اپنی بیوی کو وزیر اعظم بناؤنگا،بنگلادیشی شہری حسینہ واجد کی ساڑھیاں لے گیا

عوام کیلئے خوشخبری، سولر پینلز کی قیمتوں میں اچانک بڑی کمی

ویب ڈیسک: مہنگی بجلی سے پریشان عوام کے لئے اچھی خبر، سولر سسٹم لگوانے کے منتظر افراد ہوجائیں تیار،پاکستان میں سولر پینلز کی قیمتوں میں مزید کمی ہوگئی ۔

رپورٹس کے مطابق پاکستان بھر میں سولر پینلز کی قیمتیں مزید گر گئی ہیں،فی واٹ سولر پینلز کی قیمتیں 30 سے 32 روپے کی سطح تک گر گئی ہیں۔

ڈیلرز کے مطابق انٹرنیشنل مارکیٹ میں لیتھیم بیٹری کی قیتمیں 50 فیصد تک گری ہیں۔

واضح رہے کہ اس سے قبل بھی ملک میں سولر پینلز کی قیمتیں گری تھیں۔

شیخ حسینہ کے ظلم کی داستان" آئینہ گھر "جہاں سے کوئی زندہ باہر نہ آسکا

ویب ڈیسک: (علی زیدی) بنگلہ دیش کی سابق وزیر اعظم شیخ حسینہ  کی جانب سے ملک بھر میں ’’ آئینہ گھر’’ house of mirrors قائم کئے جانے کا انکشاف ہواہے۔ جہاں سیاسی مخالفین اور بات نہ ماننے والے حکام کو قید میں رکھ کر اذیتوں کا نشانہ بنا یا جاتا تھا۔

تفصیلات کے مطابق بنگلہ دیش چھوڑنے کے بعد وزیراعظم شیخ حسینہ کے آئینہ گھر کی حقیقت سامنے آئی ہے۔ ملک بھر میں 23‘ہاؤس آف مرر’ قائم کئے گئے تھے۔ جہاں مخالفین کو جسمانی وذہنی تشدد کا نشانہ بنایا جاتا تھا۔ خیال کیا جاتا ہے کہ یہاں زیر حراست افراد شاید ہی اپنے اوپر ہونے والے تشدد کو بیان کرنے کیلئے زندہ باہر آپاتے ہیں۔ 

شیخ حسینہ اپنے خلاف اٹھنے والی ہر آواز کو ان آئینہ گھر کے ذریعے کچل دیتی تھیں۔ 

آئینہ گھر وہ خفیہ اڈہ تھا، جہاں شیخ حسینہ کے خلاف آواز اٹھانے والوں کو بغیر کسی اصول و ضوابط کے یرغمال بنا کر رکھا جاتا تھا۔ 

بنگلہ دیش کے اخبار ڈیلی آبزرور کی ایک رپورٹ کے مطابق بنگلہ دیش کی انٹیلی جنس ایجنسی ڈی جی ایف آئی (ڈائریکٹوریٹ جنرل آف فورس انٹیلی جنس) ملک میں ایسے کل 23 آئینہ گھر چلا رہی تھی۔ تاہم شیخ حسینہ کے فرار کے بعد اب ان قیدیوں کو رہا کیا جا رہا ہے۔

حال ہی میں رہا ہونے والے بیرسٹر احمد بن قاسم ارمان بنگلہ دیش کے بریگیڈیئر جنرل عبداللہ امان اعظمی کو بھی گرفتار کرکے اسی آئینہ گھر میں رکھا گیا تھا۔

شیخ حسینہ واجد استعفے کے بعد پہلی مرتبہ منظرعام پر آگئیں،30 ہزار میں کیا خریدا؟

ویب ڈیسک: (علی زیدی) سابق بنگلہ دیشی وزیراعظم شیخ حسینہ واجد کی فوجی گیسٹ ہاؤس غازی آباد میں رہائش پرکڑے حفاظتی اقدامات کیے گئے ہیں۔ 24 گھنٹے سیٹلائٹ سے مانیٹرنگ کی جارہی ہے۔ سابق وزیراعظم بھارت میں پہلے دن منظرعام پر آگئیں۔

ذرائع کے مطابق شیخ حسینہ واجد کو ان کی بہن ریحانہ شیخ اور بیٹی کے ہمراہ ایک آرمی گیسٹ ہاؤس میں رکھا گیا ہے ۔جہاں فوجی کمانڈوز کا دستہ ان کی حفاظت پر تعینات ہے جبکہ گیسٹ ہاؤس کی بذریعہ سیٹلائٹ 24 گھنٹے کڑی نگرانی کی جاتی ہے ۔ 

قرب وجوار کی سڑکوں پر پولیس ناکے قائم ہیں علاقے میں کسی غیر متعلقہ فرد کو آنے جانے کی اجازت نہیں ۔ اسی طرح کارگو ٹرک کو بھی علاقے میں داخل نہیں ہونے دیا جارہا۔

اپنی بھارت آمد کے بعد شیخ حسینہ پہلی بار گزشتہ روزکڑی سیکیورٹی میں گیسٹ ہاؤس سے باہر نکلیں۔ وہ غازی آباد کے ایک شاپنگ کمپلیکس میں خریداری کے لیے گئیں۔ انہوں  نے 30000 روپے کی کچھ ضروری چیزیں خریدیں۔ 

ذرائع نے دعوی کیا ہے کہ خریداری کرتے وقت ان کے پاس پیسے ختم ہو گئے جس کے بعد انہوں نے اپنے ہمراہ آئے بھارتی حکام سے پیسے طلب کئے۔

ذرائع کا کہنا ہے کہ ڈھاکا سے فرار ہوتے وقت وہ اپنے ساتھ زیادہ سامان نہیں لا سکی تھی۔  انہوں نے شاپنگ سنٹر سے کچھ سوٹ کیس اور بیگ  خریدے۔ انہوں  نے اپنے اور اپنی بہن کے لیے کپڑوں کے ساتھ ساتھ روزمرہ استعمال کی اشیا بھی خریدیں۔

ملک کو دوسری بار آزادی ملی ہے، ڈاکٹر یونس آج حلف اٹھائیں گے

ویب ڈیسک: نوجوانوں  کی قربانی کے باعث ملک کو دوسری بار آزادی ملی ہے۔بنگلہ دیش کے نوبیل انعام یافتہ ماہر اقتصادیات محمد یونس ڈھاکہ پہنچ گئے۔

ڈھاکہ کے حضرت شاہ جلال بین الاقوامی ہوائی اڈے پر پہنچنے  پر محمد یونس کا استقبال  بنگلہ بری فوج کے سربراہ جنرل وقار الزمان نے کیا۔ اس موقع پر بحریہ اور فضائیہ کے سربراہان بھی موجود تھے۔

سابقہ وزیر اعظم شیخ حسینہ کے خلاف بغاوت کی قیادت کرنے والے کچھ طلبہ رہنما بھی ان کے استقبال کے لیے ہوائی اڈے پر موجود تھے۔  ان طلبہ نے ہی محمد یونس کا نام ملک کے عبوری رہنما کے طور پر  صدر کو تجویز کیا تھا۔

 وطن آمد کے فوری بعد محمد یونس کا کہنا تھاکہ ان کی ترجیح امن بحال کرنا ہو گی۔

پریس کانفرنس سے خطاب کرتے ہوئے محمد یونس نے کہا، ’’بنگلہ دیش ایک خاندان ہے۔ ہمیں اسے متحد کرنا ہوگا۔ اس کا بے پناہ امکان ہے۔‘‘ انہوں نے سب پر زور دیا کہ وہ تشدد کو روکیں اور وعدہ لیا کہ  کسی کے خلاف کسی بھی قسم کے جابرانہ اقدامات کا سہارا نہیں لیا جائے گا۔ 

یونس کی بحفاظت آمد یقینی بنانے کے لیے ہوائی اڈے پر سخت حفاظتی انتظامات کیے گئے تھے۔ وطن واپس پہنچنے پر انہوں نے حالیہ پرتشدد مظاہروں میں مارے جانے والے افراد کو خراج تحسین پیش کرتے ہوئے کہا کہ ان کی قربانیوں کے سبب قوم کو دوسری مرتبہ آزادی ملی۔

 انہوں  نے کہا کہ  آج ہمارے لیے ایک شاندار دن ہے۔

انہوں نے کہا کہ ’بنگلہ دیش نے فتح کا نیا دن بنایا ہے۔ بنگلہ دیش کو دوسری آزادی ملی ہے۔‘

سیاست نہیں چھوڑی، حسینہ اب بھی بنگلہ دیش کی وزیراعظم ہیں، بیٹا سجیب واجد

 ویب ڈیسک :شیخ حسینہ واجد کے بیٹے سجیب واجد جوئے نے کہا ہے کہ شیخ حسینہ قانونی طور پر بنگلہ دیش کی وزیراعظم ہیں انہوں نے استعفا نہیں دیا۔۔عوامی لیگ واپس آئے گی ، ہم ابھی مرے نہیں۔

 بھارتی ذرائع ابلاغ کو انٹرویو دیتے ہوئے انہوں نے کہا کہ شیخ حسینہ نئی دہلی میں ہیں اور فی الحال کہیں اور جانے کا ان کا کوئی ارادہ نہیں ہے۔

  ان کاکہنا تھا کہ ہم نے شروع میں فیصلہ کیا تھا کہ ہم سیاست چھوڑ دیں گے، لیکن چونکہ ہماری پارٹی کے لوگوں پر حملے ہو رہے ہیں، اس لیے ہمیں اس پر نظر ثانی کرنی پڑی۔ ہم انہیں ایسے نہیں چھوڑ سکتے۔

 آئینی طور پر شیخ حسینہ نے کبھی استعفیٰ نہیں دیا کیونکہ انہیں ایسا کرنے کا کبھی موقع نہیں ملا، اس لیے یہ ایک آئینی مسئلہ ہے۔ آئینی طور پر وہ بنگلہ دیش کی وزیر اعظم  ہی ہیں۔

جب ان سے پوچھا گیا کہ کیا حسینہ واجد کی سیاسی واپسی ہوگی یا عوامی لیگ کا احیاء ہوگا تو انہوں نے زور دے کر کہا کہ عوامی لیگ بنگلہ دیش کی سب سے پرانی اور سب سے بڑی سیاسی جماعت ہے۔ انہوں نے کہا کہ "ہم مرے نہیں، ہم کہیں نہیں جا رہے... عوامی لیگ واپس آ رہی ہے۔"

سجیب واجد نے وزیر اعظم نریندر مودی اور بھارتی حکومت کا شکریہ ادا کیا اور کہا، "بھارتی حکومت نے اپنے فوری ردعمل سے ان (شیخ حسینہ) کی جان بچائی۔" انہوں نے کہا، "میں ان جتنا بھی شکریہ ادا کروں، کم ہے اور میں ہمیشہ شکر گزار رہوں گا۔

 اسی کے ساتھ انہوں نے کہا کہ بنگلہ دیش میں سیکولر حکومت کے بغیر، بدقسمتی سے اقلیتوں کو نشانہ بنایا جا رہا ہے۔ میرا ماننا ہے کہ بنگلہ دیش میں لوگوں کو محفوظ رکھنے، سرحد کو محفوظ بنانے اور انتہا پسندی کو ختم کرنے کے لیے ہمیں ایک پرامن سیکولر حکومت کی ضرورت ہے۔ 

بنگلہ دیش کی عبوری حکومت محمد یونس کی سربراہی میں آج حلف اٹھائے گی

ویب ڈیسک: بنگلہ دیش کی عبوری حکومت آج نوبیل انعام یافتہ ماہر اقتصادیات محمد یونس کی سربراہی میں حلف اٹھائے گی، جس کے بعد امکان ہے کہ ملک میں کئی روز سے جاری بد امنی ختم ہوگی اور استحکام بحال ہوگا۔

جولائی میں سرکاری ملازمتوں کے لیے کوٹہ سسٹم کے خلاف طلبہ کے مظاہروں سے شروع ہونے والی بدامنی جلد ہی وزیراعظم شیخ حسینہ واجد کے 15 سالہ دور حکومت کے لیے ایک بڑا مسئلہ بن گئی  تھی، جس کے دوران صرف چند ہفتوں میں 300 سے زیادہ اموات ہوئیں۔

پانچ اگست کو حسینہ واجد استعفیٰ دے کر انڈیا روانہ ہوگئیں جبکہ طلبہ رہنماؤں نے پارلیمنٹ تحلیل کرکے محمد یونس کو عبوری حکومت کا سربراہ مقرر کرنے کا مطالبہ کیا۔

بنگلہ دیش کے صدر محمد شہاب الدین، جو ایک علامتی شخصیت ہیں اور اب آئین کے تحت چیف ایگزیکٹو کے طور پر کام کر رہے ہیں، نے منگل کو پارلیمنٹ تحلیل کر دی تھی، جس سے عبوری انتظامیہ کی راہ ہموار ہوئی، جس کے بارے میں توقع ہے کہ وہ نئے انتخابات کا شیڈول جاری کرے گی، لیکن یہ واضح نہیں ہے کہ یہ انتخابات کب ہوں گے۔

بنگلہ دیش کی تاجر برادری کا مجبورا شیخ حسینہ کی حمایت کرنے کا انکشاف

ویب ڈیسک: شیخ حسینہ کا دھڑن تختہ کے بعد بنگلہ دیش کی تاجر براردی کا ردعمل بھی سامنے آگیا۔ انٹرنیشنل چیمبر آف کامرس بنگلہ دیش (آئی سی سی بی) کے صدر محبوب الرحمان نے انکشاف کیا کہ ملک کے تاجر دباؤ میں رہنے کی وجہ سے طویل عرصے سے شیخ حسینہ حکومت کی حمایت کرنے پر مجبور تھے اور اگر ان کے پاس کوئی دوسرا راستہ ہوتا تو شاید وہ دباؤ کو نظر انداز کر سکتے تھے۔

ڈھاکہ کے ایک ہوٹل میں آئی سی سی بی نے تمام کاروباری تنظیموں کی جانب سے یہ پریس کانفرنس ملک کی موجودہ صورتحال پر بات کرنے کے لیے منعقد کی۔

تاجر رہنمائوں نے کہا کہ امن و امان کی موجودہ صورتحال کو جلد قابو میں لانے اور کاروباری ماحول کو معمول پر لانے کی ضرورت ہے۔ اس کے علاوہ انہوں نے کہا کہ وہ پروفیسر محمد یونس کی قیادت میں نئی ​​عبوری حکومت کی حمایت کریں گے۔

پریس کانفرنس میں آئی سی سی بی کے صدر نے تاجروں کی جانب سے صحافیوں کے مختلف سوالات کے جوابات دیئے۔ ایک صحافی نے سوال کیا کہ 16 سال تک شیخ حسینہ کی حکومت کو تاجروں کی مکمل حمایت حاصل رہی، اب آپ کاروباری طبقہ کہہ رہا ہے کہ ملک کے طلبہ نے بہت اچھا کام کیا ہے اور آپ پروفیسر محمد یونس کی قیادت میں نئی ​​حکومت کا ساتھ دیں گے، کیا آپ کو یہ باتیں کہنے کا اخلاقی جواز ہے؟

سوال کے جواب میں آئی سی سی بی کے صدر محبوب الرحمٰن نے کہا ’گزشتہ سال بنگا بندھو انٹرنیشنل کانفرنس سینٹر (بی آئی سی سی) میں ایک بزنس کانفرنس منعقد ہوئی تھی اس میں کہا گیا کہ ’’بار بار شیخ حسینہ کی حکومت کی ضرورت ہے اور اس طرح شیخ حسینہ کی حکومت آئی، اب اگر آپ کو حکومت کے سربراہ سے ملاقات کی دعوت دی گئی ہے، اور آپ گھر بیٹھے ہیں۔ ہمارے پاس کوئی دوسرا راستہ نہیں تھا۔

محبوب الرحمن نے کہاکہ جب ہمیں مدعو کیا گیا تو ہم اسے ٹھکرا نہیں سکے، مجھے جانا ہے کوئی بھی تاجر کسی بھی ٹیم کو سپورٹ کر سکتا ہے، اس کو غلط سمجھنے کی کوئی وجہ نہیں ہے، ہم ملک کی معیشت کو آگے لے جانا چاہتے ہیں۔

واضح رہے کہ ایف بی سی سی آئی نے گزشتہ سال جولائی میں بنگ بندھو انٹرنیشنل کانفرنس سینٹر (بی آئی سی سی) میں ایک بزنس کانفرنس کا اہتمام کیا۔ وہاں کل 31 تاجروں نے خطاب کیا۔ ان میں سے اکثر نے براہ راست کہا کہ وہ شیخ حسینہ کو دوبارہ وزیر اعظم چاہتے ہیں، بعض نے شیخ حسینہ کے حق میں نعرہ بھی لگائے۔

بنگلادیش فوج کے بریگیڈیئر جنرل 8 سال کے بعد رہا

ویب ڈیسک: سابق امیر غلام اعظم کے بیٹے اور بنگلادیش فوج کے بریگیڈیئر جنرل (معطل ) عبداللہ الامان اعظمی کو 8 سال کی اسیری کے بعد رہا۔

بنگلادیشی اخبار کے مطابق عبداللہ الامان اعظمی اور سپریم کورٹ کے وکیل احمد بن قاسم ارمان منگل کو علی الصبح اپنے اپنے گھروں کو پہنچ گئے، بنگلا دیش جماعت اسلامی نے اپنے تصدیق شدہ فیس بک پیج پر ایک پوسٹ کے ذریعے ان کی رہائی کی تصدیق کی۔

عبداللہ الامان اعظمی جماعت اسلامی کے سابق امیر  غلام اعظم کے بیٹے ہیں  جبکہ احمد بن قاسم ارمان پارٹی کی سینٹرل ایگزیکٹو کمیٹی کے رکن مرحوم میر قاسم علی کے بیٹے ہیں،وکیل احمد بن قاسم ارمان کو 9 اگست 2016 کو ڈھاکا میں میرپور کے علاقے میں واقع ان کی رہائش گاہ سے اور اسی سال 23 اگست میں بریگیڈیئر جنرل عبداللہ الامان اعظمی کو زبردستی اٹھایا گیا جس کے بعد سے وہ لاپتہ تھے۔

تازہ ترین پیشرفت میں کچھ سابق فوجیوں اور جبری گمشدگی کے متاثرین نے پیر کی رات ڈھاکا چھاؤنی کے قریب احتجاج بھی کیا اور مطالبہ کیا کہ مبینہ طور پر ’آئینہ گھر‘ کے اسیروں کو رہا کیا جائے،جماعت اسلامی نے بریگیڈیئر جنرل عبداللہ الامان اعظمی کی واپسی کی تصدیق کرتے ہوئے اپنی پوسٹ میں لکھا کہ اللہ جبری گمشدگی کے متاثرین کو ہمیں واپس ملوائے۔

واضح رہے کہ سابق بریگیڈیئر جنرل عبداللہ الامان اعظمی کو قانون نافذ کرنے والے اہلکاروں نے 1971 کی جنگ آزادی میں انسانیت کے خلاف جرائم کے الزام میں اٹھا لیا۔ ان دونوں افراد کا مقام شیخ حسینہ واجد کی حکومت کے تحت چلنے والی ایک خفیہ جیل ”آئینہ گھر“ بنی۔

”ڈیلی آبزرور بنگلہ دیش“ کی رپورٹ کے مطابق عبداللہ الامان اعظمی کو 8 سال تک بدترین حالات میں بغیر کسی مقدمے کے قید رکھا گیا، اور حسینہ واجد کی حکومت کا دھڑن تختہ ہونے کے بعد 6 اگست 2024 کو انہیں رہا کیا گیا۔

آئینہ گھر دراصل خوف کا گڑھ ہے، وہاں حراست میں رکھے گئے اور رہا کیے جانے والے لوگ مشکل سے ہی اس بارے میں بات کرتے ہیں کہ وہاں ان پر کیا گزری۔

عبوری حکومت کے نئے سربراہ کا آتے ہی پہلا بڑا بیان

ویب ڈیسک:بنگلہ دیش کی عبوری حکومت کے چیف ایڈوائزر نوبل انعام یافتہ ڈاکٹر محمد یونس نے بنگالی عوام کے لئے پیغام جاری کر دیاہے ۔

تفصیلات کے مطابق ڈاکٹر محمد یونس نے بنگالی عوام کے نام پیغام جاری کرتے ہوئے کہا کہ بہادر طلبا کو مبارکباد جنہوں نے ہمیں آزادی دلائی، تحریک کی حمایت کرنے پر بنگلا دیشی عوام کو بھی مبارکباد دیتا ہوں ، ہماری کوئی غلطی اس فتح کو نقصان نہ پہنچائے،  میری اپیل ہے کہ تباہی نہ پھیلائیں اور املاک کو نقصان نہ پہنچائیں۔

اس ملک کو اگلی نسل کے لیے بچانا ہماری ذمہ داری ہے، تشدد ہم سب کا دشمن ہے، اس دشمن سے دور رہیں، پر امن رہیں اور ملک کی ترقی میں اپنا حصہ ڈالیں۔

بنگلہ دیش کے آرمی چیف نے بیان جاری کرتے ہوئے کہاہے کہ بنگلہ دیش کی عبوری حکومت جمعرات کو حلف اٹھائے گی، جمعرات کی شام 8 بجے عبوری حکومت کی حلف برداری ہوگئی،عبوری حکومت کو فوج کی مکمل حمایت حاصل ہوگی، ایڈوائزری کونسل میں 15 ارکان ہوں گے۔

یاد رہے کہ 5 اگست کو ملک میں ہونے والے ہنگاموں اور مظاہروں میں شدت کے باعث حسینہ واجد نے عہدے سے استعفیٰ دیا اور بھارت فرار ہو گئیں ۔ 

بنگلہ دیش کے سابق انٹیلی جنس چیف ملک سے فرار ہوتے ہوئے گرفتار

ویب ڈیسک:بنگلہ دیش کے سابق انٹیلیجنس چیف میجر جنرل ضیاالاحسن کو ملک سے فرار ہوتے ہوئے گرفتار کرلیا گیا۔

بنگلہ دیش کی سابق وزیراعظم حسینہ واجد کے استعفیٰ دے کر ملک سے فرار ہونے کے بعد ان کی  جماعت عوامی لیگ سے تعلق رکھنے والے رہنماؤں اور ان حمایت یافتہ عہدیداروں کے ملک چھوڑنے کا سلسلہ بھی جاری ہے۔

بنگلہ دیش کے آرمی چیف نے بھی فوجی عہدیداران میں بڑے پیمانے پر اکھاڑ پچھاڑ کی ہے جس کے نتیجے میں میجر جنرل ضیاالاحسن کو بھی فوج میں ان کے عہدے سے ہٹا دیا گیا تھا۔

 بعدازاں انہیں منگل کی نصف شب کے قریب اس وقت حراست میں لے لیا گیا جب ان کے طیارے کو ڈھاکہ ایئرپورٹ کے رن وے سے بورڈنگ برج پر واپس لایا گیا،سابق انٹیلی جنس چیف کو طیارے سے اتار کر ڈھاکہ چھاؤنی لے جایا گیا۔

حضرت شاہ جلال انٹرنیشنل ایئرپورٹ کے ذرائع کے مطابق امارات ایئرلائن کی پرواز 585 کو رن وے سے واپس بورڈنگ برج پر ٹیکسی کرنے کی ہدایت کے بعد ضیاالاحسن کو گرفتار کیا گیا، مستعفی ہونے والی وزیر اعظم حسینہ کے قریبی ساتھی کے طور پر جانے جاتے ہیں۔

خالدہ ضیاء کا جیل سے رہائی کے بعد پہلا ویڈیو بیان آگیا

ویب ڈیسک: بنگلادیش کی سابق وزیراعظم اور شیخ حسینہ دور اقتدار کی اپوزیشن رہنما خالدہ ضیا نے جیل سے رہائی کے بعد پہلا بیان جاری کردیا۔

خالدہ ضیا نے اپنے ویڈیو پیغام میں بنگلادیشی عوام پر زور دیا کہ وہ ایسے جمہوری بنگلادیش کی تعمیر کریں جہاں تمام مذاہب کا وقار برابر ہو۔ 

انکا کہنا تھا کہ آپ موجودہ تمام تر صورتحال میں میری صحتیابی کےلیے دعا کرتے رہیں، میں اللّٰہ کے فضل و کرم سے آج آپ کے ساتھ بات کرنے کے قابل ہوں۔ ہم آج اس فاشسٹ حکومت سے آزادی حاصل کرنے کے قابل ہوئے ہیں۔ میں اس دوران جانوں کا نذرانہ پیش کرنے والوں کو خراج تحسین پیش کرتی ہوں۔

خالدہ ضیا کا کہنا تھا کہ ہمیں اس جیت کے بعد نیا بنگلادیش تعمیر کرنا ہے جہاں طلبہ و نوجوان ہماری امید ہوں۔ 

انہوں نے مذہبی اقلیتوں پر حملوں سے متعلق خبردار کرتے ہوئے کہا کہ ہمیں ایسے جمہوری بنگلادیش کی تعمیر کرنی ہے جہاں تمام مذاہب کی عزت ہو، نوجوان اور طلبہ ایسا ممکن بنائیں گے۔ 

سابق وزیراعظم نے کہا کہ ایسا بنگلادیش بنانا ہے جہاں امن، ترقی و خوشحالی ہو، جہاں بدلے کی آگ اور نفرت موجود نہ ہو۔

واضح رہے کہ کوٹہ سسٹم کے خلاف احتجاج کو طاقت سے کچلنے کی کوشش کرنے والی وزیراعظم شیخ حسینہ عہدے سے مستعفی ہونے کے بعد نئی دہلی فرار ہوگئیں۔

بنگلادیشی آرمی چیف نے ملک میں صدر سے مشاورت کے بعد عبوری حکومت کے قیام کا اعلان کیا تھا جبکہ صدر نے خالدہ ضیا اور دیگر اپوزیشن رہنماؤں کی رہائی کا حکم بھی دیا تھا۔

بنگلہ دیش والے حالات یہاں بھی ہوسکتے ہیں، سابق بھارتی وزیرخارجہ نے خبردار کردیا

ویب ڈیسک: کانگریس رہنما اور بھارت کے سابق وزیرخارجہ سلمان خورشید نے خبردار کیا ہے کہ بنگلہ دیش میں جو کچھ ہو رہا ہے وہ بھارت میں بھی ہو سکتا ہے۔ 

رپورٹ کے مطابق ایک تقریب سے خطاب کرتے ہوئے ان کا کہنا تھا کہ بنگلہ دیش میں نظر آنے والی بدامنی ممکنہ طور پر بھارت میں بھی ہو سکتی ہے۔ انہوں نے مشورہ دیا کہ ظاہری طور پر معمول کے مطابق ہونے کے باوجود بنیادی مسائل اسی طرح کے ہنگاموں کا باعث بن سکتے ہیں۔

وہ سابق مرکزی وزیر ماہر تعلیم مجیب الرحمان کی کتاب 'شکوہ ہند: دی پولیٹیکل فیوچر آف انڈین مسلمز' کے اجراء کے موقع پر بات کر رہے تھے۔

اس موقعے پر انہوں نے کہا کہ کشمیر میں سب کچھ نارمل نظر آ سکتا ہے۔ یہاں سب کچھ نارمل نظر آ سکتا ہے۔ ہو سکتا ہے ہم جیت کا جشن منا رہے ہوں، حالانکہ یقیناً کچھ لوگوں کا خیال ہے کہ 2024 کی فتح یا کامیابی شاید معمولی تھی، شاید ابھی بہت کچھ کرنے کی ضرورت ہے۔  بھارت کے سابق وزیر خارجہ نے کہا کہ جو بنگلہ دیش میں ہو رہا ہے وہ بھارت میں بھی ہو سکتا ہے۔

مقبوضہ کشمیر کے تین دفعہ وزیراعلی رہنے والے سیاسی رہنما شیخ فاروق عبداللہ نے کہا ہے کہ بھارت کو انتہائی محتاط رہنے کی ضرورت ہے۔ تمام آمروں کا یہی حال ہوگا۔

امید ہے کہ پڑوسی ملک اس بحران پر قابو پالے گا اور ہندوستان کے ساتھ خوشگوار تعلقات برقرار رکھے گا۔

فاروق عبداللہ نے مزید کہا کہ بنگلہ دیش میں کئی سالوں سے بدامنی ہے اور بے روزگاری اس کی ایک بڑی وجہ ہے۔ دوسری بات یہ کہ ملک کی معاشی حالت بھی بہت خراب تھی۔ یہ سب ایسی صورت حال کا باعث بنا جس کے نتیجے میں حکومت کا خاتمہ ہوا۔ انہوں نے کہا،تمام آمروں کو یاد رکھنا چاہیے کہ وہ انہی حالات کا سامنا کریں گے جس کا بنگلہ دیش کو سامنا کرنا پڑا۔

احتجاجی ملازمین نےبنگلہ دیشی مرکزی بینک کے گورنر سمیت دیگر سے جبری استعفیٰ لے لیا

ویب ڈیسک: (علی زیدی) شیخ حسینہ واجد کی حکومت گرنے کے بعد بنگلہ دیش کا مرکزی بنک انتہائی عدم استحکام کا شکار ہوگیا ہے۔ 

تفصیلات کے مطابق 4 ڈپٹی گورنرز اور مالیاتی انٹیلی جنس یونٹ کے سربراہ سے جبری استعفی لے لیا گیا ہے۔

یاد رہے کہ 200 ملازمین کے گروپ نے مرکزی بینک کے گورنر، 4 ڈپٹی گورنرز کے استعفے کا مطالبہ کیاتھا۔ احتجاجی ارکان نے تمام ڈپٹی گورنرز کو خالی کاغذات پر دستخط کرنے پر مجبور کیا۔

گروپ نےمشیروں اور مالیاتی انٹیلی جنس یونٹ کے سربراہ کا بھی استعفیٰ طلب کیا۔ احتجاج ملازمین نے دعویٰ کیا کہ بینک کے اعلیٰ افسران بینکنگ سیکٹر میں بے ضابطگیوں اور بدعنوانی کے ذمہ دار تھے۔

سپریم کورٹ بار کا ججز سے ایک ہفتے میں مستعفی ہونے کامطالبہ

ویب ڈیسک: (علی زیدی) بنگلہ دیش سپریم کورٹ بار ایسوسی ایشن کے صدر ایم محبوب الدین خاکون نے سپریم کورٹ کے ججز سے ایک ہفتے کے اندر مستعفی ہونے کا مطالبہ کردیا ہے۔ 

تفصیلات کے مطابق بنگلہ دیش کی سپریم کورٹ بار ایسوسی ایشن (ایس سی بی اے) کے صدر ایم محبوب الدین خاکون نے بھارت پر زور دیا ہے کہ وہ سابق وزیر اعظم شیخ حسینہ اور ان کی بہن شیخ ریحانہ کو گرفتار کرے۔ ڈھاکہ ٹریبیون کے ایک رپورٹ کے مطابق انہوں نے بھارتی حکومت سے شیخ حسینہ کو بنگلہ دیش واپس بھیجنے کو کہا ہے۔

ایس سی بی اے آڈیٹوریم میں منعقدہ ایک پریس کانفرنس میں خاکون نے کہا کہ ہم بھارت کے لوگوں کے ساتھ مثبت تعلقات برقرار رکھنا چاہتے ہیں۔ شیخ حسینہ اور شیخ ریحانہ کو گرفتار کر کے بنگلہ دیش واپس بھیج دیں۔ 

انہوں نے بنگلہ دیش میں ہونے والی کئی اموات کا ذمہ دار حسینہ کو ٹھہرایا۔ انہوں نے کہا کہ شیخ حسینہ نے بنگلہ دیش میں کئی لوگوں کو قتل کیا ہے۔ کانفرنس میں بی این پی کے حامی وکلاء بھی موجود تھے۔

خاکون جو بنگلہ دیش نیشنلسٹ پارٹی (بی این پی) کے جوائنٹ جنرل سیکریٹری بھی ہیں۔ اپنی پریس کانفرنس کے دوران انہوں نے ملک میں نافذ ایمرجنسی کے اعلان کو ختم کرنے کے ساتھ ساتھ سیاسی سرگرمیوں اور کرپشن میں ملوث سپریم کورٹ کے ججوں سے ایک ہفتے میں مستعفی ہونے کا بھی مطالبہ کیا۔

انہوں نے ریاستی لاء افسران کے استعفیٰ کا مطالبہ بھی کیا۔ ان میں اٹارنی جنرل اے ایم امین الدین، اور انسداد بدعنوانی کمیشن (اے سی سی) اور نیشنل ہیومن رائٹس کمیشن (این ایچ آر سی) کے سربراہان اور اہلکار شامل ہیں، کیونکہ ان کا تقرر حسینہ کی قیادت میں کیا گیا تھا۔ مزید برآں خاکون نے سیاسی قیدیوں کی رہائی کا مطالبہ کیا۔

بنگلا دیش اور بھارت کےسرحدی علاقوں میں کرفیو نافذ،حالات کشیدہ

ویب ڈیسک: بنگلادیش میں شیخ حسینہ واجد کی صورت میں اپنے اہم اثاثے کو کھونے کے بعد بھارت میں اوپر سے نیچے تک کھلبلی مچی ہوئی ہے۔

تفصیلا ت کے مطابق بھارت کی بنگلا دیش کےساتھ 4,096 کلومیٹر طویل سرحد ہے، 5بھارتی ریاستوں کی سرحد بنگلادیش کے ساتھ لگتی ہے اورحکومتی اعداد و شمار کے مطابق تقریباً 915.35 کلومیٹر سرحد پر باڑ نہیں ہے۔

بھارت کی بارڈر سیکورٹی فورس اس وقت ہائی الرٹ پرہے،مشرقی ریاست ویسٹ بنگال کی بنگلا دیش سے جُڑی سرحد اور وہاں کے سرحدی علاقوں کی صورتحال اس وقت نہایت کشیدہ ہے۔

بھارتی حکومت کی طرف سےسخت ہدایات موصول ہوئی ہیں کہ کسی کو بھی درست دستاویزات کے بغیرملک میں داخل ہونےکی اجازت نہ دی جائے۔

سرحد پرپیٹرا پول لینڈ پورٹ کےذریعے سامان کی نقل وحرکت بھی روک دی گئی ہے، سینکڑوں بھارتی ٹرک بنگلا دیش میں پھنسے ہوئے ہیں، اس کےعلاوہ، بھارتی ریاست میگھالیہ نےبھارت بنگلا دیش سرحد کے ساتھ ریاست میں رات کا کرفیونافذ کردیا ہے۔

بھارتی میڈیا کی رپورٹ کے مطابق، بارڈر سکیورٹی فورس (بی ایس ایف) کے مشورے سے ریاست میگھالیہ کی بنگلا دیش سے متصل سرحد پر 200 میٹر کے اندر موجود تمام علاقوں میں شام 6 بجے سے صبح 6 بجے تک کرفیو نافذ کیا گیا ہے۔

بھارت اور بنگلادیش کے درمیان ریلوے بھی جولائی کے وسط سے غیر معینہ مدت کے لیے معطل ہے۔

شیخ حسینہ کی پارٹی تیزی سے عوام میں غیر مقبول ہوتی جا رہی تھی، جمہوری ادارے ختم ہوتے جارہے تھے اور حکومت سے عوام کی نفرت بڑھتی جا رہی تھی۔ 

بھارت شیخ حسینہ کا سب سے بڑا حمایتی تھا اسی لیے وہاں کی عوام بھارت سے بھی اتنی ہی نفرت کرنے لگی۔اس نفرت کے اثرات اب بھارت پر ظاہر ہونے شروع ہوگئے ہیں۔

بیرون ملک فرار کی کوشش، ڈھاکہ ایئرپورٹ سے وزیرخارجہ حسن محمود گرفتار

ویب ڈیسک: بنگلہ دیش کے مقامی میڈیا کے مطابق سابق وزیرِ اعظم شیخ حسینہ کی کابینہ میں وزیرِ خارجہ رہنے والے حسن محمود کو مبینہ طور پر ڈھاکہ ایئرپورٹ سے بیرون ملک جانے سے روک کر حراست میں لے لیا گیا ہے۔

رپورٹ کے مطابق سابق وزیرِخارجہ منگل کی شام کو دبئی کے لیے پرواز پر سوار ہونے والے تھے مگر اس سے پہلے ہی انہیں روک دیا گیا۔

اس سے قبل سابق وزیرِ تعلیم محب الحسن چودھری، بلدیات کے وزیر تازالاسلام، سابق وزیرِخزانہ ابوالحسن محمود علی، وزیرِ کھیل نظم الحسن پاپون اور ڈھاکہ کے میئر شیخ فضلِ نور کے بیرونِ ملک جانے کی اطلاعات بھی سامنے آئی تھیں۔

ڈھاکہ ایئرپورٹ حکام کے حوالے سے مقامی میڈیا کا کہنا ہے کہ سول ایوی ایشن اتھارٹی نے عوامی لیگ کی طلباء تنظیم بنگلہ دیش چھاتر لیگ کے دو عہدے داروں کو بھی حراست میں لیا ہے۔

اس سے قبل آئی ٹی کے وزیر جنید پلک کو بھی ڈھاکہ ایئرپورٹ سے ان کے دو معاونین سمیت نیپال جانے سے روک دیا گیا تھا۔ میڈیا کے مطابق ایوی ایشن حکام نے حراست میں لیے گئے افراد کو فوج کے حوالے کردیا ہے۔

"شیخ حسینہ واجد کو فوج کی حمایت کھو دینے کا واضح پیغام دیا گیا"

ویب ڈیسک: (علی زیدی) بنگلادیشی فوجی اہلکار نے کہا ہے کہ شیخ حسینہ واجد کیلئے پیغام واضح تھا اب ان کو فوج کی حمایت حاصل نہیں رہی۔

غیرملکی خبر ایجنسی نے بنگلادیش کی فوج کے حاضر اور ریٹائرڈ افسران سے بات چیت کی ہے۔

بنگلادیش کے ایک فوجی اہلکار نے کہا ہے کہ آرمی چیف اور فوجی افسران نے شیخ حسینہ کے ملک چھوڑنے سے ایک دن قبل میٹنگ کی، فوج نے طلبہ احتجاج کو دبانے کیلئے طاقت کے استعمال سے انکار کردیا تھا۔

بنگلادیشی فوجی اہلکار نے بتایا کہ مظاہروں کے پھیلنے اور زیادہ اموات نے فوج کیلئے شیخ حسینہ کی حمایت کو مشکل بنایا۔

بنگلادیشی فوج کے ریٹائرڈ بریگیڈیئر نے کہا کہ فوجیوں کے اندر بہت بے چینی تھی۔

سابق فوجی افسران کا کہنا ہے کہ شیخ حسینہ کو محفوظ راستہ نہیں دیا جانا چاہیے تھا، یہ ایک حماقت ہے۔

غیرملکی خبر ایجنسی کے مطابق بنگلادیش میں حکومت مخالف مظاہروں میں سابق سینئر فوجی افسران نے بھی شرکت کی تھی اور شیخ حسینہ کے ملک چھوڑنے پر موجودہ اور سابق بنگلادیشی فوجی افسران ناراض ہیں۔

دوسری جانب بھارتی عہدیدار کا کہنا ہے کہ شیخ حسینہ کو سفارتی طور پر کہا گیا تھا کہ ان کا بھارت میں قیام عارضی ہونا چاہیے، شیخ حسینہ کے قیام سے بھارت کے اگلی بنگلادیشی حکومت سے تعلقات میں خرابی کا خطرہ ہے۔

لندن میں مقیم خالدہ ضیاء کےبیٹے کا آج وطن واپسی کا فیصلہ

ویب ڈیسک: (علی زیدی) بنگلہ دیش کی سابق وزیراعظم بیگم خالدہ ضیا کے بیٹے طارق رحمان آج وطن واپس لوٹ رہے ہیں۔

تفصیلات کے مطابق طارق رحمان کئی سالوں سے لندن میں مقیم ہیں اور بنگلہ دیش کی موجودہ صورت حال میں انہوں نے وطن واپسی کا فیصلہ کیا ہے۔ 

بتایا جا رہا ہے کہ آج شام وہ ڈھاکہ میں ایک ریلی سے خطاب بھی کریں گے۔

طارق رحمان کو عمر قید کی سزا:

بنگلا دیشی عدالت نے اپوزیشن جماعت بنگلا دیش نیشنلسٹ پارٹی کے قائم مقام سربراہ اور سابق وزیر اعظم خالدہ ضیا کے بیٹے طارق رحمن کو 2004 ء میں ملک کی وزیر اعظم شیخ حسینہ واجد پر ہونے والے گرنیڈ حملے کے الزام میں عمر قید کی سزا سنائی تھی۔ 

اس حملے میں شیخ حسینہ واجد زخمی اور دیگر 20 افراد جاں بحق ہو گئے تھے جن میں بنگلا دیش کے ایک سابق صدر کی اہلیہ بھی شامل تھیں۔ حملے میں ملوث ہونے کے الزام میں کل 49 افراد کے خلاف مقدمہ چلایا گیا جس کی سماعت مکمل ہونے پر طارق رحمن کو عمر قید اور ان کے دیگر 19 ساتھیوں جن میں 2سابق وزراء بھی شامل ہیں کو 2018 میں سزاسنائی گئی تھی۔

طارق رحمن2008ء میں بیرون ملک چلے جانے کے بعد سے اب تک لندن میں خود ساختہ جلاوطنی کی زندگی گزار رہے ہیں۔

انگلینڈ اور نہ ہی امریکا: شیخ حسینہ کس یورپی ملک جائیں گی؟ نام سامنے آگیا

ویب ڈیسک: (علی زیدی) سابق وزیراعظم شیخ حسینہ آئندہ 48 گھنٹوں میں یورپ جا سکتی ہیں۔ تاہم وہ یورپ کے کس ملک جائیں گی اس بارے میں کوئی صحیح معلومات سامنے نہیں آئی ہیں۔

تفصیلات کے مطابق اس سے قبل ان کے لندن جانے کی باتیں ہو رہی تھیں لیکن برطانیہ نے انہیں اپنے ملک آنے کی اجازت نہیں دی۔ دریں اثنا، امریکا نے بھی ان کا ویزا منسوخ کر دیا ہے۔

اس کے علاوہ دیگر ممالک سے بھی بات چیت جاری ہے۔ یہ بحث بھی ہے کہ وہ روس میں بھی پناہ لے سکتی ہیں۔

شیخ حسینہ کے بحفاظت باہر نکلنے کے لیے تمام انتظامات کیے جا رہے ہیں۔ پیر کی شام  بھارت پہنچننے والی حسینہ فن لینڈ اور روس جیسے کچھ ممالک سے بات کر رہی ہیں۔ 

بھارت ان کے اگلے بیرون ملک سفر پر ان کے محفوظ سفر کے انتظامات بھی کرے گا۔  کیونکہ بنگلہ دیشی ائیر فورس کا سی 130 طیارہ واپس ڈھاکا جا چکا ہے اس سے پہلے انہوں نے لندن جانے کا فیصلہ کیا تھا۔

یہ بھی معلوم ہوا ہے کہ حسینہ کے خاندان کے افراد فن لینڈ میں ہیں اور اسی وجہ سے انہوں نے شمالی یورپ جانے پر بھی غور کیا ہے۔

ایسی  بھی خبریں ہیں کہ شیخ حسینہ یو اے ای اور سعودی عرب جیسے ممالک میں پناہ لینے کا راستہ تلاش کر رہی ہیں۔

بنگلاد یش میں 13 سال بعد جماعت اسلامی کا دفتر بھی کھل گیا

ویب ڈیسک:بنگلاد یش کی بڑی مذہبی سیاسی پارٹی جماعت اسلامی کا دفتر 13 سال بعد کھول دیا گیا۔

بنگلا دیشی عوام کے احتجاج کے آگے پسپا ہو کر حسینہ واجد کو ملک چھوڑنا پڑا ان کا مظاہرین کے لیے بولا گیا ایک لفظ ان کے 16 سالہ اقتدار کے خاتمے کا سبب بنا،بنگلا دیش کے طلبہ اور عوام ایک ماہ سے کوٹا سسٹم کے خلاف سراپا احتجاج تھے جو بعد ازاں حسینہ حکومت کے جابرانہ اور آمرانہ رویے کے سبب سول نا فرمانی اور حسینہ واجد ہٹاؤ تحریک میں تبدیل ہوگیا۔

بھارت نواز حسینہ واجد کے ملک سے انڈیا فرار ہونے کے بعد عوام نے جماعت اسلامی کے دفاتر کو کھولنا شروع کر دیا ہے،تیرہ سال سے بند جماعت اسلامی کا دفتر کھلنے پر کارکنان اور دیگر رہنما جمع ہوگئے۔ امیرجماعتِ اسلامی بنگلادیش ڈاکٹرشفیق الرحمان نے سب کا خیرمقدم کیا۔

غیرملکی میڈیا کےمطابق جماعت اسلامی کے رہنما بیرسٹراحمد بن قاسم کوبھی آٹھ سال بعد رہا کر دیا گیا ہے۔  بیرسٹر احمد کےبارے میں کسی کو زندہ ہونے کا یقین نہیں تھا اوران کی نماز جنازہ بھی پڑھا دی گئی تھی۔ احمد بن قاسم سزائےموت پانے والے بنگلادیش کے سب سے بڑے نجی بینک کے صدر میرقاسم علی کے صاحبزادے ہیں۔

بنگلادیش؛ ویرات کوہلی بھی مظاہرین میں شامل؟ ویڈیو نے دھوم مچا دی

ویب ڈیسک: بنگلہ دیش میں شیخ حسینہ واجد کی حکومت کا تختہ اُلٹ چکا ہے، ملک بھر میں طلبا تحریک نے کامیابی حاصل کرنے پر جشن منایا اور حکومت کے خلاف بھرپور نعرے بازی کی، سوشل میڈیا پر ایک ویڈیو کافی وائرل ہورہی جس میں ویرات کوہلی کا ہمشکل احتجاج کررہا ہے ۔

تفصیلات کے مطابق سوشل میڈیا پر وائرل ہونے والی ویڈیو میں دیکھا جاسکتا ہےکہ ویرات کوہلی کے ہم شکل ایک شخص کو بنگلادیشی نوجوانوں نے کندھے پر اٹھایا ہوا ہے اور وہ بھرپور جوش وخروش سے نعرے لگا رہا ہے،ویرات کوہلی کے ہم شکل شخص نے انڈین پریمیئر لیگ کی فرنچائز  رائل چیلنجز بنگلورو کی کیپ پہنی ہوئی ہے۔

پہلی نظر میں ایسا معلوم ہوتا ہےکہ یہ بھارتی کرکٹر ویرات کوہلی ہی ہیں جو بنگلادیشی مظاہرین سے اظہار یکجہتی کے لیے احتجاج میں شامل ہوگئے ہیں۔

بھارتی میڈیا کے مطابق مذکورہ ویڈیو 5 اگست کی ہے جب حسینہ واجد کی جانب سے مستعفی ہونے اور بھارت فرار ہونے کی خبر سامنے آئی تھی جس کے بعد بنگلادیشی عوام کی بڑی تعداد سڑکوں پر جشن منانے کے لیے نکل آئی تھی،ویڈیوکی سوشل میڈیا پر دھوم مچی ہوئی ہے اور  صارفین اس حوالے سے دلچسپ تبصرے کر رہے ہیں۔

شیخ حسینہ واجد کی بیٹی کہاں؟ سنسنی خیزخبر آگئی

ویب ڈیسک: بنگلہ دیش میں جاری بدامنی کے درمیان، سابق وزیر اعظم شیخ حسینہ نے پیر کو اپنے عہدے سے استعفیٰ دے دیا اور فوجی ہیلی کاپٹر میں ملک سے فرار ہو گئیں، ان کی بیٹی کے بارے کافی قیاس آرائیاں ہورہی ہیں کہ وہ کہاں تھیں؟

تفصیلات کے مطابق گزشتہ روز وزیراعظم کے عہدے سےمستعفیٰ ہونے والی سابق بنگلہ دیش منسٹر شیخ حسینہ واجد اپنی بہن کے ساتھ تقریباً 5 بج کر 35 منٹ پربھارت کی ہندون ائیر بیس پر پہنچی، جہاں اطلاعات کے مطابق بھارتی فضائیہ کے حکام نے ان کا استقبال کیا، لیکن ان کی بیٹی صائمہ واجد کے ٹھکانے کے بارے میں کافی قیاس آرائیاں کی جا رہی ہیں جو  بھارتی دارالحکومت نئی دہلی میں مقیم تھیں۔

صائمہ واجد کون ہیں؟
صائمہ وازد عالمی ادارہ صحت (ڈبلیو ایچ او) کے لیے جنوب مشرقی ایشیا میں ریجنل ڈائریکٹر ہیں،تعلیم کے لحاظ سے وہ ایک ماہر نفسیات ہیں جنہوں نے دماغی امراض کے میدان میں اہم خدمات انجام دی ہیں۔

سال 2012 سے وہ بنگلہ دیش کی نیشنل ایڈوائزری کمیٹی برائے نیورو ڈیولپمنٹل ڈس آرڈرز کی سربراہی کر رہی ہیں،صائمہ واجد ڈبلیو ایچ او میں دماغی صحت کی آگاہی، خاص طور پر آٹزم اور نیورو ڈیولپمنٹل عوارض سے متعلق ذمہ داریاں نبھاتی ہیں۔

انہیں ڈبلیو ایچ او کی ریجنل کمیٹی کے 76ویں اجلاس کے دوران ڈبلیو ایچ او کے عہدے کے لیے نامزد کیا گیا تھا، جس میں انہوں نے نیپال کے شمبھو اچاریہ کے خلاف کامیابی حاصل کی تھی۔

صائمہ واجد کی نامزدگی باضابطہ طور پر جنوری 2024 میں ڈبلیو ایچ او کے ایگزیکٹو بورڈ میں جمع کرائی گئی تھی اور یکم فروری 2024 سے ان کے عہدے کی مدت شروع ہوئی تھی،وہ برطانیہ، امریکہ، کینیڈا، اور متحدہ عرب امارات سمیت کئی ممالک میں رہ چکی ہیں اور کام بھی کر چکی ہیں۔

ڈبلیو ایچ او کے لیے صائمہ واجد کا وژن وبائی امراض سے نمٹنے کی تیاری کو بڑھانے اور رکن ممالک میں دماغی صحت کی خدمات کو فروغ دینے پر مرکوز ہے، جو خطے میں صحت عامہ کے چیلنجوں سے نمٹنے کے لیے اس کے عزم پر زور دیتا ہے،صائمہ واجد  نے اپنے بچپن کا کچھ حصہ بھارت میں ایک پناہ گزین کے طور پر گزارا۔

بنگلہ دیش:  مظاہرین کے حملے، پولیس کا کام کرنے سے انکار، ہڑتال پر چلی گئی

(ویب ڈیسک )  بنگلہ دیش میں  مظاہرین کی جانب سے حملوں کے بعد  پولیس نے کام کرنے سے انکار کردیا اور ہڑتال پر چلی گئی۔

غیر ملکی خبر ایجنسی کا کہنا ہے کہ  گزشتہ روز شیخ حسینہ واجد کے استعفے کے بعد  مظاہروں میں 450 سے زائد پولیس تھانوں پر حملے ہوئے اور متعدد  تھانوں کو آگ لگائی گئی،اس دوران ایک پولیس اہکار بھی ہلاک ہوا ہے۔

بنگلادیش پولیس سروس ایسوسی ایشن  کی جانب سے کہا گیا ہے کہ  جب تک ہمارے تمام اہلکاروں کی سکیورٹی یقینی نہیں بنائی جاتی تب تک ہم ہڑتال پر رہیں گے۔ 

ایڈیشنل ڈی آئی جی پولیس بنگلادیش سہیل رانا   نے عوام لو پولیس پر حملے نہ کرنے کی اپیل کی ہے اور کہا ہے کہ  مسئلہ پولیس فورس میں نہیں بلکہ لیڈرشپ میں ہے۔مظاہروں کے دوران طلبہ اور عام شہریوں کو ہلاک کرنے والے ملزمان کو گرفتار کیا جائے گا اور ان کے خلاف قانونی کارروائی ہوگی۔ 

مقامی میڈیا کے مطابق  پولیس آج ڈھاکا کی سڑکوں سے غائب ہے اور ٹریفک پولیس کی جگہ بھی طلبہ نے ٹریفک کی صورتحال سنبھالنے کے فرائض انجام دیے۔

شیخ حسینہ کیخلاف مہم کی قیادت کرنیوالا طالبعلم ناہید اسلام کون ہے؟

ویب ڈیسک:بنگلہ دیش میں ملازمتوں میں کوٹہ کے خلاف طلبہ کا احتجاج ایک ماہ سے زیادہ عرصے تک جاری رہا، جس کے نتیجے میں شیخ حسینہ واجد کو اقتدار چھوڑنا پڑا،اب ہر کوئی یہ جاننا چاہتا ہے کہ شیخ حسینہ واجد کی حکومت کے خاتمے میں طلبہ  تحریک کی قیادت کرنے والا طالبعلم رہنما ناہید اسلام کون ہے؟

تفصیلات کے مطابق بنگلہ دیش میں مسلسل 15 سال تک حکمرانی کرنے والی شیخ حسینہ واجد طلبہ تحریک کے نتیجے میں استعفیٰ دے کر بھارت پہنچ گئیں، جبکہ احتجاجی طلبا کے پرزور مطالبے پر بنگلہ دیشی صدر نے پارلیمنٹ بھی تحلیل کردی ہے،اور فوج نے ملک کا نظام سنبھال لیا۔ جاری مظاہروں میں تقریباً 300 افراد جان کی بازی بھی ہارگئے۔

بنگلہ دیش کی وزیراعظم کی حکومت کا خاتمہ کرنے کےلئے طلبہ کے بھرپور تحریک چلائی، اس تحریک کو لیڈ کرنے والا طالب علم ناہید اسلام کون ہے؟ اس کے بارے جاننے کے لئے تقریباً ہر کوبے چین ہے، مظاہروں کے دوران سوشل میڈیا پر ناہیداسلام کی متعدد ویڈیوز بھی وائرل ہورہی ہے۔

غیرملکی میڈیا رپورٹس کے مطابق 26 سالہ ناہید اسلام ڈھاکا یونیورسٹی میں سوشیالوجی ڈیپارٹمنٹ کے طالبعلم ہیں،اور وہ انسانی حقوق کے لیے کام کرنے کی وجہ سے مشہور ہیں،ناہید اسلام نے شیخ حسینہ واجد کی حکومت کے خلاف آواز اٹھائی تو انہیں دہشتگرد قرار دے دیا گیا تھا۔

ناہید اسلام سرکاری ملازمتوں میں کوٹے کے خلاف طلبا تحریک کے کوآرڈینیٹر تھے، جو شیخ حسینہ واجد کو اقتدار سے بے دخل کرنے میں تبدیل ہوگئی،ناہید اسلام حکومت مخالف اس تحریک کے دوران اس وقت زیادہ مشہور ہوگئے جب گزشتہ ماہ انہیں ڈھاکا یونیورسٹی کے کچھ دیگر دوستوں کے ساتھ حراست میں لیا گیا تھا۔

ناہید اسلام نے اپنے ایک سوشل میڈیا پیغام میں کہا کہ طلبا فوج کی زیرقیادت یا حمایت یافتہ کسی بھی حکومت کو قبول نہیں کریں گے، ہم شہیدوں کے خون کے ساتھ غداری نہیں کرسکتے،اپنے وعدے کے مطابق ایک نیا جمہوری بنگلہ دیش ضرور بنائیں گے۔

ناہید اسلام 1998 میں ڈھاکا میں پیدا ہوئے اور شادی شدہ ہیں، ان کا ایک چھوٹا بھائی بھی ہے، جس نام نقیب ہے، جبکہ ان کے والد استاد اور والدہ گھریلو خاتون ہیں۔

واضح رہے کہ اس وقت بنگلہ دیش کا نظام فوج نے سنبھالا ہوا ہے تاہم طلبا نے عبوری حکومت کے لیے نوبیل انعام یافتہ ڈاکٹر یونس کا نام تجویز کیا ہے، جبکہ ڈاکٹر یونس نے بھی عبوری حکومت کی سربراہی کے لیے حامی بھر لی ہے۔

حسینہ واجد کے اثاثے کتنے اور کن ممالک میں جائیداد؟ جان کر حیران رہ جائیں گے

(ویب ڈیسک ) 15سال مسلسل اقتدار میں رہنے والی شیخ حسینہ کن اثاثوں کی مالک ہیں آ پ یہ جان کر حیران رہ جائیں گے۔

گزشتہ روز  بنگلا دیش میں سب سے طویل عرصے تک وزیرا‏عظم رہنے والی شیخ حسینہ واجد استعفیٰ دیکر بھارت فرار ہوگئیں تھی۔وہ   بنگلادیش کے پہلے صدر شیخ مجیب الرحمان کی صاحبزادی ہیں۔

 حسینہ واجد 2009 سے مسلسل اقتدار میں تھیں، وہ رواں سال جنوری میں چوتھی بار وزیراعظم منتخب ہوئيں لیکن بنگلا دیش کے آخری انتخابی عمل میں اپوزيشن کا مکمل بائيکاٹ رہا۔

 حسینہ واجد کن اثاثوں کی مالک ہیں؟

میڈیا رپورٹس کے مطابق  حسینہ واجد کی  سالانہ تنخواہ تقریباً 13 لاکھ ٹکا سے زائد تھی۔  بنگلادیش کے الیکشن کمیشن میں جمع کروائی گئی اثاثوں کی تفصیلات کے مطابق شیخ حسینہ 6 کروڑ ٹکے سے زائد کی مجموعی دولت کی مالک ہیں۔

بھارتی میڈیا رپورٹس میں کہا گیا ہے کہ  شیخ حسینہ واجد 6 ایکڑ زرعی اراضی کی بھی مالک ہیں اور وہ فش فارم سے حاصل ہونے والی آمدنی سے بھی فائدہ اٹھاتی ہیں۔اس کے علاوہ  ان کے پاس ایک مہنگی گاڑی بھی ہے  جو انہیں تحفے میں ملی تھی۔

بھارتی ایسٹس میگزین کی رپورٹ  میں کہا گیا ہے کہ  شیخ حسینہ بنگلا دیش میں کئی جائیدادوں کی مالک ہیں، جن میں ان کا فیملی مینشن بھی شامل ہیں ۔

علاوہ ازیں ان کی بیرون ملک جائیدادیں ہونے کی بھی اطلاعات ہیں ۔رپورٹس کے مطابق حسینہ واجد کے   سنگاپور میں گھر ، رہائشی پلاٹ اور ولا بھی ہیں۔

بھارت نے بنگلہ دیش کی فوجی قیادت سے رابطہ کرلیا

ویب ڈیسک: بھارتی میڈیا کی رپورٹ کے مطابق بھارت نے بنگلادیش کی فوجی قیادت سے رابطہ کرکے ملک میں امن و امان اور معمولات زندگی جلد از جلد بحال کرنے کی درخواست کی ہے۔

بھارت کے اعلیٰ حکومتی ذرائع کے حوالے سے رپورٹ میں کہا گیا ہے کہ مودی سرکار بنگلادیشی آرمی چیف وقار الزمان سے رابطے میں ہے اور شیخ حسینہ کے استعفیٰ کے بعد ملک میں حالات معمول پر لانے میں مدد کےلیے آمادگی ظاہر کر چکی ہے۔

رپورٹ میں یہ بھی کہا گیا ہے کہ شیخ حسینہ کے ساتھ بھارت میں مہمان جیسا سلوک کیا جا رہا ہے۔

شیخ حسینہ نے گزشتہ روز ہنڈن ایئر بیس پر بھارتی قومی سلامتی کے مشیر اجیت ڈوول سے ملاقات بھی کی تھی۔

بنگلہ دیشی آرمی میں اکھاڑ پچھاڑ، انٹیلیجنس چیف ملازمت سے برطرف

ویب ڈیسک: بنگلادیش کی فوج میں بڑے پیمانے پر تقرر و تبادلے کردیے گئے۔

بنگلادیش کے انٹرسروسز پبلک ریلیشنز (آئی ایس پی آر) کی جانب سے جاری اعلامیے میں بتایا گیا ہے کہ میجر جنرل ضیاء الاحسن کو ملازمت سے برطرف کردیا گیا ہے۔ 

میجر جنرل ضیاء الاحسن ملکی انٹیلی جنس ایجنسی نیشنل ٹیلی کمیونیکیشن مانیٹرنگ سینٹر (این ٹی ایم سی) کے ڈائریکٹر جنرل تھے اور یہ ایجنسی وزارت داخلہ کے ماتحت ہے۔

اس ایجنسی کے ذمہ ملکی صورتحال پر نظر رکھنا، اعدادو شمار جمع کرنا اور کمیونیکیشن مواد کی ریکارڈنگ شامل تھا۔ اس کے علاوہ اس ایجنسی کو ای میلز اور سوشل میڈیا اکاؤنٹس کی نگرانی اور فون کالز ریکارڈنگ بھی کرنے کی اجازت ہے۔

بنگلا دیشی آئی ایس پی آر کے مطابق لیفٹیننٹ جنرل سیف العالم کو وزارت خارجہ کا قلمدان دیا گیا ہے، اس کے علاوہ لیفٹیننٹ جنرل مجیب الرحمان جی او سی آرمی ٹریننگ اور ڈاکٹرائن کمانڈ ہوں گے۔ بنگلادیشی فوج کے شعبہ تعلقات عامہ نے بتایاکہ میجر جنرل  ضیاء الاحسن کی جگہ میجر جنرل ردوان الرحمان ڈی جی این ٹی ایم سی ہوں گے۔

خیال رہے کہ گزشتہ روز طلبہ کے احتجاج پر حسینہ واجد اقتدار چھوڑ کر فوجی ہیلی کاپٹر میں بھارت فرار ہوگئی تھیں جس کےبعد آرمی چیف نے عبوری حکومت بنانے کا اعلان کیا تھا۔

گزشتہ روز کے صدارتی احکامات پر اپوزیشن لیڈر خالدہ ضيا کو آج جیل سے رہاکردیا گيا تاہم بنگلادیش میں نظام زندگی مفلوج ہے۔

امریکا نے شیخ حسینہ واجد کا ویزا منسوخ کردیا

ویب ڈیسک: امریکا نے بنگلادیش کی سابق وزیراعظم شیخ حسینہ کا ویزا منسوخ کردیا۔

بھارتی میڈیا نے بنگلادیشی ذرائع کے حوالے سے رپورٹ کیا ہے کہ امریکا نے شیخ حسینہ کا ویزا منسوخ کردیا ہے۔

میڈیا رپورٹس کے مطابق اس وقت شیخ حسینہ بھارت میں موجود ہیں اور افواہیں گردش کر رہی ہیں کہ وہ برطانیہ میں سیاسی پناہ لینا چاہتی ہیں۔

واضح رہے کہ بنگلادیشی وزیراعظم حسینہ واجد ایک ماہ سے جاری عوامی احتجاج کے بعد گزشتہ روز ملک سے فرار ہوگئی تھیں جس کے بعد فوج نے اقتدار سنبھالتے ہی عبوری حکومت بنانے کا اعلان کردیا تھا۔

حسینہ واجد کےمستعفیٰ ہونے کے چند منٹ پہلے بنگلہ دیش میں‌ کیاہوا؟

ویب ڈیسک: بنگلہ دیشی عوامی احتجاج اور فوج کے دباؤ کے بعد وزارت عظمیٰ کے منصب سے مستعفی ہونے والی شیخ حسینہ کے آخری 45 منٹ میں کئی اہم واقعات رونما ہوئے۔

بنگلہ دیش کی مستعفی وزیراعظم جو شدید عوامی احتجاج اور فوج کے دباؤ کے بعد اپنا ملک چھوڑ کر بہن کے ہمراہ بھارت فرار ہوچکی ہیں۔ بنگلہ دیشی آرمی چیف نے انہیں گزشتہ روز 45 منٹ میں اقتدار اور ملک چھوڑنے کا حکم دیا تھا۔ ان 45 منٹوں میں وہاں کیا کچھ ہوا وہ چشم کشا ہے۔

بھارتی میڈیا کے مطابق بڑھتے عوامی احتجاج اور فوج کی جانب سے عوام کی مکمل حمایت کے اعلان کے بعد شیخ حسینہ واجد نے مستعفی ہونے کا فیصلہ کر لیا تھا اور وہ ملک چھوڑنے سے قبل بنگلہ دیشی قوم کو قوم کو ویڈیو پیغام دینا چاہتی تھیں لیکن فوج نے اس کی بھی اجازت نہیں دی۔ انہوں نے اپنا ایک پیغام خط کی صورت میں لکھا تھا، لیکن فوجی اہلکاروں نے انہیں خط پڑھنے اور ویڈیو بنانے کی اجازت نہیں دی۔

 آرمی چیف جنرل وقار الزمان نے انہیں اقتدار کے ساتھ ملک چھوڑنے کے لیے صرف 45 منٹ کا وقت دیا تھا, سابق بنگلہ دیشی وزیراعظم کا خاندان پہلے ہی ملک سے باہر جا چکا تھا۔

بھارتی میڈیا نے اپنی رپورٹ میں یہ بھی دعویٰ کیا ہے کہ پیر 5 اگست کی صبح 9 بجے تک بنگلہ دیش میں صورتحال بہت زیادہ خراب نہیں تھی، لیکن اس کے بعد ہزاروں احتجاجی طلبا کا ایک گروپ غازی پور بارڈر سے لانگ مارچ میں ڈھاکا میں داخل ہوا، جس کے بعد جب حالات خراب ہونے لگے۔

رپورٹ میں یہ دعویٰ بھی کیا گیا ہے کہ بنگلہ دیشی فوج میں دو دھڑے بن چکے تھے، فوج کے اعلیٰ افسران شیخ حسینہ کے حق میں تھے، لیکن جونیئر فوجی افسران اور 60 ریٹائرڈ فوجی افسران شیخ حسینہ کے خلاف تھے۔

 گزشتہ روز دوپہر ایک بجے کے قریب فوج کی قومی سلامتی کونسل کا اجلاس بھی ہوا، جس کے بعد وہ فیصلہ ہوا جس کا آرمی چیف نے اعلان کیا اور حسینہ واجد کو ملک چھوڑنے کے لیے 45 منٹ کا وقت دیا تھا۔

اس ملاقات کے بعد بنگلہ دیش کی فوج نے شیخ حسینہ کو مطلع کیا کہ طلبا کے لانگ مارچ کے دوران انہیں فوج نہیں روکے گی، ایسے میں کل یعنی پانچ اگست کی صبح نو بجے تک صورتحال ٹھیک تھی۔

واضح رہے کہ شیخ حسینہ واجد اقتدار کے خاتمے کے بعد اپنی بہن ریحانہ کے ہمراہ بھارت فرار ہوچکی ہیں اور اب وہاں سے انہوں نے برطانیہ میں طویل سیاسی پناہ کے لیے درخواست دے دی ہے۔

شیخ حسینہ کی سیاسی پناہ کی خواہش پر برطانوی حکومت نے لال جھنڈی دکھا دی

ویب ڈیسک: بنگلہ دیش کی سابق وزیراعظم شیخ حسینہ واجد ملک سے فرار کے بعد بھارت میں قیام پذیر ہیں اور اب وہاں سے برطانیہ میں سیاسی پناہ کے حصول کی خواہشمند ہیں تاہم ابھی تک انہیں برطانوی حکومت نے کوئی جواب نہیں دیا ہے۔ دوسری جانب بھارت میں انہیں خفیہ رہائش فراہم کردی گئی ہے اورسابق وزیراعظم کی سیکیورٹی سخت کردی گئی ہے۔ 

ذرائع کے مطابق شیخ حسینہ واجد بھارت میں مختصر قیام کے بعد برطانیہ جانا چاہتی تھیں تاہم برطانوی وزیر خارجہ کی جانب سے بنگلہ دیش میں تشدد آمیز واقعات کی تحقیقات کے مطالبے نے ان کے لندن  جانے کے خواب پر پانی پھیردیا۔

یادرہے کہ برطانوی حکومت نے بنگلہ دیش میں حالیہ بحران کی اقوام متحدہ کی سربراہی میں تحقیقات کا مطالبہ کیا ہے جس میں متعدد ہلاکتیں ہوئی ہیں۔ سیکرٹری خارجہ ڈیوڈ لیمی نے ہنگامہ آرائی کی آزادانہ تحقیقات کی ضرورت پر زور دیا ہے اور بنگلہ دیش کے پرامن اور جمہوری مستقبل کی حمایت کے لیے برطانیہ کے عزم کا اظہار کیا ہے۔

سیکرٹری خارجہ ڈیوڈ لیمی نے کہا تھا، "بنگلہ دیش کے لوگ گزشتہ چند ہفتوں کے واقعات کی اقوام متحدہ کی زیر قیادت مکمل اور آزاد تحقیقات کے مستحق ہیں۔ برطانیہ بنگلہ دیش کے پرامن اور جمہوری مستقبل کو یقینی بنانے کے لیے کارروائی دیکھنا چاہتا ہے۔ 

برطانوی وزیر خارجہ کے اس بیان کے بعد شیخ حسینہ نے برطانیہ کی بجائے کسی اور ملک میں سیاسی پناہ لینے کی تجویز پر غور شروع کردیا ہے۔

ذرائع کے مطابق بھارتی حکومت نے بنگلہ دیش کی سابق وزیر اعظم شیخ حسینہ کو پیر کو جنوبی ایشیائی ملک میں ان کی حکومت کے خاتمے کے بعد عبوری قیام کی اجازت دے دی ہے۔ ڈیلی سن کی رپورٹ کے مطابق ان حالات کے دوران حسینہ کو برطانیہ میں سیاسی پناہ حاصل کرنے پر ہندوستان لاجسٹک مدد فراہم کرے گا۔

بھارت میں ان کو عارضی طور پر قیام کی اجات دی گئی ہے۔ حسینہ نے پیر کو مظاہروں کے بعد استعفیٰ دے دیا تھا۔ بتایا جارہا ہے کہ بھارت سے وہ لندن کا رخ کریں گی۔

ڈیلی سن کی رپورٹ کے مطابق بنگلہ دیش کی سابق وزیر اعظم کو سیاسی پناہ دینے کے حوالے سے برطانیہ حکومت کی جانب سے کوئی تصدیق نہیں ہوئی ہے۔ حسینہ اس وقت برطانیہ میں سیاسی پناہ کی تلاش میں ہیں۔ واضح رہے کہ ان کی بہن ریحانہ لندن کی شہری ہیں۔

شیخ مجیب الرحمن کی چھوٹی بیٹی ریحانہ، "فادر آف بنگلہ دیش" اور شیخ فضیلتون نیچا مجیب، شیخ حسینہ کی چھوٹی بہن بھی ہیں۔ ان کی بیٹی ٹیولپ صدیق برطانوی پارلیمنٹ کی رکن لیبر پارٹی کی نمائندگی کرتی ہیں۔

بنگلا دیشی صدر نے طلبا تحریک کے مطالبے پر پارلیمنٹ تحلیل کردی

ویب ڈیسک: بنگلہ دیشی میڈیا نے ایک پریس ریلیز کے حوالے سے بتایا ہے کہ ’مسلح افواج کے سربراہان، مختلف سیاسی جماعتوں، سول سوسائٹی کے نمائندوں اور طلبہ اتحاد ’سٹوڈنٹس اگینسٹ ڈسکریمینیشن کے ساتھ ملاقات کے بعد صدر نے پارلیمنٹ کو تحلیل کر دیا ہے۔‘

مزید کہا گیا کہ بنگلہ دیش نیشنل پارٹی کی چیئرپرسن خالدہ ضیا کو رہا کر دیا گیا ہے۔

یہ بھی کہا گیا کہ یکم جولائی سے پانچ اگست تک طلبہ تحریک میں گرفتار افراد کو رہا کرنے کا سلسلہ شروع ہو چکا ہے، اور بہت سے لوگوں کو رہا کر دیا گیا ہے۔

دوسری جانب بنگلہ دیش کے آرمی جنرل وقار الزماں منگل کو طلبہ رہنماؤں سے ملاقات کریں گے اور عبوری حکومت سے متعلق ناموں پر بات چیت کریں گے۔

خبر رساں ادارے 'رائٹرز' کے مطابق بنگلہ دیش کی فوج نے ایک بیان میں کہا ہے کہ جنرل وقار الزمان دن بارہ بجے مظاہروں کے منتظمین سے ملیں گے۔

واضح رہے کہ عالمی خبر رساں ادارے کے مطابق صدر سے پارلیمنٹ کو تحلیل کرنے کا مطالبہ طلبا تحریک کے کوآرڈینیٹر ناہد اسلام نے اپنے دو ساتھیوں کے ہمرہ ایک ریکارڈ کرائے گئے ایک ویڈیو پیغام میں کیا۔

ویڈیو بیان میں کہا گیا ہے کہ صدر شہاب الدین نے کل پیر 5 اگست کو کہا تھا کہ قومی پارلیمنٹ کو فوری طور پر تحلیل کر دیا جائے گا لیکن 24 گھنٹے گزر جانے کے بعد کوئی حکم نامہ جاری نہیں کیا گیا۔ 

ناہد اسلام نے کہا کہ طلبا اب بھی سڑکوں پر موجود ہیں اور ہم صدر شہاب الدین کو آج سہہ پہر 3 بجے تک پارلیمنٹ تحلیل کرنے کا الٹی میٹم دیتے ہیں بصورت دیگر احتجاج دوبارہ شروع کرنے پر مجبور ہوں گے۔

قبل ازیں طلبا تحریک کے رہنما ناہد اسلام نے منگل کی صبح ایک ویڈیو پیغام میں نوبل انعام یافتہ ماہر معاشیات پروفیسر محمد یونس کو عبوری حکومت کا چیف ایڈوائزر مقرر کرنے کا مطالبہ بھی کیا تھا۔

خیال رہے کہ اسی طلبا تحریک کے نتیجے میں گزشتہ روز شیخ حسینہ واجد کا 15 سالہ اقتدار کا سورج غروب ہوگیا اور وہ استعفیٰ دیکر بھارت روانہ ہوگئی تھیں جس کے بعد آرمی چیف نے ملک میں عبوری حکومت کی تشکیل دینے کا اعلان کیا تھا۔

امریکا: بنگلہ دیشی قونصلیٹ سے شیخ مجیب الرحمان کی تصاویر زبردستی اتاردی گئیں

ویب ڈیسک: (علی زیدی) "دیکھو مجھے جو دیدۂ عبرت نگاہ ہو"۔ امریکا میں بنگالی قونصل خانے سے شیخ مجیب الرحمان کی تصویر ہٹادی گئی۔

تفصیلات کے مطابق بنگالی نژاد امریکی شہریوں نے نیویارک میں موجود بنگلہ دیش قونصلیٹ سے مجیب الرحمن کی تصاویر زبردستی اتار دی ہیں۔ اس حوالے سے ایک ویڈیو سوشل میڈیا پر وائرل ہے۔

ویڈیو میں عوام کا جم غفگیر بنگالی قونصلیٹ میں داخل ہوتے دیکھا جاسکتا ہے۔ مظاہرین پہلے تو قونصلیٹ میں موجود افسران سے گفت وشنید کرتے ہیں اور پھر شیخ مجیب الرحمان کی تصویر اتار دیتے ہیں۔ 

سابق را چیف، بھارتی قومی سلامتی کے مشیر اجیت ڈوبھال کی شیخ حسینہ سے ملاقات

ویب ڈیسک: شیخ حسینہ واجد سے سیف ہاؤس میں بھارتی قومی سلامتی کے مشیر اجیت ڈوبھال نے ملاقات کی ہے۔ بھارتی وزیراعظم نریندرا مودی کی زیرصدارت اجلاس میں اہم فیصلوں سے انہیں آگاہ کردیا گیا ہے۔ 

رپورٹ کے مطابق شیخ حسین واجد کو بھارت لے کر آنے والا بنگلہ دیشی فوج کا سی 130 طیارہ عملے کے 7 افراد سمیت واپس ڈھاکا روانہ ہوگیا ہے۔ 

شیخ حسینہ واجد کی اجیت ڈوبھال سے ملاقات کےدوران بھارت کے فوجی و انٹیلیجنس حکام بھی موجود تھے۔ اس موقع پر انہوں نے اپنی بیٹی صائمہ واجد جو اقوام متحدہ کی اہلکارہیں سے بھی ملاقات کی۔

وزیر اعظم نریندر مودی نے بنگلہ دیش کی سیاسی صورتحال پر اپنی سرکاری رہائش گاہ پر ایک اعلیٰ سطحی میٹنگ کی۔ وزیراعظم مودی کی صدارت میں ہوئی کابینہ کمیٹی برائے سلامتی کی اس اعلیٰ سطحی اہم میٹنگ میں مرکزی وزیر داخلہ امت شاہ، وزیر دفاع راج ناتھ سنگھ، وزیر خارجہ ایس  جے شنکر اور وزیر خزانہ نرملا سیتا رمن کے علاوہ کئی دیگر اعلیٰ حکام بھی شامل تھے۔

میٹنگ میں قومی سلامتی کے مشیر اجیت ڈوبھال  نے بھارتی وزیر اعظم مودی کو شیخ حسینہ سے اپنی میٹنگ کے بارے میں  بریفنگ دی۔ ساتھ ہی میٹنگ میں بنگلہ دیش کی تازہ ترین سیاسی صورتحال  کے بارے میں بھی بریف کیا گیا۔

شیخ حسینہ واجد نے برطانیہ میں سیاسی پناہ کی درخواست کردی

ویب ڈیسک: شیخ حسینہ واجد سے سیف ہاؤس میں بھارتی قومی سلامتی کے مشیر اجیت ڈوبھال نے ملاقات کی ہے۔ بھارتی وزیراعظم نریندرا مودی کی زیرصدارت اجلاس میں اہم فیصلوں سے انہیں آگاہ کردیا گیا ہے۔ سابق بنگلہ وزیراعظم نے برطانیہ سے سیاسی پناہ کی درخواست کردی ہے۔

رپورٹ کے مطابق شیخ حسین واجد کو بھارت لے کر آنے والا بنگلہ دیشی فوج کا سی 130 طیارہ عملے کے 7 افراد سمیت واپس ڈھاکا روانہ ہوگیا ہے جبکہ شیخ حسینہ واجد نے برطانیہ کے ہوم آفس لندن میں سیاسی پناہ کے لئے درخواست دیدی ہے۔جسے فوری طور پر قبول کرنے سے برطانیہ نے انکار کردیا ہے۔ ہوم آفس نے ایک بیان میں کہا ہے کہ درخواست کو معمول کے مطابق کارروائی میں دیکھیں گے۔

شیخ حسینہ واجد کی اجیت ڈوبھال سے ملاقات کےدوران بھارت کے فوجی و انٹیلیجنس حکام بھی موجود تھے۔ اس موقع پر انہوں نے اپنی بیٹی صائمہ واجد جو اقوام متحدہ کی اہلکارہیں سے بھی ملاقات کی۔

وزیر اعظم نریندر مودی نے بنگلہ دیش کی سیاسی صورتحال پر اپنی سرکاری رہائش گاہ پر ایک اعلیٰ سطحی میٹنگ کی۔ وزیراعظم مودی کی صدارت میں ہوئی کابینہ کمیٹی برائے سلامتی کی اس اعلیٰ سطحی اہم میٹنگ میں مرکزی وزیر داخلہ امت شاہ، وزیر دفاع راج ناتھ سنگھ، وزیر خارجہ ایس  جے شنکر اور وزیر خزانہ نرملا سیتا رمن کے علاوہ کئی دیگر اعلیٰ حکام بھی شامل تھے۔

میٹنگ میں قومی سلامتی کے مشیر اجیت ڈوبھال  نے بھارتی وزیر اعظم مودی کو شیخ حسینہ سے اپنی میٹنگ کے بارے میں  بریفنگ دی۔ ساتھ ہی میٹنگ میں بنگلہ دیش کی تازہ ترین سیاسی صورتحال  کے بارے میں بھی بریف کیا گیا۔

بنگلہ دیش میں سیاسی بغاوتوں کی تاریخ پر ایک نظر!

ویب ڈیسک : (علی زیدی)بنگلہ دیش کی وزیر اعظم شیخ حسینہ  کی اقتدار سے بے دخلی اور بھارت فرار نے ایک بار پھر ملک کی سیاسی ہلچل اور بغاوتوں کی تاریخ پر توجہ مرکوز کر دی ہے۔ بنگلہ دیش میں سیاسی بغاوتوں کی تاریخ نئی نہیں۔

آئیے نظرڈالتے ہیں بنگلہ دیش کی سیاسی تاریخ پر۔ یہ امر تاریخ میں دلچسپی رکھنے والوں کے اہم ہے کہ بنگلہ دیش میں ہر بغاوت خونی بغاوت ثابت ہوئی۔ آئیے جانتے ہیں۔ 

1971 

بنگلہ دیش کا قیام بھی ایک بغاوت کانتیجہ تھا جو اس وقت کی یحییٰ حکومت کے خلاف شیخ مجیب الرحمان نے کیا اور مشرقی پاکستان کہلانے والا پاکستان کا حصہ ایک جنگ کے نتیجہ میں علیحدہ ہوا۔ جس کے نتیجے میں شیخ مجیب الرحمان نے اقتدار سنبھالا۔

1975

بنگلہ دیش کے قیام کے بعد پہلی بغاوت کا  آغاز 1975 میں ملک کے پہلے وزیراعظم شیخ مجیب الرحمان کےایک فوجی بغاوت میں قتل سے ہوا تھا۔

مستعفی ہونے والی وزیراعظم حسینہ کے والد، اور ملک کے پہلے وزیر اعظم شیخ مجیب الرحمان کو ان کے خاندان کے بیشتر افراد سمیت ایک فوجی بغاوت میں قتل کر دیا گیا تھا۔

جس کے نتیجے میں بنگلہ دیش میں طویل عرصے تک فوجی حکمرانی کا آغاز ہوا۔ اسی سال دو اور بغاوتیں نومبر میں جنرل ضیاء الرحمن کے اقتدار پر قبضے کے ساتھ ختم ہوئیں۔

بنگلہ دیش نے جنوری 2010 میں ان پانچ سابق فوجی عہدے داروں کو، جنھوں نے 1975ء میں قوم کی آزادی کے قائد کو قتل کیا تھا، پھانسی پر لٹکا دیا تھا۔

قتل کا مشہور مقدمہ مقتول قائد کی بیٹی شیخ حسینہ کی حکومت میں چلا۔ وہ اس سے ایک سال قبل ملک کی دوسری مرتبہ وزیرِاعظم منتخب ہوئی تھیں۔

1981

جنرل ضیاء الرحمن کو باغیوں نے چٹاگانگ شہر میں ایک سرکاری گیسٹ ہاؤس میں گھس کر قتل کر دیا جہاں وہ رہائش پذیر تھے۔ خیال کیا جاتاہے کہ یہ تشدد فوجی افسروں کے ایک چھوٹے سے گروپ کی کارروائی تھی، لیکن فوج خود وفادار رہی اور بغاوت کو کچل دیا۔

1982

جنرل ضیاء الرحمن کے جانشین عبدالستار کو حسین محمد ارشاد کی سربراہی میں ایک خونریز فوجی انقلاب میں معزول کر دیا گیا، جنہوں نے پہلےچیف مارشل لاء ایڈمنسٹریٹر کا عہدہ اور بعد میں صدر کا عہدہ سنبھالا۔

عوامی احتجاج اور ہنگاموں کے بعد جنرل حسین محمد ارشاد کو انیس سو اکانوے میں اقتدار سے علیحدہ ہونا پڑا۔

2007

آرمی چیف نے فوجی بغاوت کے بعدایک نگراں حکومت کی حمایت کی جس نے اگلے دو سال تک ملک پر حکمرانی کی جس کے بعد شیخ حسینہ واجد نے 2009 میں اقتدار سنبھالا۔

2009

اس سال اپنی اجرتوں اور دیگرحالات سے برہم، بنگلہ دیش رائفلز کے سرحدی محافظوں نے دارالحکومت ڈھاکہ میں 74 سے زیادہ افراد کو ہلاک کر دیا، جن میں زیادہ تر فوجی افسرتھے۔

بغاوت کے دوران سرحدی محافظوں نے ڈھاکہ میں اپنی مرکزی بارکوں پر قبضہ کرلیا تھا اور بغاوت مختلف چوکیوں تک پھیل گئى تھی۔ استغاثہ کا کہنا ہے کہ بغاوت کم تنخواہوں اور ناروا سلوک پر احتجاج کے طور پر شروع ہوئى تھی۔ یہ چھ دن کے بعد ختم ہو گئی تھی اور ناراض محافظوں نے سلسلہ وار بات چیت کے بعد ہتھیار ڈال دیے۔ جس کے بعد ہلاکتوں میں ملوث افراد کو سخت سزائیں دی گئیں۔

2012

بنگلہ دیش کی فوج نے کہا کہ اس نے ریٹائرڈ اور حاضر سروس افسران کی بغاوت کی ایک کوشش کو ناکام بنا دیا ہے جو پورے ملک میں شریعت یا اسلامی قانون متعارف کرانے کی مہم کے ذریعے چلائی گئی تھی۔

2024

بنگلہ دیش کے آرمی چیف جنرل وقار الزمان نے پانچ اگست کو کہا کہ حسینہ واجد نے کوٹہ مخالف پرتشدد مظاہروں کے بعد استعفیٰ دے دیا ہے اور ملک کی قیادت کے لیے ایک عبوری حکومت قائم کی جائے گی۔

شیخ حسینہ کی برطرفی بھارت کیلئے ویسا ہی دھچکا ہےجیسے امریکا کیلئے افغانستان

ویب ڈیسک: (علی زیدی) شیخ حسینہ اور بھارت کا مضبوط قریبی تعلق بھی عوامی نفرت کی وجہ بنا، تجزیہ کاروں کا کہنا ہے صرف حسینہ واجد پر بھروسہ کرکے بھارت نے سارے انڈے ایک ہی ٹوکری میں ڈال دیے جس کا نقصان اب بھارت کو اٹھانا ہوگا۔ اب حسینہ حکومت کی برطرفی بھارت کیلئے ویسا ہی دھچکا ہے جیسے امریکا کیلئے افغانستان۔

تفصیلات کے مطابق انڈیا شیخ حسینہ کا سب سے قریبی اتحادی ہے اور 1971 میں بنگلہ دیش کے وجود میں آنے کے بعد سے ہی عوامی لیگ پارٹی کو انڈیا کی مکمل حمایت حاصل رہی ہے۔

بھارت سابق خارجہ سیکریٹری ہرش وردھن شرینگلہ نے ایک ٹی وی انٹرویو میں کہا کہ شیخ حسینہ کے تعلقات صرف حکومت سے ہی نہیں انڈیا کی سیاسی قیادت سے بھی بہت گہرے ہیں۔

شیخ حسینہ واجد کی خود ساختہ جلا وطنی

1975 میں جب ان کے والد شیخ مجیب الرحمن اور ان کے خاندان کے دیگر افراد کو قتل کر دیا گیا تھا، اس وقت شیخ حسینہ یورپ میں تھیں۔ وہاں سے وہ دلی آئیں اور یہاں کئی برس مقیم رہیں۔

پاکستان کے ایٹمی پروگرام میں شیخ حسینہ کے شوہر کا کردار

اس وقت حسینہ کے شوہر جو ایک سائنسدان تھے انھیں ایک سرکاری ادارے میں ملازمت بھی دی گئی تھی۔ شیخ حسینہ کے شوہر ڈاکٹر واجد میاں ایک سائنسدان تھے جو پاکستان اٹامک انرجی کمیشن کا حصہ رہ چکے تھے اور سقوط ڈھاکہ سے قبل کراچی نیوکلیئر پلانٹ کے چیف سائنسدان بھی تھے لیکن پھر حالات خراب ہونے کے بعد ان کی سیکیورٹی کلیئرنس ختم کر دی گئی تھی۔

شیخ حسینہ کے بھارت سے بڑے معاہدے

شيخ حسینہ تقریباً 21 برس بنگلہ دیش کی وزیراعظم رہ چکی ہیں۔ وہ گزشتہ 16 برس سے مسلسل وزیراعظم کے عہدے پر فائز تھیں۔ مودی حکومت کے قیام کے بعد انہوں نے انڈیا سے پانی کی تقسیم کا سمجھوتہ کیا، نئے نئے تجارتی راستے کھولے، بنگلہ انکلیو کے تبادلے اور امن معاہدہ کیا۔

خالدہ ضیاء بمقابلہ شیخ حسینہ 

خالدہ ضیا کی حکومت کے درمیان بنگلہ دیش میں انتہا پسند طاقتوں کو شہ ملی اور وہاں کئی تنظیمیں تشدد پر اتر آئیں۔ اںڈیا بھی ان انتہا پسندوں کی پرتشدد کارروائیوں کی زد میں آیا اور انڈیا کے تعلقات خالدہ ضیاء کی حکومت سے خراب ہوتے گئے۔ لیکن شیخ حسینہ کے اقتدار میں آنے کے بعد دونوں ملکوں کے رشتے بہت گہرے ہو گئے۔

بھارت سے بنگلہ دیشی عوام کی نفرت 

چونکہ انڈیا شیخ حسینہ کا سب سے بڑا حمایتی تھا اسی لیے وہاں کی عوام انڈیا سے بھی اتنی ہی نفرت کرنے لگی۔

انڈیا امریکہ، برطانیہ اور پوری دنیا کو یہ باور کرواتا رہا ہے کہ اگر عوامی لیگ ہار گئی تو بنگلہ دیش انتہا پسندوں کے قبضے میں چلا جائے گا۔

انڈیا کو یہ اندازہ ہی نہیں تھا کہ شیخ حسینہ کی آمرانہ حکومت سے عوامی نفرت اس حد تک پہنچ جائے گی کہ انہیں اقتدار چھوڑ کر ملک سے فرار ہونا پڑسکتا ہے۔ یہ انڈیا کے لیے ویسا ہی بڑا دھچکا ہے جیسا امریکیوں کے لیے افغانستان ثابت ہوا۔

بھارت ایک بھی سرکاری بیان جاری نہ کرسکا

بظاہر انڈیا اس وقت بہت سنبھل کر چل رہا ہے۔ ڈھاکہ میں کئی دن سے جاری مظاہروں اور ہلاکتوں کے واقعات سے لے کر شیخ حسینہ کی حکومت کے خاتمے اور ان کے انڈیا پہنچنے کے بعد بھی حکومت کی طرف سے ابھی تک ایک بھی بیان جاری نہیں کیا گیا ہے۔

بنگلہ دیش میں فوج نےکرفیو اٹھالیا،تعلیمی ادارے کھل گئے

ویب ڈیسک: شیخ حسینہ واجد کی حکومت کے خاتمے کے اگلے روز فوج نے ملک سے کرفیو اٹھالیا۔

برطانوی نشریاتی ادارے کی رپورٹ کے مطابق بنگلادیشی فوج کے پبلک ریلیشن ڈپارٹمنٹ نے ملک سے کرفیو اٹھانے کا اعلان کیا جب کہ ملک میں تعلیمی ادارے بھی کھول دیے گئے ہیں۔

رپورٹ میں بتایا گیا ہے کہ دارالحکومت ڈھاکا سمیت مختلف شہروں میں اسکول، کالجز اور یونیورسٹیاں کھول دی گئی ہیں مگر طلبہ کی تعداد بہت کم ہے جب کہ ڈھاکا کی یونیورسٹی میں پڑھنے والے طلبہ کی ایک بڑی تعداد تعلیمی اداروں کی بندش اور ملکی حالات کی وجہ سے اپنے آبائی علاقوں کو چلی گئی تھی جن کی واپسی میں اب وقت لگے گا۔ 

رپورٹس کے مطابق بنگلادیش میں اساتذہ کی تنظیم 'یونیورسٹی ٹیچرز نیٹ ورک' آج میٹنگ میں تعلیمی سرگرمیوں کی بحالی سے متعلق  آئندہ کا لائحہ عمل طے کرے گی۔ 

دوسری جانب گارمنٹس مینوفیکچررز نے اعلان کیا ہےکہ آج ملک بھر میں گارمنٹس فیکٹریاں بند رکھی جائیں گی اور فیکٹریاں کھولنے کا اعلان بعد میں کیا جائے گا۔

شیخ حسینہ کی حکومت کا خاتمہ

بنگلہ دیش میں ایک ماہ سے جاری پرتشدد مظاہروں اور ان میں سیکڑوں ہلاکتوں کے بعد 5 اگست کو بنگلادیشی وزیراعظم شیخ حسینہ واجد استعفیٰ دے کر ملک سے فرار ہوگئیں۔

 بنگلہ دیشی فوج نے وزیراعظم حسینہ واجد کو مستعفی ہونے کے لیے 45 منٹ کی ڈیڈ لائن دی تھی۔

خبر ایجنسی کے مطابق شیخ حسینہ واجد نے محفوظ مقام پر منتقلی سے قبل تقریر ریکارڈکرانے کی کوشش کی مگر انہیں تقریر ریکارڈ کرانے کا موقع نہیں دیا گیا۔

بنگلادیش میں احتجاج کب اور کیوں شروع ہوا؟

 یاد رہے کہ بنگلادیش میں 1971 کی جنگ لڑنے والوں کے بچوں کو سرکاری نوکریوں میں 30 فیصد کوٹہ دیے جانے کے خلاف گزشتہ ماہ کئی روز تک مظاہرے ہوئے تھے جن میں 200 افراد ہلاک ہوئے جس کے بعد سپریم کورٹ نے کوٹہ سسٹم کو ختم کردیا تھا مگر طلبہ نے اپنے ساتھیوں کو انصاف نا ملنے تک احتجاج جاری رکھنے اور سول نافرمانی کی کال دے تھی۔

پرتشدد احتجاج میں 300 ہلاکتیں

بنگلادیش میں کوٹہ سسٹم مخالف طلبہ کی جانب سے سول نافرمانی کی تحریک کے اعلان کے بعد پرتشدد احتجاج میں مجموعی ہلاکتوں کی تعداد 300 سے تجاوز کرگئی تھی۔

شیخ حسینہ کا اقتدار

شیخ حسینہ واجد 16 سالہ اقتدار کے نتیجے میں ملک کی طویل ترین وزیراعظم رہیں، وہ اسی سال چوتھی مرتبہ وزیراعظم منتخب ہوئی تھیں جب کہ حسینہ واجد پر سیاسی مخالفین کے خلاف اقدامات کے الزامات بھی لگائے جاتے ہیں اور حال ہی میں ان کی حکومت نے بنگلادیشی جماعت اسلامی پر پابندی لگائی تھی۔ 

اقوام متحدہ کا بنگلہ دیشن میں اقتدار کی پرامن منتقلی کا مطالبہ

ویب ڈیسک: (علی زیدی) اقوام متحدہ نے بنگلہ دیش میں اقتدار کی پرامن منتقلی کے حوالے سے کہا ہے کہ اس دوران انسانی حقوق کو مدِنظر رکھا جائے اور پرتشدد واقعات کے ذمہ داران کو انصاف کے کٹہرے میں لایا جائے۔

تفصیلات کے مطابق شیخ حسینہ واجد کے وزیر اعظم کے عہدے سے مستعفی ہونے اور طلبا کے احتجاج کے پیشِ نظر بنگلہ دیش چھوڑنے کے بعد اقوام متحدہ کے ہائی کمشنر برائے انسانی حقوق وولکر ترک نے کہا کہ سینکڑوں افراد کی ہلاکت اور بڑی تعداد میں زخمی ہونے والوں کے ذمہ داروں کو انصاف کے کٹہرے میں لایا جانا چاہیے۔

اُن کا مزید کہنا تھا کہ ’اقتدار کی منتقلی کو شفاف اور جوابدہ طریقے سے انجام دیا جانا چاہیے اور بنگلہ دیش کے تمام شہریوں کی اس عمل میں بامعنی شرکت کو یقینی بنایا جانا چاہیے۔ ساتھ ہی اس بات کا بھی خیال رکھا جائے کہ اس دوران تشدد یا انتقامی کارروائی نہ ہو۔‘

اقوام متحدہ کے ہائی کمشنر برائے انسانی حقوق نے یہ بھی کہا کہ جمہوری عمل اور قانون کی حکمرانی کو جلد از جلد یقینی بنایا جانا چاہیے اور ایسے میں بین الاقوامی قوانین کا بھی خیال رکھا جائے۔

انھوں نے مزید کہا کہ ’موجودہ حالات میں اور عوامی اعتماد کو یقینی بنانے کے لیے ایک آزادانہ انکوائری کی جانی چاہیے اور ہم اس عمل کی حمایت کے لیے تیار ہے۔‘

اقوام متحدہ کے ہائی کمشنر برائے انسانی حقوق وولکر ترک نے کہا کہ ’انصاف اور اصلاحات کے مطالبات پر توجہ دی جانی چاہیے۔‘

3 عام طلباء نے طاقتورترین شیخ حسینہ حکومت کیسے گرائی؟

ویب ڈیسک: (علی زیدی) ناہید اسلام، آصف محمود اور ابوبکر… یہ ڈھاکہ یونیورسٹی کے تین طالب علم ہیں جنہوں نے بنگلہ دیش میں اتنی بڑی تحریک چلائی کہ وزیراعظم شیخ حسینہ کو ملک چھوڑنا پڑ گیا۔

تینوں طلبا کا تعلق عام متوسط  گھروں سے  ہے۔ ان سب کا کوئی سیاسی پس منظر بھی نہیں  تاہم  کچھ چھوٹے موٹے احتجاجی مظاہروں کا حصہ ضرور رہے۔

بات اسی سال 19 جولائی کی ہے، جب محمد ناہید اسلام کو پولیس اٹھا کر لے گئی۔ الزام لگایا گیا کہ اس پر حملہ کیا گیا۔ ناہید کی بائیں ران، دونوں ہاتھوں اور کندھے پر چوٹ کے نشانات تھے۔

ناہید نے بتایا کہ سادہ کپڑوں میں کچھ لوگ آئے اور اسے دوست کے گھر سے اٹھا کر لے گئے۔ پھر مارا پیٹا گیا۔ جب اس کی آنکھ کھلی تو اس نے خود کو سڑک کے کنارے پڑا ہوا پایا۔ اس کی آنکھوں پر پٹی بندھی ہوئی تھی۔ 

ناہید کی والدہ ممتاز بیگم اور والد بدرالاسلام اپنے بیٹے کا پتہ جاننے کے لیے ڈیٹیکٹیو برانچ کے دفتر کے سامنے سارا دن انتظار کرتے رہے، لیکن انہیں کچھ نہیں بتایا گیا۔

26 جولائی کو یہ واقعہ دوبارہ پیش آیا، جب ناہید اسلام، آصف محمود اور ابوبکر کو پولیس کے سراغ رساں ونگ نے اسپتال سے اٹھایا۔ تب پولیس نے کہا کہ تینوں کو سیکیورٹی وجوہات کی بنا پر حراست میں لیا گیا ہے۔ 

میڈیا رپورٹس کے مطابق ناہید کو لوہے کی سلاخوں سے مارا گیا جبکہ آصف کو انجکشن لگایا گیا جس کے باعث وہ کئی روز تک بے ہوش رہا۔ ناہید نے بتایا کہ مجھے لگتا ہے کہ میں 24 گھنٹے تک بے ہوش رہا۔ دونوں نے دعویٰ کیا کہ ایجنسیوں نے ان پر تحریک روکنے کے لیے دباؤ ڈالا۔

اب یہی  طلبا نئی عبوری حکومت کا خاکہ طے کر رہے ہیں۔ انہوں نے فوج کی ڈکٹیشن لینے سے انکار کردیا ہے۔

طلبہ تحریک کے کوآرڈینیٹر محمد ناہید اسلام نے کہا کہ آئندہ 24 گھنٹوں میں عبوری حکومت کا خاکہ تیار کر لیا جائے گا۔ ناہید نے بغاوت کو شہید طلبا اور عام لوگوں  کے نام کیا ہے۔ انہوں نے کہا کہ ہم بغاوت میں مرنے والوں کو قومی ہیرو قرار دیتے ہیں۔

بنگلہ دیشی مظاہرین کا جیل پر دھاوا، طلباء رہنماؤں کو آزاد کروالیا

ویب ڈیسک: (علی زیدی) بنگلہ دیشن میں شیخ حسینہ واجد کی حکومت ختم ہونے کے بعد بھی احتجاج جاری ہے۔ مظاہرین نے دھاوا بولتے ہوئے بنگلہ دیش کے شیرپور ضلع کی جیل میں بند طلبا رہنماؤں کو چھڑا لیا گیا۔ رپورٹس کے مطابق 500 مزید قیدی بھی فرار ہوگئے۔ 

تفصیلات کے مطابق شیرپور ضلع میں لاٹھیوں سے لیس مشتعل مظاہرین نے ضلع جیل میں گھس کر 500 سے زائد قیدیوں کو چھڑا لیا۔ اطلاع کے مطابق مظاہرین نے کم از کم 6 پولیس اسٹیشنوں میں توڑ پھوڑ کے بعد آگ لگا دی ہے۔ 

ان پولیس اسٹیشنوں سے اسلحے، گولیاں اور دیگر سامان لوٹے جانے کی خبریں بھی سامنے آ رہی ہیں۔ ’ڈھاکہ ٹریبیون‘ کی ایک رپورٹ میں بتایا جا رہا ہے کہ عوامی لیگ کے لیڈران و کارکنان کے گھروں و افسران کو بھی نشانہ بنایا گیا ہے۔

شیخ حسینہ کےخلاف بغاوت،5اہم وجوہات

ویب ڈیسک : ( جواد ملک )آخر وہ کیا وجوہات تھیں جن کی وجہ سے بنگلہ دیش میں حالیہ دنوں میں شیخ حسینہ کے خلاف غصہ بڑھتا چلا گیا اور وہ غیر مقبول ہو گئیں اور عوامی غم و غصے کی لہر نے ان کے تخت کو ہلا کر رکھ دیا۔ آئیے جانتے ہیں کچھ اہم وجوہات ۔
اختلاف ظاہر کرنے والوں پر جبر
شیخ حسینہ کی انتظامیہ پر حزب اختلاف کی آوازوں اور اختلاف رائے کو منظم طریقے سے دبانے کا الزام لگتا رہا ہے۔ ان کے طویل دور اقتدار میں اپوزیشن رہنماؤں کی گرفتاریوں، اظہار رائے کی آزادی کو دبانے اور اختلاف رائے کو دبانے کے واقعات دیکھنے میں آئے اور انہوں نے اپوزیشن رہنماؤں اور کارکنوں کو گرفتار کرنے کے ساتھ ساتھ احتجاج کو دبانے میں بھی کوئی کسر نہیں چھوڑی۔ حالیہ مظاہروں پر ان کی حکومت کا ردعمل بھی خاص طور پر پرتشدد رہا ہے، مظاہرین کے خلاف ضرورت سے زیادہ طاقت کے استعمال کی خبریں آئیں ۔

جمہوری اصولوں کو ختم کر دیا

ناقدین کا کہنا ہے کہ حسینہ واجد کی حکومت نے جمہوری عمل اور اداروں کو کمزور کردیا۔ ان کے دور میں انتخابات دھاندلی اور تشدد کے الزامات میں گھرے رہے۔ سرکاری ایجنسیوں نے ان کی ہدایت پر سازش کی اور اپوزیشن لیڈروں کو جیلوں میں ڈالتی رہیں یا ان کے خلاف مقدمات کا انبار لگا دیا گیا۔ مجموعی طور پر، پولیس اور دیگر سرکاری اداروں نے اپوزیشن رہنماؤں کو پھنسانے کے لیے کام زیادہ کیا۔

انسانی حقوق کی خلاف ورزیاں

حسینہ کی حکومت میں انسانی حقوق کی خلاف ورزیوں کی متعدد رپورٹس سامنے آئی ہیں، جن میں جبری گمشدگیاں اور ماورائے عدالت قتل شامل ہیں۔ بین الاقوامی تنظیموں نے ان زیادتیوں کو دستاویزی شکل دی ہے، جس کے نتیجے میں مغربی ممالک نے ان خلاف ورزیوں سے منسلک کچھ سیکورٹی فورسز کے خلاف پابندیاں بھی عائد کیں ۔

نوکریوں میں ریزرویشن

حال ہی میں شیخ حسینہ کی حکومت نے ان لوگوں کو ملازمتوں میں کوٹہ دیا تھا جن کے خاندانوں نے 1971 میں ملک کی آزادی کے لیے جنگ لڑی تھی۔ اس پر طلبہ کا غصہ بھڑک اٹھا ۔ جگہ جگہ مظاہرے ہونے لگے۔ طلبہ کا یہ احتجاج ملک بھر میں پھیل گیا۔ تشدد ہوا۔ حالانکہ بنگلہ دیش کی سپریم کورٹ نے اس کوٹہ کو ختم کر دیا تھا لیکن تب تک پورا ملک مشکل میں تھا۔ اپوزیشن نے بھی اس تحریک کو مزید تقویت دی۔ اس کے نتیجے میں بنگلہ دیش میں غصہ مزید بڑھ گیا۔ پچھلے تین دنوں سے ایسا لگ رہا تھا کہ بنگلہ دیش میں حکومت نام کی کوئی چیز نہیں ہے۔ بڑے پیمانے پر تشدد، آتش زنی اور افراتفری پھیلی ہوئی تھی۔

میڈیا سنسر شپ

حسینہ واجد کی انتظامیہ کو آزادی صحافت پر قدغن لگانے پر بھی تنقید کا سامنا کرنا پڑا ہے۔ حکومت پر تنقید کرنے والے صحافیوں اور میڈیا اداروں کو اکثر ہراساں کیے جانے، قانونی کارروائی یا بندش کا سامنا کرنا پڑا ۔ اس سے ملک میں اظہار رائے کی آزادی پر منفی اثرات مرتب ہوئے۔ بہت سے لوگوں کو حکومتی سرگرمیوں کی رپورٹنگ کرنے پر منفی نتائج کا ڈر ستانے لگا ۔

بنگالی طلباء نے سابق کرکٹر مشرفی مرتضٰی کا گھر نذرآتش کردیا

ویب ڈیسک: (علی زیدی) بنگالی عوام کا غم وغصہ ابھی بھی ٹھنڈا نہ ہوسکا۔ سابق وزیراعظم شیخ حسینہ واجد کے قریبی ساتھیوں کی شامت آگئی۔ بنگالی عوام نے عوامی لیگ سے رکن پارلیمنٹ منتخب ہونے والے سابق کرکٹر مشرفی مرتضیٰ کے گھر کو نذرآتش کردیا۔ گھر کو آگ لگانے سے پہلے گھر میں توڑ پھوڑ بھی کی گئی۔ 

تفصیلات کے مطابق مشرفی مرتضیٰ بنگلہ دیش کے نریل -2 حلقے سے رکن پارلیمنٹ ہیں، جنہیں سابق وزیر اعظم شیخ حسینہ کے بہت قریب سمجھا جاتا ہے۔ مرتضیٰ اس سال مسلسل دوسری بار نریل-2 سیٹ سے رکن پارلیمنٹ منتخب ہوئے تھے۔ 

مشرفی مرتضیٰ کے گھر کو آگ لگانے کے علاوہ پرتشدد عناصر نے ضلع میں واقع عوامی لیگ کے دفتر کو بھی آگ لگا دی۔ اسی ضلع میں پارٹی صدر سبھاش چندر بوس کے گھر میں توڑ پھوڑ کی گئی ہے۔ نارائن گنج-4 حلقہ اور عوامی پارٹی سے وابستہ کئی رہنماؤں  کے گھروں میں لوٹ مار اور توڑ پھوڑ کی خبر ہے۔

واضح رہے کہ مشرفی مرتضیٰ نے 20 سال تک بنگلہ دیش کے لیے کرکٹ کھیلی اور طویل عرصے تک کپتان بھی رہے۔ اپنے تاریخی کیریئر میں انہوں نے 36 ٹیسٹ میچز کھیلے جس میں ان کے نام 78 وکٹیں اور 797 رنز ہیں۔ ان کے نام 220 ون ڈے میچوں میں 270 وکٹیں ہیں اور بطور بلے باز انہوں نے 1,787 رنز بنائے ہیں۔ اپنے ٹی ٹوئنٹی کیریئر کے 54 میچوں میں انہوں نے 42 وکٹیں اور 377 رنز بنائے۔

بنگلادیش میں شیخ حسینہ کے لاڈلوں کی تلاش

ویب ڈیسک: گزشتہ روز شیخ حسینہ کے وزیرِاعظم کے منصب سے مستعفی ہونے اور بھارت چلے جانے کے بعد اب ملک بھر میں اُن سرکاری افسروں اور اُن کے ماتحتوں کی شامت آگئی ہے جو عوامی لیگ کے 15 سالہ اقتدار کے دوران شیخ حسینہ کے نزدیک رہ کر مزے لُوٹتے رہے۔

ٹائمز آف انڈیا نے ایک رپورٹ میں بتایا ہے کہ بنگلہ دیش کے طول و عرض شیخ حسینہ کے لاڈلوں کو تلاش کیا جارہا ہے۔

ہزاروں سینیر اور جونیر سرکاری افسر اپنے گھروں سے نکل گئے ہیں۔ یہ لوگ اپنی شناخت بھی چھپارہے ہیں۔ بیشتر نے بھارت جانے کا فیصلہ کیا ہے مگر مسئلہ یہ ہے کہ بھارت نے بنگلہ دیش سے ملحق سرحدوں پر تمام انٹری پوائنٹ بند کردیے ہیں۔

بہت سے سرکاری افسران نے ڈھاکہ میں بھارتی ہائی کمیشن سے رابطہ کرکے استدعا کی ہے کہ پاسپورٹ یا ویزا نہ ہونے کی صورت میں بھی اُنہیں بھارت میں داخل ہونے دیا جائے کیونکہ اگر وہ اپنے ملک میں کسی بپھرے ہوئے ٹولے کے ہتھے چڑھ گئے تو وہ مار ڈالے گا۔

بدلی ہوئی صورتِ حال میں وہ سینیر اور جونیر سرکاری افسر زیادہ پریشان ہیں جو عوامی لیگ کے دورِ حکومت میں کُھل کر کرپشن کرتے اور اپنی اپنی تجوریاں بھرتے رہے۔ بیشتر کا یہ حال ہے کہ اپنا نام بتاتے اور شناخت کراتے بھی ڈر رہے ہیں کہیں کسی ٹولے کو بھنک نہ پڑ جائے۔

ڈھاکہ ایئر پورٹ بند ہے۔ پروازیں منسوخ کی جاچکی ہیں۔ ٹرین سروس بھی تقریباً مکمل طور پر بند ہے۔ ایسے میں بھارت میں داخل ہونے کے لیے کسی چیک پوسٹ یا کراسنگ پوائنٹ تک پہنچنے کے لیے پرائیویٹ گاڑیوں ہی کا سہارا لیا جاسکتا ہے۔ بہت سے سرکاری افسر سرحدی چیک پوائنٹس تک پہنچے ہیں تاہم انہیں مغربی بنگال یا اگرتلہ میں داخل نہیں ہونے دیا جارہا۔

بنگلا دیشی وزیراعظم کے اقتدار میں آخری لمحات کی کہانی سامنے آگئی

ویب ڈیسک: بنگلہ دیش کی مستعفی ہونے والی وزیراعظم شیخ حسینہ واجد اخر وقت تک مظاہرین کے خلاف سخت طاقت کا استعمال کرنا چاہتی تھیں لیکن پھر ایک بات نے انہیں بھاگنے پر مجبور کر دیا۔حسینہ واجد کے اقتدار میں آخری ایک گھنٹے کی کہانی سامنے آگئی ہے۔

تفصیلات کے مطابق بنگلا دیش کے اخبار پروتم آلو کے مطابق وزیراعظم حسینہ واجد مظاہرین کی خلاف طاقت کا استعمال کرنا چاہتی تھی اور انہوں نے پیر سے کرفیو اس وقت کرنے کے احکامات دیے تھے لیکن 9 بجے کے قریب مظاہرین نے کرفیو توڑنا شروع کر دیا اس پر ایسی واجد نے تین سروسز چیف اور پولیس کے انسپیکٹر جنرل کو وزیراعظم ہاؤس میں طلب کیا۔

اجلاس کے دوران حسینہ واجد پر برس پڑیں ان کا کہنا تھا کہ مظاہرین کے خلاف خاطرخواہ اقدامات نہیں کیے جا رہے۔ انہوں نے کہا کہ بکتر بند گاڑیوں پر چڑھنے والے مظاہرین کے خلاف کارروائی کیوں نہیں کی جا رہی۔

اس دوران سروسز چیف اور آئی جی نے وزیراعظم کو سمجھانے کی کوشش کی کہ حالات کنٹرول سے باہر ہو گئے ہیں۔

بنگلا دیش کے ایک اخبار کا کہنا ہے کہ میٹنگ کے دوران حسینہ ماجد کے بیٹے سے بھی رابطہ کیا گیا اور انہوں نے بھی اپنی والدہ کو سمجھانے کی کوشش کی۔

حسینہ واجد اقتدار فوج کے حوالے کرنے کو تیار نہیں تھی اور انہوں نے سروس سروسز چیف کو یاد دلایا کہ ان کی تقریریں انہوں نے ہی کی ہیں۔خاندان سے صلاح و مشورے کے بعد حسینہ واجد استعفی دینے کو تیار ہو گئیں۔

تاہم اقتدار چھوڑنے سے پہلے وہ ایک تقریر ریکارڈ کرانا چاہتی تھیں۔ اس پر حسینہ واجد کو بتایا گیا کہ مظاہرین وزیراعظم ہاؤس کی طرف بڑھ رہے ہیں اور انہیں وہاں پہنچنے میں 45 منٹ سے زیادہ نہیں لگیں گے اگر مظاہرین پہنچ گئے تو حسینہ واجد کو بھاگنے کا موقع نہیں ملے گا۔

یاد رہے کہ پیر کو یہ بات سامنے آئی تھی کہ فوج نے حسینہ واجد کو اقتدار چھوڑنے کے لیے 45 منٹ کا الٹی میٹم دیا ہے۔ یہی وہ الٹی میٹم تھا۔

شیخ حسینہ واجد ایک فوجی ہیلی کاپٹر میں جب وزیراعظم ہاؤس سے فرار ہوئی تو اس کے کچھ ہی دیر بعد ہزاروں افراد نے ان کی رہائش گاہ پر دھاوا بول دیا اور توڑ پھوڑ شروع کر دی۔

شیخ حسینہ جس ہیلی کاپٹر میں فرار ہوئیں اس نے پہلے بھارت میں اگر تلہ کے بی ایس ایف بیس پر لینڈنگ کی۔ اس کے بعد شیخ حسینہ وہاں سے دلی کی طرف روانہ ہوئی اور اور دلی کے قریب ہنڈن ایئرپورٹ پر اتریں۔

بنگلہ دیش میں عبوری حکومت سےمتعلق امریکابھی میدان میں آگیا

ویب ڈیسک: امریکی محکمہ خارجہ نے بنگلہ دیش کی صورتحال بارے ردعمل دیتے ہوئے کہا ہے کہ بنگلہ دیش میں عبوری حکومت کے قیام کا خیر مقدم کرتے ہیں۔

ترجمان امریکی محکمہ خارجہ میتھیو ملر نے پریس بریفنگ میں کہا ہے کہ بنگلہ دیش کی صورتحال کا جائزہ لے رہے ہیں، گزشتہ کئی روز کے دوران وہاں متعدد جانیں ضائع ہوئیں جن پر شدید افسوس ہے،  ان اموات کا احتساب یقینی بنانے کے لیے مکمل اور شفاف تحقیقات ہونی چاہئیں۔

ترجمان کا کہنا تھا کہ  امریکا بنگلا دیش کے عوام کے ساتھ کھڑا  ہے ، اقتدار کی منتقلی بنگلادیش کے آئین کے مطابق ہونی چاہیے۔

ترجمان امریکی محکمہ خارجہ نے مزید کہا کہ بنگلہ دیش میں تمام فریقین صبروتحمل کا مظاہرہ کریں ،  امریکا کو ایسی اطلاعات موصول ہوئی ہیں کہ فوج نے طلبہ کی قیادت میں ہونے والے مظاہروں پر مزید کریک ڈاؤن کرنے کے دباؤ کو تسلیم کرنے سے انکار کردیا ہے۔

انہوں نے کہا کہ اگر یہ حقیقت میں درست ہے کہ فوج نے قانونی مظاہرین کے خلاف کریک ڈاؤن کے مطالبے کی مزاحمت کی تو یہ ایک مثبت پیش رفت ہو گی۔

ملک میں اتوار تک پرتشدد مظاہروں میں 300 سے زائد افراد کی ہلاکت کے بعد حسینہ واجد نے وزارت عظمیٰ سے استعفیٰ دے دیا تھا اور آرمی چیف قمرالزمان نے آج ملک میں عبوری حکومت کے قیام کا اعلان کیا تھا۔

برطانوی میڈیا کے مطابق بنگلہ دیشی وزیر اعظم حسینہ واجد کو آرمی چیف نے 45منٹ کی ڈیڈ لائن دی تھی۔

شیخ حسینہ واجد کے استعفیٰ کے بعد بنگلہ دیش کے صدر محمد شہاب الدین نے فوجی قیادت سے ملاقات میں مختلف سیاسی جماعتوں اور سول سوسائٹی پر مشتمل عبوری حکومت قائم کرنے پر آمادگی کا اظہار کیا تھا  جبکہ فوج سے کہا گیا تھا کہ وہ جاری لوٹ مار بند کرائے اور قانون کی بلادستی بحال کرائی جائے۔

  واضح رہے کہ بنگلہ دیش میں 1971 کی جنگ لڑنے والوں کے بچوں کو سرکاری نوکریوں میں 30 فیصد کوٹہ دیے جانے کے خلاف گزشتہ ماہ کئی روز تک مظاہرے ہوئے تھے جن میں 200 افراد ہلاک ہوئے ، جس کے بعد سپریم کورٹ نے کوٹہ سسٹم کو ختم کردیا تھا مگر طلبہ نے اپنے ساتھیوں کو انصاف نہ ملنے تک احتجاج جاری رکھنے اور سول نافرمانی کی کال دے تھی اور ڈھاکہ کی طرف مارچ کا اعلان کیا تھا۔

طلبہ کافوجی حکومت قبول کرنےسےانکار،عبوری حکومت کا خاکہ پیش کردیا

ویب ڈیسک: بنگلہ دیش میں حسینہ واجد کے خلاف احتجاج کرنے والی طلبہ تحریک کے رہنما نے ملک میں فوجی حکومت قبول کرنے سے انکار کر دیا ہے، ساتھ ہی ڈاکٹر یونس کی سربراہی میں عبوری حکومت کا خاکہ بھی جاری کردیا گیا ہے۔

تفصیلا ت کے مطابق طلبہ تحریک کے رہنما ناہید اسلام نے کہا ہے کہ ہمیں بنگلہ دیش میں فوج کی حمایت یافتہ حکومت قبول نہیں ہے، ملک میں عبوری حکومت بنانی ہے تو اس کا خاکہ ہم دیں گے۔

طلبہ تحریک کے رہنما ناہید اسلام، آصف محمود اور ابوبکرمازوم دار نے ویڈیو پیغام کے ذریعے عبوری حکومت کا خاکہ جاری کرتے ہوئے مطالبہ کیا کہ نوبیل انعام یافتہ ڈاکٹر محمد یونس کے زیر سربراہی عبوری حکومت قائم کی جائے۔

ناہید اسلام نے کہا کہ طلبہ پہلے ہی ڈاکٹر یونس سے بات کرچکے ہیں اور وہ عبوری حکومت میں کردار پر آمادگی ظاہر کرچکے ہیں، دیگرنام آج صبح دیے جائیں گے.

طلبہ تحریک کے رہنما ناہیداسلام نے کہا کہ بنگلہ دیش کی عبوری حکومت اگلے 24 گھنٹوں میں قائم کردی جائے گی ، ہمیں متحد رہنا ہے اور مذہبی اشتعال انگیزی اور تقسیم سے بچنا ہے ، مظاہرین کو یہ سلسلہ روک دینا چاہیے۔

دوسری جانب ڈاکٹر محمد یونس نے اپنے بیان میں کہا کہ شیخ حسینہ واجد نے شیخ مجیب الرحمان کی میراث تباہ کردی تھی، بنگلہ دیش اب آزاد ہوگیا ہے۔

ادھر امریکہ نے بنگلہ دیش کی تازہ ترین صورتحال پر ردعمل کا اظہار کرتے ہوئے تمام فریقوں پر زور دیا ہے کہ وہ پرتشدد اقدامات سے گریز کریں۔

ملک میں اتوار تک پرتشدد مظاہروں میں 300 سے زائد افراد کی ہلاکت کے بعد حسینہ واجد نے وزارت عظمیٰ سے استعفیٰ دے دیا تھا اور آرمی چیف قمرالزمان نے آج ملک میں عبوری حکومت کے قیام کا اعلان کیا تھا۔

پیر کو بنگلہ دیش کے صدر محمد شہاب الدین نے فوجی قیادت سے ملاقات میں مختلف سیاسی جماعتوں اور سول سوسائٹی پر مشتمل عبوری حکومت قائم کرنے پر آمادگی ظاہر کی تھی۔

اس سلسلے میں فوج سے کہا گیا تھا کہ وہ جاری لوٹ مار بند کرائے اور قانون کی بلادستی بحال کرائی جائے۔

آرمی چیف وقار الزمان نے بھی مختلف سیاسی جماعتوں کے رہنماؤں اور سول سوسائٹی کے افراد سے ملاقاتیں بھی کی تھیں اور عبوری حکومت جلد قائم ہونے کا عندیہ دیا تھا، وہ طلبہ اور اساتذہ سے بھی ملاقاتیں کریں گے۔

ادھر بھارتی میڈیا کے مطابق بنگلہ دیش کی مستعفی وزیراعظم نے برطانیہ سے سیاسی پناہ کی درخواست کردی ہے جبکہ ان کی بہن شیخ ریحانہ کے پاس پہلے ہی سے برطانیہ کی شہریت ہے، دونوں بہنیں اس وقت بھارت میں ہیں۔

بنگلہ دیش میں 1971 کی جنگ لڑنے والوں کے بچوں کو سرکاری نوکریوں میں 30 فیصد کوٹہ دیے جانے کے خلاف گزشتہ ماہ کئی روز تک مظاہرے ہوئے تھے جن میں 200 افراد ہلاک ہوئے جس کے بعد سپریم کورٹ نے کوٹہ سسٹم کو ختم کردیا تھا۔