پاکستان کیخلاف پروپیگنڈا کرنے والے بھارتی یوٹیوب چینلز کو بلاک کر دیا  گیا

خیبر پختونخوا پولیس افسران کو اسلام آباد مارچ میں سہولت فراہم نہ کرنے کی ہدایت 

ویب ڈیسک: خیبر پختونخوا کے انسپکٹر جنرل پولیس (آئی جی پی) ذوالفقار حمید نے پولیس افسران کو ہدایت کی ہے کہ اسلام آباد کی جانب کسی مارچ، ریلی یا جلوس میں کسی قسم کی سہولت یا معاونت فراہم نہ کی جائے۔

آئی جی پی نے واضح کیا کہ اگر کسی پولیس افسر کو مارچ، ریلی یا جلوس میں سہولت فراہم کرنے کی ہدایت موصول ہو تو اس سے فوری طور پر آئی جی پولیس کو آگاہ کیا جائے۔ انہوں نے کہا کہ عدالتی احکامات کی خلاف ورزی کرنے والے افسر کے خلاف کارروائی کی جائے گی۔

اس سے قبل خیبر پختونخوا کے چیف سیکریٹری بھی سرکاری افسران کو اسلام آباد جانے والے کسی مارچ، ریلی یا جلوس میں معاونت یا سہولت فراہم نہ کرنے کی ہدایت کر چکے ہیں۔ ہدایات میں سرکاری وسائل اور فنڈز کے استعمال سے بھی منع کیا گیا ہے، جبکہ خلاف ورزی کی صورت میں محکمانہ کارروائی کا عندیہ دیا گیا ہے۔

یہ پیش رفت اسلام آباد ہائی کورٹ کے گزشتہ روز کے فیصلے کے بعد سامنے آئی ہے، جس میں عدالت نے قرار دیا تھا کہ کسی سیاسی جماعت یا صوبائی حکومت کو اسلام آباد کی جانب جانے والی شاہراہیں بند کرنے کا اختیار نہیں۔

ارب پتی افراد کو لامحدود زندگی کے بجائے وقت کو بہتر انداز میں گزارنا چاہیے ، برطانوی ماہرِ طبیعیات

ویب ڈیسک: برطانوی ماہرِ طبیعیات جم الخلیلی نے ارب پتی افراد کی ہمیشہ زندہ رہنے کی کوششوں پر سوال اٹھاتے ہوئے کہا ہے کہ انسان کو لافانی زندگی کے بجائے اپنے محدود وقت کو بہتر انداز میں گزارنے پر توجہ دینی چاہیے۔

جم الخلیلی کے مطابق آئن اسٹائن کے نظریۂ اضافیت نے وقت کے بارے میں انسانی تصور بدل دیا ہے۔ رفتار اور کششِ ثقل کے باعث مختلف افراد کے لیے وقت کے گزرنے کی رفتار مختلف ہو سکتی ہے۔

انہوں نے کہا کہ ماضی میں سفر بعض مخصوص حالات میں ریاضیاتی طور پر ممکن دکھائی دیتا ہے، تاہم اس سے پیچیدہ تضادات پیدا ہوتے ہیں، جبکہ مستقبل میں سفر نظریاتی طور پر نسبتاً ممکن ہے۔ یہ روشنی کی رفتار کے قریب سفر یا انتہائی طاقتور کششِ ثقل کے اثر میں ممکن ہو سکتا ہے۔

ماہرِ طبیعیات نے مزید کہا کہ وہ وقت کے ایک اہم معمے، یعنی وقت کے صرف ایک سمت میں گزرنے، کی سائنسی وضاحت بھی پیش کریں گے۔ ان کے مطابق وہ اس موضوع پر رائل انسٹی ٹیوشن کے کرسمس لیکچرز میں تفصیل سے بات کریں گے۔

اٹلی کے لیجنڈ فٹبالر سینڈرو ماتزولا انتقال کرگئے

ویب ڈیسک: اٹلی اور انٹر میلان کے سابق اسٹار فٹبالر سینڈرو ماتزولا 83 برس کی عمر میں انتقال کر گئے ہیں۔

ہفتے کے روز ان کے انتقال کی تصدیق کرتے ہوئے انٹر میلان نے انہیں فٹبال کی تاریخ کے عظیم ترین کھلاڑیوں میں سے ایک قرار دیا۔

ماتزولانے انٹر میلان کے ساتھ چار 'سیری اے' (Serie A) ٹائٹل اور مسلسل دو یورپی کپ (1964 اور 1965 میں) جیتے۔ انہوں نے کلب کے لیے 565 میچوں میں 158 گول کیے اور ریال میڈرڈ کے خلاف 1964 کے یورپی کپ کے فائنل میں اہم کردار ادا کرتے ہوئے 3-1 کی فتح میں دو گول اسکور کیے۔

مازولا نے اٹلی کی جانب سے 70 میچوں میں 22 گول کیے اور 1968 کی یورپی چیمپئن شپ کا ٹائٹل جیتا۔ وہ 1970 کے ورلڈ کپ فائنل کے لیے اطالوی اسکواڈ کا بھی حصہ تھے، جس میں برازیل نے اٹلی کو 1-4 سے شکست دی تھی۔

مازولا نے 17 سالہ پیشہ ورانہ کیریئر کے بعد 1977 میں ریٹائرمنٹ  لی۔ بعد ازاں، انہوں نے انٹر میلان میں انتظامی ذمہ داری سنبھالی اور ٹورینو کے اسپورٹنگ ڈائریکٹر کے طور پر بھی خدمات انجام دیں۔

کیمرون کی طالبہ کا انوکھا کوکنگ بیگ، بغیر بجلی اور آگ کے کھانا تیار

ویب ڈیسک: کیمرون کی فزکس کی طالبہ نے ایسا تھرمل کوکنگ بیگ تیار کیا ہے جس کی مدد سے کھانا بجلی یا مسلسل آگ کے بغیر پکایا جا سکتا ہے۔

یہ بیگ موصلیت فراہم کرنے والے خاص مٹیریل سے تیار کیا گیا ہے اور سلو کُکر کی طرح کام کرتا ہے۔ کھانا پکانے کے لیے پتیلی کو پہلے صرف 5 سے 10 منٹ تک چولہے پر اُبالا جاتا ہے، پھر ڈھکن سمیت اسے بیگ میں رکھ کر اچھی طرح بند کردیا جاتا ہے۔

بیگ اندر موجود حرارت کو برقرار رکھتا ہے، جس کے باعث کھانا کئی گھنٹوں تک آہستہ آہستہ پکتا رہتا ہے۔ یہ طریقہ خاص طور پر چاول، دال اور گوشت پکانے کے لیے مفید ہے، جبکہ سوپ تقریباً 20 منٹ میں تیار کیا جا سکتا ہے۔

اس ٹیکنالوجی کے استعمال سے کھانا پکانے کے لیے ایندھن کی کھپت میں 70 فیصد تک کمی کا دعویٰ کیا گیا ہے، جس سے درختوں کی کٹائی اور دھوئیں میں بھی کمی لائی جا سکتی ہے۔

کیمرون میں اب تک ایسے 2 ہزار سے زائد بیگ فروخت کیے جا چکے ہیں۔

سفیر عمران حیدر نے بھوٹان کے بادشاہ کو اپنی سفارتی اسناد پیش کر دیں

ویب ڈیسک: سفیر عمران حیدر نے بھوٹان کے بادشاہ جگمے کھیسر نامگیال وانگچک کو ایک پروقار تقریب میں اپنی سفارتی اسناد پیش کر دیں۔

بھوٹان کے بادشاہ نے سفیر عمران حیدر کا پرتپاک خیرمقدم کیا اور ان کی تقرری پر مبارکباد پیش کی۔ بھوٹان کے بادشاہ نے پاکستان کے عوام اور قیادت کے لیے نیک خواہشات کا اظہار کیا۔

سفیر عمران حیدر نے صدرِ پاکستان اور وزیراعظم پاکستان کی جانب سے بھوٹان کے بادشاہ کو تہنیتی پیغامات اور نیک تمنائیں پہنچائیں۔ سفیر عمران حیدر نے بھوٹان کے ساتھ دوستانہ تعلقات کے فروغ کے لیے پاکستان کے عزم کا اعادہ کیا۔

ایران کسی بھی جارحانہ اقدام کا بھرپور جواب دینے کے لیے تیار ہے، پاسداران انقلاب

ویب ڈیسک: ایرانی پاسدارانِ انقلاب کی بری فوج کے کمانڈر محمد کرمی نے کہا ہے کہ ایران دشمن کی جانب سے کسی بھی غلط اندازے یا جارحانہ اقدام کا طاقت کے ساتھ جواب دینے کے لیے مکمل طور پر تیار ہے۔

غیر ملکی میڈیا کے مطابق محمد کرمی نے کہا کہ ایران کے پاس دشمن کی کسی بھی ممکنہ کارروائی کا بھرپور جواب دینے کی صلاحیت اور تیاری موجود ہے۔

رپورٹس کے مطابق تہران میں امام حسین اسکوائر سے انقلاب اسکوائر تک ایک بڑا جلوس نکالا گیا، جس میں ’جان فدا‘ مہم کی جنگی بٹالینز اور مختلف شعبوں سے تعلق رکھنے والے افراد نے شرکت کی۔

ایرانی میڈیا کے مطابق ملک کو لاحق ممکنہ خطرات سے نمٹنے کے لیے ’جان فدا‘ مہم کے تحت 3 لاکھ 13 ہزار افراد کو متحرک کیا گیا ہے۔

بسیج تنظیم کے سربراہ حسین طائب نے ریلی سے خطاب کرتے ہوئے ’جان فدا‘ مہم کو ایران کی عوامی ثابت قدمی کی علامت قرار دیا۔ ان کا کہنا تھا کہ یہ دنیا کی جنگی تاریخ کی سب سے بڑی عوامی مہم ہے۔

دہشت گردوں سے مذاکرات نہیں ہوں گے، ڈی جی آئی ایس پی آر

ویب ڈیسک: ڈی جی آئی ایس پی آر لیفٹیننٹ جنرل احمد شریف چودھری نے کہا ہے کہ دہشت گردوں کے ساتھ کسی قسم کے مذاکرات نہیں ہوں گے، ریاست کی پالیسی اس معاملے پر واضح ہے۔

عرب نیوز کو دیے گئے خصوصی انٹرویو میں لیفٹیننٹ جنرل احمد شریف چودھری نے کہا کہ افغانستان کے حوالے سے پاکستان کا بنیادی مطالبہ واضح ہے کہ افغان سرزمین سے پاکستان کے خلاف ہونے والی دہشت گردی کو روکا جائے۔ انہوں نے کہا کہ افغان طالبان حکومت کو دوحہ معاہدے کے تحت کیے گئے وعدوں پر عمل درآمد کرنا ہوگا، بصورتِ دیگر پاکستان کو اپنے دفاع کا مکمل حق حاصل ہے۔ ان کے مطابق پاکستان افغانستان سے بات چیت کرسکتا ہے، تاہم دہشت گردوں کے ساتھ مذاکرات نہیں کیے جائیں گے۔

ڈی جی آئی ایس پی آر نے دعویٰ کیا کہ پاکستان میں ہونے والے خودکش حملوں کے تقریباً 80 فیصد حملہ آور افغان شہری ہیں، جبکہ افغانستان سے پاکستان آنے والے دہشت گرد گروہوں میں بھی افغان شہری شامل ہوتے ہیں۔

بلوچستان میں دہشت گردی
بلوچستان کی صورتحال پر بات کرتے ہوئے لیفٹیننٹ جنرل احمد شریف چودھری نے کہا کہ دہشت گردوں کو عوامی حمایت حاصل نہیں اور وہ بندوق کے زور پر اپنا نظریہ مسلط کرنے کی کوشش کر رہے ہیں۔

انہوں نے پاکستان کے مؤقف کا حوالہ دیتے ہوئے کہا کہ بلوچستان میں دہشت گردی کی سرپرستی بھارت کر رہا ہے، جبکہ سوشل میڈیا پر دہشت گردی سے متعلق مواد بھی بیرونِ ملک سے آپریٹ کیا جا رہا ہے۔ بھارت ماضی میں پاکستان کی جانب سے عائد ان الزامات کی تردید کرتا رہا ہے۔

سعودی عرب کے دفاع کے لیے پاکستان کا عزم
سعودی عرب کی سلامتی کے حوالے سے ڈی جی آئی ایس پی آر نے کہا کہ پاکستان عملی اور سفارتی سطح پر سعودی عرب کے ساتھ کھڑا ہے اور سعودی قیادت کی ضرورت کے مطابق حرمین شریفین اور مملکت کے تحفظ کے لیے اپنا کردار ادا کرنے کو تیار ہے۔

ان کا کہنا تھا کہ سعودی عرب کی سلامتی کے لیے پاکستان کا عزم غیر مشروط ہے، جو دونوں ممالک کے عوام اور سیاسی و عسکری قیادت کے درمیان دیرینہ اور تاریخی تعلقات سے جڑا ہوا ہے۔

لیفٹیننٹ جنرل احمد شریف چودھری نے کہا کہ پاکستان اور سعودی عرب کے درمیان دفاعی تعاون اور باہمی عزم کے تحت کیے گئے وعدوں کی پاسداری جاری ہے، جبکہ پاکستان کی سیاسی اور عسکری قیادت سعودی قیادت سے مسلسل رابطے میں ہے۔

انہوں نے مزید کہا کہ سعودی عرب کے خلاف کسی بھی جارحیت کی صورت میں پاکستان اپنے عزم کے مطابق مملکت کے دفاع کے لیے تیار ہے۔

سونے اور چاندی کی قیمتوں میں معمولی کمی

ویب ڈیسک: عالمی اور مقامی صرافہ مارکیٹ میں سونے اور چاندی کی قیمتوں میں معمولی کمی ریکارڈ کی گئی ہے۔

صرافہ مارکیٹ کے مطابق 24 قیراط فی تولہ سونا 100 روپے سستا ہو کر 4 لاکھ 60 ہزار 236 روپے کا ہوگیا، جبکہ 10 گرام سونے کی قیمت میں 85 روپے کمی ہوئی، جس کے بعد یہ 3 لاکھ 94 ہزار 578 روپے کی سطح پر آگئی۔

عالمی مارکیٹ میں بھی سونے کی قیمت میں معمولی کمی دیکھی گئی اور فی اونس سونا ایک ڈالر کمی کے بعد 4 ہزار 377 ڈالر کا ہوگیا۔

دوسری جانب 24 قیراط فی تولہ چاندی کی قیمت میں بھی 69 روپے کمی ریکارڈ کی گئی، جس کے بعد چاندی 7 ہزار 100 روپے فی تولہ ہوگئی۔

سینئر تھیٹر اداکار آصف اقبال انتقال کرگئے 

ویب ڈیسک: پاکستانی تھیٹر انڈسٹری کے سینئر اداکار آصف اقبال انتقال کرگئے۔ اہلِ خانہ کے مطابق انہیں اچانک دل کا دورہ پڑا جو جان لیوا ثابت ہوا۔

آصف اقبال طویل عرصے سے تھیٹر سے وابستہ تھے اور اپنے منفرد اندازِ اداکاری، برجستگی اور مزاحیہ کرداروں کے باعث ناظرین میں خاصے مقبول تھے۔

اپنے فنی کیریئر کے دوران انہوں نے متعدد اسٹیج ڈراموں میں یادگار کردار ادا کیے اور تھیٹر کے لیے نمایاں خدمات انجام دیں۔

ان کے ساتھی فنکاروں، مداحوں اور دیگر شوبز شخصیات نے آصف اقبال کے انتقال پر گہرے رنج و غم کا اظہار کرتے ہوئے انہیں خراجِ عقیدت پیش کیا۔ فنکاروں کا کہنا ہے کہ تھیٹر کے لیے ان کی خدمات اور یادگار کردار ہمیشہ یاد رکھے جائیں گے۔

اہلِ خانہ کے مطابق آصف اقبال کی نمازِ جنازہ اور تدفین کے حوالے سے تفصیلات بعد میں جاری کی جائیں گی۔

اقوام متحدہ کے دفتر کے باہر کشمیریوں کا احتجاج، انسانی حقوق کی خلاف ورزیوں کے فوری خاتمے کا مطالبہ

ویب ڈیسک: جنیوا میں اقوام متحدہ کے دفتر کے باہر کشمیریوں نے احتجاج کیا جس میں انسانی حقوق کی خلاف ورزیوں کے فوری خاتمے کا مطالبہ کیا گیا۔مظاہرے کے دوران مقررین نے مقبوضہ کشمیر میں آبادی کے تناسب میں تبدیلی کی کوششوں پر اظہار تشویش کیا۔

کے ایم ایس کے مطابق  شرکاء نے ”آرمڈ فورسز اسپیشل پاورز ایکٹ ، پبلک سیفٹی ایکٹ ، یو اے پی اے“ جیسے کالے قوانین کے مسلسل استعمال کی بھرپور مذمت کی۔ سابق وزیر چوہدری پرویز اشرف اور KIIR کے چیئرمین الطاف حسین وانی نے جنیوا میں احتجاجی مظاہرے سے خطاب کیا۔ مقررین نے اس بات پر زور دیا کہ اقوام متحدہ کی سلامتی کونسل جموں و کشمیر کے بارے میں اپنی قراردادوں پر عملدرآمد کیلئے عملی اقدامات کرے ۔ کشمیری عوام کا حقِ خودارادیت ناقابلِ تنسیخ ہے۔ سلامتی کونسل اپنے وعدوں اور قراردادوں کو عملی جامہ پہنائے۔

مقررین نے سیاسی رہنماؤں، کارکنوں اور انسانی حقوق کے محافظوں کو ہراساں کرنے اور طویل حراست میں رکھنے کا سلسلہ بند کرنے کا مطالبہ بھی کیا۔ حریت رہنما یاسین ملک سمیت تمام اسیر کشمیری سیاسی قیدیوں کے مقدمات اور حراستی حالات کی بین الاقوامی نگرانی کی جائے۔ بھارت کے نام نہاد ترقیاتی اقدامات دراصل مقبوضہ علاقے میں آبادکاری کے نوآبادیاتی منصوبے کا گھناؤنا حصہ ہیں۔ 
 کشمیری رہنماوں زاہد ہاشمی، پرویز احمد شاہ اور شمیم شال سمیت دیگر کشمیری نمائندوں نے عالمی برادری سے فوری ایکشن کا پرزور مطالبہ کیا۔

"ڈائیلاگ"

سخاوت ناز بنے پبلک ڈیمانڈ سیزن 2 کے خاص مہمان

"پبلک اوپینین"

"Public Pulse"

جمائما نے ٹایان وائٹ کو اپنی "سوتیلی بیٹی" تسلیم کر لیا

ویب ڈیسک: سابق وزیراعظم عمران خان کی سابقہ ​​اہلیہ جمائما گولڈ سمتھ نے سوشل میڈیا پر اپنی دوسری شادی کی تصاویر شیئر کردیں جس میں انہوں نےٹایان وائٹ کو اپنی "سوتیلی بیٹی" قرار دیا، جبکہ ٹایان نے اس تقریب میں ان کی 'میڈ آف آنر' (دلہن کی مرکزی معاون) کے طور پر خدمات انجام دیں۔

میڈیا رپورٹس کے مطابق جمائما نے 12 ستمبر کو آئرش نژاد آسٹریلوی فنانسر کیمرون او ریلی سے نجی تقریب میں شادی کی۔ تقریب میں دونوں خاندانوں کے بچوں نے بھی اہم کردار ادا کیا۔

جمائما نے اپنی پوسٹ میں کیمرون کی بیٹیوں شاہ اور تارا او ریلی کو برائیڈز میڈز جبکہ ٹریان وائٹ کو اپنی ’قیمتی سوتیلی بیٹی‘ قرار دیا۔ ان کے بیٹے سلیمان اور قاسم خان نے بھی والدہ کو ایزل تک پہنچایا۔

ٹریان وائٹ امریکی خاتون سیتا وائٹ کی بیٹی ہیں۔ سیتا وائٹ کے انتقال کے بعد جمائما نے ٹریان کی پرورش میں اہم کردار ادا کیا۔ ٹریان کے معاملے پر عمران خان اور سیتا وائٹ کے درمیان طویل عرصے تک قانونی تنازع بھی رہا، جبکہ عمران خان نے ٹریان کو اپنی بیٹی تسلیم نہیں کیا۔

جمائما اور عمران خان کی شادی 1995 میں ہوئی تھی اور دونوں 2004 میں علیحدہ ہوگئے تھے۔ ان کے دو بیٹے سلیمان اور قاسم ہیں۔

ڈومیسٹک کرکٹ میں چھکوں کا نیا ریکارڈ قائم

ویب ڈیسک: پاکستان میں جاری ڈومیسٹک فرسٹ کلاس کرکٹ میں ایک اننگز میں سب سے زیادہ چھکوں کا نیا ریکارڈ قائم ہوگیا۔

پریزیڈنٹ ٹرافی میں کرم ایجنسی کے دائیں ہاتھ کے بیٹر محمد فاروق نے شاندار بیٹنگ کا مظاہرہ کرتے ہوئے ایک اننگز میں 14 چھکے جڑ دیے۔ محمد فاروق نے صرف 99 گیندوں پر 163 رنز کی برق رفتار اننگز کھیلی۔

اس سے قبل فرسٹ کلاس کرکٹ کی ایک اننگز میں سب سے زیادہ چھکوں کا ریکارڈ 12 چھکوں کا تھا، جو تقریباً 50 سال قبل ریلویز کی جانب سے کھیلنے والے گل فراز خان نے قائم کیا تھا۔ محمد فاروق نے 14 چھکے لگا کر یہ ریکارڈ اپنے نام کرلیا۔

سلمان علی آغا کی شاندار واپسی، کیریئر کی پہلی ٹرپل سنچری
ٹیسٹ ٹیم سے ڈراپ کیے جانے کے بعد سلمان علی آغا نے ڈومیسٹک کرکٹ میں شاندار واپسی کرتے ہوئے فرسٹ کلاس کیریئر کی پہلی ٹرپل سنچری اسکور کرلی۔ سلمان علی آغا نے ٹیم مارخور کے خلاف جارحانہ انداز اپناتے ہوئے 42 چوکوں اور 6 چھکوں کی مدد سے ٹرپل سنچری مکمل کی۔ اس کارکردگی کے ساتھ وہ ڈومیسٹک فرسٹ کلاس کرکٹ میں ٹرپل سنچری بنانے والے 18ویں پاکستانی بیٹر بن گئے۔

واضح رہے کہ دورۂ ویسٹ انڈیز اور انگلینڈ میں کارکردگی کے باعث سلمان علی آغا کو تنقید کا سامنا کرنا پڑا تھا۔ انگلینڈ کے خلاف تیسرے ٹیسٹ کے لیے انہیں قومی اسکواڈ سے ڈراپ کیا گیا، جس کے بعد وہ وطن واپس آگئے تھے۔

وزیراعظم ریلیف اسکیم: 5 لیٹر سے کم پیٹرول پر بھی رعایت ملے گی

ویب ڈیسک: وزیراعظم خصوصی ریلیف اسکیم کا ملک بھر میں اجرا ہوگیا، جس کے تحت اہل شہریوں کو پیٹرول پر 100 روپے فی لیٹر رعایت دی جا رہی ہے۔

وزیراعظم آفس کے مطابق موٹر سائیکل، چنگ چی اور رکشہ مالکان کو 5 لیٹر سے کم پیٹرول خریدنے پر بھی رعایت دینے کی ہدایت کردی گئی ہے۔ ہفتے میں ایک ٹوکن اور ماہانہ 4 ٹوکن جاری ہوں گے۔

اس کے علاوہ 800 سی سی تک کی گاڑیوں کے مالکان ہر 10 روز میں 10 لیٹر پیٹرول پر 100 روپے فی لیٹر رعایت حاصل کرسکیں گے، جبکہ ماہانہ 10 لیٹر کے 3 ٹوکن جاری کرنے کا سلسلہ بھی جاری رہے گا۔

وزیراعظم آفس کے مطابق یکم جنوری 2006 کے بعد رجسٹرڈ موٹر سائیکلیں، رکشے اور چنگ چی رکشے بھی اسکیم میں شامل ہیں۔

اسکیم سے پاکستان، آزاد کشمیر اور گلگت بلتستان کے اہل شہری استفادہ کرسکتے ہیں، جبکہ رجسٹریشن کے لیے میسج سروس بھی مفت کردی گئی ہے۔

کوہاٹ پولیس لائنز مسجد دھماکا: آپریشن مکمل، 7 خوارج ہلاک 

ویب ڈیسک: کوہاٹ پولیس لائنز کی مسجد میں ہونے والے دھماکے کے بعد سیکیورٹی فورسز نے آپریشن مکمل کرلیا، کارروائی کے دوران پولیس لائنز میں چھپے آخری دو خودکش بمباروں سمیت مجموعی طور پر 7 خوارج ہلاک ہوگئے۔

سکیورٹی ذرائع کے مطابق فجر کے بعد پاک فوج نے پولیس لائنز میں کارروائی کی، جس کے دوران آخری دو خودکش بمباروں کو بھی ہلاک کردیا گیا۔

ذرائع کا کہنا ہے کہ آپریشن کی براہِ راست نگرانی کوہاٹ کے جنرل آفیسر کمانڈنگ نے کی۔ کارروائی مکمل ہونے کے بعد پاک فوج کے کمانڈوز، جوانوں اور بم ڈسپوزل اسکواڈ نے علاقے کو کلیئر کرکے پولیس کے حوالے کردیا۔

دوسری جانب دھماکے میں زخمی ہونے والا ایک پولیس اہلکار بھی دم توڑ گیا، جس کے بعد واقعے میں شہید ہونے والے افراد کی تعداد 22 ہوگئی ہے۔

پیٹرولیم مصنوعات کی قیمتوں میں کمی کردی گئی

(ویب ڈیسک)اوگرا نے حکومتی پٹرولیم پرائسنگ میکنزم کے تحت 19 ستمبر تا 21 ستمبر 2026 کے لیے پٹرولیم مصنوعات کی ایکس ڈپو قیمتوں میں ردوبدل کردیا۔

پیٹرولیم ڈویژن کے مطابق اعلان کردہ قیمتیں عالمی مارکیٹ میں پٹرول اور ڈیزل کی قیمتوں سے منسلک ہیں۔نوٹیفکیشن کے مطابق ہائی اسپیڈ ڈیزل کی قیمت میں 88 پیسے فی لیٹر کمی کردی گئی جس کے بعد نئی قیمت 424 روپے 4 پیسے ہوگئی۔

پٹرول کی قیمت میں1 روپے 65 پیسے فی لیٹر کمی سے نئی قیمت 389 روپے 14 پیسے  ہوگئی۔

اعلامیے میں کہا گیا ہے کہ عالمی مارکیٹ میں تبدیلیوں، پلاٹس ریٹس، پریمیم اور دیگر اخراجات کے مطابق پٹرولیم مصنوعات کی قیمتوں میں ردوبدل کیا گیا۔

پنجاب میں سانپ کے ڈسنے کے واقعات میں خطرناک حد تک اضافہ

(ویب ڈیسک)صوبائی دارالحکومت لاہور سمیت پنجاب بھر میں رواں سال سانپ کے ڈسنے کے واقعات میں تشویشناک اضافہ ریکارڈ کیا گیا ہے، جہاں گزشتہ 8 ماہ کے دوران سانپ کے کاٹنے کے ایک ہزار سے زائد کیسز سامنے آئے ہیں۔

رپورٹ کے مطابق یکم جنوری سے 31 اگست تک کے دورانیے میں پنجاب بھر سے سانپ کے کاٹنے کے مجموعی طور پر 1,070 واقعات رپورٹ ہوئے۔ان 8 ماہ کے دوران سانپ کے زہر کے باعث 6 افراد جان کی بازی ہار گئے۔متاثرین میں 614 مرد اور 446 خواتین شامل ہیں۔

ترجمان محکمہ وائلڈ لائف کے مطابق  برسات کے موسم میں سانپ کے کاٹنے کے واقعات میں اضافہ ہوجاتا ہے۔ کچی آبادیوں میں پانی جمع ہونے کے باعث سانپ آبادیوں کا رخ کر لیتے ہیں۔

آئندہ 3 روز کیلئے پیٹرولیم مصنوعات کی قیمتوں میں کتنا اضافہ ہوگا؟اہم خبر

(ویب ڈیسک ) آئندہ تین روز کے لئے پیٹرولیم مصنوعات کی قیمتوں کا تعین آج ہو گا۔

ذرائع کا کہناہے کہ پیٹرول کی فی لٹر قیمت میں 2 روپے سے کچھ زائد اضافے کا امکان ہے،آئندہ تین روز کے لئے پیٹرول کی فی لٹر قیمت 393 روپے سے کچھ زائد مقرر ہونے کا امکان ہے۔

ذرائع کے مطابق ڈیزل کی قیمت میں آئندہ تین روز کے لئے معمولی کمی کا امکان ہے۔ڈیزل کی فی لٹر قیمت میں 90 پیسے یا اس سے کچھ زائد کمی کی جا سکتی ہے۔

پیٹرولیم ڈویژن حتمی قیمت کو کچھ دیر میں نوٹیفائی کرے گا۔

کوہاٹ دہشتگرد حملہ: پاک فوج کی کمانڈ نے فرنٹ لائن پر خود آپریشن کی قیادت کی

(ویب ڈیسک) خیبرپختونخوا کے ضلع کوہاٹ میں دہشت گرد حملے کے دوران پاک فوج کی کمانڈ نے روایتی عزم اور جرات کا مظاہرہ کرتے ہوئے فرنٹ لائن پر موجود رہ کر خود آپریشن کی قیادت کی ہے۔

تفصیلات کے مطابق کوہاٹ میں دہشت گرد حملے کے دوران پاک فوج کی کمانڈ نے فرنٹ لائن پر موجود رہ کر آپریشن کی قیادت کی۔کمانڈرز نے جوانوں کے شانہ بشانہ میدان میں رہتے ہوئے عزم اور جرات کا مظاہرہ کیا۔

لیڈنگ فرام دی فرنٹ کی یہ روایت پاک فوج کی مضبوط کمانڈ اور حوصلے کی عکاس ہے۔ 

ٹھٹہ میں تعلیمی انقلاب: وزیرِ تعلیم سندھ کا گھارو، مکلی میں جدید سہولیات سے آراستہ اسکولز کا افتتاح 

(ویب ڈیسک): صوبائی وزیرِ تعلیم سندھ سید سردار علی شاہ نے ضلع ٹھٹہ کے علاقوں گھارو اور مکلی میں نئے سیکنڈری بلاکس، اسٹیٹ آف دی آرٹ انفراسٹرکچر اور جدید ترین تعلیمی سہولیات سے آراستہ اپ گریڈ کیے گئے اسکولوں کا باضابطہ افتتاح کر دیا ہے۔

تفصیلات کے مطابق گھارو اور مکلی میں اپ گریڈ کیے گئے جدید اسکولوں کی افتتاحی تقریب میں ایشیائی ترقیاتی بینک (ADB) پاکستان کی کنٹری ڈائریکٹر ایما فین نے بھی خصوصی طور پر شرکت کی۔

اسکولوں میں نئے سیکنڈری بلاکس اور جدید انفراسٹرکچر کے قیام کا بنیادی مقصد طلبا و طالبات کو بین الاقوامی معیار کا تعلیمی ماحول فراہم کرنا ہے۔

پروگرام کے پہلے مرحلے کے تحت ایشیائی ترقیاتی بینک کے باہمی تعاون و اشتراک سے سندھ بھر کے 10 اضلاع میں مجموعی طور پر 116 اسکولوں کی اپ گریڈیشن اور تعمیر کا کام تکمیل کے آخری مراحل میں داخل ہو چکا ہے۔

اس منصوبے سے صوبہ سندھ میں اسکولوں کے مجموعی بنیادی ڈھانچے کو جدید خطوط پر استوار کرنے اور بچوں کے لیے بہتر تعلیمی ماحول کی فراہمی میں مدد ملے گی۔

عدالتی فیصلے کے بعد دھاوا بولنے کا کوئی جواز نہیں، فورسز کو بتا دیا ہر ممکن طریقے سے ان کو روکیں گے، محسن نقوی

(ویب ڈیسک): وفاقی وزیر داخلہ محسن نقوی نے اہم پریس کانفرنس کرتے ہوئے کہا ہے کہ اسلام آباد ہائیکورٹ کا تفصیلی فیصلہ آچکا ہے، عدالتی فیصلے کے بعد کوئی صورت نہیں بنتی کہ اسلام آباد پر دھاوا بولا جائے۔ عدالتی فیصلے کے بعد کوئی جواز نہیں بنتا اور نہ ان کو احتجاج کی اجازت ہے۔ اگر کسی نے عدالتی فیصلے کی خلاف ورزی کی تو اس کے خلاف توہین عدالت کی درخواست دائر کرینگے۔

وفاقی وزیر داخلہ محسن نقوی نے کہا ہے اگر آپ کو احتجاج کرنا ہے تو اپنے علاقے اور شہر میں کریں، آپ اپنے علاقے میں احتجاج ضرور کریں لیکن کسی صوبے پر حملہ قبول نہیں۔ سیاسی جلسے جلوس اور اس طرح کی یلغار کرنے والے جتھوں میں فرق ہوتا ہے۔ 

انہوں نے کہا کہ سوشل میڈیا پر بات چیت ہورہی ہے کہ مخصوص قبائل کے لوگ آرہے ہیں۔ زیب نہیں دیتا کہ ایک طرف شہدا کے جنازے اٹھائیں اور دوسری طرف دھرنوں کی تیاری کریں۔ آج کوہاٹ میں دہشت گردی کا افسوسناک واقعہ ہوا، وزیراعلیٰ اور ان کی کابینہ اتنی محنت دہشت گردی کا مقابلہ کرنے کیلئے کرے، وزیراعلیٰ کے پی لانگ مارچ کے بجائے دہشت گردی کے خلاف محنت کریں۔

محسن نقوی کا کہنا تھا کہ تمام فورسز کو بتا دیا ہے کہ ہر ممکن طریقے سے ان کو روکیں گے، جوانوں کو بتادیا ایسا نہیں ہوگا وہ گولی چلائیں تو آپ چپ بیٹھیں، اگر کسی کی جان گئی تو ذمہ دار وہ ہوں گے جو جتھوں کو لانے والے آرگنائزر ہوں گے۔ یہ سمجھتے ہیں جتھوں سے مسائل حل ہوں گے تو ہم نمٹنے کیلئے تیار ہیں، اسلام آباد میں احتجاج سے نمٹنے کیلئے ہم بالکل تیار ہیں اور صوبے بھی احتجاج کے معاملے پر مکمل تیار ہیں۔ کسی صورت بدامنی نہیں پھیلانے دیں گے جیسے ماضی میں پھیلائی گئی۔

انہوں نے مزید کہا کہ کنٹینر لگانے کے ذاتی طور پر خلاف ہوں لیکن مجبوراً ایسا کرنا پڑتا ہے، وہ احتجاج کریں گے تو ہمیں اسلام آباد کو سیل کرنا ہوگا، یہ احتجاج کرتے ہیں تو مجبوراً ہمیں اسلام آباد میں راستے بند کرنا پڑیں گے، تاہم میری کوشش ہوگی کہ اسلام آباد کے شہریوں کو کم سے کم مشکلات ہوں۔ 

محسن نقوی نے کہا کہ پی ٹی آئی والے پارٹی میں بھی ووٹنگ کرالیں تو وہ بھی احتجاج کے حق میں نہیں ہوں گے، محب وطن پاکستانی، سیاستدان کی حیثیت میں سوچیں کیا یہ حالات احتجاج کیلئے ٹھیک ہیں؟ وزیراعظم نے فلور پر کئی بار ان سے بات چیت کرنے کا ذکر کیا۔

الرجی اور نزلہ زکام کی دوا کے مخصوص بیچز پر پابندی، مارکیٹ سے واپس منگوانے کا حکم

ویب ڈیسک: محکمہ صحت حکومت پنجاب اور ڈائریکٹوریٹ آف ڈرگز کنٹرول نے الرجی اور نزلہ زکام کے لیے استعمال ہونے والی دوا Citraclor کے مخصوص بیچز کو غیر معیاری قرار دیتے ہوئے میڈیکل الرٹ جاری کردیا۔

محکمہ صحت کے مطابق یہ کارروائی ڈرگ ٹیسٹنگ لیبارٹری پنجاب کی رپورٹ کی روشنی میں کی گئی، جس میں دوا کے نمونوں کے تجزیے کے دوران عضویاتی ناپائیداری اور آلائشوں کی موجودگی کی نشاندہی کی گئی ہے۔

الرجی اور نزلہ زکام کے لیے استعمال ہونے والی Citraclor (Cetirizine Dihydrochloride 10mg) میسرز آرسنز فارماسیوٹیکل انڈسٹریز، لاہور کی تیار کردہ دوا ہے۔

میڈیکل الرٹ کے مطابق 38126، 37826، 37726، 38026 اور 37926 بیچ نمبرز کو غیر معیاری قرار دیا گیا ہے۔ ان تمام بیچز کی میعاد مارچ 2028 تک ہے۔

حکام نے ملک بھر کے میڈیکل اسٹورز، فارمیسیوں، اسپتالوں اور ہول سیلرز کو ہدایت کی ہے کہ مذکورہ بیچز کی فروخت فوری طور پر روک دی جائے اور دستیاب اسٹاک کی تفصیلات متعلقہ ڈرگ انسپکٹر کو فراہم کی جائیں۔

الرٹ میں مذکورہ دوا کے متاثرہ بیچز کو مارکیٹ سے فوری طور پر واپس منگوانے کی بھی ہدایت کی گئی ہے۔

حکام نے شہریوں اور مریضوں کو بھی ہدایت کی ہے کہ وہ Citraclor کے مذکورہ بیچز کا استعمال نہ کریں اور اگر ان کے پاس یہ دوا موجود ہے تو اسے استعمال کرنے سے قبل ڈاکٹر یا فارماسسٹ سے مشورہ کریں۔

کوہاٹ بم دھماکے میں 21 افراد بشمول 15 پولیس اہل کار شہید , پولیس ذرائع

(ویب ڈیسک)پولیس ذرائع نے تصدیق کی ہے کہ اب تک کوہاٹ پولیس مسجد بم دھماکہ میں 21 افراد بشمول 15 پولیس اہل کار شہید ہو چکے ہیں۔34 زخمی افراد ہسپتال میں زیرِ علاج ہیں، جبکہ 4 کی حالت تشویشناک ہیں اور ان کو پشاور منتقل کر دیا گیا ہے۔

کوہاٹ بم دھماکے کے بعدسیکیورٹی فورسز کا علاقے میں سرچ آپریشن جاری ہے۔

سیکیورٹی ذرائع کا کہنا ہے کہ دھماکے کی اطلاع ملتے ہی  سیکیورٹی فورسز کے دستے جائے وقوعہ پر پہنچ گئے ،سیکیورٹی فورسز نے علاقے کو گھیرے میں لے کرسرچ آپر یشن شروع کردیا ہے، دھماکے کی نوعیت اوراس کے محرکات سے متعلق مزید معلومات اکٹھی کی جارہی ہیں۔

جب تک ٹرمپ، نیتن یاہو اقتدار میں ہیں آبنائے ہرمز نہیں کھلے گی ،سیاسی مشیر سپریم لیڈر

(ویب ڈیسک )ایرانی رہبرِ انقلاب کے سیاسی مشیر محمد باقر ذوالقدر نے دوٹوک مؤقف اپناتے ہوئے اعلان کیا ہے کہ جب تک امریکی صدر ڈونلڈ ٹرمپ اور اسرائیلی وزیراعظم نیتن یاہو برسرِ اقتدار ہیں، اس وقت تک 'آبنائے ہرمز' کو کسی صورت نہیں کھولا جائے گا۔

ایرانی میڈیا کے مطابق ایرانی سپریم لیڈر سید مجتبیٰ خامنہ ای کے سیاسی مشیر  محمدباقر ذوالقدر  کا کہنا ہے کہ آبنائے ہرمز کی بندش ایرانی قوم کے انتقام کا پہلا مرحلہ ہے۔ایرانی قوم اپنے وجود، شناخت، آزادی اور اعلیٰ اہداف کا دفاع کر رہی ہے۔

انہوں نے کہا کہ ایرانی قوم نےارادہ کرلیاہےکہ جارح دشمن کے دانت توڑ دے، سامراجیوں کوپٹخ دے۔

سونے کی قیمت میں ایک بار پھر بڑا اضافہ 

ویب ڈیسک: کاروباری ہفتے کے پانچویں روز ملک میں سونے کی قیمت میں ایک بار پھر نمایاں اضافہ ریکارڈ کیا گیا۔

صرافہ مارکیٹ کے مطابق فی تولہ سونا 6 ہزار 900 روپے مہنگا ہونے کے بعد 4 لاکھ 60 ہزار 336 روپے کا ہوگیا۔

اسی طرح 10 گرام سونے کی قیمت میں 5 ہزار 914 روپے کا اضافہ ہوا، جس کے بعد 10 گرام سونا 3 لاکھ 94 ہزار 663 روپے میں فروخت ہورہا ہے۔

احتجاج آئینی حق، تشدد اور سرکاری وسائل کا استعمال قابلِ قبول نہیں، اسلام آباد ہائیکورٹ

ویب ڈیسک: اسلام آباد ہائیکورٹ نے پاکستان تحریک انصاف (پی ٹی آئی) کے 27 ستمبر کے احتجاج اور لانگ مارچ سے متعلق کیس کا تفصیلی فیصلہ جاری کر دیا۔

چیف جسٹس سردار سرفراز ڈوگر کی سربراہی میں تین رکنی لارجر بینچ کے فیصلے میں کہا گیا ہے کہ 2022 اور 2024 کے احتجاجی واقعات میں تشدد اور جارحیت کے مناظر سامنے آئے، جبکہ بعض مارچز میں خیبرپختونخوا کے سرکاری وسائل سیاسی مقاصد کے لیے استعمال کیے گئے۔ فیصلے کے مطابق صوبائی وسائل اور پولیس اہلکاروں کی موجودگی کے باعث اسلام آباد انتظامیہ کو امن و امان برقرار رکھنے میں مشکلات کا سامنا کرنا پڑا۔ عدالت نے قرار دیا کہ کسی صوبائی حکومت یا اکائی کی جانب سے وفاق کے خلاف جارحانہ مارچ یا ریلی آئینی و قانونی حدود سے تجاوز ہے۔

عدالت نے واضح کیا کہ پُرامن احتجاج آئینی حق ہے، تاہم اسے تشدد، اسلحے کے استعمال، سڑکوں کی بندش یا شہریوں کے بنیادی حقوق متاثر کرنے کے لیے استعمال نہیں کیا جا سکتا۔ عوامی شاہراہیں تمام شہریوں کی آزادانہ نقل و حرکت کے لیے ہیں اور انہیں سیاسی دباؤ یا مستقل دھرنے کے لیے بند نہیں کیا جا سکتا۔

تفصیلی فیصلے میں کہا گیا کہ اسلام آباد کی جانب سیاسی مارچ کے لیے سرکاری فنڈز، گاڑیاں، مشینری یا سرکاری اہلکار استعمال نہیں کیے جا سکتے۔ ایسے مارچ یا ریلی کو منظم کرنے، اس میں شرکت یا اس کی تشہیر کرنے والوں کو قانون کے مطابق نتائج کا سامنا کرنا ہوگا۔

عدالت کے مطابق گزشتہ احتجاجی واقعات کے دوران سرکاری و نجی املاک کو نقصان پہنچا، کاروباری سرگرمیاں اور شہری زندگی متاثر ہوئی، جبکہ تعلیمی سرگرمیوں اور شہریوں کی آزادانہ نقل و حرکت میں بھی رکاوٹ پیدا ہوئی۔

فیصلے میں قرار دیا گیا کہ لانگ مارچ اور احتجاج کا حق قانون کے تابع ہے، جبکہ وفاقی دارالحکومت کا محاصرہ یا شہریوں کے بنیادی حقوق متاثر کرنا آئینی حق کے دائرے میں نہیں آتا۔

20 سال پرانی موٹر سائیکلیں اور رکشے بھی وزیر اعظم فیول ریلیف سکیم کیلئے اہل

(ویب ڈیسک ) یکم جنوری 2006ء کے بعد رجسٹرڈ تمام موٹر سائیکلیں، رکشے، چنگ چی وزیراعظم فیول ریلیف سکیم میں رجسٹریشن کے لیے اہل ہوں گے۔

تفصیلات کے مطابق وزیراعظم شہباز شریف  نے پرائم منسٹر فیول ریلیف سکیم میں عوام کو مزید سہولت فراہم کرنے کی خصوصی ہدایت کردی۔

وزیراعظم فیول ریلیف سکیم میں 20 سال پرانی موٹر سائیکلوں، رکشوں اور چنگ چی رکشوں کو فی الفور شامل کرنے کی ہدایت کی گئی ہے۔

یکم جنوری 2006ء کے بعد رجسٹرڈ تمام موٹر سائیکلیں، رکشے، چنگ چی وزیراعظم فیول ریلیف سکیم میں رجسٹریشن کے لیے اہل ہوں گے۔وزیراعظم فیول ریلیف سکیم سے اب 20 سال پرانی موٹر سائیکلیں، رکشے، چنگ چی چلانے والے بھی مستفید ہو سکیں گے۔

بھارت کا سندھ طاس معاہدے سے انکار ناقابلِ فہم ہے،  شیری رحمان

ویب ڈیسک: پیپلز پارٹی کی نائب صدر سینیٹر شیری رحمان نے کہا ہے کہ بھارت کی جانب سے سندھ طاس معاہدے سے انکار ناقابلِ فہم ہے۔

ایک غیر ملکی ٹی وی چینل کو انٹرویو میں شیری رحمان نے کہا کہ سندھ طاس معاہدہ سرحد پار پانی کی تقسیم، معلومات کے تبادلے اور تنازعات کے حل کا واضح طریقہ کار فراہم کرتا ہے اور عالمی سطح پر ایک اہم مثال ہے۔

انہوں نے کہا کہ معاہدے میں یک طرفہ طور پر اسے معطل یا غیر فعال قرار دینے کی کوئی شق موجود نہیں۔ معاہدے کو یک طرفہ طور پر معطل یا نظر انداز کرنے سے سنگین قانونی سوالات پیدا ہوتے ہیں۔

شیری رحمان کے مطابق ثالثی عدالت اور غیر جانب دار ماہر کا طریقۂ کار تنازعات کے حل کے دو الگ راستے ہیں، جبکہ پاکستان سندھ طاس معاہدے کے تحت دستیاب قانونی راستوں کا جائزہ لے رہا ہے۔

انہوں نے کہا کہ پاکستان تنازع کا پُرامن حل چاہتا ہے اور پانی کو کسی نئے تنازع کا سبب نہیں بننا چاہیے۔ پاکستان جنوبی ایشیا میں علاقائی استحکام کے لیے اپنا کردار ادا کر رہا ہے۔

شیری رحمان نے پاکستان، سعودی عرب اور ترکیہ کے دفاعی تعاون کا ذکر کرتے ہوئے کہا کہ یہ تعاون کسی مخصوص ملک کے خلاف نہیں، بلکہ پاکستان تنازع کے بجائے باہمی مفاد اور علاقائی تعاون کو ترجیح دیتا ہے۔

ملک میں پیٹرول، ڈیزل کے بحران کا خطرہ ، آئل کمپنیز ایڈوائزری کونسل نے ہنگامی خط لکھ دیا

(ویب ڈیسک) ملک میں پیٹرول اور ڈیزل کے بحران کا خطرہ  پیدا ہوگیا۔آئل کمپنیز ایڈوائزری کونسل نے وزیر پیٹرولیم  اور چیئرمین اوگرا کو ہنگامی خط لکھ دیا۔

اوسی اے سی خط میں کہا گیا ہے کہ رقم کی قلت پیٹرول ڈیزل کی خریداری متاثر کررہی ہیں۔ملک میں پیٹرول کا صرف 18 اور ڈیزل کا 27 دن کا ذخیرہ باقی رہ گیا۔

خط میں کہا گیا ہے کہ حکومت پر آئل مارکیٹنگ کمپنیز کے 66 ارب 70 کروڑ روپے واجب الادا ہیں۔بھاری رقم پرائس ڈیفرینشیل کلیمز اور مارجن کی مد میں پھنسی ہوئی ہے۔تیل منگوانے کیلئے سرمایہ کم ہوتا جارہا ہے۔

او سی اے سی نے کہا ہے کہ ملک میں تیل کے اسٹریٹیجک ذخائر مینٹین کرنا مشکل ہے۔اپنے اسٹاکس سے پیٹرول ڈیزل فروخت کرکے بینکوں اور سپلائر کو ادائیگیاں کر رہے ہیں۔حکومت کی طرف پھنسی رقم پیٹرول کے پانچ کارگوز کے برابر ہے۔

جنرل سیکریٹری اوسی اے سی ناظر عباس زیدی کا کہنا ہے کہ  ادائیگیوں کا پندرہ دن کا وعدہ 6 ماہ میں بھی پورا نہیں ہوا۔چیئرمین اوگرا ہماری بات ہی نہیں سنتے۔اوگرا فوری طور پر کلیمز کی رقم جاری کرے۔ڈیلرز کے مارجن بڑھا دیا ہمارا 1.22 روپے فی لیٹر مارجن اب تک نہیں بڑھایا۔

پی ٹی آئی رہنما دل کا دورہ پڑنے سے انتقال کرگئے

ویب ڈیسک: راولپنڈی میں پاکستان تحریک انصاف (پی ٹی آئی) کے مقامی رہنما اعجاز ستی مبینہ طور پر پولیس کارروائی کے دوران جاں بحق ہوگئے۔

خاندانی ذرائع کے مطابق تھانہ ویسٹریج پولیس نے اعجاز ستی کو گرفتار کیا تھا۔ پولیس گاڑی میں منتقلی کے دوران ان کی طبیعت اچانک خراب ہوئی اور مبینہ طور پر دل کا دورہ پڑا۔

انہیں فوری طبی امداد کے لیے ہسپتال منتقل کیا گیا، تاہم وہ جانبر نہ ہوسکے۔ رپورٹس کے مطابق پولیس ان کی لاش ڈی ایچ کیو ہسپتال چھوڑ کر چلی گئی۔

اعجاز ستی کینٹ بورڈ وارڈ نمبر 6 سے پی ٹی آئی کے امیدوار بھی رہ چکے ہیں۔ واقعے پر مختلف رپورٹس سامنے آئی ہیں، تاہم پولیس کی جانب سے موت کی حتمی وجہ اور واقعے کی مکمل تفصیلات پر باضابطہ مؤقف سامنے آنا باقی ہے۔

جوز بٹلر نے ٹی ٹوئنٹی کرکٹ میں نئی تاریخ رقم کردی 

ویب ڈیسک: انگلینڈ کے وکٹ کیپر بلے باز جوز بٹلر نے ٹی ٹوئنٹی کرکٹ میں نئی تاریخ رقم کردی۔ وہ مختصر فارمیٹ میں 15 ہزار رنز مکمل کرنے والے دنیا کے پہلے بلے باز بن گئے ہیں۔

جوز بٹلر نے یہ تاریخی سنگِ میل کارڈف میں سری لنکا کے خلاف دوسرے ٹی ٹوئنٹی انٹرنیشنل میچ کے دوران عبور کیا۔ انہوں نے ایشان ملنگا کی گیند پر ایک رن حاصل کرتے ہوئے 15 ہزار رنز کا ہندسہ مکمل کیا۔

اس کامیابی کے ساتھ بٹلر نے ویسٹ انڈیز کے سابق آل راؤنڈر کیرون پولارڈ کو پیچھے چھوڑ دیا اور ٹی ٹوئنٹی کرکٹ میں سب سے زیادہ رنز بنانے والے بلے باز بھی بن گئے۔

جوز بٹلر نے یہ رنز 528 ٹی ٹوئنٹی میچز میں 35.46 کی اوسط اور 147.46 کے اسٹرائیک ریٹ سے بنائے ہیں۔ ان کے ریکارڈ میں 9 سنچریاں اور 107 نصف سنچریاں بھی شامل ہیں۔

بٹلر کی یہ تاریخی کامیابی ٹی ٹوئنٹی کرکٹ میں ان کی مستقل مزاجی اور جارحانہ بیٹنگ کا ایک اور نمایاں ثبوت ہے۔

طالبان حکومت کی پانچ سالہ کارکردگی، ساؤتھ ایشیا ٹائمز نے تفصیلی تحقیقاتی رپورٹ جاری کر دی

ویب ڈیسک: ساؤتھ ایشیا ٹائمز نے طالبان کے پانچ سالہ دور حکومت پر "طالبان 2.0: دی فائیو ایئر لیجر" کے عنوان سے تفصیلی تحقیقاتی رپورٹ جاری کر دی۔

 رپورٹ میں 15 اگست 2021 سے اب تک طالبان حکومت کی پانچ سالہ کارکردگی کا مجموعی جائزہ لیا گیا ہے۔ رپورٹ میں صحت، تعلیم، سکیورٹی، خواتین کے حقوق اور خارجہ پالیسی پر اعداد و شمار کے ساتھ تفصیلات جمع کی گئی ہیں۔  رپورٹ میں کہا گیا ہے کہ طالبان رجیم اپنی عوام اور عالمی برادری کی توقعات پر پورا اترنے میں یکسر ناکام رہی۔ طالبان رجیم مسلسل دوحہ معاہدے کی خلاف ورزی کر رہی ہے۔ طالبان رجیم نے 2020 کے دوحہ معاہدے کی تین بنیادی شرائط میں سے کسی ایک پر بھی عمل نہیں کیا۔ 2020,21 میں رہا کیے گئے 5 ہزار طالبان قیدی معاہدے کی خلاف ورزی کرتے ہوئے فوراً جنگ میں شامل ہو گئے۔

رپورٹ کے مطابق معاہدے کی دوسری بنیادی شرط کے برخلاف طالبان نے پچھلی حکومت سے مذاکرات کی بجائے عسکری طاقت سے حکومت پر قبضہ کر لیا۔ معاہدے کی تیسری بنیادی شرط کے برخلاف طالبان رجیم نے افغانستان کو دہشت گردوں کی آماجگاہ بنا دیا۔ یہی عناصر پاکستان کے خلاف حملوں کی منصوبہ بندی اور کاروائیوں میں ملوث ہیں۔ افغانستان پانچ سال میں دہشت گردی کا مرکز بن چکا؛ ملک میں 20 سے زائد عسکریت پسند تنظیمیں اور 13 ہزار تک غیر ملکی جنگجو موجود ہیں۔ ٹی ٹی پی، داعش خراسان، القاعدہ اور دیگر تنظیمیں اپنی کاروائیوں کیلئے افغان سرزمین استعمال کر رہی ہیں۔ صرف ٹی ٹی پی کی نفری 6 سے ساڑھے 6 ہزار جنگجوؤں پر مشتمل ہے۔

رپورٹ کے مطابق 2025 میں پاکستان میں ٹی ٹی پی کے 600 سے زائد حملے ریکارڈ کیے گئے جس میں 300 سے زائد افغان شہری بھی ملوث پائے گئے۔ افغانستان میں موجود دہشت گرد تنظیمیں پاکستان اور جنوبی ایشیا سمیت پوری دنیا کیلئے سنگین خطرہ بن چکی ہیں۔ طالبان کی نوے کی دہائی اور حالیہ سوچ و حکمت عملی میں کوئی فرق نہیں آیا۔ شدت پسندانہ نظریات، جابرانہ اقدامات اور غیر انسانی پالیسی نے افغان عوام کا جینا دوبھر کر دیا ہے۔ پوری دنیا میں سوائے روس کے کسی نے بھی پانچ سال میں طالبان حکومت کو تسلیم نہیں کیا۔

رپورٹ میں کہا گیا ہے کہ قطر میں قیام اور میڈیا پر آنے کے باوجود طالبان کی سوچ اور شدت پسندانہ نظریات میں کوئی تبدیلی نہیں آئی۔ طالبان رجیم میں موجود 4 دھڑے تجارت اور معدنیات کی کمائی کی تقسیم پر آپس میں ہی گھتم گھتا ہیں۔ افغانستان میں خواتین کے بنیادی انسانی حقوق سلب کر لیے گئے؛ 11 لاکھ سے زائد لڑکیاں ثانوی تعلیم سے محروم ہیں۔ خواتین کو تعلیم، روزگار اور دیگر زندگی کے شعبوں سے دور کر دیا گیا ہے۔ سرکاری ملازمتوں میں خواتین کی شرح 22 فیصد سے کم ہو کر 21 فیصد رہ گئی۔ 547 میں سے 219 میڈیا ادارے بند ہو چکے، صحافیوں کی تعداد 11 ہزار 857 سے کم ہو کر 4 ہزار 759 رہ گئی۔ عالمی پریس فریڈم انڈیکس میں افغانستان 180 ممالک میں سے 175ویں نمبر پر آ گیا۔ بچوں اور خواتین میں غذائی قلت بلند ترین سطح پر پہنچ گئی، قریباً 49 لاکھ افراد متاثر ہوئے۔ افغانستان کی معیشت کو 2021 سے اب تک مجموعی طور پر 25 فیصد سکڑاؤ کا سامنا ہے۔ دنیا کو اب باور کرنا ہوگا کہ افغان حکومت کے اقدامات افغان عوام اور عالمی امن کیلئے مستقل خطرہ ہیں۔

ٹک ٹاک کے نئے اے آئی سیفٹی فیچرز متعارف 

ویب ڈیسک: ٹک ٹاک نے صارفین کو اے آئی سے تیار کردہ مواد کی شناخت میں مدد دینے کے لیے نئے فیچرز متعارف کرا دیے۔

کمپنی کے مطابق پلیٹ فارم پر ایک نیا ایجوکیشنل ہب شامل کیا جا رہا ہے، جہاں صارفین اے آئی سے تیار کردہ مواد کی شناخت سے متعلق رہنمائی حاصل کرسکیں گے۔

ٹک ٹاک اے آئی اسپام ویڈیوز کی نشاندہی کرنے والے ٹولز کی بھی آزمائش کر رہا ہے۔ ان میں لائیکنس ڈیٹیکشن ٹول شامل ہے، جو پلیٹ فارم پر اے آئی سے تیار کردہ مواد تلاش کرے گا۔

کمپنی کے مطابق اب تک 3 ارب سے زائد ویڈیوز پر اے آئی ٹیگ لگایا جا چکا ہے، جبکہ اسمارٹ اسپلٹ اور اے آئی آؤٹ لائن سمیت موجودہ اے آئی ٹولز کو بھی بہتر بنایا جا رہا ہے۔

ٹک ٹاک منیج ٹاپکس فیچر کی بھی آزمائش کر رہا ہے، جس کے ذریعے صارفین اپنی فیڈ میں اے آئی سے تیار کردہ مواد کی مقدار کو کنٹرول کرسکیں گے۔

"پاکستان فرنٹ"

ایم پی اے سمیہ عطا اور راشد خان بنے پبلک ڈیمانڈ سیزن 2 کے خاص مہمان

"خبرنشر"

’ریاست اور عوام‘

مریم نواز کا ملتان میں کینسر سینٹر اور جدید طبی سہولیات کا افتتاح

ویب ڈیسک: وزیرِ اعلیٰ پنجاب مریم نواز نے ملتان میں پیٹ سی ٹی، سائیکلوٹرون، کینسر ٹریٹمنٹ کیلئے کوآبلیشن اورکینسر سینٹر کا افتتاح کردیا۔

وزیرِ اعلیٰ نے نشتر اسپتال میں 100 بستروں پر مشتمل کینسر سینٹر کا دورہ کیا، جہاں صوبائی وزیرِ صحت خواجہ سلمان رفیق اور سیکریٹری سی اینڈ ڈبلیو راجہ جہانگیر نے انہیں منصوبے اور جدید طبی سہولیات سے متعلق بریفنگ دی۔

بریفنگ میں بتایا گیا کہ چین سے لائی گئی کرائیو ایبلیشن مشین کے ذریعے صرف ایک سوئی سے کینسر کی رسولیوں کا علاج کیا جاسکتا ہے۔

مریم نواز نے مشین کے ذریعے کینسر کا علاج کرانے والی پہلی مریضہ، کمالیہ کی 55 سالہ مسرت ارشد سے بھی ملاقات کی۔ کامیاب علاج پر مسرت ارشد جذباتی ہوگئیں، جس پر وزیرِ اعلیٰ نے انہیں دلاسہ دیا اور صحت یابی پر مبارک باد دی۔

اس موقع پر مریم نواز نے کہا کہ چین سے کینسر کے علاج کے لیے جدید مشین لائی گئی ہے، اب مریضوں کو فکر کرنے کی ضرورت نہیں۔

امریکی ریاست مشی گن میں ایف-16 طیارہ گر کر تباہ

ویب ڈیسک: امریکی ریاست مشی گن میں ایف-16 طیارہ گر کر تباہ ہو گیا۔

امریکی میڈیا کے مطابق پائلٹ حادثے سے پہلے ہی طیارے سے باہر نکل گیا تھا اور اب اس کی حالت مستحکم ہے۔

پائلٹ یا تباہ شدہ طیارے کے بارے میں مزید کوئی تفصیلات جاری نہیں کی گئی ہیں۔

امریکی میڈیا کی رپورٹس کے مطابق، حادثے کے وقت پائلٹ تربیتی مشن پر ایف-16 طیارہ اڑا رہا تھا۔

رام مندر فیصلے پر مجھے افسوس ہوا، شاہ رخ، عامر اور سلمان سے معذرت کی: سوارا بھاسکر

ویب ڈیسک: بالی ووڈ اداکارہ سوارا بھاسکر نے انکشاف کیا ہے کہ 2019 میں رام جنم بھومی کیس پر بھارتی سپریم کورٹ کے فیصلے سے انہیں شدید افسوس ہوا تھا اور انہوں نے شاہ رخ خان، عامر خان، سلمان خان سمیت اپنی جان پہچان کے مسلمان افراد سے معذرت کی تھی۔

ایک حالیہ انٹرویو میں سوارا بھاسکر نے بتایا کہ فیصلے کے بعد وہ پریشان تھیں اور انہیں یہ فیصلہ ناانصافی محسوس ہوا۔ ان کے مطابق انہوں نے اپنی فون بک میں موجود مسلمان دوستوں اور جاننے والوں سے رابطہ کرکے کہا کہ بطور ہندو انہیں اس فیصلے پر افسوس اور شرمندگی ہے اور وہ اس سے اتفاق نہیں کرتیں۔

اداکارہ کے بیان کے بعد سوشل میڈیا پر انہیں تنقید کا سامنا ہے۔ بعض صارفین نے ان پر ہندوؤں کے جذبات مجروح کرنے اور عدالتی فیصلے کی توہین کرنے کا الزام عائد کیا ہے۔

واضح رہے کہ نومبر 2019 میں بھارتی سپریم کورٹ نے ایودھیا اراضی تنازع کا متفقہ فیصلہ سناتے ہوئے متنازع 2.77 ایکڑ اراضی رام مندر کی تعمیر کے لیے دینے اور مسجد کے لیے حکومت کو 5 ایکڑ متبادل اراضی فراہم کرنے کی ہدایت کی تھی۔

بلوچستان میں سیکیورٹی فورسز کی کارروائیاں، 7 دہشت گرد ہلاک

ویب ڈیسک: سیکیورٹی فورسز نے بلوچستان میں دہشت گردوں کے خلاف کارروائیاں کرتے ہوئے فتنہ الہندوستان کے 7 دہشت گردوں کو ہلاک کر دیا۔

سیکیورٹی ذرائع کے مطابق آپریشن ردالفتنہ تھری کے تحت بلوچستان میں دہشت گردوں کے خلاف کارروائیاں جاری ہیں۔ دو مختلف انٹیلی جنس بیسڈ کارروائیوں کے دوران فتنہ الہندوستان کے 7 دہشت گرد ہلاک کیے گئے۔

ذرائع کے مطابق پنجگور کے علاقے فتح علی میں سیکیورٹی فورسز کی کارروائی کے دوران 5 دہشت گرد ہلاک ہوئے۔ کارروائی کے بعد ہلاک دہشت گردوں کے قبضے سے بھاری مقدار میں اسلحہ اور گولہ بارود بھی برآمد کیا گیا۔

دوسری کارروائی ضلع کچھی کے علاقے ڈھاڈر میں کی گئی، جہاں سیکیورٹی فورسز نے انٹیلی جنس کی بنیاد پر کارروائی کرتے ہوئے 2 دہشت گردوں کو ہلاک کر دیا۔

سیکیورٹی ذرائع کے مطابق کارروائی کے دوران متعدد دہشت گردوں کے زخمی ہونے کی بھی اطلاعات ہیں۔

ذرائع کا کہنا ہے کہ سیکیورٹی فورسز دہشت گردی کے مکمل خاتمے اور بلوچستان میں امن و امان کے قیام کے لیے کارروائیاں جاری رکھے ہوئے ہیں۔