عباس عراقچی نے امریکی ایلچی سے حالیہ رابطوں کی خبروں کو مسترد کر دیا

ٹرمپ کا بیانیہ پھر تبدیل: جنگ کا ملبہ پیٹ ہیگستھ پر ڈال دیا

ویب ڈیسک: ڈونلڈ ٹرمپ نے ایران کے خلاف جاری جنگ کے معاملے پر اپنے وزیر دفاع پیٹ ہیگستھ کو ذمہ دار قرار دے دیا۔

امریکی ریاست ٹینیسی میں ہونے والے ایک گول میز اجلاس کے دوران ٹرمپ نے کہا کہ فوجی کارروائی کی حمایت سب سے پہلے پیٹ ہیگستھ نے کی تھی۔ انہوں نے وزیر دفاع کی موجودگی میں کہا کہ “آپ ہی بتائیں، کیونکہ آپ نے ہی جنگ کا کہا تھا، ایران کو جوہری ہتھیار حاصل کرنے کی اجازت نہیں دی جا سکتی۔”

یہ بیان ایسے وقت سامنے آیا ہے جب اس جنگ کے آغاز سے متعلق مختلف اور متضاد بیانیے سامنے آ رہے ہیں۔

کچھ حکام کے مطابق اسرائیل خود ایران پر حملہ کرنے والا تھا، جس کے باعث امریکا کی شمولیت ناگزیر ہو گئی، جبکہ دیگر کا کہنا ہے کہ ایران جوہری ہتھیار بنانے یا استعمال کرنے کے قریب تھا۔

ٹرمپ نے اپنے فیصلے کی وضاحت کرتے ہوئے کہا کہ انہوں نے جنرل کین سمیت دیگر اہم مشیروں سے مشاورت کی اور مشرقِ وسطیٰ میں ایک بڑے مسئلے کو ختم کرنے کے لیے کارروائی کا فیصلہ کیا۔

دلچسپ بات یہ ہے کہ وزیر دفاع کو ذمہ دار ٹھہرانے سے چند گھنٹے قبل ہی ٹرمپ یہ دعویٰ کر چکے تھے کہ خلیجی خطے میں ایران کے جوابی حملے ان کے لیے غیر متوقع تھے، جس سے حکومتی بیانیے میں تضاد مزید نمایاں ہو گیا ہے۔

ٹیکساس میں آئل ریفائنری میں دھماکوں کے بعد آگ بھڑک اٹھی

ویب ڈیسک: امریکی ریاست ٹیکساس کے شہر پورٹ آرتھر میں قائم Valero کی آئل ریفائنری میں آگ لگ گئی۔

غیر ملکی میڈیا کے مطابق آگ بھڑکنے سے قبل زور دار دھماکوں کی آوازیں بھی سنی گئیں، جن سے قریبی رہائشی علاقوں کے مکانات لرز اٹھے۔

رپورٹس میں بتایا گیا ہے کہ تاحال آتشزدگی کی وجہ معلوم نہیں ہو سکی، جبکہ حکام واقعے کی تحقیقات کر رہے ہیں۔

میڈیا کے مطابق مذکورہ ریفائنری میں یومیہ تقریباً ساڑھے چار لاکھ بیرل خام تیل کو پراسیس کر کے پیٹرول، ڈیزل اور جیٹ فیول تیار کیا جاتا ہے۔

حکام کی جانب سے تاحال جانی یا مالی نقصان کی تفصیلات جاری نہیں کی گئیں۔

ٹرمپ کےحالیہ بیانات کامقصدعالمی توانائی کی قیمتوں کو کم کرناہے،ایرانی وزارت خارجہ

ویب ڈیسک: ایران کی وزارت خارجہ نے کہا ہے کہ ڈونلڈ ٹرمپ کے حالیہ بیانات کا مقصد عالمی توانائی کی قیمتوں کو کم کرنا اور اپنے فوجی منصوبوں پر عملدرآمد کے لیے وقت حاصل کرنا ہے۔

وزارت خارجہ کے جاری کردہ بیان میں کہا گیا کہ خطے کے بعض ممالک کشیدگی کم کرنے کے لیے سرگرم ہیں اور مختلف تجاویز بھی سامنے آئی ہیں، تاہم ان تمام کوششوں کا رخ واشنگٹن کی جانب ہونا چاہیے۔ ایران نے واضح کیا کہ وہ اس جنگ کا آغاز کرنے والا فریق نہیں ہے۔

ایک اور بیان میں ترجمان نے بتایا کہ حالیہ دنوں میں دوست ممالک کی جانب سے پیغامات موصول ہوئے ہیں، جن سے ظاہر ہوتا ہے کہ امریکا جنگ کے خاتمے کے لیے مذاکرات کا خواہاں ہے، تاہم ایران نے تاحال ان تجاویز پر کوئی جواب نہیں دیا۔

ایرانی وزارت خارجہ کے مطابق یہ محتاط طرزِ عمل اس بات کی عکاسی کرتا ہے کہ ایران مذاکرات کے معاملے میں جلد بازی سے گریز کرتے ہوئے خطے میں اپنی پوزیشن کو مزید مضبوط بنانے کی حکمت عملی اختیار کیے ہوئے ہے۔

ایران کی جنگ بندی کے لیے 6 اسٹریٹجک شرائط سامنے آ گئیں

ویب ڈیسک: ایران کے ایک اعلیٰ عہدیدار نے انکشاف کیا ہے کہ ملک نے جاری جنگ کے خاتمے کے لیے علاقائی فریقوں اور ثالثوں کے سامنے چھ اہم اسٹریٹجک شرائط رکھ دی ہیں۔

ایرانی میڈیا کے مطابق نام ظاہر نہ کرنے والے عہدیدار کا کہنا ہے کہ مختلف علاقائی فریقین نے ایران کو جنگ بندی کی تجاویز دی ہیں، تاہم ایران نے ایک نئے قانونی و اسٹریٹجک فریم ورک کے تحت اپنی شرائط واضح کر دی ہیں۔

عہدیدار کے مطابق پہلی اور سب سے اہم شرط یہ ہے کہ مستقبل میں جنگ دوبارہ شروع نہ ہونے کی ٹھوس ضمانت دی جائے۔

دوسری شرط خطے میں امریکی فوجی اڈوں کی بندش ہے، جبکہ تیسری شرط میں جارح فریق کو پیچھے ہٹانے اور ایران کو ہرجانہ ادا کرنے کا مطالبہ شامل ہے۔

چوتھی شرط کے طور پر ایران نے تمام علاقائی محاذوں پر جنگ کے مکمل خاتمے پر زور دیا ہے، جبکہ پانچویں شرط آبنائے ہرمز کے لیے ایک نئے قانونی نظام کے نفاذ سے متعلق ہے۔

چھٹی اور آخری شرط ایران مخالف میڈیا سرگرمیوں کے خلاف قانونی کارروائی اور ایسے عناصر کو ملک بدر کرنے سے متعلق ہے۔

رپورٹ کے مطابق یہ واضح نہیں کیا گیا کہ یہ شرائط کن ثالثوں کے ذریعے امریکا اور اسرائیل تک پہنچائی گئی ہیں، تاہم ایرانی سکیورٹی و سیاسی حلقوں کا کہنا ہے کہ ان مطالبات کو سنجیدگی سے لیا جانا چاہیے۔

عہدیدار نے مزید دعویٰ کیا کہ ایران ایک طے شدہ حکمت عملی کے تحت مرحلہ وار پیش رفت کر رہا ہے اور دشمن کے فضائی دفاعی نظام کو نقصان پہنچایا جا چکا ہے، جبکہ ایران کو اب فضا میں برتری حاصل ہے، اسی لیے فوری جنگ بندی کے امکانات کم دکھائی دیتے ہیں۔

علی لاریجانی کی شہادت آیت اللہ خامنہ ای کی شہادت سے بڑا سانحہ ہے،برطانوی اخبار

ویب ڈیسک: برطانوی اخبار نے علی لاریجانی کی شہادت کو ایران کے لیے انتہائی بڑا سانحہ قرار دیتے ہوئے اسے آیت اللہ علی خامنہ ای کی ممکنہ شہادت سے بھی زیادہ اثر انگیز واقعہ قرار دیا ہے۔

رپورٹ کے مطابق علی لاریجانی ایک بااثر اور تجربہ کار سیاسی شخصیت تھے جن کا اثر و رسوخ نہ صرف ایران بلکہ روس اور چین سمیت کئی اہم ممالک تک پھیلا ہوا تھا، اور یہی وجہ تھی کہ انہیں نشانہ بنایا گیا۔

اخبار نے مزید لکھا کہ علی لاریجانی کی موت ایران کے لیے قاسم سلیمانی کے بعد سب سے بڑا نقصان ہے، جس نے ملکی سیاسی و سکیورٹی ڈھانچے پر گہرے اثرات مرتب کیے ہیں۔

رپورٹ میں یورپی کونسل برائے بین الاقوامی تعلقات سے وابستہ ایرانی امور کی ماہر ایلی جیرن مائے کا انٹرویو بھی شامل کیا گیا، جس میں انہوں نے کہا کہ بینجمن نیتن یاہو کی کوشش ہے کہ جنگ بندی اور ایران کے ساتھ ممکنہ مذاکرات کے لیے ڈونلڈ ٹرمپ کے پاس موجود تمام راستے بند کر دیے جائیں۔

ایلی جیرن مائے کے مطابق علی لاریجانی وہ اہم شخصیت تھے جو جنگ بندی اور سفارتی مذاکرات کو ممکن بنانے میں کلیدی کردار ادا کر سکتے تھے، اور ان کی عدم موجودگی خطے میں کشیدگی کم کرنے کی کوششوں کے لیے بڑا دھچکا ہے۔

امریکا یو اے ای کو 7 ارب ڈالر کے ہتھیار فروخت کرے گا،امریکی اخبار کادعویٰ

ویب ڈیسک: امریکی اخبار کی رپورٹ کے مطابق امریکا نے متحدہ عرب امارات (یو اے ای) کو تقریباً 7 ارب ڈالر مالیت کے جدید ہتھیار فروخت کرنے کا فیصلہ کر لیا ہے، جس کی باقاعدہ منظوری بھی دے دی گئی ہے۔

رپورٹ میں بتایا گیا ہے کہ اس معاہدے میں تقریباً 5 ارب 60 کروڑ ڈالر کے پیٹریاٹ میزائل سسٹمز اور 1 ارب 30 کروڑ ڈالر مالیت کے جدید جنگی ہیلی کاپٹر شامل ہیں۔

یہ پیش رفت ایسے وقت میں سامنے آئی ہے جب خطے میں ایران اور امریکا کے درمیان کشیدگی میں اضافہ دیکھا جا رہا ہے۔ اس سے قبل امریکا خلیجی ممالک کو مجموعی طور پر 16 ارب 50 کروڑ ڈالر سے زائد کے ہتھیار فروخت کرنے کا اعلان بھی کر چکا ہے۔

ادھر ذرائع کے مطابق امریکی صدر ڈونلڈ ٹرمپ اور اماراتی صدر شیخ محمد بن زاید النہیان کے درمیان حالیہ ٹیلیفونک رابطے میں خطے کی سکیورٹی صورتحال اور ایران کے حملوں پر تبادلہ خیال کیا گیا۔

دونوں رہنماؤں نے شہری آبادی اور اہم تنصیبات کو نشانہ بنانے کی مذمت کرتے ہوئے خطے میں استحکام کی ضرورت پر زور دیا۔

ایران جنگ میں امریکا کے اب تک16جنگی طیارےتباہ ہوچکے،بلومبرگ کا انکشاف

ویب ڈیسک: امریکی خبر رساں ادارے بلومبرگ نے انکشاف کیا ہے کہ ایران کے خلاف جاری جنگ میں اب تک امریکا کے 16 جنگی طیارے تباہ ہو چکے ہیں۔

بلوم برگ کی رپورٹ کے مطابق تباہ ہونے والے طیاروں میں 10 ریپر اسٹرائیک ڈرون طیارے بھی شامل ہیں، جبکہ اس کے علاوہ 6 امریکی جنگی جہازوں کو شدید نقصان پہنچا ہے۔

رپورٹ میں بتایا گیا ہے کہ ان میں سے 3 امریکی جنگی طیارے کویت کی فضاؤں میں تباہ ہوئے، جن کے بارے میں دعویٰ کیا گیا کہ وہ اپنے ہی فائر کا نشانہ بنے۔

اسی طرح ایک کے سی 135 ٹینکر طیارہ ری فیولنگ آپریشن کے دوران تباہ ہوا، جس کے نتیجے میں اس کے عملے کے تمام 6 ارکان ہلاک ہو گئے۔

بلوم برگ کے مطابق مزید 5 کے سی 135 ری فیولنگ طیارے سعودی عرب کے ایک ہوائی اڈے پر ایرانی میزائل حملے میں نشانہ بنے، جس سے انہیں شدید نقصان پہنچا۔

رپورٹ میں یہ بھی کہا گیا ہے کہ ایران اب تک امریکا کے بغیر پائلٹ کے ریپر ڈرون طیاروں میں سے 9 کو تباہ کر چکا ہے، جن میں سے ایک کو اردن میں بیلسٹک میزائل کے ذریعے نشانہ بنایا گیا۔

بنکرز کی کمی: اسرائیلی فوجی اہلکاروں کاڈیوٹی انجام دینے سے انکار

ویب ڈیسک: اسرائیلی فوج کو بنکرز کی کمی کا سامنا ہے جس کے باعث بعض اہلکاروں نے ڈیوٹی انجام دینے سے انکار کر دیا ہے۔

اسرائیلی میڈیا کے مطابق رضاکار اہلکاروں نے راکٹ اور میزائل حملوں سے ناکافی تحفظ پر شدید تشویش کا اظہار کرتے ہوئے اپنی پوسٹنگ پر رپورٹ کرنے سے انکار کیا۔

رپورٹس میں بتایا گیا ہے کہ لاجسٹک مسائل کا جواز پیش کرتے ہوئے بنکرز کی فراہمی بار بار مؤخر کی جا رہی ہے، جس سے اہلکاروں میں بے چینی بڑھ رہی ہے۔

ایک اسرائیلی فوجی نے صورتحال کو خطرناک قرار دیتے ہوئے کہا کہ جب سائرن بجتا ہے تو وہ صرف ہیلمٹ پہن کر اپنی جان بچانے کی دعا کرتے ہیں۔

ایک اور اہلکار کا کہنا تھا کہ اگر کوئی زخمی ہو جائے تو کیا صرف افسوس کا اظہار ہی کیا جائے گا؟

اہلکاروں نے طنزیہ انداز میں سوال اٹھایا کہ جو فوج ہزاروں کلومیٹر دور اہداف کو نشانہ بنانے کی صلاحیت رکھتی ہے، کیا وہ اپنے سپاہیوں کو بنیادی تحفظ یعنی ایک بنکر بھی فراہم نہیں کر سکتی۔

ٹرمپ کا ساتھ دینا ایسا ہےجیسےآئس برگ سےٹکرانےکےبعدٹائٹینک کا ٹکٹ خریدنا،جنرل مائیکل یاکوفلیو

ویب ڈیسک: نیٹو کے فرانسیسی جنرل مائیکل یاکوفلیو نے کہا ہے کہ آبنائے ہرمز میں امریکی صدر ڈونلڈ ٹرمپ کا ساتھ دینا بالکل ایسے ہے جیسے آئس برگ سے ٹکرانے کے بعد ٹائٹینک کا ٹکٹ خریدنا۔

جنرل یاکوفلیو نے ایک بیان میں کہا کہ یہ اقدام اتحادیوں کی جانب سے امریکا کی حمایت میں تاریخی نقصان کے مترادف ہے۔

امریکی صدر ڈونلڈ ٹرمپ نے نیٹو کو دھمکی دیتے ہوئے کہا تھا کہ اگر نیٹو نے آبنائے ہرمز کھلوانے میں مدد نہیں کی تو نیٹو کا مستقبل بہت خراب ہو جائے گا۔

صدر ٹرمپ نے دورانِ پرواز گفتگو میں کہا کہ ہم ایران سے بات کر رہے ہیں لیکن مجھے نہیں لگتا کہ وہ تیار ہیں۔

واضح رہے کہ ٹرمپ نے ہفتے کے روز آبنائے ہرمز کھولنے کے لیے چین سمیت دنیا بھر سے مدد طلب کی تھی اور امید ظاہر کی تھی کہ چین کے ساتھ ساتھ فرانس، جاپان، جنوبی کوریا، برطانیہ اور دیگر ممالک بھی اپنے جنگی جہاز آبنائے ہرمز بھیجیں گے۔

دوسری جانب، دنیا نے ٹرمپ کی مدد کی اپیل پر خاموشی اختیار کی، جاپان نے اپنے بحری جہاز بھیجنے سے انکار کر دیا، چین بھی ٹرمپ کے مطالبے پر خاموش رہا۔

جنوبی کوریا نے کہا کہ ٹرمپ کی اپیل موصول ہو گئی ہے اور وہ صورتِ حال کا قریب سے جائزہ لے رہے ہیں، جبکہ فرانس اور برطانیہ نے پہلے ہی خطے میں اپنے بحری جہاز بھیجنے سے انکار کر دیا ہے۔

مشرق وسطیٰ میں کشیدگی: ڈونلڈٹرمپ نے دورہ چین ملتوی کردیا

ویب ڈیسک: مشرقِ وسطیٰ میں جاری کشیدگی کے باعث امریکی صدر ڈونلڈ ٹرمپ نے اپنا دورہ چین ملتوی کر دیا ہے۔

وائٹ ہاؤس میں میڈیا سے گفتگو کرتے ہوئے صدر ٹرمپ نے کہا کہ ایران سے متعلق موجودہ صورتحال کے پیش نظر وہ امریکا میں ہی رہنا چاہتے ہیں کیونکہ اس وقت ان کی موجودگی انتہائی ضروری ہے۔

انہوں نے بتایا کہ چینی صدر شی جنگ پنگ کے ساتھ ملاقات کا وقت تبدیل کیا جا رہا ہے اور چین نے اس فیصلے پر کوئی اعتراض نہیں کیا۔

خبر رساں اداروں کے مطابق صدر ٹرمپ کا دورہ  چین 31 مارچ سے 2 اپریل تک طے تھا، تاہم خطے میں بڑھتی کشیدگی کے باعث اسے مؤخر کر دیا گیا۔

دوسری جانب صدر ٹرمپ نے اپنے سوشل میڈیا پلیٹ فارم پر بیان دیا کہ وہ مختلف آپشنز پر غور کر رہے ہیں، جن میں آبنائے ہرمز کی سکیورٹی سے متعلق پالیسی بھی شامل ہے۔

انہوں نے کہا کہ ممکن ہے اس اہم بحری راستے کی حفاظت کی ذمہ داری ان ممالک کو سونپ دی جائے جو اسے استعمال کرتے ہیں، تاکہ اتحادی ممالک زیادہ فعال کردار ادا کر سکیں۔

ٹرمپ کا ایک اور یوٹرن،اسرائیل کو ایران کی توانائی تنصیبات پر حملوں سے روک دیا

ویب ڈیسک: امریکی صدر ڈونلڈ ٹرمپ نے اسرائیل کو ایران کی توانائی تنصیبات پر مزید حملے کرنے سے روک دیا ہے۔ یہ دعویٰ امریکی اخبار وال اسٹریٹ جرنل کی رپورٹ میں سامنے آیا ہے۔

رپورٹ کے مطابق صدر ٹرمپ نے کہا ہے کہ ایران کو واضح پیغام دیا جا چکا ہے، اس لیے اب توانائی کے شعبے کو نشانہ بنانے کی ضرورت نہیں رہی۔ تاہم انہوں نے یہ بھی اشارہ دیا کہ اگر ایران نے آبنائے ہرمز میں کوئی اشتعال انگیز قدم اٹھایا تو پالیسی میں تبدیلی کی جا سکتی ہے۔

رپورٹ میں بتایا گیا ہے کہ اسرائیل نے بدھ کے روز ایران کے جنوبی پارس گیس فیلڈ پر حملہ کیا، جو دنیا کے بڑے گیس ذخائر میں شمار ہوتا ہے اور ایران کی معیشت کے لیے نہایت اہمیت رکھتا ہے۔

امریکی اخبار کے مطابق صدر ٹرمپ کو اس حملے سے پہلے سے آگاہ کیا گیا تھا، تاہم ان کا مؤقف حتمی نہیں سمجھا جا رہا۔

دوسری جانب ایران نے خبردار کیا ہے کہ وہ خطے میں موجود تمام تیل تنصیبات کو نشانہ بنا سکتا ہے جو امریکی کمپنیوں کی ملکیت یا زیر انتظام ہیں۔

اسی سلسلے میں ایران نے قطر کے راس لفان انڈسٹریل سٹی پر میزائل حملہ کیا، جس کے بعد آگ بھڑک اٹھی۔ تاہم قطر انرجی کے مطابق اس حملے میں کوئی جانی یا مالی نقصان نہیں ہوا۔

قطر نے اس حملے کی شدید مذمت کی اور اسے علاقائی کشیدگی میں خطرناک اضافہ اور ریاستی خودمختاری کی کھلی خلاف ورزی قرار دیا۔

روسی صدر نے علی لاریجانی کی شہادت کو باضابطہ قتل قرار دیدیا

ویب ڈیسک: روسی صدر ولادیمیر پیوٹن نے ایرانی رہنما علی لاریجانی کی شہادت کو باضابطہ قتل قرار دیتے ہوئے سخت ردعمل دیا ہے۔

غیر ملکی میڈیا کے مطابق روسی صدر کا کہنا ہے کہ علی لاریجانی کو نشانہ بنانا انسانی اخلاقیات اور بین الاقوامی قانون کی کھلی خلاف ورزی ہے، جس سے عالمی اصولوں کو پامال کیا گیا ہے۔

اس سے قبل روس کے دارالحکومت ماسکو میں صدارتی محل کریملن کی جانب سے جاری بیان میں بھی اس واقعے کی شدید مذمت کی گئی تھی۔ بیان میں کہا گیا کہ خودمختار ممالک کی قیادت کو نشانہ بنانا ناقابل قبول ہے۔

کریملن نے مزید کہا کہ ایسے اقدامات نہ صرف عالمی قوانین کے منافی ہیں بلکہ خطے میں کشیدگی کو مزید بڑھا سکتے ہیں، اس لیے عالمی برادری کو اس معاملے کا سنجیدگی سے نوٹس لینا چاہیے۔

آج بھی ملک بھر سےمشرق وسطیٰ کی 40پروازیں منسوخ کردی گئیں

ویب ڈیسک: پاکستان سے مشرق وسطیٰ کے فلائٹ آپریشن میں بہتری آنے لگی ہے، آج ملک بھر سے مشرق وسطیٰ کی 40 پروازیں منسوخ کر دی گئیں۔

ایئرپورٹ ذرائع کے مطابق العین سے لاہور، اسلام آباد اور پشاور کیلئے 10 پروازوں کی آمد متوقع ہے، دوحہ سے کراچی، لاہور اور اسلام آباد کیلئے پروازیں بھی شیڈول کے مطابق ہیں۔

کراچی سے دوحہ، بحرین، ابوظہبی اور دبئی کی 13 پروازیں منسوخ کی گئیں۔

اس کے علاوہ لاہور کی 8، اسلام آباد کی 7، پشاور کی 10 اور ملتان ایئرپورٹ سے مشرق وسطیٰ کی 2 پروازیں منسوخ کی گئی ہیں۔

سعودی عرب اور قطرکاآپریشن غضب للحق عارضی طور پر روکنے کے فیصلے کا خیرمقدم

ویب ڈیسک: سعودی عرب اور قطر نے عیدالفطر کے موقع پر پاکستان کی جانب سے افغانستان میں دہشت گردوں کے خلاف جاری آپریشن “غضب للحق” عارضی طور پر روکنے کے فیصلے کا خیر مقدم کیا ہے۔

سعودی وزارت خارجہ نے اپنے بیان میں کہا کہ عارضی جنگ بندی امن کی جانب ایک مثبت اور اہم قدم ہے۔ سعودی عرب نے اس پیش رفت کو خطے میں کشیدگی کم کرنے کی کوشش قرار دیتے ہوئے کہا کہ مسائل کے حل کے لیے مذاکرات ہی بہترین راستہ ہیں۔

قطر نے بھی اس فیصلے کو سراہتے ہوئے کہا کہ عید کے موقع پر جنگ بندی دونوں ممالک کے درمیان ماحول کو بہتر بنانے میں مدد دے گی اور یہ اقدام مستقبل میں مستقل امن کی بنیاد بن سکتا ہے۔

واضح رہے کہ وزیر اطلاعات عطا تارڑ نے اعلان کیا تھا کہ عیدالفطر کے پیش نظر آپریشن “غضب للحق” کو 23 اور 24 مارچ کی درمیانی رات تک عارضی طور پر روک دیا گیا ہے۔

حکام کے مطابق اگر افغانستان کی جانب سے دراندازی جاری رہی تو آپریشن دوبارہ مزید شدت کے ساتھ شروع کیا جائے گا۔

قطرنے ایران کی توانائی تنصیبات پراسرائیلی حملے کو غیرذمہ دارانہ قرار دیدیا

ویب ڈیسک: قطر نے ایران کی توانائی تنصیبات پر اسرائیلی حملے کو سخت الفاظ میں مسترد کرتے ہوئے اسے نہایت خطرناک اور غیر ذمہ دارانہ اقدام قرار دیا ہے۔

قطری وزارت خارجہ کے مطابق اسرائیل نے ایران کے ساؤتھ پارس گیس فیلڈ سے منسلک توانائی تنصیبات کو نشانہ بنایا، جو درحقیقت قطر کے نارتھ فیلڈ کی توسیع سمجھی جاتی ہے۔ بیان میں خبردار کیا گیا کہ توانائی کے بنیادی ڈھانچے کو نشانہ بنانا عالمی توانائی کے تحفظ کے لیے سنگین خطرہ ہے۔

قطر نے اس بات پر زور دیا کہ ایسے حملے نہ صرف خطے بلکہ پوری دنیا میں توانائی کی فراہمی کو متاثر کر سکتے ہیں، جس کے اثرات عالمی معیشت پر بھی مرتب ہوں گے۔

دوسری جانب متحدہ عرب امارات نے بھی اس حملے پر گہری تشویش کا اظہار کیا ہے۔ اماراتی حکام کے مطابق ایران میں واقع پارس جنوبی گیس فیلڈ قطر کے شمالی گیس فیلڈ سے جڑا ہوا ہے، اور اس حساس مقام کو نشانہ بنانا عالمی توانائی نظام کے لیے خطرناک پیش رفت ہو سکتی ہے۔

متحدہ عرب امارات نے اپنے بیان میں تمام فریقین پر زور دیا کہ وہ اہم توانائی تنصیبات کو نشانہ بنانے سے مکمل گریز کریں اور خطے میں کشیدگی کم کرنے کے لیے ذمہ دارانہ رویہ اختیار کریں۔

ایران کی تیل تنصیبات پر اسرائیلی حملے کے بعد تیل کی قیمتوں میں مزیداضافہ

ویب ڈیسک: مشرقِ وسطیٰ میں جاری کشیدگی نے عالمی توانائی مارکیٹ کو شدید متاثر کر دیا ہے، خصوصاً ایران کے بڑے گیس فیلڈ پر حملے کے بعد تیل کی قیمتوں میں نمایاں اضافہ دیکھنے میں آیا ہے۔

رپورٹس کے مطابق اسرائیل کی جانب سے ایران کے سب سے بڑے گیس فیلڈ ساؤتھ پارس پر حملے کے بعد عالمی منڈی میں بے یقینی کی فضا پیدا ہو گئی، جس کے نتیجے میں برینٹ کروڈ کی قیمت 5 فیصد سے زائد اضافے کے ساتھ 108.66 ڈالر فی بیرل تک جا پہنچی، جبکہ امریکی ویسٹ ٹیکساس انٹرمیڈیٹ خام تیل 98.65 ڈالر فی بیرل ہو گیا۔

ماہرین کا کہنا ہے کہ قیمتوں میں یہ اضافہ اس خدشے کے باعث ہوا کہ خطے میں جاری جنگ طویل ہو سکتی ہے، جس سے تیل اور گیس کی عالمی سپلائی مزید متاثر ہونے کا خطرہ ہے۔

ایرانی سرکاری میڈیا کے مطابق ساؤتھ پارس گیس فیلڈ، جو صوبہ بوشہر کے ساحل کے قریب واقع ہے، دنیا کے سب سے بڑے گیس ذخائر میں شمار ہوتا ہے، اور اس پر حملہ عالمی توانائی نظام کے لیے بڑا دھچکا ہے۔

دوسری جانب اسلامی انقلابی گارڈ کور (پاسدارانِ انقلاب) نے ردعمل دیتے ہوئے دھمکی دی ہے کہ وہ قطر، سعودی عرب اور متحدہ عرب امارات کی تیل و گیس تنصیبات کو بھی نشانہ بنا سکتا ہے، جس سے پورے خطے میں خوف اور غیر یقینی صورتحال مزید بڑھ گئی ہے۔

اسی دوران قطر کے راس لفان گیس فیسلٹی میں ایرانی بیلسٹک میزائل حملے کے بعد آگ لگنے کی اطلاعات سامنے آئیں، جسے بعد ازاں حکام نے قابو میں آنے کی تصدیق کر دی۔

موجودہ صورتحال میں امریکا اور اسرائیل کی جانب سے ایران پر حملوں اور ایران کی جوابی کارروائیوں کے باعث مشرقِ وسطیٰ سے تیل و گیس کی ترسیل شدید متاثر ہو رہی ہے، جبکہ کئی مقامات پر پیداوار بھی معطل کر دی گئی ہے، جس سے عالمی توانائی بحران کے خدشات مزید شدت اختیار کر گئے ہیں۔

آبنائے ہرمزکھلوانےکےکسی آپریشن میں حصہ نہیں لیں گے،میکرون

ویب ڈیسک: فرانسیسی صدر ایمانوئیل میکرون نے واضح کیا ہے کہ فرانس آبنائے ہرمز کھلوانے کے کسی بھی فوجی آپریشن میں حصہ نہیں لے گا۔

اپنے بیان میں میکرون کا کہنا تھا کہ فرانس اس تنازع کا فریق نہیں، اس لیے موجودہ صورتحال میں کسی بھی فوجی کارروائی میں شامل ہونے کا سوال ہی پیدا نہیں ہوتا۔

انہوں نے مزید کہا کہ فرانس ایک ایسے بین الاقوامی اتحاد کی تیاری پر کام کر رہا ہے جو کشیدگی میں کمی کے بعد خطے میں آزادانہ جہاز رانی کو یقینی بنا سکے۔

اس سے قبل کئیر اسٹارمر بھی واضح کر چکے ہیں کہ برطانیہ آبنائے ہرمز کھلوانے کے کسی بھی آپریشن میں حصہ نہیں لے گا۔

ایران آخری حدتک لڑنے کوتیارہے،خفیہ امریکی کیبل میں انکشاف

ویب ڈیسک: خفیہ امریکی کیبل میں انکشاف ہوا ہے کہ ایران کمزور نہیں ہو رہا بلکہ آخری حد تک لڑنے کو تیار ہے۔

امریکی اخبار نے محکمہ خارجہ کی کیبل کا حوالہ دیتے ہوئے کہا ہے کہ سینئر اسرائیلی حکام نے امریکی سفارتکاروں کو بتایا ہے کہ اگر ایرانی شہری حکومت کے خلاف سڑکوں پر نکلے تو انہیں قتل عام کا سامنا کرنا پڑ سکتا ہے۔

رپورٹ میں بتایا گیا ہے کہ بیت المقدس میں امریکی سفارتخانے کی جانب سے جاری کیبل کے مطابق اسرائیلی حکام کا اندازہ ہے کہ ایران کی حکومت کمزور نہیں پڑ رہی اور 28 فروری کو سپریم لیڈر آیت اللہ علی خامنہ ای کی شہادت اور جاری امریکی و اسرائیلی حملوں کے باوجود آخر تک لڑنے کے لیے تیار ہے۔

اخبار کی رپورٹ کے مطابق حیرت انگیز بات یہ ہے کہ صورتحال کا ادراک ہونے کے باوجود اسرائیلی حکام نے عوامی بغاوت کی امید ظاہر کرتے ہوئے امریکا پر زور دیا کہ اگر ایران میں احتجاج شروع ہو تو وہ مظاہرین کی حمایت کے لئے تیار رہے۔

شہیدعلی لاریجانی کی زندگی پر ایک نظر

ویب ڈیسک: ایران کے سکیورٹی چیف علی لاریجانی شہید اور ان کے خاندان کے دیگر افراد ایرانی قیادت میں مختلف عہدوں پر فائز رہے ہیں، یہ سمجھا جاتا ہے کہ وہ فیصلہ سازی میں اہم کردار ادا کرتے رہے ہیں، وہ واحد شخص تھے جو مغربی قوتوں کے ساتھ مذاکرات میں اہم کردار ادا کر سکتے تھے۔

شہید علی لاریجانی ایران کے سکیورٹی چیف اور سپریم نیشنل سکیورٹی کونسل کے سیکرٹری کے طور پر خدمات انجام دے رہے تھے، وہ سابق رہبر اعلیٰ علی خامنہ ای کی شہادت کے بعد کے مرحلے میں فیصلہ سازوں میں شامل تھے، حالیہ عرصے میں وہ امریکا کے ساتھ یورینیم افزودگی پر مذاکرات سے متعلق فیصلوں میں کردار ادا کر رہے تھے۔

علی لاریجانی 1957ء میں عراق کے شہر نجف میں پیدا ہوئے، 1961ء میں خاندان کے ساتھ ایران واپس آگئے، ریاضی کی تعلیم حاصل کی، تہران یونیورسٹی سے فلسفے میں ماسٹرز اور ڈاکٹریٹ کی ڈگری لی، ان کے والد مذہبی عالم تھے، علی لاریجانی کے 4 بھائی ہیں اور سب نے ایرانی ریاستی اداروں میں اہم عہدے سنبھالے۔

علی لاریجانی نے 1980ء کی دہائی کے اوائل میں سرکاری ایرانی چینل میں مختصر مدت کیلئے نگران کی حیثیت سے کام کیا، ایرانی پاسداران انقلاب میں بھی شمولیت اختیار کی، ایران عراق جنگ میں خدمات سرانجام دیں۔

1992ء میں محمد خاتمی کی جگہ وزیر ثقافت و اسلامی رہنمائی کا عہدہ سنبھالا 1994ء میں سرکاری ایرانی نشریاتی ادارے کا ڈائریکٹر مقرر کیا گیا، 1996ء میں خامنہ ای نے 3 سال کیلئے سپریم نیشنل سکیورٹی کونسل میں اپنا نمائندہ مقرر کیا 1997ء میں مصلحت نظام کونسل کے رکن بنے، 1999 میں دوبارہ سپریم لیڈر کے نمائندے کے طور پر سپریم نیشنل سکیورٹی کونسل میں شامل ہوئے۔

2002ء میں دوبارہ مصلحت نظام کونسل کا رکن بنایا گیا، 2004ء میں سرکاری ایرانی چینل کے ڈائریکٹر کے طور پر واپس آئے، 2005ء میں جوہری پروگرام پر یورپی یونین کے ساتھ مذاکرات کا انچارج مقرر کیا گیا، 2008ء میں پارلیمنٹ کے رکن بنے اور سپیکر منتخب ہوئے، کئی مرتبہ اس عہدے پر فائز رہے، وہ 2020ء تک سپیکر رہے۔

علی لاریجانی کی مصلحت نظام کونسل کی رکنیت کی کئی مرتبہ تجدید ہوئی، 2020ء میں خامنہ ای نے انہیں اپنا مشیر مقرر کیا، انہوں نے 2021ء میں صدارتی انتخاب کیلئے کاغذات جمع کروائے لیکن نگہبان کونسل نے مسترد کر دیے، 2024ء میں نگہبان کونسل نے دوسری بار ان کی صدارتی نامزدگی مسترد کی، اگست 2025ء میں سپریم نیشنل سکیورٹی کونسل کا سربراہ اور کونسل میں سپریم لیڈر کا نمائندہ مقرر کیا گیا۔

شہید علی لاریجانی نے ایران کی طرف سے جوہری معاملات پر مذاکرات کی قیادت کی، غزہ اور لبنان کی حالیہ جنگوں کے دوران عالمی سطح پر نمایاں کردار سامنے آیا، جنگ کے دوران عراق، لبنان، شام اور خلیج کے حکام سے ملاقاتیں کیں۔

فروری میں امریکی انتظامیہ نے علی لاریجانی پر مظاہرین کے خلاف کریک ڈاؤن کا الزام لگاتے ہوئے پابندیاں عائد کیں، خامنہ ای کی شہادت کے بعد لاریجانی کے بیانات سخت ہو گئے، اور انہوں نے کہا تھا کہ اب ایران امریکا کے ساتھ مذاکرات نہیں کرے گا، طویل مدت کی جنگ کیلئے تیار ہیں۔

علی لاریجانی کی شہادت کے بعد سعید جلیلی کے عبوری سیکرٹری بننے کا امکان

ویب ڈیسک: ایران کی قومی سلامتی کونسل کے سیکرٹری علی لاریجانی کی شہادت کے بعد سابق سیکرٹری سعید جلیلی کے عارضی طور پر یہ ذمہ داری سنبھالنے کا امکان ظاہر کیا جا رہا ہے۔

سپریم نیشنل سکیورٹی کونسل کی جانب سے سرکاری ٹی وی پر جاری بیان میں بتایا گیا کہ علی لاریجانی اپنے بیٹے اور ایک معاون سمیت اسرائیلی حملے میں شہید ہوئے۔ یہ واقعہ تہران میں پیر اور منگل کی درمیانی شب تقریباً ساڑھے تین بجے پیش آیا۔

رپورٹس کے مطابق علی لاریجانی کو سابق سپریم لیڈر آیت اللہ علی خامنہ ای نے نامزد کیا تھا، جبکہ ان کے ساتھ سعید جلیلی بھی کونسل کا حصہ رہ چکے ہیں۔

ذرائع کا کہنا ہے کہ عارضی طور پر سعید جلیلی کو یہ ذمہ داری دی جا سکتی ہے، جب تک ممکنہ نئے سپریم لیڈر مجتبیٰ خامنہ ای کی جانب سے کونسل کے لیے مستقل نمائندے کا تقرر نہیں کیا جاتا۔

علی لاریجانی کی شہادت کا ردعمل: ایران کااسرائیل پرکلسٹرمیزائلوں سے بڑاحملہ

ویب ڈیسک: ایرانی فورسز نے علی لاریجانی کی شہادت کے بعد وسطی اسرائیل پر کلسٹر میزائلوں سے بڑا حملہ کیا ہے، جس کے نتیجے میں جانی و مالی نقصان کی اطلاعات ہیں۔

خبر ایجنسی کے مطابق ایران کے حملے کے دوران ایک کلسٹر میزائل فضا میں پھٹا جس کے جلتے ہوئے ٹکڑے وسیع علاقے میں پھیل گئے، جن کے اثرات تل ابیب سمیت مختلف علاقوں میں دیکھے گئے۔

رپورٹس کے مطابق یروشلم، رامات گن اور بنی براک میں بھی نقصان کی اطلاعات ہیں۔

ابتدائی اطلاعات کے مطابق حملے میں ایک 70 سالہ مرد اور خاتون ہلاک ہو گئے، جبکہ شارون کے علاقے میں کم از کم پانچ افراد زخمی ہوئے ہیں۔

اسرائیلی میڈیا کے مطابق ایرانی میزائل حملوں میں کم از کم چار مقامات کو نشانہ بنایا گیا جس کے باعث املاک کو بڑے پیمانے پر نقصان پہنچا۔

دوسری جانب لبنان کی مزاحمتی تنظیم حزب اللہ نے بھی اسرائیل پر درجن سے زائد حملوں کا دعویٰ کیا ہے۔ گروپ کے مطابق اطلیت بیس، جو حیفا کے جنوب میں واقع ہے، پر اسرائیلی بحری یونٹ کو نشانہ بنایا گیا، جبکہ جنوبی لبنان اور اسرائیل میں فوجی اہداف پر بھی حملے کیے گئے۔

علی لاریجانی کی شہادت کے بعد ڈونلڈٹرمپ کا ردعمل آگیا

ویب ڈیسک: امریکی صدر ڈونلڈ ٹرمپ نے ایران کی قومی سلامتی کونسل کے سیکرٹری علی لاریجانی کی شہادت کے بعد اپنے بیان میں کہا ہے کہ امریکا اپنے اہداف کے حصول میں شیڈول سے بہت آگے جا رہا ہے۔

ٹرمپ نے ایران پر حملے کو درست فیصلہ قرار دیتے ہوئے کہا کہ اگر یہ کارروائی نہ کی جاتی تو ایران اب تک ایٹمی ہتھیار حاصل کر چکا ہوتا۔ ان کا کہنا تھا کہ امریکا نے ایران کی فضائیہ اور بحریہ کو مکمل طور پر تباہ کر دیا ہے۔

انہوں نے مزید کہا کہ موجودہ کارروائیاں منصوبے کے مطابق نہیں بلکہ اس سے بھی تیز رفتار انداز میں آگے بڑھ رہی ہیں۔

واضح رہے کہ ایرانی حکام کے مطابق علی لاریجانی امریکا اور اسرائیل کے حملے میں شہید ہوئے۔ ایرانی میڈیا رپورٹس کے مطابق حملہ مشرقی تہران میں اس وقت کیا گیا جب وہ اپنی بیٹی سے ملاقات کے لیے گئے ہوئے تھے، جبکہ اس حملے میں ان کے بیٹے مرتضیٰ بھی شہید ہو گئے۔

اسرائیلی فضائی حملہ، علی لاریجانی اور غلام رضا سلیمانی شہید

ویب ڈیسک: ایران کی اہم سیاسی و سکیورٹی شخصیت علی لاریجانی اسرائیلی فضائی حملے میں شہید ہو گئے، جبکہ بسیج فورس کے سربراہ غلام رضا سلیمانی بھی ایک علیحدہ حملے میں جان کی بازی ہار گئے۔

ایرانی میڈیا کے مطابق تہران میں ایک خفیہ مقام پر اسرائیلی جنگی طیاروں نے علی لاریجانی کو نشانہ بنایا۔ رپورٹس میں بتایا گیا ہے کہ وہ تہران کے مشرقی علاقے میں اپنی بیٹی سے ملاقات کے لیے گئے تھے جب ان پر حملہ کیا گیا۔ اس حملے میں ان کے بیٹے مرتضیٰ بھی شہید ہو گئے۔

ایرانی قومی سلامتی کونسل سے منسلک سوشل میڈیا اکاؤنٹ سے بھی ان کی شہادت کی تصدیق کرتے ہوئے کہا گیا کہ "خدا کا بندہ خدا سے جا ملا"۔

ایرانی صدر مسعود پزشکیان نے علی لاریجانی کو خراج عقیدت پیش کرتے ہوئے کہا کہ وہ ایک نمایاں اور باصلاحیت شخصیت تھے جنہوں نے مختلف اہم عہدوں پر خدمات انجام دیں اور خطے میں امن و استحکام کے لیے کردار ادا کیا۔

غیر ملکی میڈیا کے مطابق اسرائیلی حکام انہیں ایران کا ڈی فیکٹو لیڈر قرار دے رہے تھے اور دعویٰ کیا گیا تھا کہ آیت اللہ علی خامنہ ای کے بعد وہ عملی طور پر قیادت سنبھال چکے تھے۔

دوسری جانب ایک علیحدہ اسرائیلی حملے میں بسیج فورس کے سربراہ غلام رضا سلیمانی بھی شہید ہو گئے، جو ایران کی اندرونی سکیورٹی کے اہم ترین کمانڈرز میں شمار ہوتے تھے۔

اسرائیلی فوج کا علی لاریجانی کو نشانہ بنانے کا دعویٰ، ایران کی تردید

ویب ڈیسک: اسرائیلی میڈیا کا دعویٰ ہے کہ اسرائیلی فوج نے ایران کے سکیورٹی چیف علی لاریجانی کو نشانہ بنایا ہے۔

اسرائیلی میڈیا رپورٹس میں  کہا گیا ہے فوری طور پر واضح نہیں کہ آیا علی لاریجانی مارے گئے یا زخمی ہوئے۔

ایرانی میڈیا نے اسرائیلی میڈیا کے دعوے کی تردید کرتے ہوئے کہا کہ بہت جلد ایرانی سکیورٹی چیف علی لاریجانی کا پیغام جاری کیا جائے گا۔

دوسری جانب غیر ملکی خبر ایجنسی کا بتانا ہے کہ ایران کے دارالحکومت تہران کے مرکزی علاقے میں دھماکے سنے گئے، فوری طور پر یہ واضح نہیں ہو سکا کہ کن مقامات کو نشانہ بنایا گیا۔

ایران میں جاسوسی کے الزام میں 10 غیر ملکی افراد گرفتار

ویب ڈیسک: ایران کے شمال مشرقی علاقے میں جاسوسی کے الزام میں 10 غیر ملکی افراد کو گرفتار کر لیا گیا ہے۔

ایرانی میڈیا کے مطابق یہ کارروائی پاسدارانِ انقلاب کے انٹیلی جنس ادارے نے انجام دی، جس دوران ملزمان کو حراست میں لیا گیا۔

رپورٹس کے مطابق گرفتار افراد پر حساس تنصیبات سے متعلق معلومات اکٹھی کرنے اور ممکنہ فیلڈ آپریشنز کی تیاری کا الزام عائد کیا گیا ہے۔

ایرانی حکام نے تاحال گرفتار افراد کی قومیت کے حوالے سے کوئی تفصیلات جاری نہیں کیں، جبکہ مزید تحقیقات جاری ہیں۔

بغداد میں امریکی سفارتخانے پر ڈرون اور راکٹ حملوں کی شدید لہر

ویب ڈیسک: بغداد میں قائم امریکی سفارتخانے کو ڈرون اور راکٹ حملوں کی شدید لہر کا نشانہ بنایا گیا ہے، جسے حالیہ عرصے کا سب سے بڑا اور شدید حملہ قرار دیا جا رہا ہے۔

غیر ملکی خبر رساں اداروں اور فرانسیسی خبر ایجنسی کے مطابق عراقی سکیورٹی ذرائع کا کہنا ہے کہ حملے کی شدت غیر معمولی تھی اور اسے حالیہ حملوں کے سلسلے میں سب سے بڑا حملہ سمجھا جا رہا ہے۔

رپورٹس کے مطابق حملوں سے چند گھنٹے قبل امریکی سفارتخانہ بغداد کی جانب سے عراق میں موجود اپنے شہریوں کے لیے سکیورٹی الرٹ جاری کیا گیا تھا، جس میں خبردار کیا گیا تھا کہ ایران سے منسلک عسکریت پسند گروہ بار بار بغداد کے انٹرنیشنل زون کو نشانہ بنا رہے ہیں۔

تاحال حملوں میں جانی یا مالی نقصان کی مکمل تفصیلات سامنے نہیں آئیں، تاہم سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے اور صورتحال پر کڑی نظر رکھی جا رہی ہے۔

ایرانی میزائل حملوں سے اسرائیل میں تباہی، متعدد ہلاکتیں اور درجنوں زخمی

ویب ڈیسک: ایرانی میزائل حملوں کے نتیجے میں اسرائیل کے مختلف علاقوں میں شدید تباہی ہوئی ہے، متعدد مقامات پر آگ بھڑک اٹھی جبکہ تل ابیب میں کئی عمارتیں اور گاڑیاں تباہ ہو گئیں اور درجنوں افراد زخمی ہو گئے۔

بیت شمیش پر بھی میزائل داغے گئے، جس کے بعد اسرائیل میں ہلاک ہونے والے فوجیوں اور شہریوں کی تعداد 15 ہو گئی ہے، جبکہ جنگ کے آغاز سے اب تک 3 ہزار 350 سے زائد افراد کے زخمی ہونے کی تصدیق کی گئی ہے۔ ہلاکتوں کے حوالے سے اسرائیلی حکام کی جانب سے مکمل تفصیلات جاری نہیں کی گئیں۔

ادھر لبنان کی مزاحمتی تنظیم حزب اللہ کی جانب سے بھی اسرائیل پر حملے جاری ہیں اور تنظیم نے ایک ٹینک تباہ کرنے کی ویڈیو بھی جاری کی ہے۔

آبنائے ہرمز پر تعاون نہ کرنے پر ٹرمپ کے اتحادیوں سے شکوے

ویب ڈیسک: امریکی صدر ڈونلڈ ٹرمپ نے آبنائے ہرمز کھلوانے میں مدد نہ دینے پر نیٹو سمیت اتحادی ممالک سے شکوے کرتے ہوئے ایران پر بھی سخت الزامات عائد کیے ہیں۔

میڈیا سے گفتگو میں ڈونلڈ ٹرمپ نے کہا کہ اگر ایران کے پاس ایٹمی ہتھیار ہوتا تو وہ اسے امریکا کے خلاف استعمال کر دیتا اور ممکنہ طور پر اسرائیل سمیت پورے مشرقِ وسطیٰ کو نشانہ بناتا۔

انہوں نے کہا کہ ایران تباہی پھیلا کر خطے کی قیادت کرنا چاہتا ہے اور پرتشدد عناصر کو ایٹمی ہتھیار رکھنے کی اجازت نہیں ہونی چاہیے۔ ان کا کہنا تھا کہ جو ممالک ایران کو ایٹمی ہتھیار حاصل کرنے سے روکنا چاہتے ہیں انہیں ان کے اقدامات کی حمایت کرنی چاہیے۔

امریکی صدر نے کہا کہ وہ دنیا میں جنگ نہیں چاہتے لیکن موجودہ صورتحال میں ایران اپنے پڑوسی ممالک پر میزائل حملے کر رہا ہے۔ انہوں نے بعض اتحادی ممالک پر مایوسی کا اظہار کرتے ہوئے کہا کہ نیٹو کے دفاع کے لیے امریکا ہمیشہ موجود رہا لیکن ضرورت پڑنے پر اتحادی ساتھ نہیں دے رہے۔

انہوں نے برطانوی وزیر اعظم کیئر اسٹارمر کا حوالہ دیتے ہوئے کہا کہ جنگ جیتنے کے بعد جنگی طیارے بھیجنے کی پیشکش کی گئی جس کی اب ضرورت نہیں رہی، اور اس حوالے سے انہوں نے برطانوی قیادت پر مایوسی کا اظہار کیا۔

ٹرمپ کا کہنا تھا کہ امریکا نے نیٹو کے دفاع کے لیے اربوں ڈالر خرچ کیے مگر مشکل وقت میں اتحادی غیر حاضر رہے۔ انہوں نے دعویٰ کیا کہ ایران کی بحریہ، فضائیہ اور دفاعی نظام کو شدید نقصان پہنچایا گیا ہے۔

انہوں نے مزید کہا کہ کچھ ممالک آبنائے ہرمز کے معاملے پر تعاون کے لیے تیار نہیں، اس کے باوجود امریکا نے چین، جاپان، جنوبی کوریا اور دیگر ممالک سے دوبارہ مدد کی اپیل کی ہے۔

ڈونلڈ ٹرمپ نے دعویٰ کیا کہ ایران کی قیادت کمزور ہو چکی ہے اور ملک میں مذاکرات کے لیے مؤثر قیادت موجود نہیں۔ انہوں نے جنگ کے خاتمے کے حوالے سے کہا کہ اس بارے میں حتمی طور پر کچھ نہیں کہا جا سکتا تاہم جنگ جلد ختم ہونے کی توقع ہے۔

امریکی صدر نے اینٹی فراڈ ٹاسک فورس سے متعلق ایک ایگزیکٹو آرڈر پر دستخط کرنے کا بھی اعلان کیا۔

ایران جنگ میں زخمی ہونیوالے امریکی فوجیوں کی تعدادمنظرعام پر آگئی

ویب ڈیسک: ایران کے ساتھ جاری جنگ میں زخمی ہونے والے امریکی فوجیوں کی تصدیق شدہ تعداد سامنے آ گئی ہے۔

امریکی سینٹ کام کے مطابق اس جنگ میں اب تک 200 امریکی فوجی زخمی ہو چکے ہیں جن میں سے 10 کی حالت تشویشناک بتائی گئی ہے۔

غیر ملکی میڈیا کے مطابق یہ امریکی فوجی 7 مختلف ممالک میں زخمی ہوئے، جبکہ 28 فروری کو امریکا اور اسرائیل کی جانب سے جنگ کے آغاز کے بعد ایران کے حملوں میں اب تک 13 امریکی فوجیوں کی ہلاکت بھی ہو چکی ہے۔

دوسری جانب ایران نے اسرائیلی اور امریکی اہداف پر حملوں کی 57 ویں لہر شروع کرنے کا اعلان کیا ہے۔

ایران نے ان حملوں کو رمضان میں اپنی والدہ کی گود میں شہید ہونے والے شیر خوار بچے مجتبیٰ کے نام سے منسوب کیا ہے۔