری طور پر انخلا کا عمل شروع کر دیا۔ مکینوں کو محفوظ مقامات پر منتقل کرنے کے لیے مساجد میں اعلانات کیے جا رہے ہیں جبکہ دو سرکاری اسکولوں میں ہنگامی بنیادوں پر ریلیف کیمپ قائم کر دیے گئے ہیں۔ ان کیمپوں میں متاثرہ افراد کے لیے کھانے اور ضروری سہولیات کا انتظام بھی کیا گیا ہے۔

ملتان روڈ پر چوہنگ کے قریب ایک نجی ہاؤسنگ سوسائٹی بھی زیرِ آب آگئی ہے جس کے باعث رہائشیوں کو شدید مشکلات کا سامنا ہے۔ متاثرہ خاندانوں نے قیمتی سامان اور مال مویشی محفوظ مقامات پر منتقل کرنے کی کوششیں تیز کر دی ہیں۔

عینی شاہدین کے مطابق  بند کے کمزور حصوں کو مزید مضبوط کیا جا رہا ہے تاکہ مزید نقصان سے بچا جا سکے۔

ریسکیو 1122، ضلعی انتظامیہ اور مقامی پولیس کی ٹیمیں متحرک ہیں جبکہ امدادی کارروائیوں کے دوران متاثرہ خاندانوں کو ریلیف کیمپوں میں منتقل کرنے پر توجہ دی جا رہی ہے۔ حکام نے شہریوں سے اپیل کی ہے کہ وہ ہدایات پر عمل کریں اور غیر ضروری طور پر خطرناک مقامات پر نہ جائیں۔

رینجرز کا سیلاب سے متاثرہ سلیمانکی میں ریسکیو آپریشن جاری، فری میڈیکل کیمپس بھی قائم

ویب ڈیسک: پاکستان رینجرز (پنجاب) کا سیلاب سے متاثرہ سلیمانکی میں ریسکیو آپریشن جاری، فری میڈیکل کیمپس بھی قائم کیے۔

سلیمانکی میں سیلاب میں پھنسے 55 افراد اور 150 مویشیوں پاکستان رینجرز پنجاب نے محفوظ مقامات پر منتقل کیا۔ پاکستان رینجرز پنجاب کی جانب سے سیلاب سے متاثرہ علاقوں میں فری میڈیکل کیمپس بھی قائم کئے گئے ہیں۔

فری میڈیکل کیمپس میں سیلاب متاثرین کو بروقت طبی سہولیات کی فراہمی یقینی بنائی جا رہی ہے۔ میڈیکل کیمپس میں سیلاب متاثرین کے طبی معائنے کے ساتھ ساتھ مفت ادویات بھی فراہم کی جا رہی ہیں۔ سلیمانکی میں منعقدہ فری میڈیکل کیمپ سے خواتین اور بچوں سمیت 34 افراد مستفید ہوئے۔

پاکستان رینجرز پنجاب سیلابی صورتحال کے حوالے سے مسلسل دیگر اداروں کے ساتھ رابطے میں ہے۔ پاکستان رینجرز پنجاب کی جانب سے ریسکیو اور ریلیف آپریشن کو عوام کی جانب سے سراہا گیا ہے۔

ہمیں سیلاب کی تباہی سے بچنے کیلئے پانی کے نئے ذخائر تعمیر کرنے ہوں گے، وزیر اعظم

ویب ڈیسک: وزیراعظم شہباز شریف نے کہا ہے کہ پانی کے نئے ذخائر کی تعمیر وقت کی ضرورت ہے۔ ملک میں کئی چھوٹے ڈیم بنانے کی صلاحیت موجود ہے۔

نارووال میں سیلاب کی صورتحال پر ایم ڈی ایم اے اور دیگر اعلیٰ حکام سے خطاب کرتے ہوئے وزیراعظم نے کہا کہ ملک میں حالیہ سیلاب سے گھروں اور فصلوں کو شدید نقصان پہنچا۔ آئندہ آنے والے برسوں میں بھی ماحولیاتی تبدیلی سے نقصان ہوگا۔ آئندہ برسوں میں سیلاب سے بچنے کیلئے صوبے اپنی تیاری کریں۔ انہوں نے کہا کہ ہمیں اس تباہی سے بچنے کیلئے پانی کے نئے ذخائر تعمیر کرنے ہوں گے۔

شہباز شریف نے مزید کہا کہ پنجاب میں سیلابی صورتحال ہے۔ تمام ریسکیو ادارے دن رات کام کر رہے ہیں۔ خیبرپختونخوا اور گلگت میں سیلاب سے شدید نقصان ہوا۔ گلگت بلتستان، خیبرپختونخوا کے بعد اب پنجاب کو طغیانی کا سامنا ہے۔

انہوں نے کہا کہ سیلاب کی وجہ سے سیالکوٹ اور نارووال متاثر ہوئے، سوات ، بونیر اور مختلف علاقوں میں سیلاب سے تباہ کاریاں ہوئیں۔ گلگت بلتستان میں سیلاب کے باعث اموات ہوئیں۔ اب سیلابی پانی پنجاب کے دریاؤں سے گزر رہا ہے۔

پنجاب میں سیلابی صورتحال فنکار برادری کے قوم کے نام پیغامات

ویب ڈیسک: پنجاب میں سیلابی صورتحال پر فنکار برادری کے قوم کے نام پیغامات سامنے آئیں ہیں۔

اداکار شامل خان نے اپنے پیغام میں کہا ہے کہ سیلابی صورتحال میں احتیاطی تدابیر اختیار کریں اور حکومتی اداروں سے تعاون کریں۔

سونو ڈینجرس نے کہا کہ سیالکوٹ میں صورتحال سنگین ہے پاک فوج قوم کے شانہ بشانہ ہے۔ یہ صورتحال اتحاد و اتفاق کا تقاضہ کر رہی ہے۔ ہمیں پاک فوج اور دیگر اداروں کا بھرپور ساتھ دینا چاہیے۔

عمران اشرف نے کہا کہ سیلاب سے متاثرہ افراد ہمارے اپنے ہیں ان کی داد رسی کی جانی چاہیے۔ پاک فوج ہر مشکل میں قوم کے شانہ بشانہ ہوتی ہے ہمیں اپنی افواج پر فخر ہے۔

بل گیٹس کا پاکستان کے سیلاب متاثرین کیلئے ایک ملین ڈالر امداد دینے کا اعلان

ویب ڈیسک: مائیکروسافٹ کے بانی بل گیٹس کی فلاحی تنظیم ’’گیٹس فاؤنڈیشن‘‘ نے پاکستان کے سیلاب متاثرین کیلئے ایک ملین ڈالر امداد دینے کا اعلان کیا ہے۔

میڈیا رپورٹس کے مطابق یہ رقم حکومت پاکستان کو عالمی ادارہ صحت (ڈبلیو ایچ او) کے ذریعے فراہم کی جائے گی۔ یہ امداد چاروں صوبوں کے 33 متاثرہ اضلاع میں 4 لاکھ 65 ہزار افراد کو طبی سہولیات فراہم کرنے کیلئے استعمال کی جائے گی۔

پاکستان میں ڈبلیو ایچ او کے نمائندہ ڈاکٹر ڈاپنگ لو نے گیٹس فاؤنڈیشن کا شکریہ ادا کرتے ہوئے کہا کہ یہ امداد متاثرین کی جانیں بچانے میں مددگار ثابت ہوگی۔ اُن کا کہنا تھا کہ ماحولیاتی تبدیلی کے باعث قدرتی آفات میں اضافہ ہو رہا ہے، جس کیلئے بروقت تیاری ضروری ہے۔

واضح رہے کہ ڈبلیو ایچ او کی رپورٹ کے مطابق 26 جون سے 27 اگست تک سیلاب اور طوفانی بارشوں کے باعث 802 افراد جاں بحق اور 1,088 زخمی ہوئے، جب کہ 5,584 مویشی ہلاک، 7,465 مکانات تباہ اور 238 پل متاثر ہوئے۔ خیبرپختونخوا سب سے زیادہ متاثرہ صوبہ رہا۔ اب تک عالمی ادارہ صحت کی جانب سے 3 لاکھ 80 ہزار سے زائد متاثرین کو طبی امداد فراہم کی جا چکی ہے۔

شاہدرہ کے اطراف سے لوگوں کو پہلے ہی نکال لیا گیا تھا، مریم اورنگزیب

ویب ڈیسک: سینیر صوبائی وزیر مریم اورنگزیب نے کہا ہے کہ وزیر اعلیٰ کی ہدایت پر پہلے دن سے ادارے متحرک ہیں۔ دو لاکھ کیوسک سیلابی ریلا اس وقت دریائے راوی سے گزر رہا ہے۔

سینیر صوبائی وزیر مریم اورنگزیب، صوبائی وزیر عظمیٰ بخاری اور علیم خان کی شاہدرہ کے مقام پر میڈیا سے گفتگو۔ سینیر صوبائی وزیر نے کہا کہ شاہدرہ کے اطراف سے لوگوں کو پہلے ہی نکال لیا گیا تھا، سوا 2 لاکھ لوگوں کو محفوظ مقامات پر منتقل کیا گیا۔ پونے 2 لاکھ مویشیوں کو بھی محفوظ مقام پر منتقل کیا گیا۔ دوردراز کے علاقوں میں کشتیوں کے ذریعے ریسکیو کا عمل جاری ہے۔ سیف سٹی کیمروں کے ذریعے مانیٹرنگ جاری ہے۔ مثبت رپورٹنگ پر میڈیا کا بھی شکریہ ادا کرتی ہوں۔

انہوں نے کہا کہ چناب ، راوی اور ستلج میں سیلابی صورتحال ہے۔ علاقہ مکینوں کو محفوظ مقامات پر منتقل کیا جا رہا ہے۔ بارہ اموات سیلابی صورتحال میں ہوئی ہیں۔ دودراز کے علاقوں میں ریسکیو آپریشن کیا جا رہا ہے۔ میڈیا کے ذریعے متاثرہ علاقوں میں شہریوں کو ریسکیو کیا گیا۔ ریسکیو آپریشن میں جو ادارے خدمات سر انجام دے رہے ہیں، انہیں خراج تحسین پیش کرتی ہوں۔

وزیر اعظم اور وزیر اعلیٰ پنجاب نے نارووال کا دورہ کیا ہے۔ آٹھ ماہ قبل نالوں کی صفائی کا آپریشن کیا گیا۔ نالوں کی بروقت صفائی سے حالات کنٹرول میں ہیں۔ سیلاب میں اموات شہریوں کے غیر سنجیدہ رویے کی وجہ سے ہوئی۔ سیلابی پانی کے ساتھ سیلفی لینے سے گریز کریں۔

وفاقی وزیر عبدالعلیم خان نے کہا کہ پنجاب میں غیر متوقع سیلاب ہے۔ دریائے راوی کی صورتحال پہلے کبھی ایسی نہیں دیکھی۔ سیلاب متاثرین کیلئے ہمیں مل کر کردار ادا کرنا چاہیے۔ یہ موقع ہے کہ پوری قوم اکٹھی ہو۔ انہوں نے کہا کہ پنجاب حکومت فعال کردار ادا کررہی ہے۔ جہاں سڑکوں کا نقصان ہوا، انہیں ٹھیک کریں گے۔

پنجاب حکومت نے صوبائی وزراء کو سیلاب زدہ علاقوں کے دورے کرنے کی ہدایت کردی

ویب ڈیسک: بھارت کی آبی جارحیت کے نتیجے میں پیدا ہونے والی سیلابی صورتحال کے پیش نظر پنجاب حکومت نے صوبائی وزراء کو سیلاب زدہ علاقوں کے دورے کرنے کی ڈیوٹی لگا دی۔

تفصیلات کے مطابق صوبائی وزیر صحت خواجہ عمران نزیر فیصل آباد کے معاملات دیکھیں گے۔ صوبائی وزیر خزانہ میاں مجتبی شجاع الرحمن کو لاہور اور شیخوپورہ کے اضلاع الاٹ کیے گئے ہیں۔ صوبائی وزیر ہاؤسنگ بلال یاسین کو ننکانہ صاحب اور قصور، صوبائی وزیر انڈسٹریل چودھری شافع حسین کو گجرات۔ صوبائی وزیر آبپاشی کاظم پیرزادہ کو بہاولپور ڈویژن، صوبائی وزیر ماینز منرل شیر علی گورچانی کو ڈی جی خان۔ سید عاشق حسین کرمانی صوبائی وزیر زراعت کو ساہیوال میں سیلاب کی صورتحال کی نگرانی کی ہدایت کی گئی ہے۔

اسی طرح صوبائی وزیر لوکل گورنمنٹ ذیشان رفیق اور صوبائی وزیر اقلیتی امور رمیشں سنگھ اروڑہ کو گوجرنوالہ، صوبائی وزیر مواصلات صہیب احمد ملک کو سرگودھا اور صوبائی وزیر تعلیم رانا سکندر حیات کو ملتان اور صوبائی وزیر ٹرانسپورٹ بلال اکبر خان کو منڈی بہاوالدین اور حافظ آباد کے اضلاع سونپے گئے ہیں۔

تمام وزرا اپنے اپنے اضلاع میں سیلاب کے حوالے سے سرگرمیاں کی نگرانی کریں گے۔

پنجاب میں سیلاب نے تباہی مچا دی، حفاظتی بند ٹوٹنے سے سیلابی پانی آبادیوں میں داخل

ویب ڈیسک: بھارت کی جانب سے پانی چھوڑنے اور حالیہ بارشوں کے باعث پنجاب میں بڑے پیمانے پر تباہی پھیل گئی ہے۔ کئی مقامات پر حفاظتی بند ٹوٹنے سے سیلابی پانی آبادیوں میں داخل ہو گیا۔ کھڑی فصلیں برباد ہو گئیں جبکہ ہزاروں افراد کو محفوظ مقامات پر منتقل کرنا پڑا۔

کمشنر گوجرانوالہ نوید حیدر شیرازی کے مطابق مختلف حادثات میں 7 افراد جان کی بازی ہار گئے۔ ان میں 3 گجرات، 2 سمبڑیال جبکہ گوجرانوالہ اور نارووال میں ایک ایک ہلاکت رپورٹ ہوئی۔ انتظامیہ نے متاثرہ علاقوں میں امدادی سرگرمیاں تیز کر دی ہیں۔

بہاولپور میں دریائے ستلج کے کناروں پر دباؤ بڑھنے کے باعث بستی یوسف والا اور احمد والا کے عارضی بند ٹوٹ گئے۔ اس کے نتیجے میں بستی احمد بخش اور قریبی آبادیاں پانی میں گھر گئیں۔ سیلابی ریلوں نے زمین کا تیز کٹاؤ شروع کر دیا ہے جس سے کپاس اور دھان سمیت سینکڑوں ایکڑ فصلیں تباہ ہو گئیں۔

دریائے چناب میں بھی پانی کی سطح بلند ہے۔ کوٹ مومن کے مقام پر 6 لاکھ کیوسک کا ریلا داخل ہوا ہے۔ پانی کھیتوں اور دیہات میں پھیل رہا ہے جبکہ ضلعی انتظامیہ نے خبردار کیا ہے کہ آج 10 لاکھ کیوسک کا ریلا بھی گزر سکتا ہے۔ ڈپٹی کمشنر سرگودھا کے مطابق ریلیف کیمپس فعال ہیں اور اب تک 2500 افراد اور 1700 سے زائد مویشی محفوظ مقامات پر منتقل کیے جا چکے ہیں۔

وہاڑی میں دریائے ستلج کے قریب موضع نون میں بھی بند ٹوٹنے سے درجنوں بستیاں زیرِ آب آ گئیں۔ دریا کے کنارے آباد لوگوں کو انخلا کی ہدایت کر دی گئی ہے۔ ریسکیو ٹیمیں امدادی کارروائیاں جاری رکھے ہوئے ہیں۔

دریائے راوی میں ہیڈ بلوکی پر درمیانے درجے کا سیلاب ہے۔ حکام کے مطابق پانی کی سطح مسلسل بلند ہو رہی ہے اور اب تک 30 افراد کو محفوظ مقامات پر منتقل کر دیا گیا ہے۔

ادھر سندھ کے ضلع نوشہرو فیروز میں دریائے سندھ کے کنارے کنڈیارو کے قریب زمینداری بند ٹوٹ گیا۔ پانی کچے کے علاقوں میں پھیل گیا اور پانچ گاؤں زیرِ آب آ گئے۔ سینکڑوں ایکڑ رقبے پر کھڑی کپاس، دھان، تل اور جوار کی فصلیں برباد ہو گئیں۔ انتظامیہ مزید نقصان کو روکنے کے لیے ہنگامی اقدامات کر رہی ہے۔

وزیراعظم شہباز شریف پنجاب کے سیلاب سے متاثرہ علاقوں کے دورے پر روانہ

ویب ڈیسک: وزیراعظم محمد شہباز شریف پنجاب کے سیلاب سے متاثرہ علاقوں کے دورے پر روانہ ہوگئے۔

روانگی سے قبل اور فضائی جائزہ کے دوران چیئرمین این ڈی ایم اے لیفٹیننٹ جنرل انعام حیدر نے ملک میں مجموعی سیلابی صورتحال پر وزیراعظم کو تفصیلی بریفنگ دی۔ وزیراعظم کو پنجاب کے دریاؤں میں طغیانی اور زیر آب علاقوں میں ریسکیو ریلیف آپریشن پر تفصیلی بریف کیا گیا۔

وزیر اعلیٰ پنجاب مریم نواز شریف بھی لاہور سے وزیراعظم کے ہمراہ نارووال روانہ ہوئیں۔ دوران سفر سیلابی صورتحال پر گفتگو ہوئی۔ وزیراعظم محمد شہباز شریف نے سیلاب زدہ علاقوں کا فضائی جائزہ لیتے ہوئے سیلابی صورتحال سے بچاؤ اور ریلیف آپریشن میں تمام ضروری اقدامات کرنے کی ہدایات جاری کی۔

وزیر اعظم اور وزیر اعلیٰ کو نارووال میں تفصیلی بریفنگ دی جائے گی۔

دریائے چناب میں ہیڈ خانکی اور ہیڈ قادرآباد پر پانی کے بہاؤ میں کمی

ویب ڈیسک: سیلابی ریلوں میں شدت میں کمی آنا شروع۔ ہیڈ خانکی اور ہیڈ قادر آباد کے مقام پر دریائے چناب میں بہاؤ کم ہو گیا ہے۔

حکام کے مطابق ہیڈ خانکی کے مقام پر پانی کی آمد 15 لاکھ کیوسک سے کم ہو کر 8.59 ملین کیوسک اور ہیڈ قادر آباد کے مقام پر پانی کی آمد 9.96 ملین کیوسک ہو گئی ہے۔ دریائے ستلج پر گنڈا سنگھ والا کے مقام پر پانی کا بہاؤ 2.61 ملین کیوسک سے زائد ہے، یہاں بھی غیر معمولی سیلاب ہے۔ ہیڈ مرالہ کے مقام پر درمیانے درجے کا سیلاب ہے، یہاں پانی کا بہاؤ ایک لاکھ 91 ہزار کیوسک ہے۔

حکام نے مزید بتایا کہ دریائے راوی میں بلوکی اور ستلج میں سلیمانکی کے مقام پر درمیانے درجے کا سیلاب ہے۔ بہاولپور میں دریائے ستلج میں طغیانی کے باعث سینکڑوں ایکڑ پر کاشت کی گئی کپاس، دھان اور دیگر کئی فصلیں زیر آب آ گئیں۔

مریم نوازکی ہدایت پر پنجاب میں سیلاب متاثرین کے لئے گرینڈ ریسکیواینڈ ریلیف آپریشن جاری

ویب ڈیسک: وزیراعلی مریم نوازشریف کی ہدایت پر پنجاب میں سیلاب متاثرین کے لئے گرینڈ ریسکیواینڈ ریلیف آپریشن جاری۔ پنجاب کی تاریخ میں پہلی بار تین دریاؤں میں سیلاب کی وجہ سے صوبے میں سب سے بڑا اور غیر معمولی ریسکیو اینڈ ریلیف آپریشن شروع کیا گیا  ہے۔

دریائے راوی، ستلج اور چناب میں سیلاب سے پنجاب کے کل 769 موضع جات کے 6 لاکھ ایک ہزار 126 شہری متاثر ہوئے ہیں۔ سیلاب متاثرین کی مدد اور دیکھ بھال کے لئے 263 ریلیف کیمپ، 161 میڈیکل کیمپ قائم ، خوراک، علاج اور عارضی پناہ گاہیں فراہم کردی گئیں ہیں۔  سمبڑیال، سیالکوٹ اور پسرور سمیت سیلاب متاثرین میں خوراک، پانی اور دیگر اشیاءکی فراہمی کا سلسلہ جاری ہے۔ قصور، ننکانہ، چنیوٹ، پلکھو نالہ وزیرآباد سمیت دیگر سیلاب زدہ علاقوں سے شہریوں کی منتقلی کا بڑا آپریشن کیاگیا۔ 

پاک فوج، ضلعی انتظامیہ، پولیس، ریسکیو 1122، پی ڈی ایم اے اور دیگر ادارے مشترکہ طورپر ریسکیو اینڈ ریلیف آپریشن میں شریک ہیں۔  دیہی علاقوں میں پالتو جانوروں کو بھی کشتیوں کے ذریعے محفوظ مقامات پر منتقل کیاگیا ۔ سیلاب سے بے گھر ہونے والوں کو عارضی پناہ گاہوں میں منتقل کرنے کا سلسلہ بھی جاری ہے ۔ سیلاب متاثرین کے علاج معالجے کے لئے ہنگامی طبی کیمپ بھی قائم، ملحقہ ہسپتالوں میں ہنگامی حالت کا نفاذ کردیاگیا ۔

دریائے چناب کے کنارے آباد کل 333 موضع جات میں ڈیڑھ لاکھ سے زائد لوگ متاثر ہوئے ہیں۔ سیالکوٹ میں 133، وزیرآباد میں16،گجرات میں 20، منڈی بہاﺅالدین میں 12 ، چنیوٹ میں 100 اور جھنگ میں 52 موضع جات سیلاب سے متاثر ہوئے ۔ متاثرین کی مدد اور دیکھ بھال کے لئے78 ریلیف کیمپس اور28 میڈیکل کیمپس قائم کئے گئے ہیں۔ دریائے راوی کے کنارے آباد 101 موضع جات کی 70 ہزار 358 لوگ سیلاب سے متاثر ہوئے ہیں ۔ دریائے راوی کے کنارے متاثر ہونے والے شہروں میں ناروال، ننکانہ، قصور اور ساہیوال شامل ہیں۔  دریائے راوی میں سیلاب سے متاثرین کی مدد اور دیکھ بھال کے لئے 81 ریلیف کیمپ اور 28 میڈیکل کیمپ لگائے گئے ہیں 

دریائے ستلج کے کنارے آباد 335 موضع جات کے 3 لاکھ 80 ہزار768 شہری سیلاب سے متاثر ہوئے۔ دریائے ستلج کے سیلاب متاثرین کی مدد اور دیکھ بھال کے لئے 104 ریلیف کیمپ اور 105 میڈیکل کیمپ کام کررہے ہیں ۔ دریائے ستلج میں سیلاب سے متاثر ہونے والے شہروں میں قصور، اوکاڑہ، پاک پتن، ملتان، وہاڑی، بہاولنگر اور بہاولپور شامل ہیں ۔

وزیراعلی پنجاب نے پاک فوج سمیت ریسکیو اینڈ ریلیف آپریشن میں شریک اداروں، افسروں اور جوانوں کو خراج تحسین پیش کیا۔انہوں نے کہا کہ   پنجاب کے سیلاب سے متاثرہ ہر خاندان کی بحالی میرا مشن ہے۔ بے گھر وں کی اُن کے گھروں میں آباد ہونے تک پوری مدد کریں گے۔

پاک فوج کا کوٹ مومن میں متاثرین کیلئے ریلیف آپریشن

ویب ڈیسک: پاک فوج نے سیلاب سے متاثرہ علاقے کوٹ مومن میں متاثرین کے لیے ریلیف آپریشن شروع کر دیا ہے۔

سیکیورٹی ذرائع نے بتایا ہے کہ پاک فوج نےکوٹ مومن میں  سیلاب متاثرین کی مدد کے لیے ریلیف آپریشن  شروع کر دیا ہے ،پاک فوج کے جوانوں نے گورنمنٹ ہائی سکول لکسیاں میں ریلیف کیمپ قائم کردیا ہے ۔ ریلیف آپریشن میں پاک فوج کیساتھ ساتھ ضلعی انتظامیہ بھی  شریک ہے،پاک فوج اور ضلعی انتظامیہ پر مشتمل3 ریسکیو ٹیمیں مڈ رانجھا طالب والا اور ہلال پور میں تعینات ہیں ۔

سیکیورٹی ذرائع نے  مزید بتایا کہ ریسکیو ٹیموں میں ماہر تیراکوں کو بھی شامل کیا گیا ہے،ہر ریسکیو  ٹیم کے پاس 2کشتیاں 30 لائف جیکٹس و دیگر سامان موجود ہے. سیلاب متاثرین کیلئے خیمے بھی نصب کردیئے گئے  ہیں جہاں انہیں ہر طرح کی سہولیات دی جا رہی ہیں۔متاثرین سیلاب نے پاک فوج کے اس جذبۂ خدمت کو سراہا ہے۔پاک فوج مشکل کی اس گھڑی میں عوام کے شانہ بشانہ کھڑی ہے۔
 

سیلاب کے خطرے سے نمٹنے کیلئے سندھ حکومت نے بھی کمر کس لی

ویب ڈیسک: پنجاب میں سیلاب کے باعث ہونے والے جانی اور مالی نقصان کے پیش نظر سندھ حکومت نے بھی تیاریاں شروع کر دی ہیں اور وزراء کو فوکل پرسن مقرر کیا گیا ہے، جس کی منظوری کا  نوٹیفکیشن  وزیراعلیٰ سندھ  مراد علی شاہ نے جاری کر دیا ہے۔

تفصیلات کے مطابق وزیراعلیٰ سیکریٹریٹ سے جاری حکم نامے کے تحت نامزد وزراء اپنے اپنے دائرۂ اختیار میں دریا کے دائیں اور بائیں کنارے کی نگرانی کریں گے۔ گڈو سے سکھر تک کے علاقے کے لیے ایکسائز اینڈ ٹیکسیشن کے وزیر مکیش کمار چاؤلہ کو دائیں کنارے جبکہ زراعت، کھیل اور امورِ نوجوانان کے وزیر سردار محمد بخش مہر کو بائیں کنارے کا فوکل پرسن مقرر کیا گیا ہے۔

اسی طرح سکھر سے کوٹری تک کے لیے صنعت و تجارت کے وزیر جام اکرام اللہ خان دھاریجو دائیں کنارے جبکہ توانائی و منصوبہ بندی کے وزیر سید ناصر حسین شاہ بائیں کنارے کی نگرانی کریں گے۔ کوٹری سے نیچے کے علاقے میں مذہبی امور، زکوٰۃ و عشر کے وزیر ریاض حسین شاہ شیرازی کو دائیں کنارے جبکہ لائیو اسٹاک اور فشریز کے وزیر محمد علی ملکانی کو بائیں کنارے کا فوکل پرسن مقرر کیا گیا ہے۔

نوٹیفکیشن میں مزید ہدایت کی گئی ہے کہ صوبائی اسمبلی کے تمام اراکین (ایم پی ایز) جو دریائے سندھ کے ساتھ موجود اضلاع سے تعلق رکھتے ہیں، وہ آئندہ ایک ہفتے کیلئے اپنے حلقوں میں موجود اور نامزد فوکل پرسنز سے قریبی رابطے میں رہیں۔ نامزد وزراء کو ہدایت دی گئی ہے کہ وہ محکمہ آبپاشی سندھ کے ساتھ مل کر سیلاب کے خطرات کا جائزہ لیں اور دریا کے پشتوں کے تحفظ اور نگرانی کیلئے ایم پی ایز کو شامل کریں۔

خیال رہے کہ اس سے پہلے سندھ کے صوبائی وزیر شرجیل انعام میمن نے پنجاب میں سیلابی صورتحال کے پیش نظر وزیر اعلیٰ پنجاب مریم نواز کو ہم ممکن تعاون کی پیشکش کی تھی۔

پنجاب کے دریاؤں میں سیلاب سے کونسے اضلاع و دیہات متاثر ہوئے ؟ تفصیلات سامنے آگئی

ویب ڈیسک: پنجاب کے دریاؤں میں اونچے درجے کے سیلاب سےغریب کسانوں کی  لاکھوں ایکڑ اراضی زرعی تباہ ہوگئی۔ اس کے ساتھ چھ لاکھ سے زیادہ افراد متاثر ہو چکے ہیں۔ حکومت کی جانب سے متاثرہ علاقوں میں ریسکیو آپریشن جاری ہے۔

حکام کا کہنا ہے کہ دریائے چناب کے کنارے واقع 333 دیہات میں ایک لاکھ 50 ہزار سے زائد افراد متاثر ہوئے ہیں، ان میں سیالکوٹ کے 133، وزیرآباد کے 16، گجرات کے 20، منڈی بہاؤالدین کے 12، چنیوٹ کے 100 اور جھنگ کے 52 دیہات شدید طور پر متاثر ہوئے ہیں۔

دریائے ستلج کے کنارے واقع 335 دیہات کے 3 لاکھ 80 ہزار 768 شہری سیلاب سے متاثر ہوئے ہیں، متاثرین کی مدد اور دیکھ بھال کے لیے 104 امدادی کیمپ اور 105 میڈیکل کیمپ کام کر رہے ہیں۔ ستلج کے سیلاب سے متاثرہ شہروں میں قصور، اوکاڑہ، پاکپتن، ملتان، وہاڑی، بہاولنگر اور بہاولپور شامل ہیں۔ ضلع قصور میں 72 دیہات اور ساڑھے 4 لاکھ افراد، پاکپتن کے 12، وہاڑی کے 23، بہاولنگر کے 75 اور بہاولپور کے 15 دیہات شدید طور پر متاثر ہوئے ہیں۔

محکمہ مواصلات و تعمیرات کے مطابق کئی اضلاع، خاص طور پر نارووال، شکرگڑھ اور سیالکوٹ میں شاہراہیں زیرِ آب آگئی ہیں۔ سیالکوٹ-پسرور ڈوئل کیرج وے تقریباً ایک کلومیٹر تک زیرِ آب آگئی، جب کہ کوٹلی چھور میں نالہ ڈیک کے حفاظتی پشتے میں شگاف سے شاہراہ متاثر ہوئی اور کونا ڈرین پل کو بھی نقصان پہنچا۔

دریائے راوی میں مقبوضہ جموں و کشمیر سے آنے والے پانی کے باعث نارووال ضلع کے درجنوں دیہات زیرِ آب آگئے، مقامی باشندوں اور ریسکیو اہلکاروں کے مطابق نارووال میں 35 سے 40 دیہات دریا کی طغیانی سے ڈوب گئے ہیں۔

راوی کے پانی کے ریلے نے گردوارہ کرتارپور صاحب کمپلیکس کے کچھ حصے کو کئی فٹ پانی میں ڈبو دیا، گردوارہ آنے والے سکھ یاتری اور ملازمین سیلاب میں پھنس گئے جنہیں ریسکیو کر لیا گیا۔ نارووال-شکرگڑھ روڈ بھی 3 سے 4 کلومیٹر کے حصے میں ڈوب گیا، جس سے ارد گرد کے دیہات مکمل طور پر کٹ گئے، نارووال کی تحصیل ظفر وال میں بھی درجنوں دیہات زیرِ آب آگئے، کنجروڑ قصبہ، جس کی آبادی تقریباً 20 ہزار ہے، کو شدید خطرہ لاحق بتایا گیا۔

نالہ ڈیک میں پانی کی سطح بلند ہونے سے صورتِ حال مزید خراب ہو گئی، کئی مقامات پر حفاظتی بند ٹوٹ گئے اور ہنجلی پل مکمل طور پر بہہ گیا، نالے کے پانی نے دیہی سیالکوٹ کے کئی حصے بھی ڈبو دیے اور چونڈہ-ظفر وال روڈ کو متاثر کیا۔

راوی کے سیلابی پانی نے نچلی جانب بہہ کر شیخوپورہ، ننکانہ صاحب اور اوکاڑہ کو متاثر کیا، جبکہ فیصل آباد کی تحصیل تاندلیانوالہ اور ساہیوال کے کچھ علاقے بھی خطرے میں ہیں۔ ننکانہ صاحب میں ہیرا، جٹاں داوارہ، نواں کوٹ، خضرا آباد اور لالو آنہ سمیت کئی علاقے زیرِ آب آگئے، اس کے ساتھ شیخ ڈاٹول، گجراں دا ٹھٹہ، کھوہ صدیق، ڈیرہ حکیم اور ڈیرہ مہر اشرف بھی متاثر ہوئے۔

اوکاڑہ میں راوی کے سیلابی پانی نے جندران کلاں گاؤں (جس کی آبادی 30 ہزار سے زائد ہے) کے علاوہ جیدھو اور جھندو منج کو بھی اپنی لپیٹ میں لے لیا۔

فیصل آباد میں حکام نے خبردار کیا کہ راوی کے پانی سے تاندلیانوالہ تحصیل متاثر ہو سکتی ہے، جہاں 100 سے زائد بستیاں خطرے میں ہیں، جن میں بستی جامن دولوں، جالی تریانہ، جالی فتیانہ، ماری پتن، شیرازا اور ٹھٹہ دوکان شامل ہیں۔

چناب کے سیلاب نے سیالکوٹ، منڈی بہاؤالدین، سرگودھا، گجرات، وزیرآباد، حافظ آباد، چنیوٹ اور جھنگ کے اضلاع کو متاثر کیا ہے۔

چناب کا پانی وزیر آباد شہر کے بعض حصوں میں داخل ہو گیا، جس سے سوہدرہ اور قریبی علاقے بری طرح متاثر ہوئے ہیں، شمالی سیالکوٹ کا بجوات علاقہ جو دریائے چناب اور توی کے درمیان واقع ہے، شدید متاثر ہوا ہے اور تقریباً 70 دیہات ڈوب گئے ہیں۔ ریسکیو حکام نے تصدیق کی کہ ان دیہات کو سیالکوٹ شہر سے ملانے والی سڑکیں مکمل طور پر منقطع ہو گئی ہیں۔

صوبہ پنجاب میں اونچے درجے کے سیلاب سے لاکھوں شہری متاثر، 22 افراد جان کی بازی ہار گئے، متعدد لاپتہ

ویب ڈیسک: بھارتی آبی جارحیت کے بعد پاکستانی دریا بپھر گئے۔ دریائے راوی، چناب اور ستلج میں شدید سیلابی صورتحال کے باعث تباہی مچ گئی، بستیاں ڈوب گئیں، لاکھوں افراد متاثر ہوئے ہیں اور 22 افراد جان سے گئے جبکہ متعدد لاپتہ ہیں جن کی تلاش جاری ہے۔

پنجاب کے بڑے دریاؤں سے پانی کناروں سے نکل کر آبادیوں میں داخل ہونے سے لاکھوں ایکڑ زرعی اراضی تباہ ہو گئی ہے، 6 لاکھ سے زیادہ افراد متاثر ہو چکے ہیں، سیکڑوں دیہات زیر آب آ چکے ہیں جبکہ بنیادی ڈھانچہ جات کے نقصانات کا اندازہ پانی اترنے کے بعد ہی ہو سکے گا۔

دریائے راوی میں شاہدرہ پر پانی میں اضافے کے بعد اونچے درجے کا سیلاب ہے اور پانی کا بہاؤ ایک لاکھ 45 ہزار 160کیوسک ہو گیا ہے۔

کمشنر لاہور کا کہنا ہے کہ ابھی تک راوی میں سیلابی صورتحال قابو میں ہے، دریائے راوی کی گنجائش 2 لاکھ 50ہزارکیوسک ہے۔ ضلعی انتظامیہ سمیت تمام محکموں کی تیاری مکمل ہے اور ہائی الرٹ پرہیں۔

راوی میں جسڑ کے مقام پر سیلاب کا زور کم ہونے لگا ہے، پانی کا بہاؤ ایک لاکھ52 ہزار کیوسک پر آگیا۔

ہیڈ قادر آباد میں پانی کے دباؤ میں کمی

پی ڈی ایم اے پنجاب نے کہا ہے کہ صورتحال دریائے چناب میں ہیڈ قادر آباد میں پانی کے دباؤ میں کمی ہو رہی ہے، قادر آباد ہیڈ ورکس میں پانی کا بہاؤ کل کی نسبت 1 لاکھ کیوسک کم ہے، بہاؤ 9 لاکھ 96 ہزار کیوسک ہے۔

واضح رہے کہ ہیڈ قادر آباد کی صلاحیت 8 لاکھ کیوسک پانی کی ہے، اس لیے صورت حال اب بھی غیرمعمولی ہے، قادر آباد ہیڈ ورکس کی بائیں اطراف بند کو مزید مضبوط بنایا جا رہا ہے۔

ضلعی انتظامیہ محکمہ آبپاشی پنجاب پولیس اور تمام متعلقہ محکموں کی ٹیمیں موقع پر موجود ہیں، بند کو مضبوط بنانے کیلئے تمام تر وسائل اور کوششیں بروئے کار لائی جا رہی ہیں۔

دریائے چناب میں ہیڈ خانکی پر بھی پانی کے بہاؤ میں کچھ کمی آنا شروع ہوئی ہے مگر صورتحال اب بھی خطرناک ہے، پانی کا بہاؤ ساڑھے 10 لاکھ کیوسک سے کم ہو کر 8 لاکھ 59 ہزار کیوسک پر آ گیا ہے۔

دوسری جانب دریائے ستلج میں گنڈا سنگھ والا کے مقام پر پانی کا بہاؤ 2 لاکھ 61 ہزار کیوسک سے زائد ہے اور یہاں بھی غیر معمولی سیلاب ہے، ہیڈ مرالہ پر اونچے درجے کا سیلاب ہے، یہاں پانی کا بہاؤ 1 لاکھ 91 ہزار کیوسک ہے۔

دریائے راوی میں بلوکی اور ستلج میں سلیمانکی پر درمیانے درجے کے سیلاب ہیں۔

نارنگ منڈی

دریائے راوی نے نارنگ منڈی میں تباہی مچا دی، ہزاروں ایکڑ زرعی اراضی تباہ ہو گئی، متعدد دیہات زیر آب آ گئے، کئی دیہات اور ڈیرہ جات کا زمینی راستہ منقطع ہو گیا،

کجلہ، جاجوگل، میروال، برج ، لونگ والا ، پسیانوالہ,منڈیالی سمیت درجنوں ڈیرہ دیہات کا زمینی راستہ منقطع ہو چکا ہے، ۔علاقہ مکینوں کی اپنی مدد آپ کے تحت مال مویشی محفوظ مقامات پر منتقلی کا عمل جاری ہے، حکومت کی جانب سے سیلابی علاقوں میں امدادی سرگرمیاں شروع نہ کی جا سکیں،

شرقپور شریف

دریائے راوی میں شرقپور کے مقام پر پانی کی سطح مزید بلند ہورہی ہے، راوی کا پانی کناروں سے نکل کر جنگل سے گزرتا ہوا حفاظتی بند کے ساتھ لگ گیا، شرقپور کے حفاظتی بند کے ساتھ 1988 کے بعد اب پانی پہنچا ہے، شاہدرہ سے گزرنے والا ایک لاکھ پچپن ہزار کیوسک والا ریلہ دن 11 بجے تک شرقپور پہنچے گا۔

سنگین صورتحال سے نمٹنے کے لیے ریسکیو 1122, ضلعی انتظامیہ اور پولیس سمیت فوجی دستے متحرک ہیں۔

عارف والا میں انتہائی اونچے درجے کے سیلاب کا خطرہ بڑھ گیا، دلاور، نورا رتھ اور ٹبی لال بیگ سیکٹر کے ملحقہ کئی دیہات خالی کرا لیے گئے، ضلعی انتظامیہ نے ہنگامی بنیادوں پر لوگوں کے انخلا کے اقدامات تیز کردیئے۔

اموات

سیالکوٹ میں ایک ہی خاندان کے 5 افراد، گجرات میں 4، نارووال میں 3، حافظ آباد میں 2 اور گوجرانوالہ شہر میں ایک شخص جاں بحق ہوا۔

گجرات کے شہبازپور میں دریائے چناب کا بند ٹوٹنے سے تین بچے بھی ڈوب گئے، جن میں سے دو کی لاشیں نکال لی گئیں جبکہ ایک کو زندہ بچا لیا گیا۔

سیالکوٹ کے علاقے سمبڑیال میں سیلاب کے باعث 3 افراد لاپتہ بھی ہوگئے۔

بستیاں زیر آب

سیلاب سے نارووال کے کئی دیہات زیر آب آگئے، ہزاروں ایکڑپر کھڑی فصلیں تباہ ہوگئیں، شکر گڑھ نارووال روڈ بھی ڈوب گیا جبکہ قلعہ احمد آباد میں ریلوے ٹریک سیلاب کی زد میں آگیا جس کی وجہ سے ٹرینوں کی آمد و رفت معطل ہوگئی۔

شکرگڑھ میں کوٹ نیناں کےمقام پر راوی میں انتہائی اونچے درجے کا سیلاب ہے، متعدد دیہات زیرِآب آچکے، رابطہ سڑکیں اور کئی پُل بہہ گئے۔

دوسری جانب ساہیوال کے نواحی علاقے میں دریائی کٹاؤ سے ساہیوال مین جی ٹی روڈ سمیت مختلف مقامات پر پانی سڑک کے ساتھ بہنے لگا ہے۔

دوسری جانب بہاول نگر میں کپاس اور دھان کی فصلوں کو نقصان پہنچا، کئی رابطہ سڑکیں بہہ گئیں جبکہ وہاڑی کے علاقےمیلسی میں حفاظتی بند ٹوٹنے سےکئی دیہات اور فصلیں زیر آب آگئیں۔

ملتان میں دریائےستلج میں جلالپور پیر والا کےمقام پر سیلابی صورتحال ہے، بستیوں میں پانی داخل ہوگیا، ریسکیو کارروائیاں جاری ہیں۔

ریلیف کمشنر پنجاب

ریلیف کمشنر پنجاب نبیل جاوید نے کمشنرز و ڈپٹی کمشنرز کو فیلڈ میں موجود رہنے کی ہدایات دیتے ہوئے کہا کہ پی ڈی ایم اے صوبے بھر میں مسلسل کوارڈینیشن کو یقینی رہا ہے، ڈپٹی کمشنرز اور دیگر افسران فیلڈ میں موجود رہیں۔

ریلیف کمشنر پنجاب نے کہا کہ سیلاب سے متاثرہ علاقوں سے لوگوں کے انخلاء کو جلد از جلد یقینی بنائیں، عوام کے جان و مال کی حفاظت اولین ترجیح اور ذمہ داری ہے۔

دریائے راوی میں شاہدرہ کے مقام پر پانی کی سطح خطرناک حد تک بلند، الرٹ جاری

ویب ڈیسک: دریائے راوی میں شاہدرہ کے مقام پر انتہائی اونچے درجے کا سیلاب ہے۔ شاہدرہ کے مقام پر پانی کے بہاؤ میں مزید اضافہ ہوگا۔

ڈی جی پی ڈی ایم اے عرفان علی کاٹھیا نے کہا کہ لاہور شاہدرہ کے مقام پر پانی کا بہاؤ 1 لاکھ 51 ہزار کیوسک ہے۔ شاہدرہ سے تقریبا 2 لاکھ کیوسک تک پانی کا ریلہ گزرے گا۔ جسڑ کے مقام پر انتہائی اونچے درجے کا سیلاب ہے اور پانی کا بہاؤ 1 لاکھ 66 ہزار کیوسک ہے۔ بلوکی ہیڈورکس کے مقام پر درمیانے درجے کا سیلاب ہے۔ بلوکی کے مقام پر پانی کا بہاؤ 93 ہزار کیوسک ہے۔

ریلیف کمشنر پنجاب نبیل جاوید کا کہنا ہے کہ دریائے راوی کے پاٹ میں بسے شہریوں کو محفوظ مقامات پر منتقل کر دیا گیا ہے۔ انہوں نے کہا کہ شہریوں سے التماس ہے احتیاطی تدابیر اختیار کریں اور غیر ضروری دریا کے اطراف جمع ہونے کی کوشش نہ کریں۔

ریلیف کمشنر پنجاب نے کہا کہ دریاؤں کے اطراف سیرو و تفریح کیلئے ہرگز نہ جائیں۔ ناگہانی صورتحال میں انتظامیہ سے تعاون کریں

دوسری جانب، لاہور دریائے چناب میں ہیڈ قادر آباد میں پانی کے دباؤ میں کمی ہو رہی ہے۔ قادر آباد ہیڈ ورکس میں پانی کا بہاو کل کی نسبت 1 لاکھ کیوسک کم ہے۔ ہیڈ قادر آباد کے مقام پر پانی کا بہاو 9 لاکھ 96 ہزار کیوسک ہے۔

ڈی جی پی ڈی ایم اے نے کہا کہ ہیڈ قادر آباد کی صلاحیت 8 لاکھ کیوسک پانی کی ہے۔ قادر آباد ہیڈ ورکس کی بائیں اطراف بند کو مزید مضبوط بنایا جا رہا ہے۔ ضلعی انتظامیہ، محکمہ آبپاشی، پنجاب پولیس اور تمام متعلقہ محکموں کی ٹیمیں موقع پر موجود ہیں۔ بند کو مضبوط بنانے کیلئے تمام تر وسائل اور کوششیں بروئے کار لائی جا رہی ہیں۔ گزشتہ 24 گھنٹوں سے بند کی مضبوطی پر مسلسل کام جاری ہے۔