بھارت کا بزدلانہ حملہ،پاک فضائیہ کی طاقت سے دنیا متاثر

پاکستانی فتح 1 میزائل سسٹم سے بھارتی اہداف کو نشانہ بنانے کی ایک اور ویڈیو منظر عام پر

ویب ڈیسک:پاکستان نے بھارت کو ایک اور منہ توڑ جواب دیتے ہوئے فتح-1 میزائل سسٹم کے ذریعے متعدد بھارتی فوجی اہداف کو کامیابی سے نشانہ بنایا ہے جس کی ویڈیو منظرعام پر آگئی۔

تفصیلات کے مطابق اس زبردست کارروائی کی ایک نئی ویڈیو بھی منظر عام پر آ چکی ہے جس میں فتح-1 میزائلوں کے درست نشانے، زوردار دھماکوں اور دشمن کی تنصیبات کو جلتے ہوئے صاف دیکھا جا سکتا ہے۔

یاد رہے کہ پاکستان نے بھارتی جارحیت کے جواب میں آج علی الصبح بھرپور جوابی کارروائی کا آغاز کیا گیا جسے آپریشن بنیان المرصوص (آہنی دیوار) کا نام دیا گیا ہے۔

سوشل میڈیا پلیٹ فارم "ایکس" بھی بھارتی جارحیت کی زد میں

ویب ڈیسک: پاک بھارت کشیدگی،گمراہ کُن پروپیگنڈا بے نقاب ہونے پر سوشل میڈیا پلیٹ فارم ایکس بھی بھارتی جارحیت کی زد میں آگیا۔

تفصیلات کے مطابق ذرائع کا کہناہے کہ بھارتی میڈیانےہمیشہ گمراہ کن پروپیگنڈا کرتے ہوئےصحافتی اقدار کو پامال کیا،گودی میڈیا نے ہمیشہ مودی کی نفرت انگیز سیاست اور جھوٹ کا پرچار کیا،پہلگام فالس فلیگ بے نقاب ہونے اور سوشل میڈیا پر ردعمل سے بھارتی حکومت شدید بوکھلاہٹ کا شکار ہوگئی۔

ایکس انتظامیہ کا کہناہے کہ مودی حکومت نے سوشل میڈیا پلیٹ فارم ایکس کو 8000 سے زائد اکاؤنٹس بلاک کرنے کا ایگزیکٹو آرڈر جاری کردیا،بھارتی حکم میں بین الاقوامی میڈیا اداروں اور سوشل میڈیا  ایکٹوئسٹ کے اکاؤنٹس پر بھی پابندی شامل ہے،زیادہ تر بھارتی احکامات میں مواد کی وضاحت اورقانونی جوازفراہم نہیں کیا گیا،بھارت نے یہ نہیں بتایا ان اکاؤنٹس نے کون سے بھارتی قوانین کی خلاف ورزی کی ہے۔

ایکس انتظامیہ کا کہناہے کہ   کثیر تعداد میں اکاؤنٹس ایسے ہیں جن کوبندکرنےکی کوئی وجہ نظر نہیں آتی،اکاؤنٹس کی مکمل بندش آزادی اظہار رائے پرحملہ ہے،ایکس تمام قانونی راستے تلاش کررہا ہے،صارفین عدالت سے رجوع کریں۔

سیاسی ماہرین کا کہناہے کہ بھارتی حکم نامے ان اکاؤنٹس کے خلاف ہیں جو بھارتی حکومت اور فوج کے جھوٹ بےنقاب کرتے ہیں،اکاؤنٹس کی بندش سے واضح ہے کہ مودی پہلگام فالس فلیگ بے نقاب ہونے پر شدید بوکھلاہٹ کا شکار ہے،ایکس اکاؤنٹس کی بندش سے سب سے بڑی نام نہاد جمہوریت بھارت کا اصل چہرہ بے نقاب ہو گیا ہے۔

 وزیر اعظم شہباز شریف  سے امریکی وزیر خارجہ کا ٹیلی فونک رابطہ

(ویب ڈیسک )وزیر اعظم پاکستان شہباز شریف سے آج شام امریکی وزیر خارجہ مارکو روبیو نے ٹیلی فونک رابطہ کیا۔

 وزیراعظم نے  بھارت کی جانب سے  میزائل اور ڈرون حملوں کی شدید مذمت کی جس کے نتیجے میں 31 شہری شہید ، 57 زخمی ہوئے اور شہری بنیادی ڈھانچے کو نقصان پہنچا۔

وزیراعظم نے کہا کہ  بھارت کے حملوں نے ناصرف پاکستان کی خودمختاری اور علاقائی سالمیت کی خلاف ورزی کی بلکہ جنوبی ایشیاء کے خطے میں امن و استحکام کو شدید خطرات سے دوچار کیا ہے۔

 وزیراعظم نے پاکستان کی خودمختاری اور علاقائی سالمیت کا ہر قیمت پر دفاع کرنے کے پختہ عزم کا اعادہ کیا۔ انہوں نے کہا کہ پاکستانی عوام بھارت کی بلااشتعال جنگی کارروائیوں سے شدید  غصّے میں ہیں۔ وزیر اعظم نے بتایا کہ پاکستان اقوام متحدہ کے چارٹر کے آرٹیکل 51 کے تحت اپنے دفاع میں کارروائی کا حق محفوظ  رکھتا ہے۔ 

وزیراعظم نے جنوبی ایشیاء کی موجودہ سیکیورٹی صورتحال پر صدر ٹرمپ کی تشویش کو سراہا۔ 

سکریٹری روبیو نے کہا کہ امریکہ جنوبی ایشیاء کی صورتحال پر گہری نظر رکھے ہوئے ہے کیونکہ وہ خطے میں امن اور استحکام کو فروغ دینے کے لیے پرعزم ہے۔ اس مقصد کے لیے، انہوں نے پاکستان اور بھارت دونوں کو کشیدگی کم کرنے کے لیے مل کر کام کرنے کی ضرورت پر زور دیا.

 دونوں فریقین نے رابطے میں رہنے پر اتفاق کیا۔

عوام کے خون کے آخری قطرے کا بھی حساب لیا جائے گا، ترجمان پاک فوج

(ویب ڈیسک ) ڈی جی آئی ایس پی آر   احمد شریف چوہدری کا کہنا ہے کہ اپنے عوام اور زمین کے تحفظ پر کوئی سمجھوتا نہیں کریں گے۔

ڈی جی آئی ایس پی آر لیفٹیننٹ جنرل  احمد شریف چوہدری نے   نیوز بریفنگ میں  کہا کہ بھارتی حملے میں 31 شہری شہید، 57 زخمی ہوئے۔  بھارتی بزدلانہ حملے کی جتنی مذمت کی جا ئے کم ہے۔بھارت کا مکروہ چہرہ دنیا کے سامنے بے نقاب ہوگیا۔کم عمر اور نہتے شہری بھارتی حملے کا نشانہ بنے۔بچوں کو دہشتگردی کا نشانہ بنانا کہاں کی بہادری ہے۔

ترجمان پاک فوج نے کہا کہ   بھارت  نے پاکستان  میں دہشتگردی کو فروغ دیا۔حملے میں مساجد کو نشانہ بنایا گیا، قرآن مجید شہید کیے گئے۔دنیا میں وہ کونسا مذہب ہے جو عبادت گاہوں کو نشانہ بنانے کی اجازت دیتا ہے۔

انہوں نے کہا کہ جب کہ حملہ ہوا تو پاک فوج نے اپنے دفاع میں صرف ملٹری ٹارگٹس کو چنا۔ہم نے دمشن کے 3 رافیل سمیت 5 طیارے مار گرائے۔ایل او سی پر جوابی کارروائی میں متعدد بھارتی چیک پوسٹوں کو تباہ کیا گیا۔بھارتی چیک پوسٹوں سے بلااشتعال گولہ باری اور فائرنگ کی جا رہی ہے۔

ڈی جی آئی ایس پی آر  نے کہا کہ  مختلف قسم کے  بھارت کے 7 ڈرون تباہ کیے گئے۔جوابی کارروائی میں پاک فوج کا ایک بھی سپاہی شہید نہیں ہوا۔فضائی معرکے میں پاکستان کا ایک بھی طیارہ تباہ نہیں ہوا۔بھارتی حملے  کے وقت 57 بین الاقوامی فلائٹس پاکستان فضائی حدود میں تھیں۔بھارت نے سینکڑوں مسافروں کی جانیں خطرے میں ڈالیں۔

ترجمان پاک فوج نے کہا کہ نیلم جہلم ہائیڈوپراجیکٹ پر بھی بھارت نے شیلنگ کی۔جنیوا کنونشن کے تحت پانی کے ذخائر پر کسی صورت حملہ نہیں کیا جا سکتا۔قومی سلامتی کمیٹی نے مسلح افواج کو بھرپور جواب کا اختیار دیا ہے۔امن کی خواہش کو کبھی بھی ہماری کمزوری نہ سمجھا جائے۔مسلح افواج کا بھرپور ساتھ دینے پر قوم کو سلام پیش کرتے ہیں ۔ملکی خومختاری کا ہر قیمت پر دفاع یقینی بنائیں گے۔غیور عوام کے خون کے آخری قطرے کا بھی حساب لیا جائے گا۔

'بھارت نے جارحیت کر کے غلطی کی، شہیدوں کے خون کے ایک ایک قطرے کا حساب لیں گے'

(ویب ڈیسک )وزیرا عظم شہباز شریف کا کہنا ہے کہ بھارت نے جارحیت کر کے غلطی کی جس کا خمیازہ بھگتنا ہوگا۔ شہیدوں کے خون کے ایک ایک قطرے کا حساب لیں گے۔

وزیراعظم شہباز شریف نے قوم سے خطاب کرتے ہوئے کہا کہ گزشتہ رات بھارت نے جارحیت کر کے فاش غلطی کی۔بھارت نے جو غلطی کی اس کا خمیازہ بھگتنا ہوگا۔کل رات ہمارے شاہیوں نے فضاؤں میں طوفان برپا کردیا۔پاک فضائیہ نے بھارت کے 5 طیارے مار گرائے۔

انہوں نے کہا کہ گزشتہ رات دنیا نے دیکھا  کہ کئی گنا بڑے دشمن کو گھٹنے ٹیکنے میں چند گھنٹے لگے۔پاک فضائیہ نے دشمن کے 5 طیارے گرا کر ایم ایم عالم کی یاد تازہ کردی۔ہماری شاہینوں نے دشمن پر کاری ضربیں لگائیں ۔بھارت کو جن طیاروں پر غرور تھا وہ راکھ اور نشان عبرت بن چکے۔

وزیر اعظم نے کہا کہ عہد کرتے ہوئے شہیدوں کے خون کے ایک ایک قطرے کا حساب لیں گے۔

آرمی چیف  کی ایئر ہیڈ کوارٹرز آمد، بھارتی جارحیت  ناکام بنانے پر  شاہینوں کو خراج تحسین 

(ویب ڈیسک ) آرمی چیف جنرل سید عاصم منیر  نے پاکستان ائیر فورس کو ایک بار پھر دشمن کے متعدد جہاز مار گرانے اور اپنا لوہا منوانے پر بے حد سراہا ۔

چیف آف آرمی اسٹاف جنرل سید عاصم منیر ائیر ہیڈکوارٹرز پہنچے، چیف آف ائیر اسٹاف  ائیر چیف مارشل ظہیر احمد بابر سدھو نے آرمی چیف کا گرم جوشی سے استقبال کیا۔

آرمی چیف نے  چیف آف ائیر اسٹاف اور ائیر فورس کے شاہینوں کو بھارتی  ائیر فورس کی طرف سے کی جانے والی جارحیت کے مذموم منصوبے کو فوراً ناکام بنانے پر خراج تحسین پیش کیا ۔

آرمی چیف نے پاکستان ائیر فورس کو ایک بار پھر دشمن کے متعدد جہاز مار گرانے اور اپنا لوہا منوانے پر بے حد سراہا۔  آرمی چیف نے تینوں سروسز کے مابین بہترین تعاون کو بھی سراہا ۔

ملاقات کے دوران  اس عزم کو دہرایا گیا کے کسی کو بھی پاکستان کی جغرافیائی سالمیت کی خلاف ورزی نہیں کرنے دی جائے گی اور جو بھی اس کی کوشش کرے گا اس کی قیمت ادا کرے گا۔

بھارتی میزائل حملے: عالمی قوانین کی خلاف ورزی،  شہری ہوا بازی کو خطرے میں ڈال دیا

(ویب ڈیسک )  بھارت کے پاکستان کے اندر میزائل حملے غیر ذمہ دارانہ، بلا جواز اور بین الاقوامی قوانین کی کھلی خلاف ورزی تھے۔ ان حملوں نے خطے کے امن اور استحکام کو شدید خطرے میں ڈال دیا ہے۔

 جس وقت  یہ حملے کیے گئے، اس وقت 57 بین الاقوامی مسافر پروازیں، جن میں خلیجی اور یورپی ممالک کی ایئرلائنز بھی شامل تھیں، پاکستانی فضائی حدود میں موجود تھیں یا اس کے قریب سے گزر رہی تھیں۔

ان حملوں نے شہری ہوابازی کو سنگین خطرے میں ڈال دیا اور ہزاروں بے گناہ مسافروں کی جانوں کو خطرے میں ڈالا۔ یہ صرف پاکستان کے خلاف جارحیت نہیں بلکہ عالمی امن و سلامتی کے لیے براہِ راست خطرہ ہے۔

 بھارت کے ان اقدامات نے ایک ایسے خطے میں کشیدگی بڑھا دی ہے جو پہلے ہی جوہری ہتھیاروں سے لیس ہے، اور اس سے صاف ظاہر ہوتا ہے کہ بھارت کو نہ عالمی اصولوں کی پرواہ ہے اور نہ انسانی جانوں کی۔

شہری فضائی حدود کو نشانہ بنا کر اور کشیدگی کو ہوا دے کر بھارت نے خود کو ایک غیر ذمہ دار اور خطرناک ملک کے طور پر پیش کیا ہے۔ عالمی برادری کو چاہیے کہ وہ بھارت کے جھوٹے بیانیے کے پیچھے کی حقیقت کو سمجھے اور اصل جارح کو پہچانے۔

 یہ ایک ایسا نازک وقت ہے جب دنیا کی بڑی طاقتوں کو انصاف، امن اور احتساب کے لیے کھڑا ہونا ہوگا۔ اگر بروقت قدم نہ اٹھایا گیا تو بھارت کی یہ مہم جوئی پورے خطے کو، بلکہ دنیا کو بھی، مزید تنازع کی طرف دھکیل سکتی ہے۔

پاک فوج  نے کوٹ کٹھیرہ کوٹلی سیکٹر میں بھارتی پوسٹ  تباہ  کردی

(ویب ڈیسک )  بھارت  کے بزدلانہ حملے کے بعد پاک فوج کی بھارتی فوج کی پوسٹوں کے خلاف کاروائیاں جاری ہیں۔

سیکیورٹی ذرائع  کا کہنا ہے کہ  لائن آف کنٹرول پر پاک فوج کی بھارتی جارحیت  کے خلاف بھرپور جوابی کارروائیاں جاری ہیں ، کوٹ کٹھیرہ کوٹلی سیکٹر میں بھارتی پوسٹ  تباہ کردی گئی۔

سیکیورٹی ذرائع کے مطابق  پاک فوج نے لائن آف کنٹرول پر بھارتی فوج کی گول ٹیکری پوسٹ تباہ کردی،فوٹیج میں پوسٹ کے تباہ ہونے کے بعد دھواں نکلنے کے مناظر دیکھے جا سکتے ہیں،  بھارتی جارحیت کا جواب پاک فوج بھرپور طریقے سے دے رہی ہیں۔

بھارت کی بھول ہے کہ ہم اس کے حملوں کے جواب پر خاموش رہیں گے، بلاول بھٹو

(ویب ڈیسک ) چیئرمین پیپلزپارٹی بلاول بھٹو کا کہنا ہے کہ بھارت کی بھول ہے کہ ہم اس کے حملوں کے جواب پر خاموش رہیں گے۔

بلاول بھٹو نے قومی اسمبلی میں  اظہارِ خیال کرتے ہوئے کہا کہ  بھارت کے بزدلانہ حملے میں شہید ہونے والوں کے خاندانوں کے ساتھ شانہ بشانہ کھڑے ہیں۔رات کے اندھیرے میں چور اور بزدل حملہ کرتا ہے۔ 

انہوں نے کہا کہ  بزدلوں نے رات کے اندھیروں میں معصوم بچے کو نشانہ بنایاہے۔ دو ہفتے سے پاکستان پر جھوٹے اور بے بنیاد الزامات سن رہے ہیں۔ وزیراعظم نے بین الاقوامی سطح پر شفاف تحقیقات کی پیشکش کی۔ ہم سچ کے ساتھ کھڑے ہیں اور بھارت جھوٹ کے ساتھ کھڑا ہے۔

چیئرمین پی پی نے کہا کہ  پاکستان کے ائیر فورس نے بھارت کے بزدلانہ حملے کا جواب دیا۔ بھارت وحشی اور درندہ بن چکا ہے، پاکستان کے بہادر عوام ان کی آنکھیں کھولیں گے۔ 

انہوں نے کہا کہ  ہم جنگ کے حامی نہیں لیکن آپ نے ہمارے بے گناہ شہریوں پر حملہ کیا ہے۔ تمام صوبے اور ہر پاکستانی وزیر اعظم شہباز شریف کے ساتھ کھڑے ہیں ۔ پاکستان اتنا باصلاحیت ہے کہ ہر محاذ پر حملے کا جواب دینے کے لئے تیار ہیں۔

بلاول بھٹو نے کہا کہ  بھارت پھر حملہ کرے گا تو ہم پھر بھرپور جواب دینگے، ہم جنگ کے حامی کبھی رہے ہیں نہ رہیں گے، بھارت کی بھول ہے کہ ہم اس کے حملوں کے جواب پر خاموش رہیں گے۔

پاکستان نےبھارت کو جواب دےکر تاریک رات کو چاندنی رات بنادیا،شہبازشریف

(ویب ڈیسک ) وزیر اعظم شہباز شریف کا کہنا ہے کہ ہمارے دشمن نے اندھیرے میں ماضی کی طرح حملے کی ناپاک کوشش کی۔بہادر افواج نے ہندوستان کے مکروہ حملے کا منہ توڑ جواب دیا۔ اور تاریک رات کو چاندنی رات بنا دیا۔

وزیر اعظم شہباز شریف نے قومی اسمبلی سے خطاب کرتے ہوئے کہا کہ  تاریخ کے اہم موقع پر ایوان سے مخاطب ہوں،آج پوری قوم متحد ہے۔ہمارے دشمن نے اندھیرے میں ماضی کی طرح حملے کی ناپاک کوشش کی۔بہادر افواج نے ہندوستان کے مکروہ حملے کا منہ توڑ جواب دیا۔ اور تاریک رات کو چاندنی رات بنا دیا  بھارت نے حملے میں عورتوں ، بچوں سمیت نہتے شہریوں کو شہید کیا۔

وزیراعظم شہباز شریف نے کہا کہ حملے میں بچوں سمیت کئی پاکستانی شہید ہوئے، اللہ شہدا کےدرجات میں بلندی عطا فرمائے، 22 اپریل کو پہلگام میں افسوسناک واقعہ ہوا، بھارت نے10منٹ میں ایف آئی آر درج کی۔

وزیراعظم شہبازشریف نے کہا کہ حملے کے فوری بعد پاکستان پرالزام لگا دیا، بھارت نے دنیا کو باور کروانے کی کوشش کی پاکستان ملوث ہے، کچھ عرصہ قبل بلوچستان میں ٹرین ہائی جیک کی گئی، واقعہ کے تانے بانے بھارت سے ملتے تھے، ہمارے پاس ناقابل تردید ثبوت موجود ہیں۔

انھوں نے خطاب میں کہا کہ ہمارے ایس ایس جی کے جوانوں نے شہریوں کی جانیں بچائیں، بھارت نے واقعے کی مذمت تک نہیں کی، بھارت نے واقعے کا سنگدلی سے مذاق بنایا تھا، میرے دورے ترکیہ کے دوران پہلگام واقعہ کی اطلاع ملی، پاکستان کا پہلگام واقعہ کا دور دور تک تعلق نہیں، میں نے واقعہ کی غیر جانبدار واقعے کی تحقیقات کا کہا، پاکستان نے تحقیقات میں تعاون کی یقین دہانی کروائی۔

وزیراعظم شہباز شریف نے کہا کہ افواج پاکستان حملے کا جواب دینے کیلئے 24 گھنٹے تیار تھی، بھارت نے رافیل جہاز خریدے، اس پر بہت ناز کرتا ہے، ہماری افواج نے بھارت کے رافیل جہاز مار گرائے، ایئرچیف ظہیر بابر کو سب کی طرف سے سلام پیش کرتا ہوں۔

وزیراعظم نے خطاب میں کہا کہ ہم ہر لمحہ بھارتی عزائم سے اچھی طرح واقف تھے، کل بھارت نے مکمل تیاری سے 80 جہازوں کے ساتھ حملہ کیا، بھارت کی جانب سے پاکستان میں آزاد کشمیر، بہاولپور، شیخوپورہ، سیالکوٹ سمیت 6 شہروں پر حملہ کیا گیا، ہمارے جہازوں نے سرحد عبور نہیں کی، ہمارے عقابوں نے بھارتی جہازوں کو مار گرایا، بھارتی جہازوں میں رافیل جہاز بھی شامل تھے۔ کل رات بھارت کے ہوش ٹھکانےآگئے ہیں۔

وزیراعظم نے خطاب میں کہا کہ کل رات ہمارے دشمنوں کو نیند نہیں آئی، ہمارے دوستوں کا پاکستان پر اعتماد بڑھ گیا ہے، اسلام آباد میں ایک شہید کا جنازہ ہے، جنازے میں صدر اور آرمی چیف سمیت مجھے بھی شریک ہونا ہے، ہمارے شہدا نے لاکھوں بچوں کو یتیم ہونے سے بچایا، یہ شہید پاکستان کے ہیرو ہیں۔ کل اللہ نے پاکستان کو عظیم فتح نصیب فرمائی۔

بھارتی پنجاب میں  پاک فوج کو خوش آمدید ، مودی مردہ باد کے نعرے لگ  گئے

(ویب ڈیسک )   بھارتی پنجاب میں ’سکھ پاک فوج کو خوش آمدید کہتے ہیں‘ اور ’ہندوستان مودی مردہ باد‘ کے  نعرے لگ گئے۔

سکھ فار جسٹس کے رہنما گرپتونت سنگھ پنوں نے اپنے ویڈیو بیان میں کہا کہ آج دہشتگرد ہندوستان کی حکومت نے پاکستان پر حملہ کیا اور ایک مسجد پر بھی بمباری کی، جس میں عورتوں اور بچوں کو شہید کیا گیا۔

انہوں نے بتایا کہ  آج پاکستان کے ساتھ لڑنے اور پاکستان کے ساتھ کھڑے ہونے کے لیے پنجاب میں دشمیش کالج فریدکوٹ کے نوجوانوں نے کالج میں پاکستان کا جھنڈا لہرایا، نوجوانوں نے لکھا کہ سکھ پاکستان آرمی کو خوش آمدید کہتے ہیں۔

گرپتونت سنگھ پنوں نے کہا کہ  پاکستان کے ساتھ بھارتی پنجاب کے سکھ کھڑے ہیں، وہاں ہندوستان، مودی مردہ باد کے نعرے بھی لگے ہیں۔’مودی حکومت ہمیشہ رہائشی آبادیوں پر حملہ کرتی ہے، 1984 میں سری درباد صاحب پر انڈیا نے حملہ کیا، شہید جنرل 15 والا اور ان کے ساتھیوں نے انڈیا کو منہ توڑ جواب دیا اور نشانے پر انداگاندھی آئی تھیں‘

ان کا کہنا ہے کہ  آج کا حکمران نریندر مودی کہتا ہے کہ گھر میں گھس کے ماریں گے، آج بھارت نے پاکستان میں مسجد پر حملہ کیا ہے، تو اس کے ذمہ دار نریندر مودی، امیت شاہ، راجناتھ، جے شنکر اور اجیت ڈوول ہیں، اس حملے کی اسلامک جوابدہی بنتی ہے کہ آنکھ کے بدلے آنکھ، اب دیکھتے ہیں کہ پاکستان بدلا کیسے لیتا ہے۔

گرپتونت سنگھ پنوں  نے کہا کہ سکھ فارجسٹس گلوبل خالصتان ریفرنڈم کے لیے پرامن جہدوجہد کررہی ہے،سکھ فار جسٹس ان 5 بندوں کے خلاف بین الاقوامی قوانین کے تحت قانونی کارروائی کا مطالبہ کرتی ہے، ہم ان کو قانون کے دائرے میں لائیں گے نہ صرف پاکستان پر حملے کے لیے بلکہ امریکا، کنیڈا، یوکے اور آسٹریلیا میں دہشتگردی کے لیے بھی ان کو قانونی دائرے میں لائیں گے، نریندر مودی کو قانون کا سامنا کرنا ہوگا۔

پاکستان نے  بھارتی جنگی طیارہ رافیل گرایا، نئی فوٹیج  سامنے آگئی

(ویب ڈیسک )  پاکستان نے رافیل طیارہ گرایا، بھارت کے اندر ملبہ گواہی دے رہا ہے۔

نئی فوٹیج نے واضح کر دیا کہ جو بھارتی جنگی طیارہ گرایا گیا، وہ رافیل تھااس کے M88 انجن کے مخصوص نوژل اسکرو پیٹرن نے تمام شکوک ختم کر دیے ہیں۔ یہ انجن صرف رافیل طیاروں میں استعمال ہوتا ہے، نہ کہ میراج 2000 میں۔

پاکستان نے بھارتی فضائی خلاف ورزی پر بروقت اور مؤثر کارروائی کی، دشمن طیارہ حدود پار کر کے واپس جاتے ہوئے بھارت میں ہی گرا۔

فوٹیج میں رافیل کا انجن ملبے میں صاف نظر آ رہا ہے بھارت کے لیے اب انکار ممکن نہیں۔

بھارت کا مہنگا ترین اور فخر سمجھا جانے والا رافیل طیارہ پاکستانی کارروائی کا شکار ہوا۔ بھارت کا پروپیگنڈا کہ "صرف پرانا طیارہ گرایا گیا"، فوٹیج نے غلط ثابت کر دیا۔

عالمی دفاعی ماہرین بھی فوٹیج کو M88 انجن کے ساتھ میچ کر رہے ہیں یہ رافیل ہی تھا۔پاکستان نے نہ صرف دشمن کی جارحیت کا جواب دیا بلکہ اس کے جدید ترین جنگی اثاثے کو بھی زمین بوس کیا اور دنیا نے یہ سب دیکھا۔

بھارت کابزدلانہ حملہ،لائن آف کنٹرول پر بھارتی پوسٹ  کو ایک اور منہ توڑ جواب

ویب ڈیسک: بھارت کا بزدلانہ حملہ، مندل سیکٹر میں پاک فوج نے  بھارت کو ایک اور مؤثر اور منہ توڑ جواب دیدیا۔

تفصیلات کے مطابق سیکیورٹی ذرائع کا کہناہے کہ لائن آف کنٹرول پر بھارتی اشتعال انگیزیوں کے خلاف پاک فوج کی جانب سے جوابی کارروائیاں جاری ہیں۔مندل سکیٹر میں سری ٹاپ پر بھارتی پوسٹ کو پاک فوج نے تباہ کر ڈالا،بھارتی جارحیت کا جواب پاک فوج بھرپور طریقے سے دے رہی ہے۔

سکیورٹی ذرائع کا کہناہے کہ پاک فوج کی گولہ باری کے بعد بھارتی پوسٹ دھواں کی لپیٹ میں آگئی،پاکستان  کی مسلح افواج کی کارروائیوں سے  بھارتی فوج کے قدم اکھڑ چکے ہیں۔

بھارت کابزدلانہ حملہ،LOCپربھارت کی متعددپوسٹیں تباہ

ویب ڈیسک: بھارت کا بزدلانہ حملہ، لائن آف کنٹرول پر پاک فوج کی جوابی کارروائی میں دشمن کی متعدد پوسٹیں تباہ کردی گئیں۔

 تفصیلات کے مطابق سکیورٹی ذرائع کا کہناہے کہ لائن آف کنٹرول پر پاک فوج کی بھارتی جارحیت  کے خلاف بھرپور جوابی کارروائیاں جاری ہیں،پاک فوج نے چری کوٹ کے بلمقابل  جبڑی پوسٹ کو بھی تباہ کردیا،پوری پوسٹ آگ کی لپیٹ میں آگئی، بھارتی فوج کے جوان بھاگنے پر مجبور ہوگئے۔

سکیورٹی ذرائع کا کہناہے کہ فوٹیج میں پوسٹ کے تباہ ہونے کے بعد دھواں نکلنے کے مناظر بھی بخوبی دیکھے جا سکتے ہیں،پونچھ سیکٹر میں ہیڈ کوارٹر 93 بریگیڈ کی تباہی کی فوٹیج بھی دیکھی جاسکتی ہے،اس سے قبل 12 بریگیڈ اڑی سیکٹر میں بھی بھارتی فوج کو منہ کی کھانی پڑی، بھارتی جارحیت کا جواب پاک فوج بھرپور طریقے سے دے رہی ہے۔

بار بار کہا ہمارے ہاتھ صاف ہیں،جواب دینے کا حق محفوظ رکھتے ہیں ، بلاول بھٹو

(ویب ڈیسک ) چیئرمین پاکستان پیپلزپارٹی بلاول بھٹو کا کہنا ہے کہ ہم نے بار بار کہا کہ ہمارے ہاتھ صاف ہیں، پاکستان اقوام متحدہ کے چارٹر کے تحت جواب دینے کا حق محفوظ رکھتا ہے۔

چیئرمین پیپلزپارٹی بلاول بھٹو زرداری نے برطانوی نشریاتی ادارے کو انٹرویو دیتے ہوئے کہا کہ  یہ بھارت کی طرف سے جان بوجھ کر بلا اشتعال جنگی کارروائی تھی، دو ہفتے سے پاکستان کو بھارتی حکومت کی طرف سے جنگجوانہ دھمکیاں مل رہی تھیں۔

انہوں نے کہا کہ  ہم نے بار بار کہا کہ ہمارے ہاتھ صاف ہیں، حکومت نے تمام الزامات کی غیر جانبدارانہ تحقیقات کی پیشکش کی ہے، بدقسمتی سے بھارت نے پاکستان کی اس پیشکش کو ٹھکرا دیا،  بھارت نے تحقیقات کی بجائے معصوم شہریوں کو نشانہ بنانے کا انتخاب کیا۔

بلاول بھٹو نے خبردار کیا کہ  پاکستان اقوام متحدہ کے چارٹر کے تحت جواب دینے کا حق محفوظ رکھتا ہے، وزیر اعظم اور مسلح افواج کو متعلقہ کارروائیاں کرنے کا اختیار دیا گیا ہے۔

پاک فوج کی پیشہ ورانہ مہارت: دنیا کی تسلیم شدہ قوت

ویب ڈیسک: دنیا بھر کی افواج میں پاک فوج کو ایک منفرد مقام حاصل ہے، جس کی بنیادی وجہ اس کی پیشہ ورانہ مہارت، نظم و ضبط، جدید حربی حکمت عملی اور دنیا بھر میں قیامِ امن کے مشنز میں شاندار کردار ہے۔ حالیہ کشیدہ صورتحال میں ایک بار پھر پاکستان کی مسلح افواج نے ثابت کیا ہے کہ وہ نہ صرف دفاعِ وطن کی مکمل صلاحیت رکھتی ہیں بلکہ جارح دشمن کو منہ توڑ جواب دینے کی بھرپور اہلیت بھی رکھتی ہیں۔

اعلیٰ تربیت یافتہ اور جدید ٹیکنالوجی سے لیس

پاک فوج دنیا کی ان چند افواج میں شامل ہے جو جدید ترین ٹیکنالوجی اور اسمارٹ وارفیئر سسٹمز سے لیس ہیں۔ چاہے زمین ہو، فضا یا سمندر — پاک فوج نے ہر محاذ پر اپنی برتری ثابت کی ہے۔
حالیہ فضائی محاذ پر دشمن کے پانچ جدید جنگی طیارے گرانا اس پیشہ ورانہ مہارت کا جیتا جاگتا ثبوت ہے۔

عالمی سطح پر تسلیم شدہ

اقوامِ متحدہ کے امن مشنز میں پاک فوج کا کردار ہمیشہ مثالی رہا ہے۔ پاکستان دنیا کے ان چند ممالک میں شامل ہے جن کی فوجی دستے کئی دہائیوں سے یو این مشنز میں خدمات سر انجام دے رہے ہیں، چاہے وہ کانگو ہو، ہیٹی، صومالیہ یا دارفور — پاکستانی سپاہی ہمیشہ امن و استحکام کے علمبردار بن کر سامنے آئے ہیں۔

بھارتی اعترافِ شکست

دلچسپ بات یہ ہے کہ حالیہ کشیدگی کے دوران نہ صرف دشمن کی خاموشی اس کی شکست کا اعلان تھی بلکہ خود بھارتی سابق فوجی افسران بھی پاکستانی فوج کی قوت کے معترف نظر آئے۔ بھارتی ایئر مارشل سنجیو کپور نے قومی ٹی وی پر کہا کہ "پاکستانی فوج بہت تگڑی ہے، اور ہمیں اس کا سامنا کرنے کے لیے تیار رہنا چاہیے۔" یہ بیان پاک فوج کی قابلیت اور خوفناک جنگی مہارت کا ناقابلِ تردید اعتراف ہے۔

عوام کا اعتماد، فوج کا سرمایہ

پاکستانی قوم اپنی فوج کو صرف ایک ادارہ نہیں بلکہ ایک محافظ کے طور پر دیکھتی ہے۔ ہر بار جب وطن عزیز پر کوئی خطرہ آیا، فوج نے سب سے آگے بڑھ کر دفاع کیا ۔ چاہے دہشت گردی ہو، زلزلہ یا سیلاب۔ فوج کا یہی کردار عوام کے دلوں میں اس کی عظمت کو مزید بلند کرتا ہے۔

حالیہ واقعات نے ایک بار پھر ثابت کر دیا کہ پاک فوج محض دفاعی ادارہ نہیں بلکہ ایک پیشہ ور، باصلاحیت اور جدید ٹیکنالوجی سے لیس عسکری قوت ہے جو نہ صرف وطن کا دفاع کر سکتی ہے بلکہ دشمن کو ایسا جواب دے سکتی ہے جسے وہ کبھی فراموش نہ کرے۔

ملک بھر میں ہنگامی صحت کی صورتحال،سرکاری ہسپتالوں میں ایمرجنسی نافذ

ویب ڈیسک: ملک بھر میں ہنگامی صحت کی صورتحال، وفاقی وزیرِ صحت مصطفیٰ کمال نے وفاق کے تمام  سرکاری ہسپتالوں میں ایمرجنسی نافذ کرنے کا حکم دیدیا جبکہ تمام عملے کی چھٹیاں بھی منسوخ کردی گئیں ہیں۔

 تفصیلات کے مطابق وفاقی وزیرِ صحت مصطفیٰ کمال نے موجودہ صورتحال میں میری ترجیح عوام کی صحت کا تحفظ ہے،تمام ڈاکٹرز، نرسز، پیرامیڈیکل اسٹاف اور انتظامی عملے کی چھٹیاں منسوخ کر دی گئی،تمام طبی عملے کو فوری طور پر ڈیوٹی پر حاضر ہونے کی ہدایت کر دی ہے۔

وفاقی وزیرِ صحت نے جنیوا اور قطر کے طے شدہ سرکاری دورے منسوخ کر دیے۔

مصطفی کمال  نے کہا کہ وفاقی ادارہ صحت میں 24/7 ایمرجنسی کوئیک ریسپانس سینٹر قائم کر دیا ہے،ایمرجنسی سینٹر جنگی حالات سے متعلق فوری ردعمل کے لیے فعال کر دیا گیا،تمام صوبائی و ضلعی ہیلتھ اتھارٹیز سے براہِ راست رابطے کا نظام قائم کر دیا ہے،صوبائی صحت سیکرٹریز کو وزارتِ صحت سے مستقل رابطے میں رہنے کی ہدایت کر دی ہے،تمام صوبوں کو ایمرجنسی پلان اپ ڈیٹ کرنے کا پابند بنا دیا گیا۔

بھارت کا بزدلانہ حملہ،پاک فوج نے 4 مزید بھارتی ڈرون مار گرائے

ویب ڈیسک: پاک فوج کی کامیاب کارروائی، بھارتی فوج کے مزید چار ڈرون مار گرائے۔

تفصیلات کے مطابق، پاکستان نے اپنی سرحدوں کی حفاظت میں مزید کامیابی حاصل کرتے ہوئے بھارتی فوج کے چار ڈرونز کو مار گرایا۔ سیکیورٹی ذرائع کے مطابق بھارتی ڈرونز نے پاکستانی حدود میں دراندازی کی کوشش کی، جس پر پاکستان آرمی نے فوری ردعمل دیتے ہوئے انہیں اپنے علاقے میں داخل ہونے سے روک دیا۔

پاک فوج نے پکھلیاں اور سیالکوٹ سیکٹر میں بھارتی فوج کے چار ڈرونز کو نشانہ بنایا، اور انہیں مار گرا دیا۔ اس کے علاوہ، پاکستان نے اپنی جدید دفاعی صلاحیتوں کے تحت دو مزید بھارتی ڈرونز کو نیچے اتار کر قبضے میں لے لیا۔

سیکیورٹی ذرائع کا کہنا ہے کہ بھارتی فوج کی جانب سے ڈرونز کے ذریعے پاکستان میں دراندازی کرنے کی یہ کوشش ناکام ہوگئی۔ اس سے قبل، برنالہ، شکرگڑھ اور کوٹلی سیکٹر میں بھی بھارت کے تین ڈرونز گرائے جا چکے ہیں۔

اب تک کل سات بھارتی ڈرونز پاکستان کے ہاتھوں مار گرائے جا چکے ہیں، جن میں ایک بڑا "ہیرون" مسلح ڈرون بھی شامل ہے۔

پاک فوج کے ترجمان نے کہا کہ پاکستان اپنے دفاعی صلاحیتوں میں مسلسل بہتری لا رہا ہے اور دشمن کی ہر جارحیت کا بھرپور جواب دے رہا ہے۔

مسلح افواج کو جوابی کارروائی کا اختیار مل گیا،قومی سلامتی کمیٹی اعلامیہ

ویب ڈیسک: قومی سلامتی کمیٹی کا اہم اجلاس ختم ہوگیا جس میں گزشتہ رات کی بھارتی جارجیت اور پاک فوج کے دندان شکن جواب اور آئندہ کے لائحہ عمل پر غور کیا گیا۔

تفصیلات کے مطابق قومی سلامتی کمیٹی کے ہنگامی اجلاس کے جاری کردہ اعلامیے میں کہاگیا ہے کہ بھارت کے ہر حملے کے جواب کا وقت، جگہ اور طریقہ خود منتخب کریں گے، مسلح افواج کو مکمل جوابی کارروائی کا اختیار دے دیا گیا۔

اس میں کہا گیا کہ بھارتی حملے میں شہید شہریوں کے لیے فاتحہ خوانی، زخمیوں کی جلد صحت یابی کی دعا کی گئی۔

اعلامیے کے مطابق بھارتی افواج نے سیالکوٹ، شکرگڑھ، مریدکے، بہاولپور، کوٹلی، مظفرآباد پر حملے کیے، بھارت نے جھوٹے الزامات پر شہری علاقوں کو نشانہ بنایا، مساجد اور تنصیبات کو نقصان پہنچا، بھارتی حملے سے گلف ممالک کی فضائی پروازیں بھی خطرے میں پڑ گئیں۔

اس میں کہا گیا کہ نیلم جہلم ہائیڈرو پاور پراجیکٹ کو نشانہ بنانا عالمی کنونشنز کی خلاف ورزی ہے، شہریوں پر حملہ انسانیت اور عالمی قوانین کی سنگین خلاف ورزی ہے۔

اس میں کہا گیا کہ  22 اپریل کے بعد پاکستان نے شفاف تحقیقات کی پیشکش کی تھی، بھارت کا حملہ سیاسی مقاصد کے لیے جھوٹ چھپانے کی کوشش ہے،مسلح افواج نے 5 بھارتی طیارے اور ڈرون مار گرائے، قوم افواج کی جرات کو سلام پیش کرتی ہے، ہر جارحیت کا بھرپور مقابلہ کریں گے۔

بیان میں کہا گیا کہ عالمی برادری بھارت کو غیرقانونی اقدامات پر جواب دہ بنائے، پاکستان امن کا حامی ہے لیکن خودمختاری پر کوئی سمجھوتہ نہیں ہوگا۔

اجلاس کے بعد اپنے ایک بیان میں وزیر دفاع خواجہ آصف نے کہا کہ وزیراعظم قوم سے خطاب کریں گے، وزیراعظم قومی اسمبلی اجلاس میں شرکت کریں گے۔

خواجہ آصف نے کہا کہ 3 بجے کے قریب قومی سلامتی کمیٹی اجلاس سے وزیراعظم کا خطاب نشر ہوگا، قومی سلامتی کمیٹی اجلاس کے حوالے سے اعلامیہ آئے گا۔

پاک فوج کی سانگھڑ پوسٹ پر جوابی کارروائی کی مزید ویڈیو فوٹیج منظر عام پر

ویب ڈیسک: بھارتی جارحیت کا مؤثر جواب۔۔پاک فوج کی سانگھڑ پوسٹ پر جوابی کارروائی کی مزید ویڈیو فوٹیج منظر عام پر آگئیں۔

تفصیلات کے مطابق سکیورٹی ذرائع کا کہناہے کہ فوٹیج میں کارروائی سے پہلے اور بعد کے مناظر واضح طور پر دیکھے جا سکتے ہیں۔

سکیورٹی ذرائع کے مطابق بھارتی فوج نے جب پاکستان کی حدود میں دراندازی کی کوشش کی، تو پاک فوج نے فوری طور پر مؤثر جوابی کارروائی کی۔

سانگھڑ پوسٹ پر بھارتی فوج کی جارحیت کے جواب میں پاکستان آرمی نے دشمن کی پوسٹوں کو بھاری نقصان پہنچایا، اور بھارتی فوج کو گھٹنے ٹیکنے پر مجبور کر دیا۔پاک فوج کی یہ کارروائی بھارت کے لیے ایک دندان شکن پیغام ہے۔

اس سے قبل، پاکستانی فوج نے لیپہ، چورا کمپلیکس پوسٹ اور چکوٹھی سیکٹر میں بھی بھارتی فوج کی جارحیت کا مؤثر جواب دیا تھا، جس پر بھارتی فوج نے سفید جھنڈا لہرا کر اپنی ہار تسلیم کی۔

سکیورٹی ذرائع نے بتایا کہ بھارتی فوج رات کے اندھیروں میں جارحیت کرنے کی کوشش کر رہی تھی، مگر صبح کے اجالے میں وہ منہ دکھانے کے قابل نہ رہی۔ پاک فوج کی طرف سے بھارت کی بزدلانہ کارروائیوں کا جواب مؤثر انداز میں دیا جا رہا ہے۔

بھارت کا بزدلانہ حملہ،شہریوں کا شدید ردعمل،پاک فوج سے اظہاریکجہتی

ویب ڈیسک: بھارت کے بزدلانہ حملے پرشہریوں نےشدید رد عمل دیتے ہوئے پاک فوج سے اظہارِ یکجہتی کیا ہے۔

گزشتہ رات سے  پاک فوج کی جانب سے بھارتی جارحیت کا بھرپور جواب دیا جا رہاہے۔اس حوالے سے پاکستان کے مختلف علاقوں سے شہریوں نے پاک فوج کے حق میں زبردست پیغامات دیے۔

شہری نے اپنے بیان میں کہا کہ ہماری فوج بھارت کو بھرپور جواب دے رہی ہے۔ پاکستانی عوام افواجِ پاکستان کے ساتھ کھڑی ہے۔کیا مودی سرکار 1965 کی جنگ بھول گئی ہے؟

لاہور سے شہریوں کا کہنا تھا کہ"بھارت بھول چکا ہے کہ 1965 میں اسے کس طرح منہ کی کھانی پڑی تھی؟"بھارت نے ہمیشہ رات کی تاریکی میں بزدلانہ حملے کیے ہیں۔مسلمان بھارت کی طرح ڈرپوک نہیں۔

شہریوں نے مزید کہا کہ پہل بھارت نے کی، مگر اختتام پاکستان کرے گا۔رات کی تاریکی میں حملہ بزدل قوم کرتی ہے، بھارت نے ثابت کر دیا کہ وہ بزدل دشمن ہے۔

بھارت کو منہ توڑجواب دینے پر آزاد کشمیرکےشہریوں کاجوش و خروش

ویب ڈیسک: آزاد کشمیر کے شہریوں نے پاکستان کی جوابی کارروائی پر جوش و خروش کا اظہار کرتے ہوئے پاک فوج کی شجاعت کو سراہا۔

 تفصیلات کے مطابق بھارت کا بزدلانہ حملہ۔۔۔ آزاد کشمیر کے شہریوں  نے  پاکستان کی جوابی کارروائی پر بھرپور جوش و خروش کا اظہار کیا۔آزاد کشمیر کے شہریوں نے افواجِ پاکستان اور آرمی چیف کا شکریہ ادا کیا کہ انہوں نے بھارت کو مؤثر اور منہ توڑ جواب دیا۔

شہری کا کہناہے کہ  پاک فوج بھارت کی ہر جارحیت کا اسی طرح دندان شکن جواب دیتی رہے گی،شہریوں نے اس عزم کا اظہار کیا کہ وہ پاک فوج کے شانہ بشانہ کھڑے ہیں،کشمیری عوام مستقبل میں بھی بھارت کو بھرپور جواب دیں گے۔

بھارتی اخبار ’دی ہندو‘ نے پاک فضائیہ کی کامیابی کی خبر ویب سائٹ سے ہٹا دی

ویب ڈیسک: مقبوضہ کشمیر میں بھارتی فضائیہ کو پہنچنے والے بھاری نقصان سے متعلق خبر کو بھارتی انگریزی اخبار "دی ہندو" نے اپنی ویب سائٹ سے ہٹا دیا، جبکہ سوشل میڈیا پر پوسٹ کی گئی تفصیلات بھی ڈیلیٹ کر دی گئیں۔

 تفصیلات کے مطابق ابتدائی طور پر دی ہندو نے خبر شائع کی کہ پاک فضائیہ نے تین بھارتی جنگی طیارے تباہ کر دیے ہیں۔ تاہم کچھ دیر بعد ویب سائٹ پر موجود خبر کلک کرنے پر غائب ہوگئی اور تفصیلات نظر آنا بند ہوگئیں۔ اس کے بعد خبر مکمل طور پر ویب سائٹ سے ہٹا دی گئی۔ سوشل میڈیا پر کی گئی پوسٹ بھی غائب کر دی گئی، جس سے اندازہ ہوتا ہے کہ بھارتی میڈیا شدید حکومتی دباؤ میں ہے۔

ذرائع کے مطابق یہ طیارے گزشتہ رات پاکستان کے مختلف علاقوں پر ہونے والے بھارتی حملوں کے بعد جوابی کارروائی میں مار گرائے گئے تھے۔ پاک فضائیہ نے 3 رافیل، ایک مگ 29، ایک سخوئی اور ایک ڈرون کو نشانہ بنایا، جبکہ بھارتی بریگیڈ ہیڈکوارٹر بھی تباہ کیا گیا۔

پاکستانی میڈیا اور افواج کے ترجمان نے ان کامیاب کارروائیوں کی کھل کر تفصیلات میڈیا پر شیئر کیں، جب کہ بھارتی میڈیا نے سچ چھپانے اور صرف مودی حکومت کا بیانیہ دہرانے کی روش برقرار رکھی۔

بھارتی میڈیا میں آزادانہ صحافت کا شدید فقدان دیکھا جارہا ہے اور بیشتر ادارے مودی سرکار کے پروپیگنڈا ٹول بن چکے ہیں۔

واضح رہے کہ گزشتہ رات بھارتی فوج نے اندھیرے میں پاکستان کے شہری علاقوں پر حملے کیے، جس کے نتیجے میں 26 شہری شہید ہوئے۔ تاہم پاک فوج نے فوری اور مؤثر ردعمل دے کر دشمن کو بھاری نقصان پہنچایا۔ وزیراطلاعات عطا اللہ تارڑ کے مطابق بھارتی فوج نے لائن آف کنٹرول پر سفید جھنڈا لہرا کر اپنی شکست تسلیم کی ہے۔

آزاد کشمیر میں بھارتی جارحیت سےشہید خادمِ مسجد کی نماز جنازہ ادا ،سپردخاک کردیاگیا

ویب ڈیسک: گزشتہ رات بھارت کی بزدلانہ گولہ باری کے نتیجے میں شوائی نالے کے علاقے میں واقع بلال مسجد کے خادم محمد یعقوب شہید ہو گئے، وہ علاقے میں ایک شریف، نیک سیرت اور خدمت گزار شخصیت کے طور پر جانے جاتے تھے۔

تفصیلات  کے مطابق محمد یعقوب کی نمازِ جنازہ یونیورسٹی کیمپس میں ادا کی گئی، وزیر آزاد کشمیر پیر مظہر سعید نے نمازِ جنازہ پڑھائی، جنازے میں سیاسی، سماجی اور مذہبی شخصیات سمیت عوام کی بڑی تعداد نے شرکت کی۔

شرکائے جنازہ نے شہید کی قربانی کو خراجِ عقیدت پیش کرتے ہوئے کہا کہ کشمیری پہلے بھی قربانیاں دیتے آئے ہیں اور حالیہ قربانیوں سے ان کا حوصلہ پست نہیں ہوگا، ہم پاک فوج کے شانہ بشانہ کھڑے ہیں اور دشمن کی کسی بھی جارحیت کا منہ توڑ جواب دیں گے۔

جنازے میں شریک شہریوں نے بھارت کی اس جارحانہ کارروائی کی شدید مذمت کرتے ہوئے عالمی برادری سے مطالبہ کیا کہ وہ لائن آف کنٹرول پر شہری آبادی کو نشانہ بنانے کے خلاف آواز اٹھائے۔

پاک فوج نے ایک اور بھارتی ڈرون مارا گرایا

ویب ڈیسک: پاک فوج نے دشمن کی جانب سے ایک اور دراندازی کی کوشش ناکام بناتے ہوئے بھارتی فوج کا ڈرون شکرگڑھ سیکٹر میں مار گرایا ہے۔

 تفصیلات کے مطابق سیکیورٹی ذرائع کا کہناہے کہ بھارتی ڈرون آج صبح کے وقت پاکستانی حدود میں داخل ہونے کی کوشش کر رہا تھا، جسے مستعد پاکستان رینجرز نے نشانہ بنا کر تباہ کر دیا۔ حکام کا کہنا ہے کہ دشمن کی جانب سے یہ دراندازی ایک منظم منصوبے کے تحت کی جا رہی تھی، تاہم پاک فوج ہر ممکن طریقے سے ملکی خودمختاری کا دفاع کر رہی ہے۔

واضح رہے کہ گزشتہ رات بھی بھارتی جارحیت کے جواب میں پاکستان ایئر فورس نے مؤثر کارروائی کرتے ہوئے بھارت کے تین رافیل طیاروں سمیت پانچ جنگی طیارے اور ایک ڈرون مار گرایا تھا۔ آج صبح ایک اور بھارتی ڈرون کی تباہی کے بعد کل تباہ شدہ ڈرونز کی تعداد 2 ہو گئی ہے۔

سیکیورٹی ذرائع نے اس عزم کا اظہار کیا ہے کہ دشمن کی کسی بھی قسم کی جارحیت یا خلاف ورزی کا فوری اور سخت جواب دیا جائے گا، اور ملکی فضائی و زمینی سرحدوں کا دفاع ہر قیمت پر یقینی بنایا جائے گا۔

J-10C کی کارکردگی کے بعد چینی دفاعی کمپنی کے شیئرز میں نمایاں اضافہ

ویب ڈیسک: پاکستان ایئر فورس کی جانب سے بھارتی فضائیہ کے پانچ جنگی طیارے مار گرائے جانے کے بعد چین کی معروف دفاعی کمپنی "چینگدو ایرو اسپیس کارپوریشن" کے شیئرز میں نمایاں اضافہ ریکارڈ کیا گیا ہے۔ یہ کمپنی جدید J-10C لڑاکا طیاروں کی تیاری کے لیے مشہور ہے، جو اس وقت پاکستانی فضائیہ کے اہم ترین طیاروں میں شمار ہوتے ہیں۔

رپورٹس کے مطابق حالیہ فضائی جھڑپ میں پاکستان نے بھارت کے 5 طیارے، جن میں تین رافیل بھی شامل تھے، مؤثر فضائی کارروائی کے ذریعے تباہ کیے۔ ان میں سے چند طیارے J-10C کے نشانے پر آئے، جس سے ان کی صلاحیتوں پر ایک بار پھر اعتماد بڑھا ہے۔

اس کامیابی کے بعد چین کے دفاعی شعبے کو عالمی سطح پر نئی توجہ حاصل ہوئی ہے۔ اسٹاک مارکیٹس میں چینی کمپنی کے حصص میں تیزی سے اضافہ دیکھنے میں آیا ہے، جو ماہرین کے مطابق J-10C کی کامیاب کارکردگی کا براہِ راست نتیجہ ہے۔

دفاعی تجزیہ کاروں کا کہنا ہے کہ پاکستانی فضائیہ کی پیشہ ورانہ مہارت اور جدید ساز و سامان نے بھارتی عزائم کو ناکام بنایا، جبکہ چین کے تیار کردہ اسلحہ کی ساکھ بھی مزید مضبوط ہوئی ہے۔ J-10C پہلے ہی کئی ممالک کی دلچسپی حاصل کر چکے ہیں، اور اب ان کی بین الاقوامی مانگ میں اضافہ متوقع ہے۔

ادھر بھارت کو اس عسکری ناکامی کے بعد سفارتی سطح پر بھی شدید تنقید اور دباؤ کا سامنا ہے، جو اس کی علاقائی پوزیشن کو مزید کمزور کر سکتا ہے۔

بھارتی جارحیت کے بعد سائبر حملوں کا خطرہ، نیشنل ایمرجنسی الرٹ جاری

ویب ڈیسک: بھارتی جارحیت کے بعد پاکستان میں سائبر حملوں کے خطرات بڑھ گئے  جس کے پیش نظر نیشنل سائبر ایمرجنسی رسپانس ٹیم نے ایک اہم ایڈوائزری جاری کر دی ہے۔

تفصیلات کے مطابق ایڈوائزری میں خبردار کیا گیا ہے کہ دشمن عناصر موجودہ کشیدہ حالات کا فائدہ اٹھاتے ہوئے پاکستان کے اہم نیٹ ورکس کو سائبر حملوں کے ذریعے متاثر کرنے کی کوشش کر رہے ہیں۔ ان حملوں کا مقصد نہ صرف نظام کو نقصان پہنچانا ہے بلکہ عوام کو فریب پر مبنی پیغامات، فشنگ اسکیمز اور جھوٹی معلومات کے ذریعے گمراہ کرنا بھی ہے۔

نیشنل سائبر ایمرجنسی رسپانس ٹیم نے شہریوں سے اپیل کی ہے کہ وہ سوشل میڈیا پر کسی بھی غیر مصدقہ معلومات یا افواہ کو ہرگز شیئر نہ کریں۔ مشتبہ لنکس، غیر مستند ای میلز اور سوشل میڈیا میسجز کو کھولنے سے اجتناب برتنے کی ہدایت بھی دی گئی ہے۔

ایڈوائزری میں مزید کہا گیا ہے کہ دشمن عناصر ملک میں غیریقینی صورتحال پیدا کرنے کے لیے افواہوں کا سہارا لے رہے ہیں، اس لیے عوام صرف سرکاری یا ایمرجنسی ذرائع سے ہی معلومات حاصل کریں۔

حکام نے زور دیا ہے کہ واٹس ایپ، فیس بک، ٹوئٹر یا دیگر سوشل میڈیا پلیٹ فارمز پر ملنے والی غیر مصدقہ معلومات پر ہرگز یقین نہ کیا جائے اور کسی بھی مشتبہ سرگرمی کی اطلاع فوری طور پر متعلقہ اداروں کو دی جائے۔

حقیقت دکھانے کا فیصلہ، پاکستان نے عالمی میڈیا کے لیے دروازے کھول دیے

ویب ڈیسک: رات گئے پاکستان پر بھارتی میزائل حملوں کے بعد وزارت اطلاعات کی جانب سے ملکی اور غیرملکی میڈیا کے نمائندوں کو آج مظفرآباد، کوٹلی، مریدکے اور احمد پور شرقیہ کا دورہ کروایا جارہا ہے۔

تفصیلات کے مطابق میڈیا کو ان تمام مقامات کا دورہ کروایا جا رہا ہے جہاں بھارت نے کل رات پاکستان پر حملہ کرتے ہوئے معصوم پاکستانیوں کو نشانہ بنایا، اس دورے کا مقصد انٹرنیشنل اور قومی میڈیا میں بھارتی جارحیت کو دنیا کے سامنے بے نقاب کیا جائے گا۔

ذرائع  کے مطابق 30 کے لگ بھگ غیر ملکی اور 50 سے زائد ملکی میڈیا کے ارکان بھارتی حملوں سے متاثرہ جگہوں کا دورہ کریں گے۔

بھارتی ناظم الامور کی دفترخارجہ طلبی، پاکستان کاشدید احتجاج

ویب ڈیسک: بھارتی ناظم الامور کو دفتر خارجہ میں طلب کیا گیا ہے اور شدید احتجاج ریکارڈ کروایا گیا ہے۔ 

ترجمان دفتر خارجہ کے مطابق بھارتی ناظم الامور کو وزارت خارجہ طلب کای گیاہے۔ بھارتی ناظم الامور کو پاکستان اور آزاد جموں و کشمیر میں متعدد مقامات پر بلا اشتعال ہندوستانی حملوں پر پاکستان نے شدید احتجاج ریکارڈ کروایا۔ان حملوں کے نتیجے میں خواتین اور بچوں سمیت متعدد شہری ہلاک اور زخمی ہوئے۔

ترجمان دفترخارجہ کا کہنا ہے کہ بھارتی جارحیت پاکستان کی خودمختاری کی صریح خلاف ورزی ہے۔اس طرح کے اقدامات اقوام متحدہ کے چارٹر، بین الاقوامی قانون اور بین ریاستی تعلقات کو کنٹرول کرنے والے قائم کردہ اصولوں کے منافی ہیں۔ پاکستان نے بھارت کے دشمنانہ رویے کے بے بنیاد جواز کو سختی سے مسترد کر دیا۔

بھارتی فریق کو خبردار کیا گیا کہ اس طرح کے لاپرواہی سے علاقائی امن و استحکام کو شدید خطرہ لاحق ہے۔

نیلم جہلم ہائیڈرو پاور پروجیکٹ پر بھارتی گولہ باری، نقصان کی ویڈیو سامنے آگئی

ویب ڈیسک: نیلم جہلم ہائیڈرو پاور پروجیکٹ پر بھارتی گولہ باری کے نتیجے میں نقصان پہنچا جس کی ویڈیو سامنے آگئی۔

سیکیورٹی ذرائع کے مطابق نوسیری ڈیم دریائے نیلم پر واقع انٹیک اسٹرکچر کو گزشتہ شب 2 بجے نشانہ بنایا گیا، بھارتی گولہ باری سے ڈی سینڈرز یونٹ میں واقع انٹیک گیٹس کو نقصان پہنچا۔

ہائیڈرولک سسٹم کے ایک ہائیڈرولک پروٹیکشن یونٹ کو بھی نشانہ بنایا گیا جبکہ حملے میں ایک ایمبولینس کو بھی نقصان پہنچا۔

آبی ذخائر جیسے حساس مقامات کو نشانہ بنانا بین الاقوامی اصولوں کی صریحاً خلاف ورزی ہے۔

واضح رہے کہ ڈی جی آئی ایس پی آر لیفٹیننٹ جنرل احمد شریف چوہدری نے میڈیا بریفنگ میں بتایا تھا کہ بھارت نے نیلم جہلم ہائیڈرو پاور پروجیکٹ کو نقصان پہنچایا اور ہائیڈرو پروجیکٹ کو نشانہ بنانا ناقابل قبول اور خطرناک ہے۔

طیاروں کے بعد بھارت کی کرنسی بھی زمین بوس ہو گئی

ویب ڈیسک: پاکستان کے ساتھ حالیہ کشیدگی کے بعد بھارت کی مالیاتی منڈیوں پر منفی اثرات پڑنے لگے ہیں۔ بدھ کی صبح بھارتی روپیہ امریکی ڈالر کے مقابلے میں قدرے کمزور ہو گیا، جس پر ماہرین نے تشویش کا اظہار کیا ہے۔

ممبئی کے ایک بڑے بینک کے کرنسی ٹریڈر کے مطابق مارکیٹ میں غیر یقینی صورتحال نے سرمایہ کاروں کو محتاط کر دیا ہے اور عمومی فضا میں خوف محسوس کیا جا رہا ہے۔ ان کا کہنا تھا کہ اگر کشیدگی میں اضافہ ہوا تو بھارتی معیشت پر مزید دباؤ پڑ سکتا ہے۔

رپورٹس کے مطابق  بھارتی ریزرو بینک (RBI) کی جانب سے ممکنہ مداخلت کی توقع کی جا رہی ہے تاکہ مالیاتی بحران سے بچا جا سکے۔ اے این زی بینک کے کرنسی ماہر دھیرج نم کا کہنا تھا کہ ریزرو بینک کو آج کے دن روپے کو سنبھالنے کے لیے سخت اقدامات کرنے ہوں گے۔

انہوں نے یہ بھی کہا کہ بھارت نے پہلے پاکستان کے خلاف اقدامات کو معاشی خطرہ نہیں سمجھا لیکن اب خود ان ہی پالیسیوں کا دباؤ محسوس کرنے لگا ہے۔

یاد رہے کہ حالیہ دنوں میں بھارت نے دعویٰ کیا تھا کہ اس نے پاکستان کے اندر مخصوص اہداف کو نشانہ بنایا، جس کے جواب میں پاکستان نے بھرپور کارروائی کرتے ہوئے بھارت کے پانچ جنگی طیارے مار گرائے اور لائن آف کنٹرول پر کئی اہم تنصیبات کو تباہ کر دیا۔

پاک بھارت جھڑپیں،عالمی منڈی میں خام تیل اور گیس کی قیمت میں اضافہ

ویب ڈیسک: پاک بھارت جھڑپوں کے باعث عالمی منڈی میں گرتی ہوئی خام تیل کی قیمت کو سہارا مل گیا۔

تفصیلات کے مطابق عالمی منڈی میں خام تیل کی قیمت میں ایک فیصد تک اضافہ ہوا اور گیس کی قیمتیں 2 فیصد بڑھ گئیں۔

برینٹ خام تیل 62 ڈالر 52 سینٹس میں فروخت ہونے لگا جبکہ ڈبلیو ٹی آئی خام تیل 59 ڈالر 54 سینٹس کی سطح پر موجود ہے۔

عالمی منڈی میں گیس 3 ڈالر 55 سینٹس فی ایم ایم بی ٹی یو میں فروخت ہو رہی ہے۔

بھارتی حملوں میں 26 پاکستانی شہید اور 46 زخمی ہوئے: ڈی جی آئی ایس پی آر کی تصدیق

ویب ڈیسک: ڈی جی آئی ایس پی آر لیفٹیننٹ جنرل احمد شریف چودھری نے تصدیق کی ہے کہ بھارتی حملوں میں 26 پاکستانی شہید اور 46 زخمی ہوئے ہیں۔

 ڈی جی آئی ایس پی آر لیفٹیننٹ جنرل احمد شریف چودھری نے پریس کانفرنس کرتے ہوئے کہا ہے کہ بھارت نے 6 اور 7 مئی کی درمیانی سب بزدلانہ تاریخ دہرائی، مختلف مقامات پر حملوں میں 26 پاکستانی شہید اور 46 زخمی ہوئے ہیں

ترجمان پاک فوج نے بتایا ہے کہ مظفرآباد کے قریب مسجد بلال کو بھارتی جارحیت کا نشانہ بنایا گیا، مسجد بلال میں 3 شہادتیں ہوئیں، مریدکے میں ایک مسجد کو نشانہ بنایا گیا، مریدکے میں 3 مرد شہید اور ایک زخمی ہوا جبکہ کوٹلی میں 16 سالہ بچی اور 18 سالہ بچہ شہید ہوئے تاہم سیالکوٹ، شکر گڑھ سے کسی جانی نقصان کی کوئی خبر نہیں آئی۔

بھارت کی غلط فہمی کو یقیناً جلد ٹھیک کردیا جائے گا: لیفٹیننٹ جنرل احمد شریف چودھری

ڈی جی آئی ایس پی آر کے مطابق احمد پور شرقیہ میں بزدلانہ حملے میں 13 شہادتیں ہوئیں، مسلح افواج نے دشمن کو چند لمحوں بعد ہی منہ توڑ جواب دیا اور دے رہی ہیں، افواج پاکستان نے دشمن کے 5 طیارے اور ایک ڈرون کو مارگرایا، پاک فضائیہ نے بھارتی طیاروں کو اس وقت گرایا جب انہوں نے پاکستان پر حملہ کیا، بھارت کی جانب سے بلاثبوت الزامات عائد کیے جاتے ہیں۔

لیفٹیننٹ جنرل احمد شریف چودھری نے بتایا ہے کہ بھارت کی جانب سے ایل او سی پر بلااشتعال فائرنگ کا دندان شکن جواب دیا گیا، پاک فضائیہ کے تمام طیارے، دفاعی اثاثے مکمل طور پر محفوظ ہیں۔

ڈی جی آئی ایس پی آر نے کہا ہے کہ ہندوستان نے نیلم جہلم ہائیڈرو پارکس پروجیکٹ کو نشانہ بنایا اور نقصان پہنچایا، بھارت نے پاکستان کی جری قوم کو للکارا ہے، بھارت کی غلط فہمی کو یقیناً جلد ٹھیک کردیا جائے گا۔

انہوں نے مزید کہا ہے کہ پاکستان کی جانب سے بھارتی جارحیت کا بھرپورجواب دیا جارہا ہے اور دیا جاتا رہے گا، بھارت نے جب بزدلانہ کارروائی کی تو اس وقت نیشنل اور انٹرنیشنل پروازیں پاکستان کے ایئرسپیس پر موجود تھیں۔

پاکستان کا زبردست جوابی وار: بھارتی 6مہاربٹالین کا ہیڈکوارٹر بھی تباہ

ویب ڈیسک: بھارتی بزدلانہ حملے کے بعد بھارتی 6 مہار کا بٹالین ہیڈ کوارٹر بھی پاکستان کی جانب سے تباہ کردیا گیا ہے۔ 

سیکیورٹی ذرائع کے مطابق پاکستان کے جوابی وار میں بھارتی فوج کی 6 مہار یونٹ کا بٹالین ہیڈکوارٹر تباہ کردیا گیا ہے۔ بھارتی 6 مہار یونٹ آزاد کشمیر کی وادی لیپا کے سامنے مقبوضہ کشمیر میں ہے۔

پاکستان کی جانب سے بھارتی جارحیت کا بھرپور جواب جاری ہے۔

پاک فوج کی دندان شکن کارروائی، بھارت کو ایک ہی رات میں اربوں کا نقصان

ویب ڈیسک: بھارت نے رات کو بزدلانہ کارروائی کرتے ہوئے پاکستان کی سالمیت پر میزائلوں سے حملہ کردیا۔ جس کا پاک فوج نے فوری اور غیرمتوقع جواب دیکر نہ صرف بھارتی افواج کو سرپرائز دیا بلکہ ان کے جدید لڑاکا طیارے بھی مارگرائے۔

سیکیورٹی ذرائع کے مطابق بھارت کے اب تک 3 جدید لڑاکا طیارے، 1 مگ 29 اور ایک ایس یو 30 طیارہ پاکستانی شاہین گرا چکے ہیں۔ اس کے علاوہ سیالکوٹ سیکٹر کے قریب ایک ڈرون بھی گرایا جاچکا ہے۔ 

تاہم ایک رات کی بزدلانہ کارروائی سے بھارت کو اربوں کا نقصان اٹھانا پڑا ہے اور تاریخی ہزیمت بھی مودی کا مقدر بن گئی ہے۔ 

عالمی میڈیا کی رپورٹ کے مطابق ایک رافیل طیارہ 288 ملین امریکی ڈالر کی قیمت رکھتا ہے۔ پاکستان کے شاہینوں نے بھارتی فضائیہ کا غرور خاک میں ملاتے ہوئے ایک ہی رات میں تین رافیل طیارے تباہ کردیے ہیں۔ 

یاد رہے کہ بھارت نے 36 رافیل طیاروں کی ڈیل کی تھی۔ جس کا مقصد اپنی فضائیہ کو اپ گریڈ کرنا تھا۔ تاہم جدید طیارے بھی فضائیہ کی عزت بچانے میں ناکام رہے۔ 

اسی طرح روسی ساختہ ایک مگ 29 ایئرکرافٹ عالمی مارکیٹ میں 30 ملین ڈالر کی مالیت رکھتا ہے۔ جبکہ ایس یو 30 لڑاکا طیارے کی مالیت 50 ملین ڈالر تک ہے۔ 

اس طرح ایک ہی رات میں بھارت کو ایک رات میں لگ بھگ 944 ملین ڈالر کا نقصان صرف لڑاکا طیاروں کی صورت میں برداشت کرنا پڑا ہے۔ اس کے علاوہ دیگر نقصانات کا تخمینہ بھی لگایا جارہا ہے۔ 

ترکیہ سے طیارے پاکستان کی مدد کو پہنچ گئے،بھارت میں صفِ ماتم

ویب ڈیسک: بھارت کو پاکستان سے پنگا لینا مہنگا پڑ گیا۔ بزدل دشمن نے رات کے اندھیرے میں چھپ کر پاکستان پر وار کیا۔ اور نہتے شہریوں پر بم برسا دئیے۔ پاک فوج نے دشمن کو منہ توڑ جواب دیتے ہوئے چھٹی کا دودھ یاد دلا دیا۔

جنگ چھیڑنے والے بھارت کو لینے کے دینے پڑ چکے ہیں۔ کیونکہ بھارت کا اپنا میڈیا مودی کے دیش میں خوف پھیلانے لگا۔

بھارتی میڈیا نے دعوی کیا کہ بھارت کی اسٹرائیک کے دوران پاکستان میں ترکیہ سے بڑی تعداد میں جنگی طیارے پہنچے ہیں۔ جو کسی بھی وقت بھارت کے خلاف جنگ میں شامل ہو سکتے ہیں۔

بھارتی میڈیا کے دعوے پر مودی سرکار کی نیندیں حرام ہوگئیں۔ دوسری جانب ترکیہ کے وزیر خارجہ کا پاکستان کے حق میں بیان بھی آگیا۔

ترکی کے وزیر خارجہ کا اسحاق ڈار سے رابطہ ہوا۔ ترکیہ نے بھارت کے اقدامات پر تشویش کا اظہار کیا۔ ترکیہ نے بھارت کی بلااشتعال جارحیت پر پاکستان کے ساتھ مکمل یکجہتی کا اظہار کیا۔

پاکستان کی جانب سے بھارت کے بزدلانہ حملے کا بھرپور جواب دیا گیا۔ پاک فضائیہ نے دشمن کے 5 جہاز مار گرائے جب کہ بھارتی فوج کا بریگیڈ ہیڈ کوارٹر بھی تباہ کردیا۔

سکیورٹی ذرائع کے مطابق مار گرائے گئے طیاروں میں 3 رافیل، ایک مگ 29 اور ایس یو 30 شامل ہیں۔

سکیورٹی ذرائع نے بتایا ہےکہ پاک فوج نےجوابی کارروائی میں بھارت کابریگیڈ ہیڈکوارٹرتباہ کردیا۔

بزدلانہ حملے کے منہ توڑ جواب پر بھارت بوکھلا گیا، عرب دنیا سے کشیدگی میں کمی کیلئے بھاگ دوڑ

ویب ڈیسک: بھارت  بزدلانہ حملے اور پاکستان کی جانب سے منہ توڑ جواب کے بعد بوکھلا گیا، عرب دنیا سے کشیدگی کم کرانے کیلئے بھاگ دوڑ شروع کردی۔

سفارتی ذرائع کے مطابق  بھارتی حکام نے عرب دنیا کے حکمرانوں سے رابطہ کیا ہے اور درخواست کی ہے کہ عرب حکمران خصوصاً اماراتی حکام کشیدگی کم کرائیں۔

سفارتی ذرائع کا کہنا ہے کہ بھارت نے عرب دنیا سے پاکستان پر اثر و رسوخ استعمال کرنے کی درخواست کی ہے۔

پاک بھارت کشیدہ صورتحال پر یو اے ای کا ردعمل

پاکستان اور بھارت کے درمیان کشیدہ صورتحال پر متحدہ عرب امارات کا ردعمل بھی سامنے آگیا۔

 اماراتی وزیر خارجہ شیخ عبداللہ کا کہنا ہے کہ بھارت اور پاکستان کشیدگی سے گریز کریں،کشیدگی سے علاقائی و عالمی امن کو خطرہ ہو سکتا ہے۔

  اماراتی وزیر خارجہ نے کہاکہ بات چیت اور افہام و تفہیم پر زور دینا ضروری ہے۔

بھارت کا بزدلانہ حملہ اور پاکستان کا منہ توڑ جواب

بزدل بھارت نے پاکستان پر بلااشتعال جارحیت کرکے معصوم لوگوں کو ٹارگٹ کیا ہے۔

ڈی جی آئی ایس پی آر نے بتایا کہ بھارت نے پاکستان پر بلااشتعال جارحیت کی، پاکستان میں 6 مقامات پر مختلف ہتھیاروں سے بھارت کی جانب سے 24 حملے ہوئے۔  بھارت کے بزدلانہ حملوں میں 8 پاکستانی شہید،35 زخمی ہوئے جبکہ 2 افراد لاپتہ ہیں۔

بھارت کی جانب سے بزدلانہ حملے کے بعد پاکستان نے بھرپور جوابی کارروائی کی جس کے نتیجے میں 5 بھارتی طیاروں کو مار گرایا جب کہ پاکستانی حملے میں بھارتی بریگیڈ ہیڈکوارٹر بھی تباہ کیا گیا۔

پاک فوج کا بھرپور جواب،بزدل بھارت نے ایک رات میں شکست تسلیم کرلی

ویب ڈیسک: رات کی تاریکی میں بھارت کے بزدلانہ حملے کے جواب میں پاک فوج نے غیرمتوقع سرپرائز دیدیا۔ جس کی بھارتی فوج کو کسی صورت توقع نہیں تھی۔ 

تفصیلات کے مطابق پاک فوج کی جانب سے بھرپور جواب دینے پر آخر کار بھارت نے شکست تسلیم کرلی ہے۔بھارتی افواج نے اپنی پوسٹ پر سفید جھنڈا لہرا دیا ہے۔ 

اس سے قبل بھارت کے رات کی تاریکی میں بزدلانہ حملے کے بعد پاکستان نے بھرپور جوابی کارروائی کی جس کے نتیجے میں بھارت کے 5 طیارے مار گرائے اور بھارتی فوج کا بریگیڈ ہیڈ کوارٹر بھی تباہ کردیا۔

وزیردفاع خواجہ آصف نے خبر ایجنسی سے گفتگو میں تصدیق کی ہےکہ پاکستان نے بھارت کے 5 جنگی جہاز مار گرائے ہیں جب کہ پاکستانی فضائیہ کے تمام جہاز محفوظ ہیں۔

خواجہ آصف نے کہا کہ پاکستان نے بھارتی جارحیت کے جواب میں کارروائی میں برتری حاصل کرلی ہے۔

سکیورٹی ذرائع کے مطابق مار گرائے گئے طیاروں میں 3 رافیل، ایک مگ 29 اور ایس یو 30 شامل ہیں۔

سکیورٹی ذرائع کا کہنا ہےکہ پاک فضائیہ نے بھارت کا ایک اور رافیل طیارہ مار گرایا، ایوانتی پورا کے جنوب مغرب میں 17 ناٹیکل میل میں بھارت کا رافیل طیارہ مار گرایا گیا۔

سکیورٹی ذرائع نے بتایا ہےکہ پاک فوج نےجوابی کارروائی میں بھارت کابریگیڈ ہیڈکوارٹرتباہ کردیا۔

بھارتی میڈیا نے اپنے تین طیارے مار گرائے جانے کی تصدیق کردی ہے۔

پاکستان کی جانب سے دندان شکست جواب کے بعد بھارت نے شکست تسلیم کرلی ہے۔

شاہینوں سے دھلائی کے بعد رافیل طیاروں کے عالمی مارکیٹ میں شیئرز گرگئے

ویب ڈیسک: بھارتی فضائیہ کی شاہینوں کے ہاتھوں تاریخی دھلائی،،،، پاکستان کی سالمیت پر میلی آنکھ رکھنے والے رافیل طیاروں کو پاک فضائیہ نے دھول چٹا دی۔

تفصیلات کے مطابق بھارتی فضائیہ شاہینوں کے سامنے بےبس رہی۔ حملے کی کوشش میں اپنے تین جدید رافیل لڑاکا طیارے مارگرائے۔ یہی نہیں بھارتی فضائیہ نے جدید رافیل طیاروں کی اسٹاک مارکیٹ میں بھی شیئرز میں تنزلی کروادی۔ 

عالمی خبر ایجنسی کے مطابق رافیل طیارہ ساز فرانسیسی کمپنی کے عالمی مارکیٹ میں شیئرز گر گئے۔ رافیل طیارہ ساز کمپنی کے شیئرز میں 1 اعشاریہ 6 فیصد تک کمی ریکارڈ کی گئی ہے۔ 

یاد رہے کہ رافیل لڑاکا طیارے بھارتی فضائیہ کے زیر استعمال ہیں۔ 

بھارت کے بزدلانہ حملے میں معصوم بچوں کی شہادت،تصاویرسامنےآگئیں

ویب ڈیسک: بھارت کے بزدلانہ حملے میں شہید ہونے والے بچوں کی تصاویر  سامنے آگئیں۔

تفصیلات کے مطابق بھارت نے رات کے اندھیرے میں معصوم پاکستانی سویلینز کو نشانہ بنا یا ہے اور بہاولپور کی مسجد میں ہونے والے اس حملے میں ایک بچہ شہید ہو گیا ہےجبکہ اسی حملے میں ایک خاتون اور مرد بھی شدید زخمی ہوئے ہیں جن کی تصاویر بھی سامنے آگئیں ہیں۔

مریدکے میں بھارتی حملے میں شہید ہونے والے شہری کی شناخت میاں عبدالمالک نام سے ہوئی۔

بھارت کی غیر ذمہ دارانہ کارروائی، دو ایٹمی ریاستوں کو تصادم کے دہانے پر لا کھڑا کیا،دفترخارجہ

ویب ڈیسک:ترجمان دفترخارجہ شفقت علی خان نے بھارت کے پاکستان پر حملے کی مذمت کرتےہوئے کہا ہے کہ بھارت کی غیر ذمہ دارانہ کارروائی نے دو ایٹمی ریاستوں کو ایک بڑے تصادم کے دہانے پر لا کھڑا کیا ہے۔

تفصیلات کے مطابق ترجمان دفتر خارجہ شفقت علی خان نے پاکستان کی جانب سے بھارت کی کھلی جارحیت کی سخت مذمت کی اور کہا کہ بھارتی فضائیہ نے بلااشتعال اور کھلی جنگی کارروائی کے تحت اپنی فضائی حدود میں رہتے ہوئے اسٹینڈ آف ہتھیاروں کے ذریعے پاکستان کی خودمختاری کی سنگین خلاف ورزی کی ہے۔

انہوں نے کہا کہ یہ حملے بین الاقوامی سرحد کے پار مریدکے، بہاولپور اور لائن آف کنٹرول (ایل او سی) کے پار کوٹلی اور مظفرآباد (آزاد جموں و کشمیر) میں کیے گئے ہیں، ان حملوں کا نشانہ عام شہری بنے ہیں۔

شفقت علی خان نے کہا کہ بھارتی جارحیت کے نتیجے میں خواتین اور بچوں سمیت بے گناہ شہری شہید ہوئے ہیں، اس حملے سے تجارتی فضائی پروازوں کو بھی شدید خطرات لاحق ہوئے ہیں۔

انہوں نے کہا کہ پاکستان بھارت کی اس بزدلانہ کارروائی کی شدید مذمت کرتا ہے، ایسی کارروائی اقوام متحدہ کے چارٹر، بین الاقوامی قوانین اور بین الریاستی تعلقات کے مسلمہ اصولوں کی صریح خلاف ورزی ہے۔

ترجمان دفتر خارجہ کا کہنا تھا کہ پہلگام حملے کے تناظر میں بھارتی قیادت نے ایک بار پھر دہشت گردی کا بہانہ بنا کر جھوٹا بیانیہ اپنایا ہے تاکہ خطے کے امن و سلامتی کو داؤ پر لگایا جا سکے۔

ان کا کہنا تھا کہ بھارت کی غیر ذمہ دارانہ کارروائی نے دو ایٹمی ریاستوں کو ایک بڑے تصادم کے دہانے پر لا کھڑا کیا ہے اور صورت حال تیزی سے بدل رہی ہے۔

انہوں نے کہا کہ پاکستان اقوام متحدہ کے چارٹر کے آرٹیکل 51 اور بین الاقوامی قانون کے مطابق مناسب وقت اور مقام پر جواب دینے کا حق محفوظ رکھتا ہے۔

ترجمان دفترخارجہ نے کہا کہ حکومت پاکستان، مسلح افواج اور عوام بھارتی جارحیت کے خلاف متحد ہیں، وہ ہمیشہ پاکستان کی خودمختاری اور علاقائی سالمیت کے تحفظ اور بقا کے لیے فولادی عزم کے ساتھ عمل کریں گے

اقوام متحدہ کا بھارتی میزائل حملوں پر اظہارِ تشویش

ویب ڈیسک: اقوام متحدہ کے سیکریٹری جنرل انتونیو گوتریس نے بھارت کی جانب سے پاکستان پر حالیہ میزائل حملوں پر شدید تشویش کا اظہار کیا ہے۔ انہوں نے دونوں ممالک سے زیادہ سے زیادہ عسکری تحمل برتنے کی اپیل کی ہے۔

تفصیلات کے مطابق اقوام متحدہ کے ترجمان اسٹیفن دوجارک نے اپنے بیان میں کہا کہ "اقوام متحدہ کے سیکریٹری جنرل کو بھارت کی جانب سے لائن آف کنٹرول اور بین الاقوامی سرحد کے پار فوجی کارروائیوں پر بہت تشویس ہے۔" انہوں نے مزید کہا کہ "دنیا بھارت اور پاکستان کے درمیان کسی فوجی تصادم کی متحمل نہیں ہو سکتی۔"

یہ بیان بھارت کی جانب سے "آپریشن سندور" کے تحت پاکستان اور پاکستان کے زیر انتظام جموں و کشمیر میں میزائل حملوں کے بعد سامنے آیا ہے۔ بھارت نے ان حملوں کو پہلگام میں ہونے والے دہشت گرد حملے کا ردعمل قرار دیا ہے، جس میں 26 افراد ہلاک ہوئے تھے۔

دونوں ممالک کے درمیان کشیدگی میں اضافہ ہوا ہے جس کے نتیجے میں ویزوں کی منسوخی، سفارتی عملے کی واپسی، اور سندھ طاس معاہدے کی معطلی جیسے اقدامات کیے گئے ہیں۔ عالمی برادری، بشمول امریکہ، نے دونوں ممالک کے رہنماؤں سے رابطہ کر کے کشیدگی کم کرنے کی کوششیں کی ہیں۔

بھارت کی جانب سے کیے گئے میزائل حملوں میں پاکستان کے مطابق تین شہری ہلاک اور بارہ زخمی ہوئے ہیں، جبکہ دو مساجد کو بھی نقصان پہنچا ہے۔ پاکستان نے ان حملوں کو "بزدلانہ کارروائی" قرار دیا ہے۔

اقوام متحدہ کے سیکریٹری جنرل نے زور دیا ہے کہ دونوں ممالک تحمل کا مظاہرہ کریں اور کسی بھی قسم کی مزید کشیدگی سے گریز کریں تاکہ خطے میں امن و استحکام قائم رکھا جا سکے۔

پاک فوج کا شدید وار:بھارتی فوجی چوکیاں چھوڑ کر فرار

ویب ڈیسک: پاک فضائیہ نے بھارت کے بزدلانہ حملے کے جواب میں آج رات شاندار کارروائی کرتے ہوئے بھارت کے 3 جنگی طیارے مار گرائے۔ اطلاعات کے مطابق ایک طیارہ بھا ٹنڈا اور دوسرا اکھنور اور تیسراایوانتی پورا کے  جنوب مغرب میں  مار گرایا۔

تفصیلات کےمطابق پاک فضائیہ نے ایوانتی پورا کے  جنوب مغرب میں 17 ناٹیکل مائل بھارت کا ایک اور رافیل طیارہ مار گرایا۔اب تک پاک فضائیہ، بھارتی فضائیہ کے تین جنگی طیارے گرا چکی ہے۔

ہندوستانی میڈیا بھوکلاہٹ میں مسلسل پاکستانی فضائیہ کے  اور جھوٹی طیاروں کے نقصان کی من گھڑت خبریں چلا رہا ہے۔پاک فضائیہ کے کسی بھی طیارے کو کوئی نقصان نہیں ہوا۔

ذرائع کا کہنا ہے کہ لائن آف کنٹرول (ایل او سی) پر پاک فوج نے دشمن کی جارحیت کا بھرپور جواب دیا۔ جولی پوسٹ، بڈوری سیکٹر میں بھارتی فوجی شدید گولہ باری کے بعد اپنی50 سے زائد چوکیاں چھوڑ کر فرار ہو گئے۔

پاک فوج نے بھاگتے بھارتی فوجیوں پر آرٹلری کا نشانہ لگایا جس کے نتیجے میں دشمن کو بھاری جانی نقصان اٹھانا پڑا۔ اطلاعات کے مطابق متعدد بھارتی فوجی ہلاک ہوئے۔

اسی طرح پیر کانٹی سیکٹر میں بھی بھارتی فوج نے چالیس سے زائد پوسٹیں خالی کر دیں۔ پاک فوج کی جوابی کارروائی میں متعدد بھارتی فوجی مارے گئے اور دشمن کو شدید نقصان پہنچا۔

آئی ایس پی آر کے مطابق پاک فوج ہر جارحیت کا مؤثر جواب دینے کی مکمل صلاحیت رکھتی ہے اور قوم کے دفاع کے لیے ہر ممکن اقدام کیا جائے گا۔

پاک فوج نے برنالہ سیکٹر میں بھارت کا ڈرون مار گرایا

ویب ڈیسک:پاک فوج نے برنالہ سیکٹر میں بھارت کا ڈرون مار گرایا۔

 سکیورٹی ذرائع کے مطابق پاک فوج بھارتی جارحیت کا منہ توڑ جواب دے رہی ہیں۔

بھارت کی جانب سے بزدلانہ حملے کے بعد لاہور کے  شہری باہر نکل آئیں ہے ، شہریوں کا کہنا ہے جنگ مسلط کی گئی ہے تو اب فوج کے شانہ بشانہ کھڑے ہو کر مقابلہ کرے گے.

امریکی صدر نے بھارت کے پاکستان پر حملے کو شرمناک قرار دے دیا

ویب ڈیسک : امریکی صدر نے بھارت کے پاکستان پر حملے کوشرمناک قرار دے دیا ہے۔

غیرملکی خبرایجنسی رائٹرز کی رپورٹ کے مطابق وائٹ ہاؤس میں میڈیا سے بات کرتے ہوئے کہا کہ بھارت کی جانب سے پاکستان اور آزاد جموں و کشمیر میں مختلف مقامات پر کیے گئے حملے شرم ناک ہیں۔

ڈونلڈ ٹرمپ نے کہا کہ چند گھنٹوں میں ہونے والی اشتعال انگیزی کے بارے میں مجھے ابھی معلوم ہوا ہے۔

امریکی اسٹیٹ ڈپارٹمنٹ کی ترجمان ٹیمی بروس نے بھارت کے بزدلانہ حملے کے بعد ردعمل میں دونوں ممالک سے تحمل کا مطالبہ کیا۔

ٹیمی بروس نے دونوں ممالک سے کہا کہ مسائل کا حل ذمہ دارانہ انداز میں نکالیں تاکہ جنوبی ایشیا میں پائیدار علاقائی امن قائم ہو۔

انہوں نے کہا کہ ہم دونوں ممالک کی حکومتوں کے ساتھ مختلف سطح پر بدستور رابطے میں ہیں۔

واضح رہے کہ بھارت کے پاکستان پر حملے کے بعد دنیا بھر میں ایک بار پھر بھارت کو سفارتی سطح پر ناکامی کا سامنا کرنا پڑ رہاہے اور سب سے پہلے امریکی صدر کا مذمتی بیان سامنے آیا ہے۔

بھارت کا بزدلانہ حملہ، مریم نواز کا پورے پنجاب میں ہنگامی حالت کا اعلان

(ویب ڈیسک ) بھارت کے بزدلانہ حملے کے بعد وزیراعلی مریم نواز نے پورے پنجاب میں ہنگامی حالت کا اعلان کرادیا۔

وزیراعلی پنجاب مریم نواز شریف کی بھارتی بزدلانہ حملے کی شدید مذمت۔وزیر اعلی مریم نواز نے اعلان کیا کہ  پوری قوم متحد ہوکر دشمن کا مقابلہ کرے گی۔

انہوں نے کہا کہ مئی میں دشمن نے حملہ کیا، 28 مئی 1998 کی طرح منہ توڑ جواب دیں گے،پاکستان کا بچہ بچہ اس امتحان میں سرخرو ہوگا اور اللہ تعالی کے فضل و کرم سے فتح یاب ہوگا۔

وزیر اعلی نے پورے پنجاب میں ہنگامی حالت کا اعلان کر دیا ۔پنجاب پولیس سمیت تمام سکیورٹی ادارے ہائی الرٹ  کردیے گئے۔  پنجاب کے تمام ہسپتالوں کے ڈاکٹروں اور طبی عملے کی چھٹیاں منسوخ کر دی گئیں ، تمام سٹاف کو فوری طور پر ڈیوٹیاں سنبھالنے کا حکم دے دیا گیا۔

پنجاب بھر کے تمام اضلاع کی ڈسٹرکٹ ایڈمنسٹریشن بھی ہائی الرٹ کر دیا گیا ۔شہری دفاع سمیت دیگر تمام اداروں کے افسران اور عملہ بھی طلب کر لیا گیا۔

مکار دشمن نے پانچ مقامات پر بزدلانہ حملہ کیا ، بھرپور جواب دیا جا رہا ہے، وزیر اعظم

(ویب ڈیسک ) وزیر اعظم شہباز شریف کا کہنا ہے کہ پاکستان بھارت کی مسلط کردہ اس جنگی عمل کا بھرپور جواب دینے کا پورا حق رکھتا ہے اور بھرپور جواب دیا جا رہا ہے.

وزیرِ اعظم محمد شہباز شریف نے موجودہ صورتحال پر بیان جاری کردیا۔ وزیر اعظم نے کہا کہ مکار دشمن نے پاکستان کے پانچ مقامات پر بزدلانہ حملہ کیا ہے.پاکستان بھارت کی مسلط کردہ اس جنگی عمل کا بھرپور جواب دینے کا پورا حق رکھتا ہے اور بھرپور جواب دیا جا رہا ہے.

انہوں نے کہا کہ پوری قوم افواج پاکستان کے ساتھ ہے اور پوری پاکستانی قوم کا مورال اور جذبہ بلند ہے۔پاکستانی قوم اور افواج پاکستان دشمن سے نبٹنا بخوبی جانتے ہیں.دشمن کو اپنے مزموم مقاصد میں کبھی کامیاب نہیں ہونے دیں گے.

پاک افواج کی جوابی کاروائی میں بھارت کا بریگیڈ ہیڈکوارٹر تباہ

(ویب ڈیسک ) پاک افواج کی جوابی کارروائی میں بھارت کا بریگیڈ ہیڈکوارٹر تباہ کردیا گیا۔

سیکیورٹی ذرائع کا کہنا ہے کہ پاک فوج نے جوابی کارروائی کرتے ہوئے بھارت کا بریگیڈہیڈ کوارٹر تباہ کردیا ہے۔

سیکیورٹی ذرائع کے مطابق متعدد مقامات پر پاک افواج دشمن کا منہ توڑ جواب دے رہی ہیں۔

قبل ازیں     پاک فضائیہ نے دشمن کے دو جہاز گرا دیے گئے ہیں۔ سیکورٹی ذرائع کا کہنا ہے کہ  پاکستانی فضائیہ کے تمام جہاز محفوظ ہیں۔

پاک فضائیہ نے بھارت کے دو جہاز گرادیے، سیکیورٹی ذرائع

(ویب ڈیسک ) سیکیورٹی ذرائع کا کہنا ہے کہ ابتدائی اطلاعات کے مطابق  پاک فضائیہ نے دشمن کے دو جہاز گرا دیے گئے ہیں۔

سیکیورٹی ذرائع کے مطابق  سپاکستانی افواج بھارتی جارحیت کا بھرپور جواب دے رہی ہیں، ابتدائی اطلاعات کے مطابق  پاک فضائیہ نے دشمن کے دو جہاز گرا دیے گئے ہیں۔

سیکورٹی ذرائع کا کہنا ہے کہ  پاکستانی فضائیہ کے تمام جہاز محفوظ ہیں، پاکستان مسلح افواج دشمن کو جارحیت کا منہ توڑ جواب دے رہی ہیں۔

پاک فضائیہ , پاک فوج بھارتی بزدلانہ حملے کا منہ توڑ جواب دے رہی ہیں، سیکورٹی ذرائع 

(ویب ڈیسک )سیکورٹی ذرائع کا کہنا ہے کہ پاک فضائیہ  اور پاک فوج بھارتی بزدلانہ حملے کا منہ توڑ جواب دے رہی ہیں۔

سیکیورٹی ذرائع کا کہنا ہے کہ  معصوم پاکستانیوں کے خون کا بدلہ ہر صورت لیا جاے گا، ابھی تک جو نقصان کا تخمینہ سامنے آیا ہے اس کے مطابق صرف سویلین اور معصوم پاکستانیوں کو ٹارگٹ کیا گیا۔

سیکورٹی ذرائع کے مطابق  تصویروں میں واضح طور پر دیکھا جا سکتا ہے کے صرف معصوم اور نہتے پاکستانیوں کو ٹارگٹ کیا گیا، ایک ایک معصوم پاکستانی کے خون کا بدلہ لیا جاے گا۔

سیکورٹی ذرائع کا کہنا ہے کہ بھارت نے رات کے اندھیرے میں  اب تک کی اطلاعات کے مطابق پانچ مقامات پر کوٹلی، احمد پور شرقیہ، مظفرآباد، باغ اور مریدکے پر حملہ کیا۔