پاکستان اور سعودیہ سمیت20 اسلامی ممالک کی ایران پراسرائیلی جارحیت کی شدید مذمت

امریکی صدر ٹرمپ نے ایران پر حملے   کے منصوبے کی منظوری  کی خبر کو مسترد کردیا

(ویب ڈیسک ) امریکی صدر ٹرمپ نے ایران پر حملے   کے منصوبے کی منظوری  کی خبر کو مسترد کردیا ہے۔

امریکی  صدر ڈونلڈ ٹرمپ نے ایران پر ممکنہ حملے سے متعلق وال اسٹریٹ جرنل کی رپورٹ کو غلط قرار دے دیا ہے۔ رپورٹ میں دعویٰ کیا گیا تھا کہ ٹرمپ نے نجی طور پر ایران پر حملے کی منظوری دی تھی لیکن حتمی فیصلہ اس امید پر مؤخر کیا کہ ایران اپنا نیوکلیئر پروگرام چھوڑ دے گا۔

ٹرمپ نے اپنی سوشل میڈیا ایپ "ٹروتھ سوشل" پر لکھا کہ  "وال اسٹریٹ جرنل کو نہیں پتا کہ میرے ایران کے بارے میں کیا خیالات ہیں!"

کل تک ٹرمپ نے صحافیوں سے بات کرتے ہوئے کہا تھا کہ وہ ابھی تک حملے کی اجازت دینے سے متعلق فیصلہ نہیں کر سکے۔

امریکی صدر نے کہا تھا کہ  دیکھتے ہیں کیا ہوتا ہے۔ سب نے مجھ سے اس بارے میں پوچھا ہے، لیکن میں نے ابھی کوئی فیصلہ نہیں کیا۔

ایران نے بیلسٹک میزائل میں 'کلسٹر بم وار ہیڈ' استعمال کیا ، اسرائیلی اخبار کا دعویٰ

(ویب ڈیسک ) اسرائیلی اخبار کی رپورٹ کے مطابق   ایران کی جانب سے آج اسرائیل پر داغے گئے کم از کم ایک بیلسٹک میزائل میں "کلسٹر بم وار ہیڈ" موجود تھا۔

رپورٹ کے مطابق، کلسٹر بم وار ہیڈ گرتے وقت کئی چھوٹے بموں میں تقسیم ہو جاتا ہے، جو مختلف مقامات پر گرتے ہیں۔ انہی میں سے ایک بم نے اسرائیل کے شہر آزور میں ایک گھر کو نشانہ بنایا، جس سے نقصان ہوا۔

رپورٹ میں کہا گیا ہے کہ ایران دعویٰ کرتا ہے کہ اس کے پاس ایسے بیلسٹک میزائل ہیں جو "ملٹیپل انڈیپینڈنٹلی ٹارگیٹیبل ری انٹری وہیکلز (MIRV)" ٹیکنالوجی کے حامل ہیں۔ یہ میزائل ایک وقت میں کئی اہداف کو نشانہ بنا سکتے ہیں۔

فوج نے عوام کو خبردار کیا ہے کہ زمین پر گرنے والے کسی بھی میزائل یا اس کے حصے کے قریب نہ جائیں، کیونکہ وہ خطرناک اور دھماکہ خیز ہو سکتے ہیں۔

ایرانی میزائل حملوں کے باعث 5,000 سے زائد اسرائیلی بے گھر ہوگئے

(ویب ڈیسک ) ایران کے  میزائل حملوں کے باعث 5,000 سے زائد اسرائیلی بے گھر ہوگئے ہیں۔

 اسرائیلی میڈیا کی رپورٹ کے مطابق ایران کے جوابی میزائل حملوں کے باعث اسرائیل میں ہزاروں افراد بے گھر ہو گئے ہیں۔

اسرائیلی وزارت داخلہ کے مطابق اب تک 5,110 افراد کو بے گھر ہوگئے ہیں ۔ جن میں سے 907 افراد کا تعلق دارالحکومت تل ابیب سے ہے۔

خیال رہے کہ یہ حملے ایران کی جانب سے اسرائیلی کارروائیوں کے جواب میں کیے گئے ہیں ۔

ایران بیرونی جارحیت پر آبنائے ہرمز کو بند کرنے کا آپشن استعمال کر سکتا ہے

(ویب ڈیسک ) ایران نے ایک بار پھر خبردار کیا ہے کہ اگر اس پر بیرونی جارحیت کی گئی تو وہ آبنائے ہرمز کو بند کرنے کا آپشن استعمال کر سکتا ہے۔

یہ بات ایرانی پارلیمنٹ کی نیشنل سیکیورٹی کمیٹی کے رکن بہنام سعیدی نے نیم سرکاری خبر ایجنسی "مہر" کو دیے گئے انٹرویو میں کہی۔

آبنائے ہرمز ایک اہم سمندری راستہ ہے جہاں سے دنیا کے 20 فیصد تیل کی یومیہ فراہمی گزرتی ہے۔ اگر یہ راستہ بند ہوتا ہے تو عالمی منڈی میں تیل کی قیمتوں میں شدید اضافہ اور تجارتی مشکلات پیدا ہو سکتی ہیں۔

خیال رہے کہ ایران اس سے قبل بھی مغربی دباؤ کے جواب میں آبنائے ہرمز بند کرنے کی دھمکی دے چکا ہے۔

غیر ملکی خبر ایجنسی کے مطابق   موجودہ کشیدہ حالات کے باعث کئی تجارتی بحری جہاز ایرانی سمندری حدود سے گریز کر رہے ہیں۔

ایرانی سپریم لیڈر آیت اللہ علی خامنہ ای کے قتل کی دھمکیاں، آیت اللہ سیستانی کااہم بیان  آگیا

(ویب ڈیسک ) عراق کے مذہبی رہنما آیت اللّٰہ سید علی حسینی سیستانی نے ایران پر اسرائیلی بربریت کی شدید مذمت کرتے ہوئے ایرانی رہنماؤں کے قتل کو جرم قرار دے دیا۔

نجف میں اپنے دفتر سے جاری کردہ ایک بیان میں آیت اللّٰہ سید علی حسینی سیستانی نے کہا ہے کہ  ایران کی چوٹی کی مذہبی لیڈرشپ کے خلاف دھمکیاں دینے والوں کو خبردار کرتے ہیں، ایسا کوئی بھی عمل پورے خطے کیلیے ہولناک نتائج کا سبب بنے گا۔

انہوں نے کہا کہ  ناجائز مسلط کردہ جنگ کے خاتمے کیلیے خطے کے ممالک اور عالمی برادری بھرپور کردار ادا کرے۔

آیت اللہ سید علی حسینی سیستانی نے خبردار کیا کہ  کسی بھی مجرمانہ اقدام کا مقصد ایران کی قیادت کو غیر مستحکم کرنا ہے، اس کے پورے  خطے کیلئے سنگین نتائج ہوں گے، ممکنہ طور پر وسیع پیمانے پر افراتفری اور علاقائی کشیدگی میں اضافہ ہو گا۔

عراق کے مذہبی رہنما نے  اسلامی دنیا کی حکومتوں سے مطالبہ کیا کہ وہ جارحیت کو روکنے اور ایران کے ارد گرد جوہری مسئلے کا بین الاقوامی قانون کے مطابق پرامن، منصفانہ حل تلاش کرنے کے لیے کام کریں۔

ایرانی  نیوکلیئر تنصیبات پر امریکی حملے سے متعلق ابھی کچھ نہیں کہہ سکتا ، ٹرمپ

(ویب ڈیسک ) امریکی صدر ٹرمپ کا کہنا ہے کہ  امریکا ایران کی نیوکلیئر تنصیبات پر حملہ کرے گا یا نہیں  ابھی کچھ نہیں کہہ سکتا۔

امریکی صدر ڈونلڈ ٹرمپ  ایک بار پھر غیر مشروط سرینڈر کا مطالبہ دہرا دیا۔ٹرمپ نے کہا کہ آج بھی ایران کیلئے یہی پیغام ہے کہ سرینڈر کردے۔

امریکی صدر نے کہا کہ واضح کردینا چاہتا ہوں کہ ایران کو مشکلات کا سامنا کرنا پڑے گا۔ایران کی فضائی حدود پر ہمارا مکمل کنٹرول ہے۔ آج ایران بات کرنا چاہ رہا ہے مگر اب بہت دیر ہوگئی ہے۔ایران نے 2 ہفتے پہلے بات کیوں نہیں کی۔

ٹرمپ نے کہا کہ آئندہ ہفتہ اہم ہے ہوسکتا ہے  اس سے پہلے ہی بڑی کارروائی ہو۔

روس نے امریکا کو اسرائیل کو براہ راست فوجی امداد دینے یا اس بارےسوچنے سے خبردار کردیا

(ویب ڈیسک)  روسی وزارت خارجہ نے بیان میں کہا ہے کہ  امریکا اسرائیل کو براہِ راست فوجی امداد دینے یا اس کے بارے میں سوچنے سے بھی خبردار رہے۔

روسی وزارت خارجہ کی جانب سے بیان میں کہا گیا ہے کہ امریکی فوجی امداد مشرقِ وسطیٰ کی صورتحال کو شدید غیر مستحکم کرسکتی ہے، ایران اور اسرائیل دونوں کے ساتھ رابطے میں ہیں۔

خیال رہے کہ  گزشتہ روز بات سامنے آئی تھی کہ  امریکی صدر ٹرمپ نے ایران پر اسرائیلی حملوں میں امریکا کے شامل ہونے کا عندیہ دے دیا ہے۔

امریکی میڈیا نے دعویٰ کیا تھا کہ امریکا اس بات پر غور کر رہا ہے کہ وہ بھی اسرائیل کے ساتھ ایران پر بمباری میں شامل ہو جائے۔

امریکیوں کو معلوم ہونا چاہیئے  ایران سرینڈر نہیں کرے گا، آیت اللہ علی خامنہ ای 

(ویب ڈیسک ) ایرانی سپریم لیڈر آیت اللہ علی خامنہ ای نے  کہا ہے کہ امریکیوں کو معلوم ہونا چاہیئے  ایران سرینڈر نہیں کرے گا،امریکا  ان کی طرف سے کوئی بھی فوجی مداخلت بلاشبہ انہیں ناقابل تلافی نقصان پہنچائے گی۔

ایرانی سپریم لیڈر  نے اسرائیل کے خلاف حملے تیز کرنے کی ہدایت کردی ہے۔ایرانی سپریم لیڈر آیت اللہ علی خامنہ ای نے ایرانی قوم سے خطاب کرتے ہوئے کہا کہ ایران دھمکیوں کی زبان کا اچھا جواب نہیں دیتا، مسلط کردہ جنگ یا امن کو قبول نہیں کریں گے۔

انہوں نے کہا کہ امریکا کا کوئی بھی حملہ سنگین اور ناقابل تلافی نتائج کا باعث بنے گا۔   ایران اپنی سرزمین پر کسی بھی حملے کو نظر انداز نہیں کرے گا، اور مسلح افواج ہائی الرٹ پر ہیں۔

ایرانی سپریم لیڈر نے خطاب میں کہا کہ  ایران اپنی فضائی حدود کی خلاف ورزی پر صہونیوں  کو نہ تو معاف کرے گا اور نہ ہی اپنے شہداء کے خون کو بھولے گا۔

آیت اللہ علی خامنہ ای نے کہا کہ  اسرائیل نے ایک سنگین غلطی کی ہے اور اسے اس کے نتائج کا سامنا کرنا پڑے گا۔ہماری مسلح افواج وطن کے دفاع کے لیے تیار ہیں، جنہیں حکام اور پوری قوم کی حمایت حاصل ہے۔

ایران کے سپریم لیڈر آیت اللہ علی خامنہ ای کون؟ کتنی طاقت رکھتے ہیں؟

ویب ڈیسک:ایران کے رہبرِ معظم کون ہیں اور ان کے پاس کتنی طاقت ہے۔ برطانوی نشریاتی ادارے نے رپورٹ کیا ہے کہ آیت اللہ علی خامنہ ای 1979 کے انقلاب کے بعد ایران کے رہبرِ اعلیٰ بننے والے دوسرے شخص ہیں۔ وہ 1989 سے اس عہدے پر فائز ہیں۔ 

آیت اللہ خامنہ ای 1939 میں ایران کے دوسرے سب سے بڑے شہر مشہد کے ایک مذہبی خاندان میں پیدا ہوئے۔ وہ اپنے بھائی بہنوں میں دوسرے نمبر پر ہیں اور ان کے والد ایک درمیانے درجے کے شیعہ عالم تھے۔

انھوں نے بچپن میں مذہبی تعلیم حاصل کی اور 11 برس کی عمر میں وہ ایک عالم کے طور پر اہل ہو گئے تھے۔ اپنے دور کے دیگر عالموں کی طرح ان کے کام کی نوعیت مذہبی ہونے کے ساتھ ساتھ سیاسی بھی تھی۔

بطور ایک بااثر خطیب، وہ شاہِ ایران کے نقادوں میں شامل ہو گئے۔ بالآخر 1979 کے انقلاب کے نتیجے میں ایران کے شاہ کا تختہ الٹ دیا گیا، خامنہ ای کئی برسوں تک روپوش رہے اور انھیں جیل بھی کاٹنی پڑی۔ شاہِ ایران کی خفیہ پولیس نے انھیں چھ مرتبہ گرفتار کیا اور انھیں تشدد کا بھی سامنا کرنا پڑا۔

1979 کے انقلاب کے ایک سال بعد انقلاب کے بانی آیت اللہ روح اللہ خمینی نے انھیں تہران میں جمعے کی نماز کا امام مقرر کر دیا۔

1981 میں خامنہ ای صدر منتخب ہوئے جبکہ 1989 روح اللہ خمینی کی وفات کے بعد مذہبی رہنماؤں نے انھیں آیت اللہ خمینی کا جانشین مقرر کر دیا۔

رپورٹ کے مطابق خامنہ ای بہت کم ایران سے باہر جاتے ہیں۔ وہ مرکزی تہران میں واقع ایک کمپاؤنڈ میں اپنی اہلیہ کے ہمراہ ایک سادہ زندگی گزارتے ہیں۔

کہا جاتا ہے کہ وہ باغبانی اور شاعری کے شوقین ہیں۔ 1980 کی دہائی میں ان پر ہونے والے ایک قاتلانہ حملے کے بعد سے خامنہ ای اپنا دایاں بازو استعمال نہیں کر سکتے۔

اولاد

خامنہ ای کی اپنی اہلیہ منصوره خجسته باقرزاده سے چھ بچے ہیں جن میں چار بیٹے اور دو بیٹیاں شامل ہیں۔

ان کے بچوں میں ان کے دوسرے بیٹے مجتبیٰ اپنے اثر و رسوخ اور خامنہ ای کے قریبی حلقوں میں اپنے کردار کی وجہ سے سب سے زیادہ جانے جاتے ہیں۔

ایران کے حملوں سے خوفزدہ اسرائیلی سمندری راستے سے ملک سے فرار ہونے لگے

ویب ڈیسک:ایران اسرائیل جنگ کے دوران ایرانی میزائل حملوں سے تنگ اسرائیلی سمندری راستے سے ملک سے فرار ہونے لگے۔

اسرائیلی اخبار ہارٹز کی ایک رپورٹ کے مطابق فضائی حدود بند ہونے اور پروازیں معطل ہونے کے بعد اسرائیلی شہری کشتیوں کی ذریعے ملک چھوڑ کر  قبرص جانے لگے ہیں۔

ہرزلیا کے مرینا نے اب ایک عارضی ائیرپورٹ کی صورت اختیار کرلی ہے۔ اسرائیل سے نکلنے کے خواہش مند افراد یہاں صبح 7 بجے سے ہی پہنچنا شروع ہوجاتے ہیں، یہ اپنی مخصوص یاٹ تلاش کرتے ہیں جو انہیں قبرص پہنچائے گی اور وہاں سے وہ کہیں بھی چلیں جائیں گے، انہیں بس اسرائیل سے نکلنا ہے۔

سمندری راستے سے ملک چھوڑنے سے متعلق فیس بک پر قائم گروپس میں سیکڑوں افراد اسرائیل سے سمندری راستے سے نکلنے کی منصوبہ بندی کر رہے ہیں، ہرزلیا، حیفا اور عسقلان جیسی بندرگاہوں پر نجی یاٹ مالکان 10 مسافروں پر مشتمل گروپس کی روانگی کا بندوبست کر رہے ہیں۔

اخبار کے مطابق مسافروں میں سے زیادہ تر کا دعویٰ ہے کہ وہ اسرائیل میں مقیم نہیں اور صرف واپس اپنے گھروں کو جا رہے ہیں، کچھ کہتے ہیں وہ بیرون ملک اپنے بچوں یا شریک حیات کے پاس جا رہے ہیں، صرف چند ایک نے دبے لفظوں میں اعتراف کیا کہ وہ ایرانی میزائل حملوں کے خوف سے فرار اختیار کر رہے ہیں۔

اسرائیلی اخبار کے مطابق بندرگاہ پر موجود ایک جوڑے نے جنگ سے بھاگنے کا اعتراف کرتے ہوئے کہا کہ ’ہم میزائلوں سے تنگ آچکے ہیں‘۔

پینٹاگون نے ایران پر امریکی حملے کی خبروں کی تردید کر دی

ویب ڈیسک:  امریکی وزارت دفاع  نے ایران پر امریکی جنگی طیاروں کے حملے کی خبروں کو بے بنیاد قرار دے دیا ہے۔   امریکی وزارت دفاع نے بیان میں کہا ایران کے خلاف کسی بھی قسم کی فضائی کارروائی میں امریکہ کا کوئی کردار نہیں ہے۔

الجزیرہ کی رپورٹ کے مطابق پینٹاگون نے واضح کیا ہے کہ ایران پر حملے میں امریکی جنگی طیاروں کی شرکت سے متعلق گردش کرنے والی اطلاعات درست نہیں، اس حوالے سے ایک اعلیٰ امریکی عہدیدار نے بھی کہا ہے کہ ایران پر امریکی حملے کی خبریں سراسر غلط ہیں اور ان میں کوئی صداقت نہیں۔

یہ وضاحت ایسے وقت میں سامنے آئی ہے جب اسرائیلی چینل 14 نے دعویٰ کیا تھا کہ ایران پر ہونے والے حالیہ حملے میں اسرائیلی فضائیہ کے ساتھ ساتھ امریکی جنگی طیارے بھی شریک تھے۔ تاہم امریکی حکام نے اس دعوے کی سختی سے تردید کر دی ہے۔

یاد رہے کہ ایران اور اسرائیل کے درمیان کشیدگی میں اضافہ ہوگیا ہےجس کے بعد خطے میں ممکنہ فوجی کارروائیوں کے حوالے سے افواہیں گردش کر رہی تھیں، تاہم امریکہ کی اس وضاحت کے بعد ان افواہوں کی بھی نفی ہو گئی ہے۔

اسرائیل میں ہمت نہیں کہ وہ اکیلے یہ جنگ لڑے، کچھ ممالک ساتھ ہیں: ایرانی سفیر

ویب ڈیسک: ایم ڈبلیو ایم کے زیرِ اہتمام ولایت کانفرنس کا انعقاد کیا گیا، کانفرنس میں پنجاب، کشمیر اور کے پی کے سے آئے علماء کرام شریک ہوئے، ایرانی سفیر رضا امیر ی مقدم کا کہنا تھا  ایرانی تنصیابات کی وجہ سے ایران کو ٹارگٹ کیا گیا ۔

ایران اسرائیل جنگ کے تناظر میں ہنگامی سیمینار میں ایرانی سفیر رضا امیر ی مقدم نے خطاب کرتے ہوئے کہا کہ امریکن انٹیلیجنس کی رپورٹ میں یہ چیز واضح ہے ہم تو اسرائیل کے ساتھ مذاکرات کر رہے تھے۔

اسرائیل نے مذاکرات نہیں بلکہ دھوکہ دیا اور ہمارے صبر کا ناجائز فایدہ اٹھایا، گزشتہ کئی سالوں سے ہم صیہونی طاقتوں کا مقابلہ کر رہے ہیں۔

کبھی اسرائیل کہتا ہے کہ ایران میزائل بنا رہا کبھی اسرائیل کہتا کہ ایران پردے کا نفاذ کر رہا ، ایران کا صرف اتنا قصور ہے کہ اس نے غزہ کا ساتھ دیا ہے۔

 ایرانی سفیر رضا امیر ی مقدم کا کہنا تھا کہ اسرائیل سمجھ بیٹھا کہ تمام اسلامی ممالک کمزور ہو گئے ہیں لیکن یہ اسرائیل کی غلط فہمی ہے۔

ایران کے ہاتھ کٹ چکے ہیں ایسا اسرائیل کو لگتا ہے، یہ آخری لڑائی ہے یا اسرائیل کامیاب ہو گا یا ایران کی جیت ہوگی۔

اسرائیل میں اتنی ہمت نہیں ہے کہ وہ اکیلے یہ جنگ لڑے ،کچھ ممالک اس کے ساتھ ہیں ، ایران پوری طاقت کے ساتھ جنگ کے خاتمے تک اسرائیل کا مقابلہ کرے گا۔

 ایرانی سفیر کا کہنا تھا کہ ہمیں اپنے لیڈر اور اپنے سپاہیوں پر پورا یقین ہے، ہم کسی ملک سے یہ نہیں کہتے کہ ہماری مدد کریں کیونکہ کل کو ان کی باری ہوگی۔

نیتن یاہو پوری دنیا کا چہرا تبدیل کرنے کی باتیں کر رہا ہے، آج امام حسین کا غم زندہ ہے جبکہ یزید کا کہیں بھی ذکر نہیں رہا، عرب ممالک نے ہمارے اوپر ہونے والے ظلم کی مذہمت کی ہے۔

مرکزی جنرل سیکریٹری مجلس علماء مکتب اہلبیت علامہ حسن عسکری نے کانفرنس سے خطاب کرتے ہوئے کہا کہ کفر اور شرک نے اکٹھے ہوکر  ایران پر حملہ کیا ہے، علماء کرام پر بڑی ذمہ داری عائد ہوتی ہے۔

پارس یونیورسٹی کی فوٹوگرافی کی طالبہ سارہ جدت اسرائیلی حملے میں شہید

ویب ڈیسک: حالیہ اسرائیلی حملوں میں تہران کی پارس یونیورسٹی کی نوجوان فوٹوگرافی کی طالبہ، سارہ جدت شہید ہو گئیں۔ سارہ، جو اپنے منفرد اندازِ نظر اور تخلیقی کام کے باعث یونیورسٹی میں جانی جاتی تھیں، اس وقت ایک فوٹو پروجیکٹ پر کام کر رہی تھیں جب حملہ ہوا۔

اساتذہ اور ساتھی طلبہ نے سارہ کو ایک باصلاحیت اور پُرجوش طالبہ قرار دیا ہے، جو ہمیشہ اپنے کیمرے کے ذریعے سچ تلاش کرنے کی کوشش کرتی تھیں۔ ان کی ناوقت شہادت نے نہ صرف تعلیمی حلقوں بلکہ نوجوان فنکاروں میں بھی گہرا دکھ اور  افسوس کا اظہار کیا۔

سارہ کی شہادت تہران پر جاری اسرائیلی جارحیت کے انسانیت سوز پہلو کو مزید نمایاں کرتی ہے، جہاں معصوم شہری، خاص طور پر نوجوان، سب سے زیادہ متاثر ہو رہے ہیں۔

ٹرمپ کی ایران سے مذاکرات کی سختی سے تردید

ویب ڈیسک: امریکی صدر ڈونلڈ ٹرمپ نے واضح کیا ہے کہ فی الحال وہ ایران کے ساتھ کسی بھی قسم کے مذاکرات کے لیے تیار نہیں۔

غیر ملکی میڈیا کے مطابق، سوشل میڈیا پلیٹ فارم "ٹروتھ سوشل" پر اپنے پیغام میں ٹرمپ نے کہا کہ وہ ایران میں جنگ بندی سے بہتر حل اور تنازع کے مکمل خاتمے کی تلاش میں ہیں۔

واپسی کے سفر کے دوران کینیڈا سے واشنگٹن جاتے ہوئے طیارے میں صحافیوں سے گفتگو کرتے ہوئے ٹرمپ نے کہا کہ "میں ایران کے ساتھ بات چیت کرنے کے موڈ میں نہیں ہوں، نہ کسی بھی شکل میں کوئی رابطہ کیا گیا ہے۔"

صدر ٹرمپ کا کہنا تھا کہ ایران کو وہ معاہدہ تسلیم کر لینا چاہیے تھا جو پہلے ہی میز پر رکھا گیا تھا۔

ایک امریکی صحافی کے مطابق، ٹرمپ ایران سے مکمل طور پر پیچھے ہٹنے کا مطالبہ کر رہے ہیں اور ان کا مقصد ایرانی جوہری تنازع کا مکمل اور مستقل خاتمہ ہے۔

صحافی کے مطابق صدر ٹرمپ نے یہ بھی کہا کہ وہ مذاکرات کے لیے اسٹیو وٹکوف یا وینس کو ایران بھیج سکتے ہیں، لیکن فی الوقت یہ صرف ایک آپشن ہے۔

صدر ٹرمپ نے ساتھ ہی یہ پیش گوئی بھی کی کہ اسرائیل ایران پر حملوں کی شدت میں کمی نہیں کرے گا اور امریکی حکام مشرق وسطیٰ سے امریکیوں کے انخلاء کے لیے سرگرم ہیں۔

اسرائیل کی آیت اللہ خامنہ ای کو صدام حسین جیسے انجام کی دھمکی

ویب ڈیسک: اسرائیل کے وزیر دفاع اسرائیل کاٹز نے ایرانی سپریم لیڈر آیت اللہ علی خامنہ ای کو سخت تنبیہ کرتے ہوئے کہا ہے کہ اگر انہوں نے اسرائیل پر میزائل حملے جاری رکھے تو ان کا انجام صدام حسین جیسا ہو سکتا ہے۔

مقامی میڈیا کے مطابق، اسرائیلی وزیر نے کہا کہ "میں ایرانی آمر کو خبردار کرتا ہوں کہ وہ جنگی جرائم سے باز رہے اور اسرائیلی شہریوں پر حملے بند کرے۔"

انہوں نے کہا کہ "خامنہ ای کو اپنے ہمسایہ ملک عراق کے اس آمر کا انجام یاد رکھنا چاہیے جس نے اسرائیل کے خلاف یہی راستہ اپنایا اور بالآخر موت کا سامنا کیا۔"

اسرائیل کاٹز نے مزید کہا کہ اسرائیل آج بھی تہران میں حکومت اور فوجی اہداف کو نشانہ بناتا رہے گا۔ انہوں نے ایک بار پھر تہران کے شہریوں کو شہر چھوڑنے کا مشورہ دیا۔

یاد رہے کہ ایران کا کہنا ہے کہ جمعے کے بعد سے اسرائیلی حملوں میں درجنوں ایرانی شہری جاں بحق ہو چکے ہیں۔

اسرائیل کا ایران کےایک اورسینئر کمانڈر کو شہید کرنے کا دعویٰ

 ویب ڈیسک:عرب میڈیا کے مطابق اسرائیلی فوج نے ختم الانبیا کے سینٹرل ہیڈ کوارٹر کے سربراہ علی شادمانی کوشہید کرنےکا دعویٰ کیا ہے۔

چین، جرمنی اور ارجنٹینا کی اپنے شہریوں کو فوری اسرائیل چھوڑنے کی ہدایت

ویب ڈیسک: اسرائیل میں بڑھتی ہوئی کشیدگی کے پیش نظر چین، جرمنی اور ارجنٹینا نے اپنے شہریوں کو فوری طور پر ملک چھوڑنے کی سخت ہدایت جاری کر دی ہے۔

اسرائیل میں موجود چینی شہریوں کے لیے چینی سفارت خانے نے ہنگامی الرٹ جاری کرتے ہوئے کہا ہے کہ وہ فوراً زمینی راستوں کے ذریعے اسرائیل سے روانہ ہو جائیں۔ اعلامیے میں شہریوں سے کہا گیا ہے کہ سیکیورٹی صورتحال مزید بگڑ سکتی ہے، اس لیے تاخیر نہ کریں۔

ادھر ارجنٹینا اور جرمنی کی حکومتوں نے بھی اپنے شہریوں پر زور دیا ہے کہ وہ جلد از جلد اسرائیل چھوڑ دیں تاکہ کسی ممکنہ خطرے سے بچا جا سکے۔

تینوں ممالک کی یہ ہدایات ایسے وقت میں سامنے آئی ہیں جب مشرق وسطیٰ میں ایران اور اسرائیل کے درمیان کشیدگی مسلسل بڑھ رہی ہے، اور عالمی برادری کی جانب سے ممکنہ جنگ کے خدشات کا اظہار کیا جا رہا ہے۔

ایران اسرائیل تنازع: صدر ٹرمپ کا جی 7 اعلامیے پر دستخط سے انکار

ویب ڈیسک: امریکی صدر ڈونلڈ ٹرمپ نے جی 7 سربراہی اجلاس کے اختتامی اعلامیے پر دستخط نہ کرنے کا فیصلہ کیا ہے، جس میں ایران اور اسرائیل کے درمیان بڑھتی کشیدگی پر تشویش کا اظہار کرتے ہوئے فریقین سے تناؤ کم کرنے کی اپیل کی گئی ہے۔

عالمی خبر رساں ایجنسی کے مطابق امریکی حکام نے تصدیق کی ہے کہ صدر ٹرمپ کینیڈا میں ہونے والے جی 7 اجلاس کے اعلامیے کی توثیق نہیں کریں گے، کیونکہ اس مسودے میں ایران کے جوہری پروگرام اور مشرق وسطیٰ کی صورتحال پر بعض نکات امریکا کی پالیسی سے ہم آہنگ نہیں۔

مسودے میں یہ مؤقف اختیار کیا گیا ہے کہ ایران کو جوہری ہتھیار حاصل کرنے کی اجازت نہیں دی جا سکتی، جب کہ اسرائیل کو اپنے دفاع کا حق حاصل ہے۔ اعلامیے میں توانائی کی عالمی منڈیوں میں استحکام اور عالمی معیشت میں توازن برقرار رکھنے کے عزم کا اعادہ بھی شامل ہے۔

اجلاس کے موقع پر برطانوی وزیر اعظم کے ساتھ گفتگو کرتے ہوئے صدر ٹرمپ نے ایک بار پھر اس بات پر زور دیا کہ ایران کو جوہری معاہدے پر دستخط کر لینے چاہئیں، تاکہ اس کے جوہری عزائم کو محدود کیا جا سکے۔

ادھر امریکی صدر نے جی 7 اجلاس میں اپنی شرکت مختصر کرتے ہوئے قبل از وقت وطن واپسی کا فیصلہ کیا ہے۔ وہ آج واشنگٹن پہنچ کر اہم داخلی و خارجی امور پر اجلاسوں میں شرکت کریں گے۔

خیال رہے کہ جی 7 اجلاس کا آغاز 15 جون کو ہوا تھا، اور آج اس کا باضابطہ اختتام متوقع ہے۔

ایران کا سلامتی کونسل کو انتباہ: اسرائیل کے حمایتی ممالک حملوں کے ذمہ دار ہوں گے

ویب ڈیسک: ایران نے اقوام متحدہ کی سلامتی کونسل کو سخت پیغام دیتے ہوئے خبردار کیا ہے کہ اسرائیل کے ایران پر حملوں میں معاونت کرنے والے ممالک اس بحران کے ممکنہ نتائج بھگتنے کے لیے تیار رہیں، کیونکہ وہ بھی ان کارروائیوں کے قانونی طور پر ذمہ دار سمجھے جائیں گے۔

اقوام متحدہ میں ایران کے مستقل نمائندے امیر سعید ایراوانی نے سلامتی کونسل کو ارسال کردہ خط میں مؤقف اختیار کیا ہے کہ ایران نے صرف اپنے دفاع کے حق کے تحت جوابی کارروائیاں کی ہیں، جن کا مقصد صرف اور صرف اسرائیلی فوجی تنصیبات اور ان سے منسلک بنیادی ڈھانچے کو نشانہ بنانا ہے۔

بعد ازاں صحافیوں سے گفتگو کرتے ہوئے ایراوانی نے امریکا کا نام لیتے ہوئے کہا کہ اگر امریکی عسکری امداد، انٹیلیجنس معلومات اور سیاسی حمایت نہ ہوتی، تو اسرائیل ایران پر حملہ کرنے کی صلاحیت نہیں رکھتا تھا۔ ان کے مطابق اس بنا پر امریکا بھی ان حملوں کا شریکِ جرم ہے۔

ایرانی مندوب کا مزید کہنا تھا کہ ایران نے کسی تنازع میں پہل نہیں کی، اور اسرائیلی بیانیہ کہ "ایران اس کے وجود کے لیے خطرہ ہے" محض ایک جھوٹ پر مبنی پروپیگنڈا ہے۔

انہوں نے خبردار کیا کہ جو بھی ملک اسرائیلی جارحیت میں اس کی مدد کرے گا، اسے ممکنہ نتائج کا سامنا کرنا پڑے گا۔

ادھر اقوام متحدہ میں اسرائیلی مندوب ڈینی ڈینون نے ایران پر الزام عائد کرتے ہوئے دعویٰ کیا ہے کہ ایرانی حملوں کا ہدف عام شہری تھے، جبکہ اسرائیل کی کارروائیاں مبینہ طور پر حکومتی اور عسکری عناصر کے خلاف کی جا رہی ہیں۔

امریکا کی مشرق وسطیٰ میں جنگی تیاری، طیارہ بردار بحری جہاز اور درجنوں ٹینکر تعینات  

ویب ڈیسک: امریکا نے مشرق وسطیٰ میں جاری ایران اسرائیل کشیدگی کے تناظر میں اپنی دفاعی صلاحیتوں میں اضافہ کرتے ہوئے اہم فوجی سازوسامان اور افرادی قوت روانہ کر دی ہے۔

عالمی خبر رساں اداروں کے مطابق امریکی محکمہ دفاع نے بڑی تعداد میں ایندھن بھرنے والے فوجی طیارے (ری فیولنگ ٹینکرز) مشرق وسطیٰ بھیج دیے ہیں، جب کہ ایک طیارہ بردار بحری جہاز یو ایس ایس نمٹز (USS Nimitz) بھی خطے میں حرکت میں دیکھا گیا ہے۔

امریکی عہدیداروں کے مطابق یہ اقدام مشرق وسطیٰ میں امریکی فوجیوں اور اثاثوں کے تحفظ کو یقینی بنانے کے لیے کیا گیا ہے۔ وزیر دفاع نے کہا کہ امریکی افواج کی سلامتی اولین ترجیح ہے اور اس تعیناتی کا مقصد خطے میں دفاعی برتری کو مضبوط کرنا ہے۔

یو ایس ایس نمٹز بحری بیڑے میں 60 جنگی طیارے اور تقریباً 5 ہزار اہلکار تعینات کیے جا سکتے ہیں۔ یہ جہاز پہلے سے منصوبہ بندی کے تحت مشرق وسطیٰ روانہ کیا گیا تھا۔

مزید یہ کہ 31 سے زائد ملٹری ٹینکر طیارے گزشتہ اتوار امریکا سے روانہ ہوئے، جنہوں نے جرمنی، برطانیہ، یونان، اسٹونیا جیسے ممالک میں لینڈنگ کی۔

خبر رساں ادارے کے مطابق امریکی حکام نے تعینات کیے گئے جہازوں کی کل تعداد بتانے سے گریز کیا، تاہم دفاعی تجزیہ کاروں کا کہنا ہے کہ اس سطح کی تیاری خطے میں امریکا کی اسٹریٹجک پوزیشن کو واضح طور پر مضبوط کرتی ہے اور ممکنہ کشیدگی سے نمٹنے کے لیے مکمل تیاری کا عندیہ دیتی ہے۔

ٹرمپ کی تہران خالی کرنے کی وارننگ، ایران کو جوہری معاہدے پر دستخط کا مشورہ

ویب ڈیسک: امریکی صدر ڈونلڈ ٹرمپ نے ایک بار پھر ایران پر دباؤ بڑھاتے ہوئے تہران کے شہریوں کو دارالحکومت خالی کرنے کا انتباہ جاری کیا ہے، ساتھ ہی ایران کو نیوکلیئر معاہدے پر دستخط کرنے کا مشورہ بھی دیا ہے۔

سوشل میڈیا پر جاری اپنے بیان میں صدر ٹرمپ نے کہا کہ ایران کو جوہری معاہدہ قبول کر لینا چاہیے تھا، مگر بدقسمتی سے اس نے ایسا نہیں کیا۔ انہوں نے کہا کہ بارہا تنبیہ کے باوجود ایران نے مثبت رویہ نہیں اپنایا، جس کے باعث انسانی جانوں کا ضیاع انتہائی افسوسناک ہے۔

صدر ٹرمپ نے واضح الفاظ میں کہا کہ ایران کو جوہری ہتھیار حاصل کرنے کی اجازت ہرگز نہیں دی جا سکتی۔ اسی تناظر میں انہوں نے تہران کے شہریوں کو خبردار کرتے ہوئے کہا کہ وہ شہر خالی کر دیں۔

اس سے قبل کینیڈا میں جی 7 سربراہی اجلاس کے دوران برطانوی وزیرِاعظم سے ملاقات میں صدر ٹرمپ نے ایران کے ساتھ ایٹمی معاہدے کی ضرورت پر زور دیا تھا۔ ان کا کہنا تھا کہ امریکا یہ یقینی بنانے کے لیے پرعزم ہے کہ ایران کے پاس جوہری ہتھیار نہ ہوں۔

صدر ٹرمپ نے پیش گوئی کی کہ بالآخر ایران کو ایٹمی معاہدہ کرنا پڑے گا۔

دریں اثنا، وائٹ ہاؤس نے تصدیق کی ہے کہ صدر ٹرمپ کینیڈا کے دورے کے بعد آج واشنگٹن واپس پہنچیں گے، جہاں وہ اہم قومی امور پر مشاورت میں حصہ لیں گے۔ اس کے ساتھ ہی نیشنل سکیورٹی کونسل کو بھی ہائی الرٹ پر رہنے کی ہدایت جاری کر دی گئی ہے۔

ایران کا اسرائیل پر ایک اور کامیاب حملہ، اسرائیلی ایف 35 مار گرایا

ویب ڈیسک: ایران کے بھی تل ابیب سمیت کئی شہروں میں حملے جاری،تل ابیب میں سائرن بجنے لگے۔ایرانی فوج کا  ایک اور طیارہ گرانے کا دعوی ۔

ایران نے ایک اور اسرائیلی ایف35مارگرانے کا دعوی کردیا۔ ایران نے طیارہ تبریز میں مارگرانے کا دعوی کیا اس سے قبل ایران نے تین ایف35 گرانے کا دعوی کیا تھا۔

ایران نے فضائی دفاعی نظام فعال کردیا ۔ایران نے ایک بار پھر کہاہےکہ وہ اسرائیل پر تاریخ کے بڑے حملے کرے گا آج رات کو دن بنادیں گے ، اسرائیل نے کچھ ایرانی میزائل تباہ کردیے ہیں ۔ 

ایران کا پاسداران انقلاب گروپ کتنی طاقت رکھتا ہے؟ حیران کن انکشافات

ویب ڈیسک: اسرائیلی حملوں کا سلسلہ جاری ہے جبکہ ایران کی جانب سے بھی بھرپور جوابی کارروائی کی جارہی ہے، اب تک ایران کے میزائل حملوں کے نتیجے میں اسرائیل میں متعدد عمارتیں کھنڈر بن گئیں جب کہ 24 اسرائیلی ہلاک اور سیکڑوں زخمی ہوئے ہیں، ان حملوں میں ایران کا پاسداران انقلاب گروپ پیش پیش ہے لیکن یہ گروپ کون ہے اور کتنا طاقتور ہے؟

ایرانی پاسداران انقلاب  گروپ
ایرانی پاسداران  انقلاب گروپ ( IRGC ) ایران کی سب سے طاقتور اور  بااثر تنظیموں میں سے ایک ہے اس گروپ کی اپنی زمینی، بحری اور فضائی افواج ہیں۔

 ایران کے پاسداران انقلاب کا قیام 1979 میں ایرانی انقلاب کے بعد نئے اسلامی نظام کے دفاع کے لیے عمل میں لایا گیاجس کے بعد سے ہی یہ گروپ  ایک متبادل فوجی قوت کے طور پر ایران کی باقاعدہ فوج کے طور پر کام کرتا ہے۔

ایرانی پاسداران  انقلاب گروپ ( IRGC )  کے پاس کتنے فوجی ہیں اور ذمہ داری کیا ہے؟
 ایران کے پاسداران انقلاب کے  پاس ایک لاکھ 90 ہزار گارڈز اور   6 لاکھ 10 ہزار فعال فوجی موجود ہیں،  یہ گروپ ایران کے بیلسٹک میزائل اور ایٹمی پروگراموں کا نگران ہے، ساتھ ہی  ایران میں داخلی سلامتی کا ذمہ دار بھی  ہے۔

 ایران کا پاسداران انقلاب  ایرانی حکومت یا صدر  کے بجائے ایرانی سپریم لیڈر آیت اللہ خامنہ ای کو جوابدہ ہے،  آج یہ گروپ  اتحادی حکومتوں اور  پراکسی گروپوں کو رقم،  اسلحہ ، تربیت ، مشاورت اور ٹیکنالوجی فراہم کرتا ہے۔

اب  اسرائیلی حملوں نے اس گروپ کی اعلیٰ قیادت کو شہید کرکے اس تنظیم کو شدید دھچکا دیا ہےکیوں کہ اسرائیلی حملوں میں پاسدارانِ انقلاب کے سربراہ حسین سلامی ، انٹیلی جنس چیف جنرل محمد کاظمی اور ان کے نائب جنرل حسن محقق سمیت  جنرل محسن باقری شہید ہو گئے ہیں۔

ایران کے جوہری تنصیبات پر مزید نقصان کے کوئی آثار نہیں،سربراہ آئی اے ای اے

(ویب ڈیسک) انٹرنیشنل اٹامک انرجی ایجنسی (IAEA) کے سربراہ رافیل گروسی نے کہا ہے کہ ایران کے جوہریتنصیبات ، خاص طور پر نطنز اور فردو میں اسرائیلی حملوں کے بعد مزید نقصان کے کوئی آثار نہیں ملے۔

ویانا میں ایجنسی کے بورڈ آف گورنرز کے اجلاس میں ایران کی جوہری تنصیبات کی موجودہ صورتحال پر بریفنگ دیتے ہوئے گروسی نے کہا کہ "ایجنسی ایران میں موجود ہے اور رہے گی۔ جیسے ہی حفاظتی حالات اجازت دیں گے، ایران میں معائنہ دوبارہ شروع کیا جائے گا، جیسا کہ ایران کی این پی ٹی ( NPT )معاہدے کے تحت ذمہ داری ہے۔"

رافیل گروسی نے اس سے پہلے تصدیق کی تھی کہ اسرائیلی حملے میں نطنز کا اوپر زمین موجود پائلٹ یورینیم افزودگی پلانٹ تباہ ہو گیا ہے، جبکہ ایران نے فردو اور اصفہان میں بھی سائٹس پر حملوں کی اطلاع دی تھی۔

انہوں نے مزید بتایا کہ نطنز میں بجلی کا بنیادی نظام بھی تباہ ہو چکا ہے، اور ایک ہال میں بجلی کی بندش سے سنٹری فیوجز کو نقصان پہنچ سکتا ہے۔ تاہم انہوں نے واضح کیا کہ نطنز کے باہر ریڈیائی مواد کی سطح معمول کے مطابق ہے اور اس میں کوئی تبدیلی نہیں آئی۔

اسرائیلی وزیراعظم کے گھر پر حملہ، کیا نقصان ہوا؟ نیتن یاہو کا بیان

ویب ڈیسک: ایران نے اسرائیل کو سبق سیکھا دیا، ایران کے جوابی وار نے اسرائیل کو ہلا کر رکھ دیا! حیفہ کا سائنسی تحقیقاتی مرکز راکھ کا ڈھیر، پاور پلانٹ تباہ، تل ابیب اور بیت یام کھنڈر بن گئے۔

ایرانی حملوں سے خوفزدہ اسرائیلی وزیراعظم نیتن یاہو نے اعتراف کیا کہ "ایران نے میرے گھر پر حملہ کیا، میزائل میرے بیڈروم کی کھڑکی سے ٹکرایا، لیکن میں بچ گیا۔"

 نیتن یاہو نے کہا کہ وہ ایران کے ایٹمی پروگرام کو تباہ کرنا چاہتے ہیں۔

انہوں نے دعویٰ کیا کہ ایران امریکی صدر ڈونلڈ ٹرمپ کو اپنا سب سے بڑا دشمن سمجھتا ہے،اسرائیل ایران کے ایٹمی پروگرام کو مکمل طور پر تباہ کرنے کے لیے ہر ممکن اقدام کرے گا۔

نیتن یاہو نے ایران کی بڑھتی ہوئی طاقت پر گہرا خدشہ ظاہر کیا اور کہا کہ ایران ایٹمی ہتھیار ہمیں نشانہ بنانے کے لیے تیار کر رہا ہے۔

انہوں نے ایران کے بیلسٹک میزائل پروگرام کا حوالہ دیتے ہوئے کہا کہ ایران سالانہ 3,600 بیلسٹک میزائل تیار کر سکتا ہے، یعنی تین سال میں 10 ہزار میزائل بنا سکتا ہے، جو خطے کی سلامتی کے لیے شدید خطرہ ہے۔

ادھر اسرائیل نے تہران کو دھمکی دی ہے کہ "ایران کی قیمت تہران کے شہری چکائیں گے!"

اسرائیلی وزیر دفاع نے کہا کہ ایران کے رات گئے میزائل حملوں سے ہمارے کچھ لوگ ہلاک اور درجنوں زخمی ہوئے ہیں جس کی قیمت اب تہران والوں کو چکانا پڑے گی۔

اسرائیلی وزیردفاع نے الزام عائد کیا کہ ایران کے سپریم لیڈر علی خامنہ ای جان بوجھ کر سویلیز آبادی کو نشانہ بنارہے ہیں جس کا مقصد اسرائیلی فوج کے حملوں اور اس کی صلاحیوں کو کم کرنا ہے۔

اسرائیلی وزیر دفاع نے کہا کہ اسرائیل ایران کے ان حملوں کا بہت جلد جواب دے گا۔

ایرانی میزائل حملہ:اسرائیل میں امریکی سفارتخانے کو معمولی نقصان،اہلکارمحفوظ

ویب ڈیسک: ایران کے تازہ میزائل حملے کے دوران تل ابیب میں واقع امریکی سفارتخانے کو معمولی نقصان پہنچا ہے، تاہم امریکی سفیر نے تصدیق کی ہے کہ واقعے میں تمام امریکی اہلکار محفوظ رہے۔

غیر ملکی خبر رساں اداروں کے مطابق، تل ابیب میں پیش آئے واقعے کے بعد سفارتخانے کو عارضی طور پر بند کر دیا گیا ہے، اور آج اسے عوامی خدمات کے لیے بند رکھنے کا اعلان کیا گیا ہے۔

واضح رہے کہ ایران نے علی الصبح اسرائیل پر ایک اور بڑا میزائل حملہ کیا جس میں تقریباً 100 بیلسٹک میزائل داغے گئے۔ ان حملوں کے دوران تل ابیب اور مقبوضہ بیت المقدس میں زوردار دھماکے سنے گئے۔

اسرائیل کے فضائی دفاعی نظام نے متعدد میزائلوں کو راستے میں ہی تباہ کرنے کی کوشش کی، تاہم کچھ میزائل اہداف تک پہنچنے میں کامیاب رہے۔

ایران کے ایک میزائل نے حیفہ میں واقع پاور پلانٹ کو نشانہ بنایا، جس کے نتیجے میں آگ بھڑک اٹھی اور وسطی اسرائیل کے مختلف علاقوں میں بجلی معطل ہو گئی۔ حکام کے مطابق، حیفہ میں میزائل حملے سے کم از کم 4 افراد زخمی ہوئے۔

یاد رہے کہ اتوار کی رات کو بھی ایران نے اسرائیل کے مختلف علاقوں پر شدید حملے کیے تھے، جن میں متعدد عمارتوں کو نقصان پہنچا تھا۔

برطانیہ ایران کے ساتھ ممکنہ تنازع میں اسرائیل کی مدد کرسکتا ہے، وزیر خزانہ ریچل ریویس

ویب ڈیسک: برطانوی وزیر خزانہ ریچل ریویس نے عندیہ دیا ہے کہ برطانیہ مشرق وسطیٰ میں ایران کے ساتھ ممکنہ تنازع کی صورت میں اسرائیل کی حمایت کرسکتا ہے۔

برطانوی میڈیا کے مطابق ریچل ریویس کا کہنا تھا کہ مشرق وسطیٰ میں اضافی جنگی طیاروں کی تعیناتی کا مقصد نہ صرف برطانوی مفادات اور مراکز کا تحفظ ہے بلکہ یہ اقدام اتحادیوں کی ممکنہ مدد کو بھی مدنظر رکھتے ہوئے کیا گیا ہے۔

انہوں نے مزید کہا کہ برطانیہ اپنے جنگی سازوسامان صرف اپنے دفاع کے لیے ہی نہیں بلکہ اپنے اتحادیوں کی حمایت کے لیے بھی روانہ کر رہا ہے، اگر ضرورت پڑی تو ہم اسرائیل کی عملی مدد کرنے کے لیے تیار ہیں۔

ادھر برطانوی وزارتِ خارجہ نے اسرائیل کا سفر نہ کرنے کی ٹریول ایڈوائزری بھی جاری کر دی ہے، جس میں برطانوی شہریوں کو متنبہ کیا گیا ہے کہ وہ موجودہ سکیورٹی صورتحال کے پیشِ نظر اسرائیل کا غیر ضروری سفر نہ کریں۔

تجزیہ کاروں کے مطابق برطانیہ کا یہ مؤقف مشرق وسطیٰ میں بڑھتی کشیدگی کے تناظر میں ایک واضح پیغام ہے کہ لندن خطے میں اپنے اتحادیوں کے ساتھ کھڑا ہے۔

موساد کیلئے جاسوسی کا الزام، ایران میں ایک شخص کو پھانسی دیدی گئی

ویب ڈیسک: ایران نے اسرائیلی خفیہ ایجنسی موساد کے لیے جاسوسی کرنے کے جرم میں ایک اور شخص کو سزائے موت دے دی ہے۔

سرکاری خبر ایجنسی فارس کے مطابق، جاسوسی کے الزام میں گرفتار اسماعیل فکری کو پیر کی صبح پھانسی دے دی گئی۔

رپورٹ کے مطابق اسماعیل فکری کو دسمبر میں حراست میں لیا گیا تھا، اور ایرانی حکام کا دعویٰ ہے کہ وہ موساد کے دو ایجنٹس سے براہِ راست رابطے میں تھا اور انہیں اہم انٹیلی جنس معلومات فراہم کر رہا تھا۔

ایرانی حکام نے اس کارروائی کو ملک کی سلامتی کے تحفظ کے لیے ایک ضروری قدم قرار دیا ہے۔

یہ بات قابلِ ذکر ہے کہ حالیہ ہفتوں کے دوران اسرائیلی انٹیلی جنس کے لیے جاسوسی کے الزام میں ایران میں دی جانے والی یہ تیسری پھانسی ہے، جس سے ظاہر ہوتا ہے کہ ایران موساد کے مبینہ نیٹ ورکس کے خلاف سخت اقدامات جاری رکھے ہوئے ہے۔

ایران کا اسرائیل پر بڑا حملہ: بیلسٹک میزائلوں کی بارش، 7 ہلاک، 67 زخمی

ویب ڈیسک: ایران اور اسرائیل کے درمیان جاری کشیدگی ایک نئی شدت اختیار کر گئی ہے، جب تہران نے جوابی کارروائی کرتے ہوئے اسرائیل پر ایک اور بھرپور میزائل حملہ کیا۔ ایرانی فوج نے تقریباً 100 بیلسٹک میزائل داغے جنہوں نے وسطی اسرائیل کے بجلی کے نظام کو مفلوج کر دیا، جب کہ شہر حیفہ تاریکی میں ڈوب گیا۔

حملوں میں کم از کم 7 افراد ہلاک اور 67 زخمی ہونے کی اطلاعات ہیں۔ اسرائیلی حکام کے مطابق ایرانی میزائل تل ابیب، یروشلم، حیفہ، ایلات اور دیگر علاقوں میں گرے، جن سے درجنوں عمارتوں کو نقصان پہنچا اور کئی مقامات پر آگ بھڑک اٹھی۔ حیفہ پاور پلانٹ پر حملے کے بعد بجلی کی فراہمی معطل ہو گئی۔

تل ابیب میں امریکی سفارتخانہ بھی متاثر

امریکی نمائندہ مائیک ہکبی نے تصدیق کی ہے کہ تل ابیب میں واقع امریکی سفارتخانے کی ایک شاخ کو ایرانی میزائلوں سے ہونے والے دھماکوں کے جھٹکوں سے معمولی نقصان پہنچا، تاہم کوئی امریکی اہلکار زخمی نہیں ہوا۔ امریکا نے عارضی طور پر اپنے سفارتخانے اور قونصل خانے بند کر دیے ہیں۔

ایران کا پیغام: "اسرائیل کو رہنے کے قابل جگہ نہیں چھوڑیں گے"

ایرانی فوج نے واضح کیا ہے کہ اسرائیل کے تمام حمایتی جان لیں، مؤثر اور ہدف شدہ حملے اس وقت تک جاری رہیں گے جب تک اسرائیل کا خاتمہ نہ ہو جائے۔ اسرائیلی بستیوں کو فوری طور پر خالی کرنے کی تنبیہ بھی جاری کی گئی ہے۔

 دونوں ممالک کے درمیان شدید جانی نقصان

ایرانی وزارت صحت کے مطابق، اسرائیلی حملوں کے نتیجے میں اب تک 224 ایرانی شہری شہید ہو چکے ہیں، جن میں 90 فیصد عام شہری، 14 ایٹمی سائنسدان اور 20 فوجی کمانڈرز شامل ہیں۔ دوسری طرف ایرانی حملوں میں اسرائیل کے 14 شہری ہلاک، 380 زخمی جبکہ 35 لاپتہ بتائے جا رہے ہیں۔

اہم تنصیبات پر حملے اور تباہی

ایران کا بن گورین ایئرپورٹ، نیتن یاہو کا آبائی گھر اور تل ابیب کی کئی عمارتیں نشانہ
اسرائیل کا تہران، مشہد، اور ایرانی وزارت خارجہ پر میزائل حملے کا دعویٰ
مشہد میں امام رضاؑ کے روضے کے قریب دھویں کے بادل، 80 سے زائد اہداف کو نشانہ بنایا گیا
ایران نے الزام لگایا ہے کہ اسرائیل نے تہران میں واقع وزارتِ خارجہ کی عمارت کو جان بوجھ کر نشانہ بنایا جس سے کئی شہری زخمی ہوئے۔

پاسدارانِ انقلاب کے اعلیٰ افسران شہید

اسرائیلی حملے میں ایرانی پاسدارانِ انقلاب کے انٹیلی جنس چیف جنرل محمد کاظمی، ان کے نائب جنرل حسن محقق اور جنرل محسن باقری شہید ہو گئے ہیں۔ سپاہ پاسداران نے ان شہادتوں کو ایران کی خودمختاری پر حملہ قرار دیا ہے اور شدید ردعمل کی دھمکی دی ہے۔

اسرائیل میں ہنگامی حالت 30 جون تک توسیع

اسرائیلی وزیراعظم نیتن یاہو نے تباہ حال علاقوں کا دورہ کیا اور ہنگامی صورتحال میں 30 جون تک توسیع کا اعلان کر دیا۔ اسرائیل کا کہنا ہے کہ وہ ایران کی جوہری تنصیبات اور دفاعی ڈھانچے پر مزید حملے جاری رکھے گا۔

ایران کے پاس اب بھی ہزاروں بیلسٹک میزائل موجود ہیں، اسرائیلی مشیر کا اعتراف

ویب ڈیسک: اسرائیل کے قومی سلامتی کے مشیر زاچی ہنیبی نے خبردار کیا ہے کہ ایران کے بیلسٹک میزائل پروگرام پر حالیہ حملوں کے باوجود، تہران کے پاس اب بھی بڑی تعداد میں میزائل موجود ہیں۔

اسرائیلی میڈیا کے مطابق زاچی ہنیبی نے اعتراف کیا کہ ایران کے ساتھ جاری کشیدگی وقتی نوعیت کی ہے اور یہ کوئی ایسی جنگ نہیں جو ایرانی خطرے کو مکمل طور پر ختم کر دے۔ ان کے بقول، ایران کے پاس اب بھی ہزاروں بیلسٹک میزائلز ہیں جو اسرائیل اور اس کے اتحادیوں کے لیے بڑا خطرہ ہیں۔

یاد رہے کہ زاچی ہنیبی نے چند روز قبل بھی بیان دیا تھا کہ ایران کے ایٹمی پروگرام کو صرف فوجی کارروائی سے مکمل طور پر تباہ کرنا ممکن نہیں۔

اسرائیلی فوجی ماہرین کا اندازہ ہے کہ ایران نے حالیہ دنوں میں سینکڑوں میزائل فائر کیے ہیں، اس کے باوجود اس کے پاس تاحال 1500 سے 2000 بیلسٹک میزائل باقی ہیں۔

اسرائیلی حملے میں پاسدارانِ انقلاب کے اعلیٰ کمانڈرز شہید، ایران کا شدید ردعمل

ویب ڈیسک: ایران کے دارالحکومت تہران پر اسرائیلی حملے کے نتیجے میں پاسدارانِ انقلاب کے اعلیٰ افسران شہید ہو گئے ہیں۔

ایرانی ذرائع کے مطابق اتوار کو ہونے والے حملے میں انٹیلی جنس چیف جنرل محمد کاظمی، ان کے نائب جنرل حسن محقق اور جنرل محسن باقری شہید ہو گئے۔

جنرل محمد کاظمی کو 2022 میں ایرانی سپاہ پاسداران کا انٹیلی جنس سربراہ مقرر کیا گیا تھا۔ ان کی شہادت کو ایران نے ریاستی سلامتی پر سنگین حملہ قرار دیا ہے۔

ایرانی حکام نے ان حملوں کی سخت الفاظ میں مذمت کرتے ہوئے کہا ہے کہ یہ اقدام ایران کی خودمختاری پر کھلی جارحیت ہے۔ پاسدارانِ انقلاب کی جانب سے جاری بیان میں کہا گیا ہے کہ اسرائیلی حکومت کے حامی یہ سمجھ لیں کہ اسرائیل کے خلاف مؤثر اور ہدف شدہ کارروائیاں اس کے مکمل خاتمے تک جاری رہیں گی۔

دوسری جانب اسرائیلی فوج نے دعویٰ کیا ہے کہ اس نے ایران کے وسطی علاقوں میں میزائل تنصیبات کو نشانہ بنایا ہے، تاہم ایران کی جانب سے ان دعوؤں پر کوئی تبصرہ نہیں کیا گیا۔

اسرائیلی جارحیت کے دوران کسی قسم کی بات چیت نہیں ہوگی، ایران کا دوٹوک پیغام

ویب ڈیسک: ایران نے جنگ بندی سے متعلق کسی بھی قسم کے مذاکرات سے انکار کرتے ہوئے ثالثی کا کردار ادا کرنے والے ممالک قطر اور عمان کو باقاعدہ طور پر مطلع کر دیا ہے کہ اسرائیلی جارحیت کے دوران وہ کسی قسم کی بات چیت نہیں کرے گا۔

برطانوی خبر رساں ادارے سے گفتگو کرتے ہوئے ایک سینئر ایرانی عہدیدار نے بتایا کہ حالیہ دنوں میں ایران اور اسرائیل کے مابین حملوں کا تبادلہ ہوا ہے، جس سے خطے میں وسیع جنگ کا خطرہ مزید بڑھ گیا ہے۔ ان کے مطابق ایرانی مؤقف واضح ہے: جب تک اسرائیل کے حملے جاری ہیں، ایران مذاکرات کے لیے تیار نہیں۔

عہدیدار نے مزید کہا کہ قطری اور عمانی ثالثوں کو بتایا گیا ہے کہ مذاکرات اسی صورت میں ممکن ہیں جب اسرائیل کے حملوں کا مکمل اور مؤثر جواب دیا جا چکا ہو۔

ساتھ ہی ایرانی ذرائع نے ان خبروں کو بھی مسترد کیا ہے کہ ایران نے قطر یا عمان کو امریکا کے ساتھ جنگ بندی یا جوہری معاہدے کی بحالی کے لیے بات چیت کرنے کا کہا ہے۔ ایرانی وزارت خارجہ، قطر اور عمان کی جانب سے اس معاملے پر کسی قسم کا باضابطہ ردعمل سامنے نہیں آیا۔

یاد رہے کہ اسرائیل کی جانب سے جمعہ کو ایران پر شدید حملے اور ایران کے فوری جوابی اقدامات کے بعد خطے کی کشیدگی عروج پر پہنچ چکی ہے، اور ایران نے امریکا کے ساتھ طے شدہ مذاکرات کا چھٹا دور بھی منسوخ کر دیا ہے۔

ایران، اسرائیل کشیدگی، مختلف ائیرلائنز کی پروازیں معطل

ویب ڈیسک:ایران، اسرائیل کشیدگی، فضائی حدود بندش ، مختلف ائیرلائنز نے ایران اورپڑوسی ممالک کے لیے اپنی پروازیں معطل کردیں ۔

تفصیلات کےمطابق ایمریٹس ایئرلائن نے عراق، اردن، لبنان، عمان اور ایران کے لیے اپنی پروازیں معطل کردیں،  علاقائی صورتحال کی وجہ سے تمام پروازیں عارضی طور پر معطل کی ہیں۔

ایمریٹس ائیرلائن انتظامیہ کا کہنا تھا کہ   ایران اور عراق  کے پیر 30 جون 2025 تک پروازوں کو بند کیا ہے۔

پرواز کی منسوخی سے متاثر ہونے والے مسافر دوبارہ بکنگ کے لیے اپنی ٹریول ایجنسی سے رابطہ کریں۔

ایئر عربیہ کے مطابق ایئر عربیہ نے 16اور 17 جون کی ایران عراق کی تمام پروازیں منسوخ کردیں،  16 اور 17 جون کو  روس، لبنان، قازقستان، آذربائیجان، ازبکستان کی پروازیں بھی منسوخ ،مختلف ملکوں کی پروازوں کو فضائی حدود بندش کے پیش نظر رخ موڑا جارہا ہے۔

قطر ایئرویز نے ایران، عراق اور شام کے لیے فلائٹ آپریشن عارضی طور معطل کردیا، قطر ائیر ویز انتظامیہ کا کہنا تھا کہ ایران کے تمام ائیرپورٹس کے لئے قطر ایر کی پروازوں کو تاحکم ثانی معطل کیا۔ 

عراق کے لیے عارضی طور قطر ائیر کی پروازوں کو معطل کردیا، شام کے دمشق ایرپورٹ پر بھی فلائٹ آپریشن تاحکم ثانی معطل کیا ہے۔

اتحاد ائیرویز نے اسرائیلی شہر تل ابیب  کے لئے اپنا فلائٹ آپریشن معطل کردیا، ایئر عربیہ نے تل ابیب کے لیے 22 جون تک اپنا فلائٹ آپریشن معطل کیا ہے۔

ایران کی عالمی طاقتوں کو دوٹوک وارننگ

ویب ڈیسک: ایرانی ایٹمی توانائی ادارے کے سربراہ، محمد اسلامی نے واضح الفاظ میں خبردار کیا ہے کہ اگر عالمی طاقتوں نے "اسنیپ بیک میکنزم" کو فعال کیا، تو ایران جوہری ہتھیاروں کے عدم پھیلاؤ کے عالمی معاہدے (NPT) سے دستبرداری پر سنجیدگی سے غور کرے گا۔

انہوں نے کہا کہ ایسا کوئی بھی اقدام ایران کے لیے ناقابل قبول ہوگا، اور اس کا بھرپور ردعمل دیا جائے گا۔

اسنیپ بیک میکانزم ایک ایسا نظام ہے جس کے تحت اگر ایران جوہری معاہدے کی خلاف ورزی کرے، تو اقوام متحدہ کی پرانی پابندیاں خود بخود دوبارہ لاگو ہو سکتی ہیں۔

قبل ازیں اقوام متحدہ میں ایران کے مستقل مندوب سعید ایراوانی نے اقوام متحدہ کی سلامتی کونسل میں خط جمع کرایا ہے جس میں واضح کیا گیا ہےکہ برطانیہ، فرانس اور جرمنی بے بنیاد الزامات لگارہے ہیں۔

انہوں نے کہا کہ اگر یہ تینوں ممالک ایران پر پابندیاں بحال کرنے کی کوششوں میں مصروف رہے تو ایران ایٹمی عدم پھیلاؤ کے معاہدے این پی ٹی سے دستبردار ہوجائے گا۔

امریکا کا ایران اسرائیل جنگ میں شامل ہونے کااشارہ

(ویب ڈیسک )صدر ڈونلڈ ٹرمپ نے کہا ہے کہ اسرائیل اور ایران کے درمیان جاری جنگ میں امریکا کی مداخلت ممکن ہے، حالانکہ اس وقت امریکا اس میں شامل نہیں ہے۔

اتوار کو  اے بی سی نیوز کو دی گئی ایک فون انٹرویو میں صدر ٹرمپ نے کہا "ہم اس میں شامل نہیں ہیں۔ ممکن ہے کہ ہم شامل ہو جائیں، لیکن اس وقت ہم شامل نہیں ہیں۔"

جب ان سے پوچھا گیا کہ کیا ایران کو مذاکرات کی میز پر لانے کے لیے کوئی ڈیڈلائن ہے، تو ٹرمپ نے کہا، "نہیں، کوئی ڈیڈلائن نہیں ہے۔ لیکن وہ بات چیت کر رہے ہیں۔ وہ معاہدہ کرنا چاہتے ہیں، وہ مسلسل بات کر رہے ہیں۔"

واضح رہے کہ اتوار کو عمان میں امریکا اور ایران کے درمیان جوہری مذاکرات کا اگلا دور طے تھا، لیکن یہ منسوخ کر دیا گیا۔ تاہم،امریکی  صدر ٹرمپ کا کہنا ہے کہ ایرانی حکام بات چیت کے لیے تیار ہیں اور جلد ہی مذاکرات کریں گے۔

انہوں نے کہا کہ  "حالیہ کشیدگی شاید معاہدے کو جلدی کروا دے۔"

امریکی صدر ٹرمپ نے روسی صدر ولادیمیر پیوٹن کو اس تنازع میں ثالثی کا ممکنہ کردار دینے پر بھی آمادگی ظاہر کی۔ انہوں نے بتایا کہ پیوٹن نے خود ان سے رابطہ کیا تھا۔

ٹرمپ نے بتایا کہ "وہ تیار ہیں۔ انہوں نے مجھے اس بارے میں فون کیا۔ ہماری طویل بات چیت ہوئی،"۔

یہ بیان ایسے وقت میں سامنے آیا ہے جب مشرقِ وسطیٰ میں کشیدگی بڑھ رہی ہے، اور عالمی برادری کی نظریں ممکنہ سفارتی حل پر مرکوز ہیں۔

ایران نےاسرائیل پر بیلسٹک میزائل داغ دیے، بڑی تباہی

ویب ڈیسک:ایران نے دارالحکومت تہران پر حملے کے جواب میں اسرائیل پر بیلسٹک میزائل داغ دیے۔

ایران کی جانب سے میزائل فائر کرنے پر شمالی اور وسطی اسرائیل میں سائرن بج اٹھے۔ اسرائیلی فوج نے شہریوں کو شیلٹرز میں جانے کی ہدایت کردی ہے۔

ایرانی میڈیا کا کہنا ہے کہ البرز صوبے میں موساد کے 2 ایجنٹ گرفتار کرلئے گئے، ایرانی بارڈر گارڈز نے 44 اسرائیلی ڈرونز مار گرائے۔

اسرائیل نے ایران کے تازہ میزائل حملے کی تصدیق کی، بیلسٹک میزائلوں سے شمالی اسرائیل کو نشانہ بنایا گیا ہے۔

اسرائیلی فوج نے کہا ہے کہ ایران کے میزائل حملے کے بعد تل ابیب اور مقبوضہ بیت المقدس میں خطرے کے سائرن بجنے لگے ہیں۔

اسرائیلی فوج نے ایران کے میزائلوں سے بچنے کے لیے اپنے شہریوں کو شیلٹرز میں جانے کی ہدایت کی ہے، اسرائیلی فضائی دفاعی نظام جدید ترین ایرانی میزائل روکنے کیلئے کام کر رہا ہے۔

اُدھر اسرائیلی حکومت نے 30 جون تک ملک میں ایمرجنسی کا نفاذ بڑھا دیا ہے۔

دوسری جانب کچھ دیر قبل اسرائیل نے ایران کے دارالحکومت تہران میں مختلف اہداف کو نشانہ بنایا۔

اسرائیلی فوج کے مطابق 50 جہازوں کےذریعے 170 ایرانی ملٹری اہداف کو نشانہ بنایا گیا جبکہ تہران میں پاسداران انقلاب اور ایرانی دفاعی نظام سےمنسلک اہداف کو بھی نشانہ بنایا جارہا ہے۔

خبررساں ایجنسی کے مطابق تہران کے وسطی علاقےمیں ایرانی پارلیمنٹ کی عمارت کے قریب دھماکوں کے بعد آگ لگ گئی جبکہ تہران کی شاہراہ طالقانی اور ولی عصر میدان کے قریب علاقوں میں دھماکےہوئے۔

تہران میں پولیس ہیڈ کوارٹر پراسرائیلی ڈرون حملے میں متعدد افراد زخمی ہوئے، تہران پر اسرائیلی حملوں کے بعد ایرانی صدر مسعود پزشکیان نے کہا ہے کہ اسرائیل کے حملے جاری رہے تو جوابی کارروائی انتہائی طاقتور اور فیصلہ کن ہوگی۔

تصاویر: ایرانی حملے کے بعد اسرائیل میں تباہی کے مناظر

(ویب ڈیسک ) ایران کے گزشتہ رات اسرائیل پر  حملوں کے نتیجے میں  تقریبا10 اسرائیلی ہلاک ہوئے جبکہ متعدد زخمی ہیں ۔ 

ایران کے حیفا اور تل ابیب پر حملوں کے بعد کوئی عمارتیں زمین بوس ہوگئیں اور کچھ کو نقصان پہنچا ہے۔

ایران اسرائیل کے خلاف موثر اور فیصلہ کن حملے کرے گا، ایرانی آرمی چیف 

(ویب ڈیسک ) ایرانی آرمی چیف امیر حاتمی کا کہنا ہے کہ ایران اسرائیل کے خلاف موثر اور فیصلہ کن حملے کرے گا۔

ایران کے چیف آف اسٹاف امیر حاتمی نے کہا ہے کہ اسرائیل کے حملے کے پہلے لمحے سے ہی ایرانی فورسز نے مکمل خلوص کے ساتھ ردِعمل دیا ہے۔

انہوں نے مزید کہا کہ "اب سے ایرانی فورسز پوری تیاری کے ساتھ اسرائیل کے خلاف فیصلہ کن اور مؤثر جوابی کارروائیاں کریں گی۔" یہ بیان نیم سرکاری خبر رساں ادارے مہر نیوز ایجنسی نے جاری کیا ہے۔

ایران نے موساد کے 2 جاسوس گرفتار کرلیے

دوسری جانب ایران  نےموساد کے 2کارندوں کو گرفتار کرنے کا دعویٰ کیا ہے۔ ملزمان کو البرز صوبے میں دھماکاخیز مواد اور الیکٹرانک آلات کی تیاری کے دوران گرفتار کیا گیا۔

 اسرائیلی حملوں میں امریکا برابر کا شریک، سنگین نتائج بھگتنے ہوں گے، عباس عراقچی  

ویب ڈیسک: ایران کے وزیر خارجہ عباس عراقچی نے کہا ہے کہ اسرائیل کی جانب سے ایرانی اہداف پر کیے جانے والے حملوں میں امریکا براہِ راست شریک ہے، اور اس کی قیمت چکانی پڑے گی۔

تہران میں پریس کانفرنس کے دوران عباس عراقچی نے کہا کہ ایران نے اسرائیلی حملوں کے جواب میں بین الاقوامی قوانین کے تحت اپنے دفاع میں جوابی کارروائی کی۔ انہوں نے دعویٰ کیا کہ ایران نے اسرائیل کے فوجی اور اقتصادی مراکز کو نشانہ بنایا۔

وزیر خارجہ نے کہا کہ اگرچہ امریکا نے ایک سفارتی پیغام میں خود کو اسرائیلی کارروائی سے لاتعلق قرار دیا ہے، لیکن ایران کے پاس ایسے شواہد موجود ہیں جو ظاہر کرتے ہیں کہ امریکا نے اسرائیل کی ان کارروائیوں کی پشت پناہی کی ہے۔ فارس گیس فیلڈ پر حملے کو عراقچی نے "خطرناک اور اشتعال انگیز" قرار دیا۔

انہوں نے عالمی برادری سے مطالبہ کیا کہ وہ ایران پر جاری اسرائیلی حملوں کی مذمت کرے، اور بین الاقوامی ایٹمی توانائی ایجنسی سے درخواست کی کہ وہ نطنز ری ایکٹر پر اسرائیلی حملے پر باقاعدہ ردعمل دے۔

 ایران کا واضح مؤقف

عباس عراقچی نے کہا کہ ایران جنگ کو دوسرے ممالک تک نہیں پھیلانا چاہتا، تاہم اگر مجبور کیا گیا تو ایران اس حوالے سے اپنے تمام آپشنز پر غور کرے گا۔ ان کے مطابق ایران کسی ایسے معاہدے کا حصہ نہیں بنے گا جو اسے جوہری توانائی کے حق سے محروم کرے۔ انہوں نے مزید کہا کہ یورینیم کی افزودگی 60 فیصد سے زیادہ تک جاری رکھی جائے گی۔

ٹرمپ کا ردعمل

دوسری جانب امریکی صدر ڈونلڈ ٹرمپ نے اپنے سوشل میڈیا پلیٹ فارم ’ٹرتھ سوشل‘ پر واضح کیا ہے کہ اسرائیلی حملوں میں امریکا کا کوئی کردار نہیں۔ تاہم انہوں نے ایران کو متنبہ کیا کہ اگر امریکا پر کسی بھی قسم کا حملہ ہوا تو امریکی افواج اپنی پوری قوت کے ساتھ جواب دیں گی۔

ٹرمپ نے کہا کہ "اگر ایران نے حملے کی غلطی کی تو ہم ایسا ردعمل دیں گے جو دنیا نے پہلے کبھی نہ دیکھا ہو۔"

ایرانی ہائپرسونک میزائلوں نے اسرائیلی دفاعی نظام کو بےبس کر دیا

ویب ڈیسک: ایران نے اتوار کی صبح اسرائیل پر ہائپرسونک میزائل داغے، جن کی رفتار آواز سے کئی گنا زیادہ تھی۔ اس سے قبل تل ابیب پر ایرانی میزائل حملوں کے نتیجے میں کم از کم 8 افراد جاں بحق اور 200 سے زائد زخمی ہو چکے ہیں۔

کیا اسرائیلی دفاعی نظام ان میزائلوں کو روک سکتا ہے؟

ماہرین کا کہنا ہے کہ اسرائیلی دفاعی نظام ہائپرسونک میزائلوں کو روکنے کے لیے ڈیزائن ہی نہیں کیا گیا، یہی وجہ ہے کہ ایران کے حالیہ حملے خاصی حد تک کامیاب رہے۔ تجزیہ کاروں کے مطابق اسرائیل اور ایران کے درمیان موجودہ تصادم نے مستقبل کی جنگی حکمت عملی کا رخ واضح کر دیا ہے، جس پر دفاعی ادارے اور عسکری کالجز برسوں تحقیق کرتے رہیں گے۔

اسرائیلی میزائل ڈیفنس کی پرتیں

اسرائیل کے پاس تین سطحوں پر مشتمل میزائل دفاعی نظام موجود ہے:

آئرن ڈوم (Iron Dome):

قریبی فاصلے سے داغے گئے غیر گائیڈڈ راکٹوں اور چھوٹے ڈرونز کو فضا میں تباہ کرنے کے لیے استعمال کیا جاتا ہے۔ اس کا ہدف عام طور پر حماس اور حزب اللہ کے راکٹ ہوتے ہیں۔

ڈیوڈ سلنگ (David's Sling):

درمیانی فاصلے کے میزائلوں اور ڈرونز کو نشانہ بنانے کے لیے استعمال ہوتا ہے۔ یہ نظام آواز کی رفتار سے کم سپیڈ والے میزائلوں سے نمٹنے کے لیے موزوں ہے۔

ایرو سسٹم (Arrow 1, 2, 3):

طویل فاصلے کے بیلسٹک میزائلوں کو روکنے کے لیے تیار کیا گیا ہے، لیکن اگر بیک وقت کئی میزائل داغے جائیں تو یہ نظام اوورلوڈ ہو کر ناکام ہو سکتا ہے۔

باراک میزائل سسٹم بھی اسی پرت کا حصہ ہے، جو زمین سے فضا میں مار کرنے والے دفاعی میزائل کے طور پر استعمال ہوتا ہے۔

ہائپرسونک میزائل، اسرائیلی دفاع کی کمزوری

ایران کے ہائپرسونک میزائل حملوں کی کامیابی کی بڑی وجہ ان میزائلوں کی رفتار اور پرواز کا انداز ہے۔ یہ آواز سے تقریباً پانچ گنا زیادہ رفتار سے سفر کرتے ہیں اور گلائیڈنگ موشن سے اپنے ہدف تک پہنچتے ہیں، جس سے انہیں دورانِ پرواز ٹریک کرنا نہایت مشکل ہو جاتا ہے۔

امریکی دفاعی مدد بھی ناکافی؟

اسرائیل نے امریکا سے درآمد کیے گئے پیٹریاٹ میزائل سسٹم اور جدید لیزر طیارہ شکن اسلحے کو بھی اپنے دفاع میں شامل کر رکھا ہے، جو فضا میں پرواز کرتے میزائلوں اور ڈرونز کو راستے میں جلا کر تباہ کر سکتا ہے۔ تاہم جب ایک ساتھ کئی ہتھیار حملہ آور ہوں تو یہ نظام صرف کسی ایک ہدف کو بیک وقت نشانہ بنا سکتا ہے، جس سے مؤثر دفاع مزید مشکل ہو جاتا ہے۔

یورپی طاقتوں کی ایران کو جوہری پروگرام پرسنجیدہ مذاکرات کی پیشکش

ویب ڈیسک: جرمنی، فرانس اور برطانیہ نے ایران کو جوہری پروگرام پر فوری اور سنجیدہ مذاکرات کی پیشکش کر دی ہے، تاکہ خطے میں بڑھتی ہوئی کشیدگی کو کم کیا جا سکے۔

جرمن وزیر خارجہ نے کہا کہ مشرق وسطیٰ میں کشیدہ صورتحال کے پیش نظر مذاکرات ناگزیر ہو چکے ہیں۔ ان کا کہنا تھا کہ ایران نے ماضی میں کئی مواقع ضائع کیے، تاہم اب امید کی جا رہی ہے کہ تہران سنجیدہ اور مثبت ردعمل دے گا۔

انہوں نے واضح کیا کہ تینوں یورپی ممالک خطے میں امن و استحکام کے لیے ایران سے کھلی اور براہ راست بات چیت کے لیے تیار ہیں۔

امریکا-ایران مذاکرات کا چھٹا دور منسوخ

ادھر ایران اور امریکا کے درمیان متوقع جوہری مذاکرات کا چھٹا دور منسوخ کر دیا گیا ہے، جس کی تصدیق عمانی وزیر خارجہ نے بھی کر دی ہے۔ ان کے مطابق یہ مذاکرات مسقط میں ہونا تھے، لیکن اب دونوں فریقوں کے درمیان بات چیت کا سلسلہ روک دیا گیا ہے۔

عمانی وزیر خارجہ کا کہنا ہے کہ خطے میں پائیدار امن کا واحد راستہ سفارت کاری اور مذاکرات ہیں، اور عمان اس عمل کی حمایت جاری رکھے گا۔

ایران کا امریکا سے مذاکرات سے انکار

خیال رہے کہ ایران نے پہلے ہی اعلان کر دیا تھا کہ وہ اسرائیل کے حالیہ حملوں کے دوران امریکا سے مذاکرات میں شرکت نہیں کرے گا۔ ترجمان ایرانی وزارت خارجہ نے کہا تھا کہ "ایسے حالات میں جب ایران پر حملے جاری ہیں، امریکا سے بات چیت کا کوئی فائدہ نہیں۔"

مبصرین کے مطابق موجودہ صورتحال میں ایران اور مغرب کے درمیان سفارتی تناؤ مزید بڑھ سکتا ہے، تاہم یورپی ممالک کی مداخلت سے کسی حد تک بہتری کی امید کی جا سکتی ہے۔

ٹرمپ کی ایران کو سخت وارننگ، اسرائیل تنازع پر ثالثی کی پیشکش

ویب ڈیسک: سابق امریکی صدر ڈونلڈ ٹرمپ نے ایران کو امریکی مفادات پر حملے سے باز رہنے کا انتباہ جاری کرتے ہوئے، ایران اور اسرائیل کے درمیان جاری کشیدگی پر ثالثی کی پیشکش بھی کر دی ہے۔

ٹرمپ نے اپنے سوشل میڈیا پلیٹ فارم "ٹروتھ سوشل" پر بیان دیتے ہوئے کہا کہ امریکا کا حالیہ ایران پر ہونے والے حملے سے کوئی تعلق نہیں، اور ایران کو خبردار کیا کہ امریکی تنصیبات پر کسی بھی قسم کا حملہ ناقابلِ برداشت ہوگا۔

انہوں نے واضح کیا "اگر امریکا پر حملہ ہوا، تو ہماری مسلح افواج پوری طاقت سے ایسے جواب دیں گی، جو پہلے کبھی نہیں دیکھا گیا۔"

ٹرمپ نے کہا کہ امریکا ایران اور اسرائیل کے درمیان ایک معاہدہ کرانے کی مکمل صلاحیت رکھتا ہے اور یہ تنازع ختم ہو سکتا ہے، اگر فریقین سنجیدگی دکھائیں۔

سالگرہ پر فوجی پریڈ اور طاقت کا اظہار

اسی روز ڈونلڈ ٹرمپ نے اپنی 79ویں سالگرہ کے موقع پر امریکا کی حالیہ دہائیوں کی سب سے بڑی فوجی پریڈ کی میزبانی کی۔ اس پریڈ میں ٹینک، جنگی طیارے اور مسلح افواج کے دستے شریک ہوئے۔ تقریب امریکی فوج کے 250ویں یومِ تاسیس کے موقع پر واشنگٹن میں منعقد کی گئی۔

خطاب کے دوران ٹرمپ نے کہا "جو قوتیں امریکا کو چیلنج کریں گی، انہیں مکمل اور قطعی شکست کا سامنا کرنا پڑے گا۔"

انہوں نے مزید کہا کہ امریکی فوج "لڑتی ہے اور فتح حاصل کرتی ہے"۔

امریکا کی دوغلی پالیسی پر سوالات

موجودہ صورتحال میں امریکا اور اس کے اتحادیوں کی پالیسیوں پر عالمی سطح پر تنقید بھی کی جا رہی ہے۔ تجزیہ کاروں کے مطابق، ایک طرف امریکا، برطانیہ اور فرانس اسرائیل کی کھل کر حمایت کر رہے ہیں، دفاعی نظام فراہم کر رہے ہیں، جبکہ دوسری جانب ایران کو معاہدہ نہ کرنے پر دھمکیاں بھی دی جا رہی ہیں اور تنازع کی ذمہ داری بھی اسی پر ڈالی جا رہی ہے۔

اسرائیل کے کروز میزائل حملے: تہران، بندرعباس سمیت اہم ایرانی تنصیبات نشانہ

ویب ڈیسک: اسرائیل نے ایران کے دارالحکومت تہران اور بندرگاہی شہر بندر عباس سمیت مختلف علاقوں کو کروز میزائلوں سے نشانہ بنایا ہے، جس کے بعد ایرانی فضائی دفاعی نظام متحرک ہو گیا۔

بین الاقوامی ذرائع ابلاغ کے مطابق، تازہ ترین حملے میں اسرائیلی میزائلوں نے تہران سمیت متعدد شہروں کو نشانہ بنایا۔ ایرانی خبر رساں ایجنسی کے مطابق، حملے کا ایک ہدف وزارتِ دفاع کا مرکزی دفتر بھی تھا۔

رپورٹس کے مطابق اسرائیل نے شاہران آئل ڈپو پر حملہ کیا، جبکہ قدرتی گیس کی دو تنصیبات کو بھی نشانہ بنایا گیا، جس کے باعث ان علاقوں میں شدید نقصان کی اطلاعات ہیں۔

ادھر اسرائیلی وزیر اعظم بنیامین نیتن یاہو نے اپنے تازہ بیان میں کہا ہے کہ "آیت اللہ کی حکومت جہاں بھی ہو، اسے نشانہ بنایا جائے گا۔ ایران پر حملے جاری رہیں گے۔"

ایران کی جانب سے تاحال ان حملوں کے نقصانات کی تفصیلات جاری نہیں کی گئیں، تاہم خطے میں کشیدگی مزید بڑھنے کا خدشہ ظاہر کیا جا رہا ہے۔

آیت اللہ خامنہ ای پر حملے کا امکان مسترد نہیں کیا جا سکتا، اسرائیلی حکام

ویب ڈیسک: اسرائیلی حکام نے عندیہ دیا ہے کہ ایران کے سپریم لیڈر آیت اللہ علی خامنہ ای پر حملے کا امکان مسترد نہیں کیا جا سکتا۔

غیر ملکی میڈیا کے مطابق اسرائیلی حکام نے کہا ہے کہ موجودہ حالات میں ایران کی اعلیٰ قیادت، خاص طور پر سپریم لیڈر خامنہ ای، کو نشانہ بنائے جانے کا امکان موجود ہے۔

اسرائیلی فوج کے ترجمان ایفی ڈیفرین سے جب یہ سوال کیا گیا کہ آیا اسرائیل ایرانی سپریم لیڈر کو قتل کرنے کی منصوبہ بندی کر رہا ہے، تو انہوں نے جواب دینے سے گریز کرتے ہوئے کہا کہ وہ اس حوالے سے کوئی وضاحت نہیں کریں گے کہ آیا آیت اللہ خامنہ ای اسرائیل کا براہِ راست ہدف ہیں یا نہیں۔

یہ بات قابلِ ذکر ہے کہ اسرائیل ماضی میں فلسطینی تنظیم حماس کے رہنما اسماعیل ہنیہ اور حزب اللہ کے سربراہ حسن نصراللہ جیسے اہم افراد کو نشانہ بنانے کی کوششیں کر چکا ہے۔

مزید برآں، حالیہ دنوں میں ایران پر ہونے والے حملوں میں اسرائیلی فورسز نے ایرانی فوج کے سربراہ، پاسداران انقلاب کے سینیئر کمانڈرز اور جوہری پروگرام سے وابستہ سائنسدانوں کو بھی نشانہ بنایا تھا۔

ایران اسرائیل کشیدگی: 48 گھنٹوں میں دنیا بھر کی 6 ہزار پروازیں منسوخ

ویب ڈیسک: ایران اور اسرائیل کے درمیان جاری جنگی صورت حال نے عالمی فضائی نقل و حمل کو شدید متاثر کیا ہے، اور صرف دو دنوں میں دنیا بھر میں چھ ہزار پروازیں منسوخ ہو چکی ہیں۔

 ایوی ایشن ذرائع کے مطابق تنازع کے بعد سب سے زیادہ اثر اسرائیل کے تل ابیب بین گوریان ایئرپورٹ پر پڑا ہے، جبکہ خطے کے دیگر بڑے ہوائی اڈے جیسے دمشق، بغداد، تہران، بیروت اور اردن کا امان کوئین عالیہ ایئرپورٹ بھی جزوی یا مکمل طور پر بند ہیں۔

ذرائع کا کہنا ہے کہ اسرائیل، ایران اور عراق کی فضائی حدود مکمل طور پر بند ہیں، جبکہ اردن، لبنان اور شام کی فضائی حدود سے محدود پروازوں کو پیشگی اجازت کے ساتھ گزرنے کی اجازت دی جا رہی ہے۔

اعداد و شمار کے مطابق تل ابیب ایئرپورٹ سے 44 ممالک کے لیے روزانہ 100 ایئرپورٹس کی پروازیں روانہ ہوتی ہیں۔

عمان ایئرپورٹ سے 81 ایئرپورٹس کے لیے 40 ممالک کی پروازیں جاتی ہیں۔

دمشق ایئرپورٹ 13 ممالک کے 20 ایئرپورٹس سے منسلک ہے۔

بغداد ایئرپورٹ سے 18 ممالک کے لیے 32 پروازیں چلتی ہیں۔

تہران ایئرپورٹ سے 23 ممالک کے 51 ایئرپورٹس پر پروازیں جاتی ہیں۔

بیروت ایئرپورٹ سے 26 ممالک کے 49 ایئرپورٹس کو سروس فراہم کی جاتی ہے۔

فلائٹ ریڈار 24 کے ڈیٹا کے مطابق، ان ہوائی اڈوں سے یومیہ تقریباً 3 ہزار پروازیں منسوخ ہو رہی ہیں، جب کہ متعدد پروازیں تاخیر یا راستہ تبدیل ہونے کی وجہ سے شدید متاثر ہوئی ہیں۔